‘Dira Modiro Wa Moebangedi’

“Phafoxêla tšohle; . . . o dirê modirô wa sexoeledi [“moebangedi,” NW].”—2 TIMOTHEO 4:5.

1. Ke thomo efe yeo Jesu a e neilego balatedi ba gagwe?

LEINA la Jehofa le merero ya gagwe di tsebatšwa lefaseng ka bophara. Se ke ka gobane batho ba Modimo bao ba ineetšego ba ile ba tšeela godimo thomo yeo Jesu Kriste a e neilego balatedi ba gagwe ge a be a re: “Yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna.”—Mateo 28:19, 20.

2. Timotheo yo e bego e le molebeledi o ile a amogela tlhahlo efe, gomme ke tsela efe e nngwe yeo balebeledi ba Bakriste ba ka phethagatšago bodiredi bja bona?

² Barutiwa ba Jesu ba lekgolong la pele la nywaga ba ile ba tšeela thomo yeo godimo. Ka mohlala, moapostola Paulo o ile a kgothaletša molebeledi-gotee le yena wa Mokriste e lego Timotheo gore: “O dirê modirô wa sexoeledi, O bê mohlanka ka botlalô.” (2 Timotheo 4:5) Lehono, tsela e nngwe yeo molebeledi a phethago bodiredi bja gagwe ke ka go ba mogoeledi yo a fišegago wa Mmušo, yoo a tšeago karolo ka mehla bodireding bja tšhemo. Ka mohlala, molebeledi wa Thuto ya Puku ya Phuthego o na le tokelo e putsago ya go etelela pele modirong wa boboledi le go tlwaetšeng ba bangwe. Paulo o ile a phethagatša boikarabelo bja gagwe ka noši bja go tsebatša ditaba tše dibotse, gomme o ile a thuša go tlwaeletša ba bangwe bodiredi.—Ditiro 20:20; 1 Ba-Korinthe 9:16, 17.

 Baebangedi ba Fišegago ba Nakong e Fetilego

3, 4. Filipi o bile le diphihlelo dife e le moebangedi?

³ Bakriste ba pele ba be ba tsebja e le baebangedi ba fišegago. Nagana ka moebangedi Filipi. E be e le yo mongwe wa “banna ba ba šupaxo, . . . ba ba tletšexo Môya-mokxêthwa le bohlale” bao ba bego ba kgethilwe gore ba abe dijo tša letšatši le letšatši ka go se bebe sefahlego go bahlologadi ba Bakriste bao ba bolelago Segerika le bao ba bolelago Sehebere kua Jerusalema. (Ditiro 6:1-6) Ka morago ga ge tirelo yeo e kgethegilego e fedile gomme tlaišo e phatlaladitše bohle ka ntle le baapostola, Filipi o ile a ya Samaria. Moo o ile a tsebatša ditaba tše dibotse gomme o ile a matlafatšwa ke moya o mokgethwa gore a rake batemona le go fodiša bao ba golofetšego le batho bao ba hwilego lehlakore. Ba-Samaria ba bantši ba ile ba amogela molaetša wa Mmušo gomme ba ile ba kolobetšwa. Ge ba e-kwa ka se, baapostola kua Jerusalema ba ile ba romela moapostola Petro le moapostola Johane go ya Samaria e le gore badumedi bao ba sa tšwago go kolobetšwa ba ka amogela moya o mokgethwa.—Ditiro 8:4-17.

⁴ Se se latelago moya wa Modimo o ile wa iša Filipi go molaki wa Ethiopia tseleng e yago Gatsa. Ka morago ga tlhaloso e kwagalago gabotse ya Filipi ya mabapi le boporofeta bja Jesaya, “monna [yo] wa Ethiopia, molaki le letona la Kandatse mohumaxadi wa Ethiopia,” o ile a ba le tumelo go Jesu Kriste gomme o ile a kolobetšwa. (Ditiro 8:26-38) Ka morago ga fao Filipi o ile a ya Asidodo ke moka a ya Kesarea, a tšama a “bolêla Ebangedi metseng ka moka.” (Ditiro 8:39, 40) Ka ntle le pelaelo o beile mohlala o mobotse go direng modiro wa moebangedi!

5. Barwedi ba Filipi ba bane ba be ba tsebja ka eng ka mo go kgethegilego?

⁵ Filipi o be a sa dutše a le mafolofolo bodireding kua Kesarea nywaga e ka bago e 20 ka morago. Ge Paulo le Luka ba be ba dula le yena legaeng la gagwe, o be “a na le barwedi ba banê ba dikxarebe ba ba bexo ba porofeta.” (Ditiro 21:8-10) Ka ntle le pelaelo ba be ba tlwaeditšwe gabotse moyeng, ba e-na le phišego bakeng sa bodiredi gomme ba be ba bile ba e-na le tokelo ya go bolela ka tsela ya boporofeta. Phišego ya batswadi bakeng sa bodiredi e ka ba le mafelelo a mabotse go barwa le barwedi lehono, ya ba tutueletša go dira modiro wa boebangedi ka phišego gore e be wa bona wa bophelo ka moka.

Baebangedi ba Fišegago Lehono

6. Baebangedi ba lekgolong la pele la nywaga ba bile le katlego efe?

⁶ Boporofeteng bja gagwe bjo bogolo bjo bo bolelago ka mehla ya rena le mehla ya bofelo, Jesu Kriste o tsebaditše gore: “Ebangedi e swanetše xo kwatšwa pele dithšabeng ka moka.” (Mareka 13:10) Bofelo bo tla tla ka morago ga ge ditaba tše dibotse di šetše di boletšwe “lefaseng ka moka.” (Mateo 24:14) Bjalo ka ge Paulo le baebangedi ba bangwe ba lekgolong la pele la nywaga ba ile ba tsebatša ditaba tše dibotse, ba bantši e ile ya ba badumedi gomme diphuthego di ile tša hlongwa mafelong a mantši Mmušong ka moka wa Roma. Bagolo bao ba bego ba kgethilwe go hlankela diphuthegong tše ba ile ba tšea karolo le bana babo bona le dikgaetšedi modirong wa boebangedi gomme ba katološetša modiro wa boboledi kgole le kgaufsi. Lentšu la Jehofa le ile la tšwela pele le gola le go phatlalala mehleng yeo, go fo swana le ge le dira bjalo lehono ka baka la ge Dihlatse tša Jehofa tše dimilione di dira modiro wa baebangedi. (Ditiro 19:20) Na o gatile mogato wa go ba yo mongwe wa bareti bao ba thabilego ba Jehofa?

7. Bagoeledi ba Mmušo ba dira’ng lehono?

⁷ Bagoeledi ba Mmušo ba bantši ba mehleng yeno ba diriša ka mo go holago dibaka tša go katološa go tšea ga bona karolo modirong wa boebangedi. Ba dikete ba tsenetše modiro wa boromiwa gomme ba dikete tše makgolo ba tšea karolo modirong wa boebangedi e le babulamadibogo ba ka mehla le ba go thuša. Le gona banna, basadi le bana bao ba hlankelago e le bagoeledi ba fišegago ba Mmušo ba dira modiro o mobotse gakaakang! Ka kgonthe, batho ba Jehofa ka moka ba thabela tšhegofatšo ya gagwe e humilego ge ba dutše ba mo hlankela ba bapelane ka magetla e le baebangedi ba Bakriste.—Tsefanya 3:9.

8. Ke modiro ofe wa go swaya woo ga bjale o dirwago, gomme o dirwa ke bomang?

⁸ Modimo o neile balatedi ba Jesu ba tloditšwego boikarabelo bja go tsebatša ditaba tše  dibotse lefaseng ka bophara. Ba thekgwa ke palo e golago ya “dinku tše dingwê” tša Kriste modirong wo wa boebangedi. (Johane 10:16) Ka tsela ya boporofeta, modiro wo wa go phološa bophelo o swantšhwa le wa go bea leswao diphatleng tša bao ba llago e bile ba hlokofetše ka baka la makgapa ao ga bjale a diregago. Go se go ye kae, ba babe ba tla fedišwa. Go sa dutše go le bjalo, ke tokelo gakaakang go iša ditherešo tše di phološago bophelo go badudi ba lefaseng!—Hesekiele 9:4-6, 11.

9. Bao ba sa tšwago go thoma go kopanela ba ka thušwa bjang bodireding?

⁹ Ge e ba re be re dutše re tšea karolo modirong wa boebangedi ka lebaka le le teletšana, ka ntle le pelaelo re ka dira selo se itšego go thuša bao ba sa tšwago go thoma go kopanela ka phuthegong. Ka dinako tše dingwe, re ka kgona go sepela le bona bodireding. Bao ba hlankelago e le bagolo ba tla nyaka go dira sohle seo ba ka se kgonago gore ba age badumedi-gotee le bona moyeng. Maiteko a mabotse a balebeledi bao ba ikokobeditšego a ka dira mo gontši go thuša ba bangwe gore e be baebangedi ba fišegago le bao ba enywago dienywa.—2 Petro 1:5-8.

Go Nea Bohlatse ka Ntlo le Ntlo

10. Kriste le balatedi ba gagwe ba pele ba beile mohlala ofe bodireding?

¹⁰ Jesu Kriste o beetše balatedi ba gagwe mohlala o mobotse bjalo ka moebangedi. Lentšu la Modimo le bolela mabapi le bodiredi bja Kriste le bja baapostola ba gagwe gore: “A thôma xo ya le metse le metsana à xoêlêla à bolêla Ebangedi ya mmušô wa Modimo, a ya à na le bao ba lesome la metšô e mebedi.” (Luka 8:1) Go thwe’ng ka baapostola ka bobona? Ka morago ga go tšhollwa ga moya o mokgethwa ka Pentekoste ya 33 C.E., “ba se kxaotše xo hlwa bà ruta Ntlong-kxêthwa le mo malapeng, bà fêla ba kwatša Ebangedi ya xore Jesu ké Yêna Kriste.”—Ditiro 5:42.

11. Go ya ka Ditiro 20:20, 21, moapostola Paulo o ile a dira’ng bodireding bja gagwe?

¹¹ Ka baka la modiro wa gagwe wa boebangedi wa phišego, moapostola Paulo o be a ka botša bagolo ba Bakriste ba Efeso gore: “Le tseba ka mo ke sa kaxo ka Le tima tše di kaxo Le thuša, ka Le anêxêla ka Le ruta phuthexong le malapeng.” Ge Paulo a be a ‘ruta malapeng,’ na o be a etela magae a barapedi-gotee le yena ba Jehofa, a dira maeto a bodiši go badumedi? Aowa, ka gobane o tšwela pele go hlalosa gore: “Ya ba xo hlatsêla Ba-Juda le Ba-Gerika xore ba boêlê xo Modimo, ba dumêlê Morêna wa rena Jesu Kriste.” (Ditiro 20:20, 21) Ka kakaretšo, bao ba šetšego ba ineetše go Jehofa ba ka se nyake tlhahlo ya mabapi le gore “ba boêlê xo Modimo, ba dumêlê Morêna wa rena Jesu Kriste.” Paulo o ile a tlwaetša bagolo ba Bakriste ba kua Efeso bodireding bja ntlo le ntlo mola a be a dutše a ruta bao e sego badumedi mabapi le tshokologo le tumelo. Ka go dira se, Paulo o be a ekiša mokgwa woo o theilwego ke Jesu.

12, 13. Ka go dumelelana le Ba-Filipi 1:7, batho ba Jehofa ba dirile’ng mabapi le tshwanelo ya bona ya go bolela?

¹² Bodiredi bja ntlo le ntlo e ka ba tlhohlo. Ka mohlala, ba bangwe ba a kgopišega ge re ba etela magaeng a bona ka molaetša wa Beibele. Kganyogo ya rena ga se go kgopiša batho. Lega go le bjalo, bodiredi bja ntlo le ntlo ke bjo bo theilwego Mangwalong, gomme lerato la go rata Modimo le moagišani le re tutueletša go nea bohlatse ka tsela ye. (Mareka 12:28-31) Bakeng sa go ‘šireletša le go hloma ka molao’ tshwanelo ya rena ya go bolela ka ntlo le ntlo, re ile ra iša melato pele ga dikgoro-tsheko, go akaretša le Kgoro-kgolo ya Tsheko ya United States. (Ba-Filipi 1:7, bapiša le NW.) Mo e ka bago ka mehla kgoro-tsheko yeo e ile ya ema le rena. Kahlolo e latelago ke e tlwaelegilego:

¹³ “Go abja ga dipampišana tša bodumedi ke mokgwa wa kgale wa boebangedi bja baromiwa—o thomile ge go be go hlangwa metšhene ya go gatiša. E be e dutše e le mokgwa o matla mekgatlong e fapa-fapanego ya bodumedi go theoša le nywaga. Mokgwa wo wa bodumedi o dirišwa ka tekanyo e kgolo lehono ke dihlotswana tše di fapa-fapanego tša bodumedi tšeo babapatši ba tšona ba dipuku tša bodumedi ba išago Ebangedi magaeng a dikete-kete gomme ba nyaka bao ba tla amogelago tumelo ya bona ka go ba etela ka noši ka magaeng a bona. . . . Mokgwa wo wa modiro wa bodumedi o tšea sebaka se  se swanago ka tlase ga Tokišo ya Pele [go Molao-theo wa United States] go swana le borapedi bja ka dikerekeng le go rera dipulupiting.”—Murdock v. Pennsylvania, 1943.

Ke ka Baka La’ng re Tšwela Pele ka Boboledi?

14. Go ka ba le mafelelo afe a tšwelopele go mong wa ntlo bodireding bja rena?

¹⁴ Go na le mabaka a mantši a go nea bohlatse ka ntlo le ntlo. Nako e nngwe le e nngwe ge re etela mong wa ntlo, re leka go bjala peu ya therešo ya Mangwalo. Ka go dira maeto a go boela, re nyaka go e nošetša. Le gona go ka ba le mafelelo a tšwelopele e botse go mong wa ntlo, ka gobane Paulo o ngwadile gore: “Nna ke byetše; Apôllô ó nošeditše; xomme Modimo ké Yêna a medišitšexo.” (1 Ba-Korinthe 3:6) Ka gona, anke re tšweleng pele re ‘bjala le go nošetša,’ re kgodišegile gore Jehofa o tla ‘mediša.’

15, 16. Ke ka baka la’ng re etela magaeng a batho leboelela?

¹⁵ Re dira modiro wa baebangedi ka gobane maphelo a kotsing. Ka go dira modiro wa boboledi re ka iphološa le go phološa bao ba re kwago. (1 Timotheo 4:16) Ge e ba re be re tseba gore bophelo bja motho bo kotsing, na re be re tla fo dira boiteko bja go se re selo bja go mo thuša? Le gatee! Ka ge phološo e akaretšwa, re etela magaeng a batho leboelela. Maemo a dula a fetoga. Motho yo mongwe yo a swaregilego kudu go ka theetša nakong e nngwe a ka rata go kwa molaetša wa Beibele nakong e latelago. Setho se sengwe sa lapa se ka re amogela, gomme seo se ka lebiša poledišanong ya Mangwalo.

¹⁶ Ga se maemo feela ao a ka fetogago eupša gape go ka fetoga le boemo bja kgopolo bja beng ba dintlo. Ka mohlala, go lahlegelwa ka tsela e bohloko ke moratiwa lehung go ka tutueletša motho go theetša molaetša wa Mmušo. Re holofela go homotša motho yoo, re mo dire gore a lemoge senyakwa sa gagwe sa moya gomme re mmontšhe kamoo se ka kgotsofatšwago ka gona.—Mateo 5:3, 4.

17. Lebaka le legolo la go dira modiro wa rena wa boboledi ke lefe?

¹⁷ Lebaka le legolo la mabaka a rena a go nea bohlatse ka ntlo le ntlo goba go tšea karolo mehuteng e mengwe ya bodiredi bja Bokriste ke kganyogo ya go tšea karolo go tsebatšeng leina la Jehofa. (Ekisodo 9:16; Psalme 68:4) Ke mo go putsago gakaakang ge modiro wa rena wa boebangedi o thuša bao ba ratago therešo le toka go ba bareti ba Jehofa! Mopsalme o opetše ka gore: “Lena masoxana le lena basetsana, ba baxolo le ba bafsa, Bohle a ba rêtê ’ina la Morêna, xobane ’ina la xaxwe ké lôna ’ina-lephaxami lè le nnoši; letaxô la xaxwe le ukametše ’fase lé le maxodimo.”—Psalme 148:12, 13.

Modiro wa Boebangedi o Hola Rena ka Noši

18. Go dira modiro wa boebangedi go re hola bjang?

¹⁸ Go dira modiro wa moebangedi go hola rena ka noši ka ditsela tše di fapa-fapanego. Go ya ka ntlo le ntlo ka ditaba tše dibotse go re thuša go hlagolela boikokobetšo, kudu-kudu ge re sa amogelwe ka botho. E le gore re be baebangedi ba atlegilego, re swanetše go ba bjalo ka Paulo, yoo ‘a bilego tšohle go batho ba mehuta ka moka e le gore a ka rua ba bangwe.’ (1 Ba-Korinthe 9:19-23) Go ba le phihlelo bodireding go re thuša gore re be šedi. Ka go ithekga ka Jehofa le go kgetha mantšu a rena gabotse, re ka diriša keletšo ya Paulo yeo e rego: “Polêlô ya lena a e bê ya botho ka mehla, e bê e nokilwexo letswai; Le tsebê xo fetola mang le mang ka mo xo Le swanetšexo.”—Ba-Kolose 4:6.

19. Baebangedi ba thušwa bjang ke moya o mokgethwa?

¹⁹ Le gona modiro wa boebangedi o re tutueletša go ithekga ka moya o mokgethwa wa Modimo. (Sakaria 4:6) Ka baka leo, dienywa tša wona—“leratô, le lethabô, le moláô; ke xo se fêle pelo, le botho, le bonôlô, le pôtêxô le bolêta, le boithswarô”—di a bonagala bodireding bja rena. (Ba-Galatia 5:22, 23) O kgoma ditirišano tša rena le batho, ka gobane go latela tlhahlo ya moya go re thuša go bontšha lerato, gore re thabe le go ba le khutšo, gore re se fele pelo le go ba ba botho, go bontšha go loka le tumelo, le go bontšha boikokobetšo le boitshwaro ge re dutše re tsebatša ditaba tše dibotse.

20, 21. Go na le ditšhegofatšo dife le mehola efe ka go dula re swaregilego bjalo ka baebangedi?

²⁰ Tšhegofatšo e nngwe yeo re e thabelago  bjalo ka baebangedi ke ya gore re ba le kwelobohloko ka mo go oketšegilego. Ge batho ba re botša mathata a bona—bolwetši, go hloka mošomo, diteko tša ka gae—ga re šome bjalo ka baeletši, eupša re boledišana le bona ka mangwalo a kgothatšago le ao a homotšago. Re tshwenyegile ka batho bao ba foufaditšwego moyeng eupša ba bonagala ba rata go loka. (2 Ba-Korinthe 4:4) Le gona ke tšhegofatšo gakaakang go nea thušo ya moya go bao ba ‘sekametšego ka mo go swanetšego bophelong bjo bo sa felego’!—Ditiro 13:48, bapiša le NW.

²¹ Go tšea karolo ka mehla modirong wa boebangedi go re thuša go dula re tsepamišeditše dikgopolo tša rena dilong tša moya. (Luka 11:34) Seo ka ntle le pelaelo se na le mohola, ka ge ge e ba go se bjalo re ka ineela ditekong tša dilo tše di bonagalago tšeo di tlwaelegilego kudu lefaseng le. Moapostola Johane o kgothaleditše Bakriste gore: “Le se kê la rata lefase le tše lefaseng; xe motho a rata lefase, leratô la Tata wešo xa le xôna mo xo Yêna. Xobane tšohle tše lefaseng, e lexo kxanyoxô ya nama, le kxanyoxô ya mahlô, le xo phela ka xo ikxoxomoša, xa di tšwe xo Tata wešo, di tšwa lefaseng. Xomme lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” (1 Johane 2:15-17) Go dula re swaregile bjalo ka baebangedi re e-na le mo gontši mo re ka go dirago modirong wa Morena go re thuša gore re se ke ra rata lefase.—1 Ba-Korinthe 15:58.

Ipolokele Mahumo a Legodimong

22, 23. (a) Ke mahumo afe ao a bolokwago ke baebangedi ba Bakriste? (b) Sehlogo se se latelago se tla re thuša bjang?

²² Modiro wa go bolela ka Mmušo ka phišego o tliša mehola ya ka mo go sa felego. Jesu o bontšhitše se ge a be a re: “Le se kê la ikxobêlêla mahumô lefaseng, mo xo senyaxo thswêlê le diji, mo xo phulaxo mahodu a utswa. Mahumô ikxobeleng lexodimong, mo xo sa senyexo thswêlê le diji, mo xo sa phulexo mahodu a utswa. Xobane mo xo lexo lehumô la xaxo, ké mo xo lexo pelo ya xaxo.”—Mateo 6:19-21.

²³ Anke re tšweleng pele re ikgobela mahumo legodimong, re lemoga gore re ka se be le tokelo e kgolo e fetago ya go emela Morena yo a Phagamego wa Legohle e lego Jehofa re le Dihlatse tša gagwe. (Jesaya 43:10-12) Ge re dutše re phethagatša thomo ya rena re le badiredi ba Modimo, re ka ikwa bjalo ka mosadi wa Mokriste yo a lego nywageng ya gagwe ya bo-90 yoo a boletšego mabapi le bophelo bja gagwe bjo botelele bja tirelo ya gagwe go Modimo ka gore: “Go tše ka moka ke leboga Jehofa ge a ile a nkgotlelela nywaga ye ka moka, gomme ke rapela ka go tšwa pelong gore e be Tate wa-ka yo lerato ka mo go sa felego.” Ge e ba le rena ka mo go swanago re tšeela godimo tswalano ya rena le Modimo, ka ntle le pelaelo re nyaka go dira modiro wa moebangedi ka botlalo. Sehlogo se se latelago se tla re thuša go bona kamoo re ka phethagatšago bodiredi bja rena ka botlalo.

[Dipotšišo tša Thuto]

[Caption on page 10]

Baebangedi ba bjalo ka Filipi le barwedi ba gagwe ba na le badirišani-gotee le bona bao ba thabilego mehleng yeno

[Caption on page 14]

O holega bjang wena ka noši ge o dutše o boledišana le ba bangwe ka ditaba tše dibotse?

O tla Araba Bjang?

• Ke ka baka la’ng re swanetše go dira modiro wa moebangedi?

• O ka bolela’ng mabapi le modiro wa baebangedi ba nakong e fetilego le ba gona bjale?

• Ke ka baka la’ng re nea bohlatse ka ntlo le ntlo?

• Wena ka noši o holega bjang ka go dira modiro wa moebangedi?