Ke ka Ditsela Dife Bahlanka ba Modimo ba Swanago le Dihlare?

GE A bolela mabapi le motho yo a thabelago melao ya motheo ya Beibele gotee le go e diriša bophelong bja gagwe, mopsalme o re: “[O] swana le sehlare-se-šingwa-nokeng ya meetse, sa xo enywa dienywa lebaka la xôna, sa xo se pône matlakala; ’me tšohle tše a di diraxo di a lêtlêxa.” (Psalme 1:1-3) Ke ka baka la’ng papišo ye e le e swanetšego?

Dihlare di ka phela nako e telele kudu. Ka mohlala, go bolelwa gore dihlare tše dingwe tša mohlware tša kua tikologong ya Mediterranean di na le nywaga e sekete go ya go e dikete tše pedi. Ka mo go swanago, dihlare tša baobab tša kua bogareng bja Afrika di phela ka nywaga e mentši, gomme go dumelwa gore mophaene wa bristlecone wa kua California o na le nywaga e ka bago 4 600. Kua sethokgweng, dihlare tšeo di godilego ka mo go feletšego gantši di ba le mohola ditikologong tša tšona. Ka mohlala, dihlare tše ditelele di nea mahlogedi moriti wo o šireletšago, gomme matlakala ao a wago dihlareng a nontšha mmu wo o lego ka tlase ga tšona.

Dihlare tše ditelele kudu lefaseng gantši di hwetšwa di gola gotee kua dithokgweng, moo dihlare di thekganago. Ka ge medu ya tšona e ka ba e logagane, dihlare tše mmalwa e le sehlopha di ka lwantšha ledimo gakaone kudu go feta sehlare seo se emego se nnoši mafulong. Tshepedišo e kgolo ya medu gape e dira gore sehlare se kgone go hwetša meetse a lekanego le dijo go tšwa mmung. Maemong a mangwe, medu e ka tsenelela kudu ka tlase ga mmu go feta botelele bja sehlare ka bosona, goba medu e ka nabela ka thoko kudu go feta sehlare ka bosona.

Moapostola Paulo a ka ba a ile a šupa go sehlare ka go se lebanye ge a be a hlalosa gore Bakriste ba swanetše go ‘swara ka tsela e le ba Kriste, gomme e be ba ba tsemilego medu, ba ba agilwego godimo ga gagwe le ba ba tiilego tumelong.’ (Ba-Kolose 2:6, 7) Ka kgonthe, Bakriste ba ka tia tumelong ya bona ge feela ba tsemile medu ka go tia go Kriste.—1 Petro 2:21.

Ke ka ditsela dife tše dingwe bahlanka ba Modimo ba swantšhwago le dihlare? Ge e le gabotse, go etša ge dihlare tšeo di lego sethokgweng di hwetša thekgo go dihlare tše di lego kgaufsi, ka go rialo bohle bao ba dulago ba le kgaufsi le phuthego ya Bokriste ba amogela thekgo go tšwa go badumedi-gotee le bona. (Ba-Galatia 6:2) Bakriste ba botegago le bao ba godilego ka tsebo, bao ba nago le medu e tseneletšego ya moya ba thuša bao e sa tšwago go ba badumedi go dula ba tiile tumelong gaešita le ge ba lebeletšane le kganetšo e swanago le ledimo. (Ba-Roma 1:11, 12) Bao e sa tšwago go ba Bakriste ba ka gola gabotse ka tlase ga “moriti” wo o šireletšago wa bahlanka ba Modimo bao ba nago le phihlelo e ntši. (Ba-Roma 15:1) Le gona ditho ka moka tša phuthego ya Bokriste ya lefase ka bophara di holwa ke dijo tšeo di matlafatšago tša moya tšeo di newago ke “mere-ya-tokô,” e lego mašaledi ao a tloditšwego.—Jesaya 61:3.

Ke mo go kgahlišago gakaakang gore bahlanka ba Modimo ka moka ba na le tebelelo ya go thabela go phethagatšwa ga kholofetšo yeo e hwetšwago go Jesaya 65:22, yeo e rego: “Matšatši a batho ba-ka a tlo lekana le matšatši a sehlare.”

[Caption on page 28]

Godo-Foto