Dipotšišo tše Tšwago go Babadi

Ke’ng seo se diregilego nakong ya tiragalo e begilwego go Ekisodo 4:24-26, gomme ke bophelo bja mang bjo bo bego bo le kotsing?

Moše o be a le tseleng ya gagwe ya go ya Egipita a e-na le mosadi wa gagwe Tsipora le barwa ba gagwe Gerisome le Eliesere, ge tiragalo e latelago e direga: “Bà le mo tseleng, makhutšong, Morêna a xahlana le Mošê, ’me a nyaka xo mmolaya. Ké mo Tsipora a tšerexo lexakadibya a ripa molomo wa mmele wa morwa wa xaxwe, a o lahlêla fase pele [“maotong,” PK] xa xaxwe, ’me a re: O moxatš’ake wa madi! Ya ba xôna a mo lesitšexo; xe a re “moxatš’ake wa madi” ó be a e-ra lebollô.” (Ekisodo 4:20, 24-26) Gaešita le ge temana ye e sa kwešišwe gabotse gomme go sa kgonege go kgonthišega mabapi le seo e se bolelago, Mangwalo a hlabiša seetša se itšego ditemaneng tše.

Pego ga e bolele ka go lebanya gore ke bophelo bja mang bjo bo bego bo le kotsing. Lega go le bjalo, re ka phetha ka mo go kwagalago gore e be e se bophelo bja Moše, ka gobane o be a sa tšwa go amogela thomo ya Modimo ya go etelela ba-Isiraele pele go tšwa Egipita. (Ekisodo 3:10) Ke mo go sa kwagalego gore ge a le tseleng ya gagwe ya go phethagatša kabelo yeo, bophelo bja Moše bo be bo ka ba bo ile bja bewa kotsing ke morongwa wa Modimo. Ka gona, e swanetše go ba e be e le bophelo bja yo mongwe wa barwa ba gagwe. Molao wo o bego o neilwe Aborahama pejana mabapi le lebollo o itše: “Xe e le monna wa lešoboro e a sa bolotšwaxo mo mmeleng wa xaxwe, motho eo a a kxaolwê mo sethšabeng sa xabô; ó sentše kxwêranô ya-ka.” (Genesi 17:14) Go bonala Moše a ile a hlokomologa go bolotša morwa wa gagwe, ka go rialo bophelo bja mošemane bo ile bja bewa kotsing ke morongwa wa Jehofa.

Ke maoto a mang ao a ilego a kgwathwa ge Tsipora a be a ripa molomo wa mmele wa morwa wa gagwe ka maiteko a go lokiša ditaba? E be e le morongwa wa Jehofa yo a bego a e-na le matla a go bolaya morwa yo a sa bolotšwago. Ka gona, ka mo go kwagalago, Tsipora o swanetše go ba a ile a dira gore molomo wa mmele o kgome maoto a morongwa, a o tliša go yena e le bohlatse bja gore o dirile ka go dumelelana le kgwerano.

Polelwana ya Tsipora ya gore “o moxatš’ake wa madi” ke yeo e sa tlwaelegago. E bontšha’ng ka yena? Ka go dira ka go dumelelana le dinyakwa tša kgwerano ya lebollo, Tsipora o ile a amogela tswalano ya kgwerano le Jehofa. Kgwerano ya Molao yeo ka morago e ilego ya dirwa le ba-Isiraele e bontšhitše gore tswalanong ya kgwerano, Jehofa a ka lebelelwa bjalo ka monna gomme sehlopha se sengwe se le bjalo ka mosadi. (Jeremia 31:32) Ka gona, ka go bitša Jehofa (a diriša moemedi wa gagwe wa morongwa) ka gore ke “moxatš’ake wa madi,” go bonala Tsipora a be a amogela go ikokobeletša ga gagwe melao ya kgwerano yeo. Go be go le bjalo ka ge eka o amogetše boemo bja go ba mosadi kgweranong ya lebollo, Jehofa Modimo a le bjalo ka monna. Go sa šetšwe gore boemo ke bofe, ka baka la tiro ya gagwe e tiilego ya go ikokobeletša seo Modimo a se nyakago, bophelo bja morwa wa gagwe bo be bo se sa hlwa bo le kotsing.