Monyanya wo o go Kgomago

GE Jesu Kriste a be a le lefaseng, o ile a hloma monyanya wo o tumišago Modimo. Ye e be e le tirelo e nnoši ya bodumedi yeo ka go lebanya a ilego a laela barutiwa ba gagwe gore ba e gopole. E be e le Sejo sa Morena sa Mantšiboa seo gape se tsebjago e le Selalelo sa Morena.

Anke o inagane o le hlatse yeo e bonago ka mahlo ditiragalo tšeo di lebišago tiragalong yeo. Jesu le baapostola ba gagwe ba bokane gotee ka phapošing ya ka godimo kua Jerusalema bakeng sa go bina Paseka ya Sejuda. Ba feditše go ja sejo se se tlwaelegilego sa Paseka, seo se akaretšago kwana e bešitšwego, merogo e galakago, senkgwa se se sa omelwago le beine e khwibidu. Moapostola yo a sa botegego e lego Judase Isikariothe o rakilwe gomme go se go ye kae o tla eka Mong wa gagwe. (Mateo 26:17-25; Johane 13:21, 26-30) Jesu o na le baapostola ba gagwe ba botegago ba 11 feela. Mateo ke yo mongwe wa bona.

Go ya ka pego ya Mateo yo e lego hlatse e bonego ka mahlo, Jesu o hloma Sejo sa Morena sa Mantšiboa ka tsela ye: “Jesu a tšea senkxwa [se se sa omelwago], a leboxa, a se ngwathaxanya, a se neêla barutiwa, a re: Tšeang Le jê, ké mmele wa-ka. A tšea senwêlô [sa beine], a leboxa, a ba neêla sôna, a re: Nwang sôna bohle. Ké madi a-ka a Kxwêranô e mphsa, a thšollwaxo ka ’baka la ba bantši, e bê xo lebalêlwa dibe.”—Mateo 26:26-28.

Ke ka baka la’ng Jesu a ile a hloma Sejo sa Morena sa Mantšiboa? Ge a be a dira bjalo, ke ka baka la’ng a ile a diriša senkgwa se se sa omelwago le beine e khwibidu? Na balatedi ka moka ba Kriste ba be ba swanetše go ja diswantšhetšo tše? Sejo se se be se swanetše go gopolwa ga kae? Le gona, na ruri se na le seo se se bolelago go wena?