“Molaki E A Bôtêxaxo” O Atlega Tlhahlobong!

“Lebaka la xore kahlolô e thômê ka Ngwakô wa Modimo le fihlile.”—1 Petro 4:17.

1. Jesu o ile a hwetša’ng ge a be a hlahloba “molaki”?

KA Pentekoste ya 33 C.E., Jesu o ile a kgetha “mohlanka” gore a nee dijo ka lebaka la gona bakeng sa “bahlanka” ba gagwe. Ka 1914, Jesu o ile a bewa sedulong sa bogoši e le Kgoši, gomme go se go ye kae e be e le nako ya go hlahloba “molaki” yoo. O ile a hwetša gore bontši bja ditho tša “molaki” di itlhatsetše e le tše di ‘botegago le tše bohlale.’ Ka baka leo, o ile a mmea go “laka dilô tša xaxwe ka moka.” (Mateo 24:45-47) Lega go le bjalo, go be go bile go e-na le molaki yo mobe, yo a bego a sa botege e bile a se bohlale.

‘Molaki Yoo yo Mobe’

2, 3. ‘Molaki yoo yo mobe’ o tšwile kae, gomme go tlile bjang gore a be gona?

² Jesu o ile a bolela ka molaki yo mobe gatee-tee ka morago ga go ahla-ahla “molaki e a bôtêxaxo yo bohlale.” O itše: “Molaki xe a ka ba e mobe, ’me pelong ya xaxwe a re: Mong wa-ka ó sa ile! ’Me a thôma xo itia ba e lexo bahlanka ka yêna, á e-ja, à e-nwa le mataxwa, Molaki eo ó tlo thšoxa mong wa xaxwe à fihlile, à e-tla ka lebaka le a sa le tsebexo. ’Me mong wa xaxwe ó tlo mo kxabutla, a mo dira se se loketšexo baikaketši, ya tlo ba dillô le ditsikitlanô tša mênô.” (Mateo 24:48-51) Polelwana e rego ‘molaki yoo yo mobe’ e gogela tlhokomelo ya rena mantšung a Jesu ao a a boletšego pejana a mabapi le molaki yo a botegago yo bohlale. Ee, ‘molaki yo mobe’ o tšwile gare ga molaki yo a botegago. * Bjang?

³ Pele ga 1914, ditho tše dintši tša sehlopha sa molaki yo a botegago di be di fagahletše go gahlana le Monyadi legodimong ngwageng woo, eupša seo di bego di se fagahletše ga se sa ka sa direga. Ka baka la se le ditiragalo tše dingwe, ba bantši ba ile ba nyama gomme ba sego kae ba befelwa. Ba bangwe ba ba ba ile ba “itia” bao e bego e le bana babo bona ka mantšu le go gwerana le “mataxwa,” e lego dihlopha tša bodumedi tša Bojakane.—Jesaya 28:1-3; 32:6.

4. Jesu o ile a swaragana bjang le ‘molaki yo mobe’ gotee le bohle bao ba bontšhitšego moya o swanago?

⁴ Bao e bego e le Bakriste ba ile ba tsebja e le ‘molaki yo mobe,’ gomme Jesu o ile a ba “kxabutla.” Bjang? O ile a ba lahla gomme ba ile ba lahlegelwa ke kholofelo ya bona ya go phela legodimong. Lega go le bjalo, ga se ba ka ba fedišwa gatee-tee. Sa pele ba ile ba swanela ke go kgotlelela nako ya dillo le ditsikitlano tša meno “lefsifsing la ntlê-ntlê” ga phuthego ya Bokriste. (Mateo 8:12) Ga e sa le go tloga nakong yeo ya pele, batlotšwa ba bangwe gape ba sego kae ba bontšhitše moya o swanago o mobe, ba ipontšha e le ba ‘molaki yo mobe.’ Ba bangwe ba “dinku tše dingwê” ba ile ba ekiša go se botege ga bona. (Johane 10:16) Manaba ka moka a bjalo a Kriste a feleletša a le “lefsifsing la ntlê-ntlê” leo le swanago.

5. Molaki yo a botegago yo bohlale o ile a arabela bjang, ka go se swane le ‘molaki yo mobe?’

⁵ Lega go le bjalo, molaki yo a botegago yo bohlale o ile a lebeletšana le diteko tše di swanago le tša ‘molaki yoo yo mobe.’ Lega go le bjalo, go e na le gore ba befelwe, ba ile ba phošollwa. (2 Ba-Korinthe 13:11) Lerato la bona la go rata Jehofa le bana babo bona le ile la matlafatšwa. Ka baka leo, ba be ba dutše e le “kôkwanê le mothêô wa therešô” mo ‘mehleng ye ya bofelo’ yeo e hlaka-hlakanego.—1 Timotheo 3:15; 2 Timotheo 3:1.

 Dikgarebe tše Bohlale le tša Ditlaela

6. (a) Jesu o ile a bontšha bjang bohlale bja sehlopha sa gagwe sa molaki yo a botegago? (b) Ke molaetša ofe woo Bakriste ba ba tloditšwego ba bego ba o tsebatša pele ga 1914?

⁶ Ka morago ga go bolela ka ‘molaki yoo yo mobe,’ Jesu o boletše diswantšho tše pedi bakeng sa go bontšha lebaka leo ka lona ba bangwe ba Bakriste ba tloditšwego ba tlago go itlhatsela e le ba botegago le ba bohlale mola ba bangwe ba ka se be bjalo. * Bakeng sa go hlalosa seka sa bohlale ka go diriša seswantšho, o itše: “Mmušô wa maxodimo o tlo swana le dikxarebe tše lesome, tše di tšerexo mabônê a tšôna, tša tšwêla xo xahlanetša monyadi. Tše thlano tša tšôna e be e le tše bohlale, tše thlano è le ditlaêla. Tše e lexo ditlaêla, xe di tšea mabônê a tšôna, xa tša ka tša tšea le makhura. Tše bohlale tša swara makhura ka dibyana xotee le mabônê.” (Mateo 25:1-4) Dikgarebe tše lesome di re gopotša ka Bakriste ba tloditšwego pele ga 1914. Ba be ba baleletše gore monyadi e lego Jesu Kriste, o be a le kgaufsi le go tšwelela. Ka baka leo, ba ile ba ‘tšwela ka ntle’ go yo mo gahlanetša, ba bolela ka sebete gore “mabaka a ba-ntlê” a tla fela ka 1914.—Luka 21:24.

7. Ge re bolela ka tsela ya seswantšhetšo, Bakriste ba tloditšwego ba ile ba ya ‘go robala’ neng le gona ka baka la’ng?

⁷ Ba be ba nepile. Mabaka a ba-ntle a ile a fela ka 1914, gomme Mmušo wa Modimo ka tlase ga Kriste Jesu o ile wa thoma go buša. Eupša seo se diragetše magodimong a sa bonagalego. Batho mo lefaseng ba ile ba thoma go tlaišwa ke “madi-mabe” ao a bego a boletšwe e sa le pele. (Kutollo 12:10, 12) Nako ya go hlahlobja e ile ya latela. Ka ge ba be ba sa kwešiše dilo gabotse, Bakriste ba tloditšwego ba be ba nagana gore ‘monyadi o be a diega.’ Ba gakanegile e bile ba lebeletšane le bonaba lefaseng, ka kakaretšo ba ile ba nyefiša gomme ba nyaka ba kgaotša modiro o rulagantšwego wa boboledi bja phatlalatša. Ka go swana le dikgarebe tša seswantšhong, ge re bolela ka tsela ya moya ba ile ba “ôtsêla ba rôbala,” go swana le ge bao ba ipolelago gore ke Bakriste bao ba sa botegego ba ile ba dira ka morago ga ge baapostola ba Jesu ba hwile.—Mateo 25:5; Kutollo 11:7, 8; 12:17.

8. Ke’ng seo se ilego sa lebiša kgoeletšong e rego: “Šoowe, monyadi ó e tla!” gomme e be e le nako ya gore Bakriste ba tloditšwego ba dire’ng?

⁸ Ke moka ka 1919 go ile gwa direga selo seo se bego se sa letelwa. Re bala gore: “Mašexoxare xwa hlabya mokxoši wa xo re: Šoowe, monyadi ó e tla, tšwêlang xo mo xahlanetša! Dikxarebe tšeo ka moka tša tsoxa, tša lokiša mabônê a tšôna.” (Mateo 25:6, 7) Ka yona nako yeo go bego go bonagala go se na kholofelo, go ile gwa ba le pitšo ya gore go tsenwe modirong! Ka 1918, Jesu e lego “motseta wa kxwêranô,” o ile a tla tempeleng ya Jehofa ya moya bakeng sa go tlo hlahloba le go hlwekiša phuthego ya Modimo. (Maleaki 3:1) Ga bjale, Bakriste ba tloditšwego ba be ba swanetše go tšwa ba yo mo gahlanetša malapeng a lefaseng a tempele yeo. E be e le nako ya gore ba ‘hlabiše seetša.’—Jesaya 60:1; Ba-Filipi 2:14, 15.

9, 10. Ke ka baka la’ng ka 1919 Bakriste ba bangwe ba be ba le “bohlale” gomme ba bangwe e le “ditlaêla”?

⁹ Eupša ema go se nene! Seswantšhong se, tše dingwe tša dikgarebe di be di e-na le bothata. Jesu o ile a tšwela pele ka gore: “Tša ditlaêla tša kxopêla tše bohlale tša re: Re topeletšeng makhura a lena, xobane mabônê a rena a a tima.” (Mateo 25:8) Mabone a be a ka se bonege ntle le makhura. Ka gona makhura a mabone a re gopotša ka Lentšu la Modimo la therešo le moya wa gagwe o mokgethwa, tšeo di matlafaletšago barapedi ba therešo go ba barwadi  ba seetša. (Psalme 119:130; Daniele 5:14) Pele ga 1919, Bakriste bao ba tloditšwego ba bohlale ba ile ba nyaka ka phišego gore ba kwešiše thato ya Modimo bakeng sa bona, go sa šetšwe boemo bja bona bja go fokola ka nakwana. Ke ka baka leo ba bego ba itokišitše ge go be go tšwelela kgoeletšo ya gore ba hlabiše seetša.—2 Timotheo 4:2; Ba-Hebere 10:24, 25.

¹⁰ Lega go le bjalo, batlotšwa ba itšego ba be ba sa itokišetša go ikgafa goba go dira boiteko bja motho ka noši—gaešita le ge ba be ba kganyoga e le ka kgonthe go ba le Monyadi. Ka gona ge e be e le nako ya gore ba be mafolofolo go boleleng ditaba tše dibotse, ba be ba sa itokišetša. (Mateo 24:14) Ba ile ba ba ba leka go fetša bagwera ba bona ba fišegago matla, ge e le gabotse ba ba kgopela a mangwe a makhura a bona. Seswantšhong sa Jesu, dikgarebe tše bohlale di ile tša arabela bjang? Di itše: “Aowaa! Re ka tlo hlaêlêlwa bohle, rena le lena. Xo kaone xe Le e-ya xo barekiši la ithêkêla.” (Mateo 25:9) Ka mo go swanago, ka 1919 Bakriste ba tloditšwego bao ba botegago ka go se kwanantšhe ba ile ba gana go dira selo le ge e le sefe seo se tla ba fetšago matla a go rwala seetša. Ka go rialo, ba ile ba atlega tlhahlobong.

11. Go ile gwa direga’ng ka dikgarebe tša ditlaela?

¹¹ Jesu o phetha ka gore: “Ya re bà [dikgarebe tša ditlaela] sa ile, monyadi a fihla. Xomme ba ba itokišitšexo ba ya le yêna monyanyeng; ’me mojakô wa tswalêlwa. Ka moraxo xwa fihla le dikxarebe tšela tše dingwê, tša re: Morêna! Morêna! Re bulêlê! Yêna a fetola a re: Ruri, ke a Le botša, xa ke Le tsebe.” (Mateo 25:10-12) Ee, ba bangwe ba be ba sa itokišeletša go fihla ga Monyadi. Ka go rialo, ba ile ba se atlege tlhahlobong gomme ba lahlegelwa ke sebaka sa go ba gona monyanyeng wa lenyalo wa legodimong. Ke mo go nyamišago gakaakang!

Seswantšho sa Ditalente

12. (a) Jesu o ile a diriša’ng bakeng sa go bontšha potego? (b) Monna yo a ilego a “êta” ke mang?

¹² Ka morago ga go hlalosa seka sa bohlale ka go diriša seswantšho, Jesu o ile a tšwela pele a hlalosa seka sa potego ka go diriša seswantšho. O itše: “Di swana le tša motho e a rexo ke a êta, a bitša bahlanka ba xaxwe, a ba xafêla mahumô a xaxwe. A nea e mongwê dikete tše thlano; e mongwê a mo nea tše pedi; e mongwê a mo nea se tee; e mongwê le e mongwê a ba lekanyetša matla a bôná; a tseb’o wêla tsela.” (Mateo 25:14, 15) Monna yo go bolelwago ka yena mo seswantšhong ke Jesu ka boyena, yo a ilego a “êta” ge a be a rotogela legodimong ka ngwaga wa 33 C.E. Eupša pele ga thotogelo ya gagwe, Jesu o ile a neela barutiwa ba gagwe ba botegago “dilo tša xaxwe.” Bjang?

13. Jesu o ile a lokišeletša bjang tšhemo e kgolo ya modiro gomme a laela “bahlanka” ba gagwe go dira kgwebo?

¹³ Nakong ya bodiredi bja gagwe bja lefaseng, Jesu o ile a thoma go lokiša tšhemo e kgolo ya modiro ka go bolela ditaba tše dibotse tša Mmušo nageng ka moka ya Isiraele. (Mateo 9:35-38) Pele ga ge a ka “êta,” o ile a neela tšhemo yeo go barutiwa ba gagwe ba botegago, a re: “Ké xôna yang Le dirê dithšaba ka moka barutiwa, ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna.” (Mateo 28:18-20) Ka mantšu a, Jesu o ile a laela “bahlanka” ba gagwe go dira kgwebo go fihlela maboong a gagwe, “e mongwê le e mongwê  a ba lekanyetša matla a bôná.”

14. Ke ka baka la’ng bohle ba be ba sa letelwa go dira tekanyo e lekanago ya kgwebo?

¹⁴ Polelwana yeo e bontšha gore ga se Bakriste ka moka ba lekgolong la pele la nywaga bao ba bego ba e-na le maemo a swanago. Ba bangwe, ka go swana le Paulo le Timotheo ba be ba lokologile go ka tšea karolo ka mo go tletšego kamoo ba ka kgonago ka gona modirong wa boboledi le wa go ruta. Maemo a ba bangwe a ka ba a ile a lekanyetša kudu tokologo ya bona ya go dira dilo. Ka mohlala, Bakriste ba bangwe e be e le makgoba gomme ba bangwe ba be ba babja, ba godile goba ba e-na le boikarabelo bja lapa. Ke therešo gore ditokelo tše itšego tša ka phuthegong di be di sa hwetšwe ke barutiwa ka moka. Basadi ba tloditšwego le banna ba bangwe ba tloditšwego ga se ba ka ba ruta ka phuthegong. (1 Ba-Korinthe 14:34; 1 Timotheo 3:1; Jakobo 3:1) Lega go le bjalo, go sa šetšwe maemo a bona a motho ka noši, barutiwa ka moka ba ba tloditšwego ba Kriste—banna le basadi—ba be ba abetšwe go tšea karolo kgwebong, ba diriša gabotse dibaka tša bona le maemo bodireding bja Bokriste. Badirišani-gotee le bona ba mehleng yeno ba dira se se swanago.

Nako ya go Hlahlobja e a Thoma!

15, 16. (a) Nako ya go gopola tšhelete e bile neng? (b) Ke dibaka dife tše difsa tša go ‘dira kgwebo’ tšeo di ilego tša newa bao ba botegago?

¹⁵ Seswantšho se tšwela pele ka gore: “Xe xo fetile lebaka le letelele morêna wa bahlanka bao a xôrôxa, ’me a xopola thšêlêtê ya xaxwe le bôná.” (Mateo 25:19) Ka 1914—ka ntle le pelaelo nako e telele ka morago ga 33 C.E.—Kriste Jesu o ile a thoma nako ya go ba gona ga gagwe e le kgoši. Nywaga e meraro le seripa ka morago, ka 1918, o ile a tla tempeleng ya Modimo ya moya gomme a phethagatša mantšu a Petro a rego: “Lebaka la xore kahlolô e thômê ka Ngwakô wa Modimo le fihlile.” (1 Petro 4:17; Maleaki 3:1) E be e le nako ya go gopola tšhelete.

¹⁶ Bahlanka e lego bana babo Jesu ba tloditšwego, ba be ba dirile’ng ka “mahumô” a Kgoši? Go tloga ka 33 C.E. go ya pele, go akaretša le  nywaga e lebišago go 1914, ba bantši ba be ba dutše ba šoma ka thata “kgwebong” ya Jesu. (Mateo 25:16, NW) Gaešita le nakong ya ntwa ya pele ya lefase, ba ile ba bontšha kganyogo e matla ya go hlankela Mong wa bona. Ga bjale e be e le mo go swanetšego go nea babotegi dibaka tše difsa tša ‘go dira kgwebo.’ Nako ya bofelo bja tshepedišo ye ya dilo e be e fihlile. Ditaba tše dibotse di be di swanetše go bolelwa lefaseng ka bophara. “Mabêlê a lefase” a be a swanetše go bunwa. (Kutollo 14:6, 7, 14-16) Ditho tša mafelelo tša sehlopha sa mabele di be di swanetše go hwetšwa gomme “lešaba le lexolo” la dinku tše dingwe le kgoboketšwe.—Kutollo 7:9; Mateo 13:24-30.

17. Bakriste ba tloditšwego bao ba botegago ba ile ba ‘tsena bjang lethabong la mong wa bona’?

¹⁷ Nako ya puno ke nako ya lethabo. (Psalme 126:6) Ka gona, ke mo go swanetšego gore ka 1919 ge Jesu a be a nea bana babo ba botegago boikarabelo bjo bo oketšegilego, o itše: “O mpotexetše ka tše nnyane; tlaa O bê molaki wa tše ntši. Tsêna thabong ya mong wa xaxo.” (Mateo 25:21, 23, mongwalo o sekamego ke wa rena.) Go feta moo, lethabo la Mong e le Kgoši e sa tšwago go bewa sedulong ya Mmušo wa Modimo ke leo re ka se kgonego go le nagana. (Psalme 45:1, 2, 6, 7) Sehlopha sa molaki yo a botegago se hwetša lethabo leo ka go emela Kgoši go oketšeng dikgahlego tša gagwe mo lefaseng. (2 Ba-Korinthe 5:20) Lethabo la sona le bonwa mantšung a boporofeta a Jesaya 61:10 ao a rego: “A nke ke thabêlê Morêna; môya wa-ka a o hlalalêlê Yêna Modimo wa-ka. Ó nkapešitše diaparô tša phološô.”

18. Ke ka baka la’ng ba bangwe ba ile ba se atlege tlhahlobong, gomme ka mafelelo afe?

¹⁸ Ka manyami, ba bangwe ga se ba atlega tlhahlobong. Re bala gore: “Yola wa xo fiwa sekete se tee a batamela a re: Morêna, ke Xo tsebile xe O le motho e mothata; O buna mo O sa kaxo wa byala, ’me O kxobêla mo O sa kaxo wa olotša. Ka xo boifa tšeo ka ya ka fíhla sekete sa xaxo mobúng. Dilô tša xaxo ši-di!” (Mateo 25:24, 25) Ka mo go swanago, Bakriste ba bangwe ba tloditšwego ba be ba sa tšea karolo ‘kgwebong.’ Pele ga 1914 ba be ba sa tšea karolo ka mafolofolo go boledišaneng le ba bangwe ka kholofelo ya bona, gomme ga se ba ka ba nyaka go thoma ka 1919. Jesu o ile a arabela bjang merebeng ya bona? O ile a ba tšeela ditokelo tša bona ka moka. Ba ile ba ‘kgoromeletšwa lefsifsing la ntle-ntle, moo dillo tša bona le ditsikitlano tša meno di bego di tla ba gona.’—Mateo 25:28, 30.

Tlhahlobo e Tšwela Pele

19. Mogato wa tlhahlobo o tšwela pele ka tsela efe, gomme Bakriste ka moka ba tloditšwego ba ikemišeditše go dira’ng?

¹⁹ Ke therešo gore bontši bja bao e bego e tla ba bahlanka ba tloditšwego ba Kriste nakong ya bofelo ba be ba se ba tšwa ba hlankela Jehofa ge Jesu a be a thoma go hlahloba ga gagwe ka 1918. Na ba ile ba lahlegelwa ke sebaka sa tlhahlobo? Le gatee-tee! Mogato wa tlhahlobo o thomile ka 1918/19, ge molaki yo a botegago yo bohlale e le sehlopha a be a atlega tlhahlobong. Bakriste ba tloditšwego ka o tee ka o tee ba tšwela pele go hlahlobja go fihlela go swaiwa ga bona go dirilwe ga sa ruri. (Kutollo 7:1-3) Ka go lemoga se, bana babo Kriste ba ba tloditšwego ba ikemišeditše go tšwela pele ba ‘dira kgwebo’ ka potego. Ba ikemišeditše go ba bohlale, ba boloka makhura a mantši e le gore seetša se bonege ka mo go phadimago. Ba a tseba gore ge yo mongwe le yo mongwe a fihla mafelelong a tsela ya gagwe ya bophelo ka potego, Jesu o tla mo amogela madulong a legodimong. —Mateo 24:13; Johane 14:2-4; 1 Ba-Korinthe 15:50, 51.

20. (a) Dinku tše dingwe di ikemišeditše go dira’ng lehono? (b) Bakriste ba tloditšwego ba lemoga’ng?

²⁰ Lešaba le legolo la dinku tše dingwe le ekišitše bana babo lona bao ba tloditšwego. Le lemoga gore tsebo ya lona ka merero ya Modimo e tliša boikarabelo bjo bogolo. (Hesekiele 3:17-21) Ka baka leo, ka thušo ya Lentšu la Jehofa le ka moya o mokgethwa, le lona le tšea makhura a lona ka bontši ka go ithuta le ka diboka tša Bokriste. Le gona le dira gore seetša sa lona se bonege, le tšea karolo modirong wa go bolela le wa go ruta gomme ka go rialo le ‘dira kgwebo’ gotee le bana babo lona ba tloditšwego. Lega go le bjalo, Bakriste ba tloditšwego ba lemoga gabotse gore ditalente di ile tša bewa ka diatleng tša bona. Ba swanetše go ikarabela ka tsela yeo dilo tša Morena tša mo lefaseng di swarwago ka yona. Gaešita le ge e le ba sego kae ka palo, ba ka se kgone go neela lešaba le legolo boikarabelo bja bona. A naganne ka se, molaki yo a botegago yo bohlale o tšwela pele go etelela pele go hlokomeleng kgwebo ya Kgoši, a thabela thekgo ya ditho tše di ineetšego tša lešaba le legolo. Di lemoga boikarabelo bja bana babo tšona ba tloditšwego gomme di ikwa di e-na le tokelo go šoma ka tlase ga bolebeledi bja bona.

21. Ke kgothatšo efe yeo e šomago go Bakriste ka moka go tloga pele ga 1919 go fihla le mehleng ya rena?

²¹ Ka go rialo, gaešita le ge diswantšho tše tše pedi di hlabiša seetša ka ditiragalo tšeo di diregilego ka 1919 goba nakong yeo, melao ya tšona ya motheo e šoma le go Bakriste ka moka ba therešo go theoša le mehla ya bofelo. Ka tsela ye, gaešita le ge kgothatšo yeo Jesu a e neilego mafelelong a seswantšho sa dikgarebe tše lesome e šoma pele go Bakriste ba tloditšwego pele ga 1919, molao wa yona wa motheo o šoma le go Mokriste yo mongwe le yo mongwe. Ka gona, anke ka moka ga rena re ele hloko mantšu a Jesu a rego: “Ké xôna phakxamang, xobane xa Le tsebe letšatši le nakô ya xo tla xa Morwa-motho.”—Mateo 25:13.

[Mengwalo ya ka tlase]

[Dipotšišo tša Thuto]

[Lepokisi go letlakala 16]

JESU O TLA NENG?

Go Mateo dikgaolo 24 le 25, go bolelwa gore Jesu o tla “tla” ka dikgopolo tše di sa swanego. Ga go nyakege gore a sepele ka tsela e bonagalago e le gore a ‘tle.’ Go e na le moo, o “tla” ka kgopolo ya gore o retološetša tlhokomelo ya gagwe bathong goba go balatedi ba gagwe, gantši e le bakeng sa kahlolo. Ka gona, ka 1914 o ‘ile a tla’ bakeng sa go tlo thoma go ba gona ga gagwe e le Kgoši e beilwego sedulong sa bogoši. (Mateo 16:28; 17:1; Ditiro 1:11) Ka 1918, o ile a “tla” e le motseta wa kgwerano gomme a thoma go ahlola bao ba ipolelago gore ba hlankela Jehofa. (Maleaki 3:1-3; 1 Petro 4:17) Ka Haramagedone, o tla “tla” a tliša kahlolo go manaba a Jehofa.—Kutollo 19:11-16.

Go tla (goba go fihla) mo go boletšwego ka makga a mmalwa go Mateo 24:29-44 le 25:31-46 ke ga “tlaišexong e kxolo.” (Kutollo 7:14) Ka lehlakoreng le lengwe, go tla mo go boletšwego ka gona ka makga a mmalwa go Mateo 24:45 go ya go 25:30 go mabapi le go ahlola ga gagwe bao ba ipolelago gore ke barutiwa go tloga ka 1918 go ya pele. Ka mohlala, e ka se be mo go kwagalago go bolela gore go putswa ga molaki yo a botegago, kahlolo ya dikgarebe tša ditlaela le kahlolo ya molaki wa sebodu, yoo a ilego a uta talente ya Mong wa gagwe, go tla direga ge Jesu a “e-tla” masetla-pelong a magolo. Seo se tla bolela gore bontši bja batlotšwa ba tla hwetšwa ba sa botege ka nako yeo gomme ka go rialo ba tla swanela ke go tšeelwa legato. Lega go le bjalo, Kutollo 7:3 e bontšha gore bahlanka ba Kriste ka moka bao ba tloditšwego ba tla be ba ‘swaetšwe’ sa ruri ka nako yeo.

[Caption on page 14]

‘Molaki yo mobe’ ga se a hwetša ditšhegofatšo ka 1919

[Caption on page 15]

Dikgarebe tše bohlale di be di itokišitše ge monyadi a be a fihla

[Caption on page 17]

Bahlanka ba botegago ba tšere karolo ‘kgwebong’

[Caption on page 17]

Molaki wa sebodu ga se a dira bjalo

[Caption on page 18]

Batlotšwa le ba “lešaba le lexolo” ba tšwela pele go dira gore seetša sa bona se bonege

Na o ka Hlalosa?

• Jesu o ile a hlahloba balatedi ba gagwe neng, gomme o ile a hwetša’ng?

• Ke ka baka la’ng Bakriste ba bangwe ba tloditšwego ba ile ba ba le moya wa ‘molaki yoo yo mobe’?

• Re ka ipontšha bjang re le ba bohlale moyeng?

• Ke ka tsela efe re ka tšwelago pele re ‘dira kgwebo,’ re ekiša bana babo Jesu ba tloditšwego bao ba botegago?