“O Phethe Bodiredi Bja Gago Ka Botlalo”
“O Phethe Bodiredi Bja Gago Ka Botlalo”
“O phethe bodiredi bja gago ka botlalo.”—2 TIMOTHEO 4:5, NW.
1, 2. Gaešita le ge Bakriste ka moka e le baebangedi, ke’ng seo se nyakegago go bagolo go ya ka Mangwalo?
NA O mogoeledi wa Mmušo? Ge e ba go le bjalo, leboga Jehofa Modimo bakeng sa tokelo ye e kgahlišago. Na o mogolo ka phuthegong? Yeo ke tokelo e oketšegilego go tšwa go Jehofa. Eupša le ka mohla ga se ra swanela go lebala gore thuto ya rena ya lefaseng goba bokgoni bja rena bja go bolela ka bothakga ga di dire gore le ge e le mang wa rena a swanelegele bodiredi goba bolebeledi ka phuthegong. Jehofa o dira gore re swanelege gabotse bakeng sa bodiredi, gomme banna ba bangwe mo gare ga rena ba na le tokelo ya go hlankela e le balebeledi ka ge ba fihlelela dinyakwa tše lebanyago tša ka Mangwalong.—2 Ba-Korinthe 3:5, 6; 1 Timotheo 3:1-7.
2 Bakriste ka moka bao ba ineetšego ba dira modiro wa baebangedi, eupša kudu-kudu balebeledi, goba bagolo ba swanetše go bea mohlala o mobotse bodireding. Bagolo bao ‘ba itapišago ka go bolela le ka go ruta’ ba lemogwa ke Modimo le Kriste, gotee le ke Dihlatse-gotee le bona tša Jehofa. (1 Timotheo 5:17; Ba-Efeso 5:23; Ba-Hebere 6:10-12) Ka tlase ga maemo ka moka, dithuto tša mogolo e swanetše go ba tšeo di phedišago moyeng, ka gobane moapostola Paulo o ile a botša Timotheo yo e bego e le molebeledi gore: “Xo tlo tla lebaka le ba ka se kexo ba kxôna xo theetša thutô ye e phedilexo; ba tlo ikxobêla baruti ka xo ya le dikxanyoxô tša bôná, ka xo rata xo kwiša ditsêbê bose. Xobane ditsêbê tša bôná di tlo hlala therešô; ba tlo boêla dinonwaneng. Xe e le wene, phafoxêla tšohle; kxôtlêlêla mabothata, O dirê modirô wa sexoeledi, O bê mohlanka [“o phethe bodiredi bja gago,” NW] ka botlalô.”—2 Timotheo 4:3-5.
3. Ke’ng seo se swanetšego go dirwa e le gore dithuto tša maaka di se ke tša bea boemo bja phuthego bja moya kotsing?
3 E le go kgonthišetša gore dithuto tša maaka ga di bee boemo bja phuthego bja moya kotsing, molebeledi o swanetše go dira ka go dumelelana le keletšo ya Paulo e rego: “Phafoxêla tšohle; . . . O bê mohlanka ka botlalô.” (2 Timotheo 4:5) Ee, mogolo o swanetše go ‘phetha bodiredi bja gagwe ka botlalo.’ O swanetše go bo dira ka botlalo, ka mokgwa o tseneletšego goba ka tekanyo e feletšego. Mogolo yoo a dirago bodiredi bja gagwe ka botlalo o lebiša tlhokomelo e swanetšego boikarabelong bja gagwe ka moka, a sa hlokomologe selo goba go fo kga dilo ka godimo. Monna yo bjalo o a botega gaešita le dilong tše dinyenyane.—Luka 12:48; 16:10.
4. Ke’ng seo se ka re thušago go phetha bodiredi bja rena ka botlalo?
4 Go phethagatša bodiredi bja rena ka botlalo ga se ka mehla go nyakago nako e oketšegilego, eupša go nyaka nako yeo e dirišwago gabotse. Go dira dilo ka go leka-lekana go ka thuša Bakriste ka moka go phethagatša dilo bodireding. E le gore a fetše nako e oketšegilego tirelong ya tšhemo, mogolo o swanetše go ba le thulaganyo ya motho ka noši ya go leka-lekanya lenaneo la gagwe le go tseba modiro woo a swanetšego go o abela ba bangwe le kamoo a ka dirago seo ka gona. (Ba-Hebere 13:17) Ka tlhago, mogolo yo a hlompšhago le yena o kgatha tema ya gagwe, ka go swana le Nehemia, yoo a ilego a tšea karolo ka noši go agweng lefsa ga maboto a Jerusalema. (Nehemia 5:16) Le gona bahlanka ka moka ba Jehofa ba swanetše go tšea karolo ka mehla modirong wa go bolela ka Mmušo.—1 Ba-Korinthe 9:16-18.
5. Re swanetše go ikwa bjang ka bodiredi?
5 Re na le thomo e thabišago gakaakang ya go ba bagoeledi ba Mmušo o hlomilwego wa legodimong! Ka ntle le pelaelo re tšeela godimo tokelo ya rena ya go tšea karolo go boleleng ditaba tše dibotse lefaseng ka moka leo go agilwego go lona pele bofelo bo fihla. (Mateo 24:14) Gaešita le ge re sa phethagala, re ka kgothatšwa ke mantšu a Paulo ao a rego: “Lehumô leo [la bodiredi] re le swere ka dibya tša letsopa; xore matla a maxolo e bê a Modimo, e sexo a rena.” (2 Ba-Korinthe 4:7) Ee, re ka dira tirelo e amogelegago—eupša feela ka matla le bohlale tšeo re di neilwego ke Modimo.—1 Ba-Korinthe 1:26-31.
Go Bonagatša Letago la Modimo
6. Ke phapano efe yeo e ilego ya ba gona magareng ga Isiraele ya tlhago le Isiraele ya moya?
6 Ge a bolela ka Bakriste ba tloditšwego, Paulo o bolela gore Modimo ‘o re kgonišitše go ba batseta ba kgwerano e mpsha.’ Moapostola o bontšha phapano magareng ga kgwerano e mpsha yeo e dirilwego le Isiraele ya moya ka Jesu Kriste le kgwerano ya kgale ya Molao yeo e dirilwego le Isiraele ya tlhago ka Moše. Paulo o oketša ka gore ge Moše a be a theoga Thaba ya Sinai le mafsika ao a bego a e-na le Melao e Lesome, sefahlego sa gagwe se be se phadima kudu moo e lego gore ba-Isiraele ga se ba ka ba kgona go mo lebelela gabotse. Lega go le bjalo, ge nako e dutše e tšwela pele, selo se itšego se bohlokwa kudu se ile sa direga ka gobane ‘megopolo ya bona e be e thatafetše’ gomme seširo se ile sa šira dipelo tša bona. Lega go le bjalo, ge motho a retologela go Jehofa ka boineelo bja pelo ka moka, seširo se a tlošwa. Ge a be a bolela ka mo go latelago ka bodiredi bjo bo neilwego bao ba lego kgweranong e mpsha, Paulo o re: “Rena ka moka ba re boxêlaxo letaxô la Morêna ra le bôna byalo ka seiponeng mahlô à tlošitšwe seširô.” (2 Ba-Korinthe 3:6-8, 14-18; Ekisodo 34:29-35) “Dinku tše dingwê” tša Jesu lehono le tšona di na le tokelo ya go bonagatša letago la Jehofa.—Johane 10:16.
7. Batho ba ka bonagatša bjang letago la Modimo?
7 Batho bao ba nago le sebe ba ka bonagatša bjang letago la Modimo, mola go se na motho yo a ka bonago sefahlego sa gagwe gomme a phela? (Ekisodo 33:20) Go ba gona, ka ntle le letago la Jehofa ka boyena, gape go na le morero wa gagwe wa letago wa go lwela bogoši bja gagwe ka Mmušo wa gagwe. Ditherešo tšeo di lego mabapi le Mmušo di bopa karolo ya “matete a Modimo” ao a thomilego go tsebatšwa ke bao ba ilego ba tšhollelwa moya o mokgethwa ka Pentekoste ya 33 C.E. (Ditiro 2:11) Ka tlhahlo ya moya, ba be ba ka phethagatša ka botlalo bodiredi bjo ba bo neilwego.—Ditiro 1:8.
8. Paulo o be a ikemišeditše go dira’ng ge e le mabapi le bodiredi?
8 Paulo o be a ikemišeditše go se dire gore selo le ge e le sefe se mo thibele go phethagatša bodiredi bja gagwe ka botlalo. O ngwadile gore: “Xe re na le botseta [“bodiredi,” NW] byoo, ka mo kxauxêlô yé e re direxetšexo, xa re lape. Re kxaoxane le mamênêmênê a masêmê; xa re tle ka tsela ya maanô; xa re retole Lentšu la Modimo; re sekišana le matswalô a batho ka moka pele xa Modimo rè bola therešô.” (2 Ba-Korinthe 4:1, 2) Therešo e bonagatšwa ka seo Paulo a se bitšago ‘bodiredi bjo,’ gomme seetša sa moya se phatlalalela kgole.
9, 10. Go bonagatša letago la Jehofa go kgonega bjang?
9 Paulo o ngwala mabapi le Mothopo wa seetša sa kgonthe le sa moya gore: “Ké Yêna Modimo e a itšexo: Seetša a se bônêxê mo xo lexo lefsifsi. Ké Yêna a bonexetšexo dipelo tša rena, ya ba xo edišwa ka xo tseba letaxô la Modimo ka sefahloxô sa Jesu Kriste.” (2 Ba-Korinthe 4:6; Genesi 1:2-5) Ka ge re neilwe tokelo e sa lekanywego le selo ya go ba badiredi ba Modimo, anke re ipolokeng re hlwekile e le gore ka go swana le diipone re bonagatše letago la Jehofa.
10 Batho bao ba lego lefsifsing la moya ba ka se kgone go bona letago la Jehofa goba moriti wa lona go Jesu Kriste, Moše yo Mogolo. Eupša ka ge re le bahlanka ba Jehofa, re amogela seetša sa letago go tšwa ka Mangwalong gomme re se dira gore se bonegele ba bangwe. Ge e ba bao gona bjale ba lego lefsifsing la moya ba swanetše ke go phonyokga phedišo, ba nyaka seetša se se tšwago go Modimo. Ka gona, ka lethabo le legolo le phišego, re kwa taelo ya Modimo ya go dira gore seetša se bonege lefsifsing bakeng sa go tagafatšwa ga Jehofa.
Seetša sa Lena a se Bonege Dithutong tša Magae tša Beibele
11. Jesu o ile a bolela’ng mabapi le go dira gore seetša sa rena se bonege, gomme tsela e nngwe ya go dira se ke efe bodireding bja rena?
11 Jesu o boditše balatedi ba gagwe gore: “Lena Le seetša sa lefase. Motse wa thabeng xa o kxone xo utama. Le xôna motho xa a xotetše lebônê a le ribexetša ka seroto. Lebônê ba le hlôma sehlomong sa lôna, la tseb’o bônêxêla bohle ba ngwakong. Le sa lena seetša a se bônêxêlê batho ka mokxwa woo, xore ba bônê medirô e mebotse ya lena, ba tumišê Tata weno wa maxodimong.” (Mateo 5:14-16) Boitshwaro bja rena bjo bobotse bo ka dira gore ba bangwe ba nee Modimo letago. (1 Petro 2:12) Le gona dibopego tše di fapa-fapanego tša modiro wa rena wa boebangedi di re nea dibaka tše dintši tša go dira gore seetša sa rena se bonege. Bjo bongwe bja maikemišetšo a rena a magolo ke go bonagatša seetša go tšwa ka Lentšung la Modimo ka go swara dithuto tša magae tša Beibele tšeo di atlegago. Ye ke tsela e bohlokwa kudu ya go phethagatša bodiredi bja rena ka botlalo. Ke ditšhišinyo dife tšeo di ka re thušago go swara dithuto tša Beibele tšeo di kgomago dipelo tša bao ba nyakago therešo?
12. Thapelo e tswalana bjang le modiro wa go swara dithuto tša magae tša Beibele?
12 Go rapela Jehofa mabapi le taba ye go bontšha kganyogo ya rena e tseneletšego ya go swara dithuto tša Beibele. Le gona go bontšha gore re bona bohlokwa bja go thuša ba bangwe go hwetša tsebo ya go tseba Modimo. (Hesekiele 33:7-9) Ka ntle le pelaelo Jehofa o tla araba dithapelo tša rena le go šegofatša maiteko a rena a tseneletšego bodireding. (1 Johane 5:14, 15) Eupša ga re rapelele feela gore re hwetše motho yo re ka swarago thuto ya legae ya Beibele le yena. Ka morago ga ge re thomile thuto, thapelo le go naganišiša ka dinyakwa tše di lebanyago tša morutwana wa Beibele di tla re thuša go swara thuto e nngwe le e nngwe ka tsela e atlegago.—Ba-Roma 12:12.
13. Ke’ng seo se ka re thušago go swara dithuto tša magae tša Beibele tšeo di atlegilego?
13 E le gore re sware dithuto tša magae tša Beibele tšeo di atlegilego, re swanetše go lokišeletša gabotse bakeng sa thuto e nngwe le e nngwe. Ge e ba re ikwa re sa swanelege ka tsela e itšego, e ka ba mo go holago kudu go lebeledišiša kamoo molebeledi wa Thuto ya Puku ya Phuthego a akaretšago thuto ya beke e nngwe le e nngwe ka gona. Ka dinako tše dingwe, re ka kgona go sepela le bagoeledi ba Mmušo bao ba bilego le mafelelo a mabotse go swareng dithuto tša magae tša Beibele. Go ba gona, boemo bja kgopolo le mekgwa ya go ruta ya Jesu Kriste e tloga e swanelwa ke gore re e ele hloko.
14. Re ka fihlelela bjang pelo ya morutwana wa Beibele?
14 Jesu o ile a thabela go dira thato ya Tatagwe wa legodimong le go bolela le ba bangwe ka Modimo. (Psalme 40:8) O be a ikokobeditše gomme o ile a atlega go fihleleleng dipelo tša bao ba ilego ba mo theetša. (Mateo 11:28-30) Ka go rialo anke re kataneleng go fihlelela dipelo tša barutwana ba rena ba Beibele. E le gore re dire bjalo, re swanetše go lokišeletša thuto e nngwe le e nngwe re naganne ka maemo a itšego a morutwana. Ka mohlala, ge e ba e le wa setšo seo se sa amogelego Beibele, re ka swanelwa ke go mo kgodiša gore Beibele ke ya therešo. Boemong bjoo, go molaleng gore re tla swanelwa ke go bala mangwalo a mantši le go a hlalosa.
Thuša Barutwana go Kwešiša Diswantšho
15, 16. (a) Re ka thuša bjang morutwana yoo a sa kwešišego seswantšho seo se dirišitšwego ka Beibeleng? (b) Re ka dira’ng ge e ba e nngwe ya dikgatišo tša rena e diriša seswantšho seo go lego thata gore morutwana yo a itšego wa Beibele a se kwešiše?
15 Morutwana wa Beibele a ka ba a sa tlwaelana le seswantšho se itšego seo se dirišitšwego ka Mangwalong. Ka mohlala, a ka fo se kwešiše seo Jesu a bego a se bolela ge a be a bolela ka go bea lebone sehlomong. (Mareka 4:21, 22) Jesu o be a bolela ka lebone la bogologolo la makhura leo le nago le pete e tukago. Lebone le bjalo le be le bewa sehlomong se se kgethegilego gomme ka go rialo la bonega karolo e itšego ka ntlong. Nyakišišo ka taba ya “Lamp” (Lebone) le “Lampstand” (Sehlomo) ka kgatišong e bjalo ka Insight on the Scriptures e ka nyakega e le gore seswantšho sa Jesu e be seo se kwagalago gabotse. * Eupša ke mo go putsago gakaakang go nea morutwana wa Beibele tlhaloso yeo e kwešišwago le go thabelwa ke morutwana!
16 Thušo ya go ithuta Beibele e ka diriša seswantšho seo go lego thata gore morutwana yo a itšego a se kwešiše. Diriša nako go se hlalosa, goba diriša seswantšho se sengwe seo se bontšhago ntlha e swanago. Mohlomongwe kgatišo e gatelela gore molekane yo a swanetšego gotee le maiteko a kopanetšwego di bohlokwa lenyalong. Bakeng sa go bontšha se, go ka bolelwa ka monna yo a hwidinyegago godimo ga trapeze, a e tlogela gomme a ithekga ka yo mongwe gore a mo kame. Ge o diriša seswantšho se sengwe, o ka bolela gore ka ntle le pelaelo go nyakega ga modirišani yo mobotse le maiteko a kopanetšwego go ka bontšhwa ka tsela yeo bašomi ba dirišanago ka yona ka go neeletšana mapokisi ge ba laolla lori.
17. Re ka ithuta’ng go tšwa go Jesu mabapi le diswantšho?
17 Go diriša seswantšho se sengwe go ka nyaka gore re lokišeletše e sa le pele. Lega go le bjalo, yeo ke tsela ya go bontšha kgahlego ya rena ya motho ka noši go morutwana wa Beibele. Jesu o ile a diriša diswantšho tše bonolo bakeng sa go hlalosa ditaba tše thata. Thuto ya gagwe ya Thabeng e nea mehlala ya se, gomme Beibele e bontšha gore thuto ya gagwe e bile le mafelelo a mabotse go batheetši ba gagwe. (Mateo 5:1–7:29) Ka go se fele pelo Jesu o ile a hlalosa dilo ka gobane o be a e-na le kgahlego e tseneletšego ka ba bangwe.—Mateo 16:5-12.
18. Ke’ng seo se kgothaletšwago mabapi le mangwalo ao a tsopotšwego ka dikgatišong tša rena?
18 Go kgahlegela ga rena ba bangwe go tla re tutueletša go ‘bolela ka Mangwalo.’ (Ditiro 17:2, 3) Se se nyaka thuto ya kgonthe le thapelo gotee le go diriša ka bohlale dikgatišo tšeo di abjago ka “molaki e a bôtêxaxo.” (Luka 12:42-44) Ka mohlala, puku ya Tsebo e Išago Bophelong bjo bo sa Felego e tsopola mangwalo a mantši. * Ka baka la ge go e-na le sekgoba se se lekanyeditšwego, a mangwe a bontšhitšwe feela. Nakong ya thuto ya Beibele, go bohlokwa go bala le go hlalosa bonyenyane a mangwe a mangwalo a ao a bontšhitšwego. Go ba gona, thuto ya rena e theilwe Lentšung la Modimo, le gona le na le matla a magolo. (Ba-Hebere 4:12) Šupa Beibeleng ka dinako ka moka thutong e nngwe le e nngwe, o diriša leboelela mangwalo ao a hwetšwago dirapeng. Thuša morutwana go bona seo Beibele e se bolelago ka taba goba tiro e itšego. Katanela go mmontšha kamoo a tla holwago ke go kwa Modimo.—Jesaya 48:17, 18.
Botšiša Dipotšišo Tšeo di Šišinyago Kgopolo
19, 20. (a) Ke ka baka la’ng re swanetše go diriša dipotšišo tšeo di nyakago pono ya motho ge re swara dithuto tša magae tša Beibele? (b) Go ka dirwa’ng ge e ba taba e itšego e nyaka go ahla-ahlwa ka mo go tšwelago pele?
19 Go diriša ga Jesu dipotšišo ka bokgoni go ile gwa thuša batho go nea mabaka. (Mateo 17:24-27) Ge e ba re botšiša dipotšišo tšeo di nyakago pono ya motho tšeo di sa lešego morutwana wa Beibele dihlong, dikarabo tša gagwe di ka utolla seo a se naganago ka taba e itšego. Re ka hwetša gore o sa dutše a kgomaretše dipono tšeo e sego tša mangwalo. Ka mohlala, a ka ba a dumela go Boraro botee. Go kgaolo 3, puku ya Tsebo e bontšha gore lentšu “Boraro botee” ga le tšwelele ka Beibeleng. Puku ye e tsopola le go bontšha mangwalo ao a bontšhago gore Jehofa le Jesu ga se motho o tee le gore moya o mokgethwa ke matla a šomago a Modimo, e sego motho. Go bala le go ahla-ahla ditemana tše tša Beibele e ka ba mo go lekanego. Eupša go thwe’ng ge e ba go nyakega se se oketšegilego? Mohlomongwe ka morago ga thuto e latelago ya ka mehla, go ka dirišwa nako poledišanong e holago ya taba yeo e akareditšwego kgatišong e nngwe ya Dihlatse tša Jehofa, e bjalo ka poroutšha ya Na o Swanetše go Dumela go Boraro Botee? Ka morago ga moo, re ka tšwela pele ka thuto re diriša puku ya Tsebo.
20 A re re mohlomongwe karabo ya morutwana potšišong yeo e nyakago pono ya gagwe ke yeo e makatšago goba gaešita le yeo e nyamišago. Ge e ba go akaretšwa go kgoga goba taba e nngwe yeo go sego bonolo go bolela ka yona, mohlomongwe re ka šišinya gore re tšwele pele ka thuto gomme re ahla-ahle taba ka moragonyana. Go tseba gore morutwana o sa dutše a kgoga go tla dira gore re kgone go hwetša taba e gatišitšwego yeo e ka mo thušago go dira tšwelopele moyeng. Ge re dutše re katanela go fihlelela pelo ya morutwana, re ka rapelela gore Jehofa a mo thuše go gola moyeng.
21. Go ka direga’ng ge e ba re dumelelanya mekgwa ya rena ya go ruta le dinyakwa tše itšego tša morutwana wa Beibele?
21 Ka go lokišeletša gabotse le ka thušo ya Jehofa, ka ntle le pelaelo re tla kgona go dumelelanya mekgwa ya rena ya go ruta gore e swanele dinyakwa tše lebanyago tša morutwana wa Beibele. Ge nako e dutše e tšwela pele, re ka ba ra kgona go mo thuša go hlagolela lerato le le tseneletšego la go rata Modimo. Le gona re ka ba ra atlega go ageng tlhompho le tebogo bakeng sa mokgatlo wa Jehofa. Le gona ke mo go kgotsofatšago gakaakang ge barutwana ba Beibele ba dumela gore ‘ruri Modimo o na le rena’! (1 Ba-Korinthe 14:24, 25) Ka go rialo anke re swareng dithuto tša Beibele tšeo di atlegilego gomme re direng sohle seo re ka se kgonago go thuša ba bangwe go ba barutiwa ba Jesu.
Lehumo Leo le Swanetšego go Tšeelwa Godimo
22, 23. Go nyakega’ng ge e ba re tla phethagatša bodiredi bja rena ka botlalo?
22 E le gore re phethe bodiredi bja rena ka botlalo, re swanetše go ithekga ka matla ao re a neilwego ke Modimo. Ge a bolela ka bodiredi, Paulo o ile a ngwalela Bakriste-gotee le yena bao ba tloditšwego gore: “Lehumô leo re le swere ka dibya tša letsopa; xore matla a maxolo e bê a Modimo, e sexo a rena.”—2 Ba-Korinthe 4:7.
23 Go sa šetšwe gore re ba bangwe ba batlotšwa goba ba “dinku tše dingwê,” re bjalo ka dibjana tša letsopa tšeo di fokolago. (Johane 10:16) Lega go le bjalo, Jehofa a ka kgona go re nea matla a nyakegago e le gore re phethagatše dikabelo tša rena go sa šetšwe dikgateletšo tšeo di tlišwago go rena. (Johane 16:13; Ba-Filipi 4:13) Ka go rialo anke re boteng Jehofa ka mo go feletšego, re tšeele godimo tirelo ya rena gomme re phethagatše bodiredi bja rena ka botlalo.
[Mengwalo ya ka tlase]
^ ser. 15 E gatišitšwe ke Dihlatse tša Jehofa.
^ ser. 18 E gatišitšwe ke Dihlatse tša Jehofa.
[Dipotšišo tša Thuto]
[Caption on page 16]
Bagolo ba Bakriste ba ruta ka phuthegong e bile ba thuša go tlwaetša badumedi-gotee le bona bodireding
[Caption on page 18]
Go swara dithuto tša magae tša Beibele tšeo di atlegilego ke tsela e nngwe ya go dira gore seetša sa rena se bonege
O tla Araba Bjang?
• Bagolo ba ka dira’ng e le gore ba phethe bodiredi bja bona ka botlalo?
• Re ka kaonefatša bjang go atlega ga dithuto tša rena tša magae tša Beibele?
• O tla dira’ng ge e ba morutwana wa Beibele a se a kwešiša seswantšho goba a nyaka tsebišo e oketšegilego ka taba e itšego?