Bobotse Bja Tlholo Ya Jehofa

‘O yo Mogolo Kudu go Feta Dithaba’

GO BOGELA go hlaba ga seetša sa letšatši godimo ga tlhora ya Thaba ya Fuji ke phihlelo e sa lebalegego. Letšatši la mmala wa mollo le hlaba sebakeng, gomme le hlabišetša seetša godimo ga lehlwa le lešweu gotee le godimo ga lefsika le lesehla leo le tšweleditšwego ke leraga la thabamollo. Ge letšatši le latelago le hlaba, kapejana moriti o mogolo wa thaba o phatlalalela ka godimo ga meboto le meedi ka monabo o motelele.

Go etša Thaba ya Fuji—yeo e kilego ya ngwalwa ka dihlaka tšeo di bolelago gore “yeo go se nago e lekanago le yona”—dithaba tše dikgolo ga di fetše go re makatša. Ge e le gabotse, bogolo bja tšona bjo bo šiišago bo ka re dira gore re ipone re se selo! Dithaba ke tše dikgolo kudu moo e lego gore batho ba bantši ba ile ba dumela gore ditlhora tše di phagamego ka go fetišiša, tšeo gantši di apešitšwego ke mouwane le maru, e be e le legae la medimo.

Modimo a nnoši yo a tlogago a retwa ke ditlhora tša dithaba ke Mmopi wa tšona yo a nago le bokgoni, Jehofa. Ke yena a nnoši e lego “Mmopi wa dithaba.” (Amosi 4:13) Mo e nyakilego go ba tee-nneng ya karolo ya lefase ke dithaba, gomme ge Modimo a be a bopa polanete ya rena, o ile a dira gore go be le matla ao mafelelong a ilego a tšweletša ditlhora tše di kgahlišago le melokeloke ya dithaba. (Psalme 95:4) Ka mohlala, go dumelwa gore melokeloke ya dithaba tša Himalaya le tša Andes e ile ya tšweletšwa ke dikhuduego tše kgolo tša ka tlase ga lefase le ke go šutha ga dikarolo tša boalo bja lona.

Rena batho ga re kwešiše ka mo go feletšego gore dithaba di bile gona bjang e bile ga re kwešiše lebaka leo ka lona di lego gona. Ka kgonthe, ga re kgone go araba dipotšišo tše tšeo di ilego tša botšišwa Jobo wa go loka tše di rego: “O be O le kae mola kè [Jehofa] thêa lefase? . . . Dithêkxô tša lôna di tsemilwe kae?”—Jobo 38:4-6.

Lega go le bjalo, re a tseba gore bophelo bja rena bo ithekgile ka dithaba. Di be di dutše di bitšwa ditora tša meetse a tlhago, ka ge dinoka tše dikgolo ka moka di hwetša meetse go tšwa methopong yeo e lego dithabeng, le gona seripa-gare sa batho lefaseng se ithekgile ka dithaba gore di tšweletše meetse. (Psalme 104:13) Go ya ka makasine wa New Scientist, “dimela tše 6 go dimela tše 20 tšeo e lego mothopo o mogolo wa dijo lefaseng di tšwa dithabeng.” Ka tlase ga maemo a leka-lekanego a tswalano ya diphedi le tikologo ya tšona lefaseng le lefsa leo Modimo a le holofeditšego, “xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.”—Psalme 72:16; 2 Petro 3:13.

Ge go bolelwa ka dithaba ba bantši ba gopola Dithaba tše Dikgolo Kudu tša Yuropa. Ditlhora tše, go akaretša le Thaba ya Civetta yeo e bontšhitšwego mo, di nea bohlatse bjo bo kgahlišago ka Mmopi wa tšona. (Psalme 98:8) Di reta Jehofa, yo a ‘theilego dithaba ka matla a gagwe.’—Psalme 65:6. *

Se se makatšago kudu e le ka kgonthe ke bobotse bja Dithaba tše Dikgolo Kudu, gotee le ditlhora tša tšona le mariba ao a apešitšwego ke lehlwa, dipatoga tša tšona tšeo di khupeditšwego ke lehlwa, meedi ya tšona le matsha a tšona gotee le mafulo a tšona. Kgoši Dafida o ile a hlaola Jehofa e le “Mmediša-byang-dithabeng.”—Psalme 147:8.

Melokeloke ya meboto—go etša meboto ye ya kua Guilin, China—e ka bonagala e le ye e sa kgahlišego go swana le Dithaba tše Dikgolo Kudu,  eupša ke e mebotse ka tsela ya moswana-noši. Go bapa le Noka ya Li, ditlhora tše di phagamego tša lefsika la motaga tšeo di latelanago ke tšeo di kgahlago baeng ka bobotse bja tšona. Go bogela meetse ao a bonaletšago a elela magareng ga meboto ye yeo e apešitšwego ke mouwane go ka gopotša motho ka mantšu a mopsalme a rego: “Wa [Jehofa] phula methôpô mo melapong, ya êla xare xa dithaba.”—Psalme 104:10.

Re kgahlwa ka mo go swanetšego ke dithaba ka gobane re a tseba gore ke tšona karolo e kgolo ya tokišetšo e lerato ya Mmopi bakeng sa bophelo bjo bobotse bja batho le gore ba di thabele. Lega go le bjalo, gaešita le ge dithaba e ka ba tše dikgolo kudu, di ka se bapetšwe le bogolo bja Jehofa. E tloga e le yo “mogolo kudu go feta dithaba.”—Psalme 76:4, NW.

[Mengwalo ya ka tlase]

[Lepokisi/Seswantšho go letlakala 9]

Baagi ba lefase ba 10 lekgolong ba phela ditikologong tša dithaba. Eupša leo ga se lepheko leo le sa fenyegego go bao ba bolelago ditaba tše dibotse tša Mmušo wa Modimo. Badiredi ba ba Bakriste ba swaregile kudu ditikologong tše dintši tšeo di lego mafelong a phagamego. Le gona “a ratêxa bya’ng maoto a motseta wa ditaba tše di botse dithabeng, sexoeledi sa phološô.”—Jesaya 52:7.

Mopsalme o opetše ka gore: “Xa-bô-komé ké maolo a maxolo.” (Psalme 104:18) Dipudi tša thabeng, tše bjalo ka kgama ya Nubia yeo e nago le dinaka tše di kgahlišago, di gare ga diphoofolo ka moka tša maoto a tiilego kudu tša dithabeng. Di sepela go bapa le mariba a masese kudu ao a bonagalago a sa phatšege. Kgama e hlamilwe gabotse gore e phele mafelong ao go ka se fihlwego go ona. Ka boripana se ke ka baka la tsela yeo ditlhako tša yona di hlamilwego ka gona. Mosehlo wa magareng ga ditlhako o ka bulega go ithekgile ka boima bja pudi, wa dira gore phoofolo e kgone go ngaparela ge e eme goba e sepela maribeng a masese ao a nago le mafsika. Ka kgonthe, kgama ke phoofolo yeo e hlamilwego ka bokgoni kudu!

[Caption on page 9]

Thaba ya Fuji, ya kua Honshu, Japane