Na Tumelo e ka Fodiša Balwetši?

GE RE babja, re nyaka thušo le kalafo. O ka ba o tseba go tšwa Beibeleng gore nako le nako Jesu Kriste o be a fodiša mehuta ka moka ya malwetši, a thuša ba bantši bao ba babjago. Diphodišo tše bjalo di be di direga bjang? Beibele e re: “Ka boxolo [“matla a,” NW] bya Modimo.” (Luka 9:42, 43; Ditiro 19:11, 12) Ka gona, e be e le moya o mokgethwa wa Modimo wo o bego o fodiša, e sego feela tumelo ya motho ka noši. (Ditiro 28:7-9) Leo e be e le lebaka leo ka lona Jesu a bego a sa nyake gore balwetši ba ipolele tumelo ya bona go yena e le gore ba fodišwe.

O ka ipotšiša gore: ‘Na diphodišo tša mohlolo ke tša nakong e fetilego, goba na diphodišo tše di swanago le tšeo Jesu a ilego a di dira di tla direga gape? Go na le kholofelo efe ka bao ba tlaišwago ke bolwetši bjo bohloko goba bjo bo sa folego?’

Beibele e hlalosa gore lefaseng le lefsa la go loka la Modimo, matla a Modimo a tla dira gore go be le diphodišo tša mohlolo gape tše di swanago le tšeo Jesu a ilego a di dira ge a be a le mo lefaseng. Dihlatse tša Jehofa tša lefelong la geno di tla thabela go go bontšha gore ke bjang le gore ke neng moo Modimo a tlago go phethagatša dilo tšeo bao ba fodišago ka tumelo ba ka se kego ba di dira—go tloša malwetši ka moka gotee le lehu. Ee, Modimo “lehu ó tlo le tloša ka xo sa felexo.”—Jesaya 25:8.