Sejo sa Morena sa Mantšiboa Se Gopolwa Bjang?

GE A hlalosa ka botlalo monyanya wa Sejo sa Morena sa Mantšiboa, moapostola wa Mokriste e lego Paulo o ngwala gore: “Se nna ke se filwexo ke Morêna, ké sôna se nna ke Le neetšexo sôna. Ši-di: Morêna Jesu, bošexo byo a ekilwexo ka byôna ó tšere senkxwa. A re xo se ngwatha a re: Tšeang Le jê; ké mmele wa-ka o newaxo ka ’baka la lena. Dirang byalo e bê xo nkxopola. Ka mokxwa o byalo a tšea le senwêlô ka moraxo xa selalêlô, a re: Senwêlô sé ké Kxwêranô e mphsa mo mading a-ka; dirang byalo ka mehla xe Le se nwa, e bê xo nkxopola. Ké xôna ka mehla xe Le e-ja senkxwa sé, Lè e-nwa senwêlô sé, Le tsebatšê lehu la Morêna xo fihla xe a e-tla.”—1 Ba-Korinthe 11:23-26.

Go etša ge Paulo a bolela, Jesu o ile a hloma Sejo sa Morena sa Mantšiboa ka “bošexo byo [Jesu] a ekilwexo ka byôna” ke Judase Isikariothe go baetapele ba bodumedi ba ba-Juda bao ba ilego ba gapeletša ba-Roma go kokotela Kriste koteng. Sejo seo se jelwe mantšiboeng a Labone, March 31, 33 C.E. Jesu o hwetše koteng ya tlhokofatšo ka Labohlano thapama, April 1. Ka baka la ge matšatši a almanaka ya Sejuda a be a thoma mantšiboeng a letšatši le lengwe go ya mantšiboeng a letšatši le le latelago, Sejo sa Morena sa Mantšiboa le lehu la Jesu Kriste ka bobedi di diregile ka letšatši le tee—Nisani 14, 33 C.E.

Bao ba jago senkgwa le beine ba be ba swanetše go ‘tšwela pele ba dira se’ gore ba gopole Jesu. Go ya ka phetolelo e nngwe, Jesu o itše: “Dirang se e le segopotšo sa-ka.” (1 Ba-Korinthe 11:24, The Jerusalem Bible) Sejo sa Morena sa Mantšiboa se bitšwa gape ka gore ke Segopotšo sa lehu la Kriste.

Ke ka Baka La’ng re Swanetše go Gopola Lehu la Jesu?

Karabo e ithekgile ka seo lehu leo le tswalanywago le sona. Jesu o hwile e le moemedi yo mogolo wa bogoši bja Jehofa. Ka gona o ile a hlatsela gore Sathane o bolela maaka ka go dira tatofatšo ya gore batho ba hlankela Modimo e le feela ka mabaka a boithati. (Jobo 2:1-5; Diema 27:11) Ka go hwa e le motho yo a phethagetšego, Jesu gape o ile a “neêla bophelô bya xaxwe xore e bê topollô ya ba bantši.” (Mateo 20:28) Ge Adama a be a dira sebe malebana le Modimo, o ile a lahlegelwa ke bophelo bjo bo phethagetšego le ditebelelo tša bjona. Eupša “Modimo ó ratile lefase [la batho] xakaakaa, a bá a le nea Morwa wa xaxwe e a tswetšwexo à  nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) Ka kgonthe, “moputsô wa sebe ké lehu; ’me neô ya kxauxêlô ya Modimo ké bophelô byo bo sa felexo ka Jesu Kriste Mong ’a rena.”—Ba-Roma 6:23.

Ka baka leo, lehu la Jesu Kriste le tswalanywa le dipontšho tše pedi tša lerato tše dikgolo ka go fetišiša—lerato le legolo leo Jehofa a le bontšhitšego batho ka go nea Morwa wa gagwe le lerato la boikgafo leo Jesu a le bonagaditšego bakeng sa batho ka go neela bophelo bja gagwe e le motho ka go rata. Segopotšo sa lehu la Jesu se gatelela dipontšho tše tše pedi tša lerato. Ka ge lerato le le bontšhwa go rena, na ga se ra swanela go bontšha tebogo ka baka la lona? Tsela e nngwe ya go dira bjalo ke ka go ba gona segopotšong sa Sejo sa Morena sa Mantšiboa.

Seo se Emelwago ke Senkgwa le Beine

Ge Jesu a be a hloma Sejo sa Morena sa Mantšiboa, o ile a diriša senkgwa le senwelo sa beine e khwibidu e le diswantšhetšo. Jesu o ile a tšea senkgwa, gomme “[ka morago ga go leboga, NW] a re xo se ngwatha a re: Tšeang Le jê; [senkgwa se] ké mmele wa-ka o newaxo ka ’baka la lena.” (1 Ba-Korinthe 11:24) Senkgwa se be se swanetše go ngwathwa e le gore se abje le go lewa ka ge e be e le senkgwa seo se omilego seo se dirilwego ka folouro le meetse tšeo di se nago komelo. Ka Mangwalong, komelo e swantšhetša sebe. (Mateo 16:11, 12; 1 Ba-Korinthe 5:6, 7) Jesu o be a se na sebe. Ka baka leo, mmele wa gagwe wo o phethagetšego wa motho o dirile e le sehlabelo sa topollo se se swanelago bakeng sa batho. (1 Johane 2:1, 2) Ke mo go swanetšego gakaakang gore senkgwa seo se dirišitšwego go emela mmele wa Kriste wo o se nago sebe e be se se sa omelwago!

Jesu gape o ile a lebogela senwelo sa beine e sekilego e khwibidu gomme a re: “Senwêlô sé ké Kxwêranô e mphsa mo mading a-ka.” (1 Ba-Korinthe 11:25) Beine e khwibidu ka senwelong e swantšhetša madi a Jesu. Go etša ge madi a dipoo le dipudi tšeo di dirilwego dihlabelo a be a tiiša kgwerano ya Molao magareng ga Modimo le setšhaba sa Isiraele ka 1513 B.C.E., madi a Jesu ao a tšholotšwego lehung le ona a ile a tiiša kgwerano e mpsha.

Ke Bomang Bao ba Swanetšego go ja le go nwa?

Gore re tsebe bao ge e le gabotse ba swanetšego go ja diswantšhetšo tša Segopotšo, re swanetše go kwešiša morero wa kgwerano e mpsha le gore ke bomang bao e lego karolo ya yona. Beibele e bolela gore: “Tsebang! Xo tlo tla letšatši le ke tl’o xo dira kxwêranô e mphsa le ba leloko la Isiraele le la Juda. Ó r’yalo Morêna. . . . Ke tlo bea melaô ya-ka matswalong a bôná, ke tlo e tlôka dipelong tša bôná. Ké tlo ba Modimo wa bôná; ’me bôná e tlo ba sethšaba sa-ka. . . . Ke tlo ba lebalêla molato wa bôná, ke se hlwê ke xopola sebe sa bôná.”—Jeremia 31:31-34.

Kgwerano e mpsha e dira gore go be le mohuta o kgethegilego wa tswalano le Jehofa Modimo. Ka kgwerano ye, sehlopha se itšego sa batho se fetoga batho ba gagwe gomme yena e ba Modimo wa bona. Molao wa Jehofa o ngwadilwe ka gare ga bona, ka dipelong tša bona, gomme gaešita le bao e sego ba-Juda ba bolotšego ba ka tsena tswalanong ya kgwerano e mpsha le Modimo. (Ba-Roma 2:29) Mongwadi wa Beibele e lego Luka o ngwala ka morero wa Modimo wa go ‘lebiša tlhokomelo ditšhabeng le go ntšha go tšona batho ba leina la gagwe.’ (Ditiro 15:14, bapiša le NW.) Go ya ka 1 Petro 2:10, “kgalê [e be e] se setšhaba; ’me byale [ke] sethšaba sa Modimo.” Mangwalo a bolela ka bona e le “ba-Isiraele ba Modimo,” e lego Isiraele ya moya. (Ba-Galatia 6:16; 2 Ba-Korinthe  1:21) Ka gona, kgwerano e mpsha ke kgwerano magareng ga Jehofa Modimo le Isiraele ya moya.

Bošegong bja gagwe bja mafelelo le barutiwa ba gagwe, Jesu ka noši le yena o ile a dira kgwerano e fapanego le bona. O ile a ba botša gore: “Ke dira kgwerano le lena bjalo ka ge Tate a dirile kgwerano le nna, bakeng sa mmušo.” (Luka 22:29, NW) Ye ke kgwerano ya Mmušo. Palo ya batho ba sa phethagalago bao ba amogetšwego kgweranong ya Mmušo ke 144 000. Ka morago ga go tsošetšwa legodimong, ba tla buša le Kriste e le dikgoši le baperisita. (Kutollo 5:9, 10; 14:1-4) Ka baka leo, bao ba lego kgweranong e mpsha le Jehofa Modimo gape ba kgweranong ya Mmušo le Jesu Kriste. Ke bona feela bao ba swanelegago go ja diswantšhetšo tša Sejo sa Morena sa Mantšiboa.

Bao ba swanetšego go ja diswantšhetšo tša Segopotšo ba tseba bjang gore ba tswalanong ya moswana-noši le Modimo le gore ke bajabohwa gotee le Kriste? Paulo o a hlalosa: “Môya-mokxêthwa Yêna mong ké hlatse ya xo kwana le môya wa rena [boemo bja rena bja kgopolo], hlatse ya xo re re bana ba Modimo. Byale, xe re le bana, xôna re baji ba bohwa, baji ba bohwa ba Modimo, ba xo ja bohwa le Kriste; xobane re tlo ba rè tlaišexile le Yêna, ra tlo kxôna xo fiwa letaxô le Yêna.”—Ba-Roma 8:16, 17.

Ka moya wa gagwe o mokgethwa goba matla a šomago, Modimo o tlotša bajabohwa ba Kriste. Se se dira gore ba kgonthišege gore ke bajabohwa ba Mmušo. Se bopa kholofelo ya legodimong go Bakriste ba tloditšwego. Ba lebelela tšohle tšeo Beibele e di bolelago mabapi le bophelo bja legodimong di lebišitšwe go bona. Go oketša moo, ba ikemišeditše go gafa dilo tšohle tša lefaseng, go akaretša bophelo lefaseng le ditswalano ka moka le batho. Gaešita le ge Bakriste bao ba tloditšwego ka moya ba lemoga gore bophelo lefaseng la Paradeise e tla ba bjo bo kgahlišago, ye ga se kholofelo ya bona. (Luka 23:43) Ba na le kholofelo ya legodimong yeo e sa fetogego gomme ba ja diswantšhetšo tša Segopotšo ka mo go swanetšego, e sego ka baka la dipono tša bodumedi bja maaka eupša ka baka la go šoma ga moya wa Modimo.

Anke re re motho o tloga a sa kgonthišege gore o kgweranong e mpsha le kgweranong ya Mmušo. Go thwe’ng ge e ba a bile a sa hlatselwe ke moya wa Modimo gore ke mojabohwa gotee le Kriste? Gona o tla ba a dira phošo ka go ja diswantšhetšo tša Segopotšo. Ka kgonthe, Modimo a ka se thabe ge e ba motho a ipolela ka boomo e le yo mongwe wa bao ba bileditšwego go ba kgoši ya legodimo le moperisita mola ge e le gabotse a sa ka a bitšwa.—Ba-Roma 9:16; Kutollo 22:5.

Le Swanetše go Gopolwa Gakae?

Na lehu la Jesu le swanetše go gopolwa beke le beke goba mohlomongwe gaešita le letšatši le letšatši? Ge e le gabotse, Kriste o hlomile Sejo sa Morena sa Mantšiboa gomme o ile a bolawa ka tsela ye e sego ya toka ka Letšatši la Paseka. Ka ge e be e binwa gatee feela ka ngwaga, ka Nisani 14, Paseka e be e le go gopolwa ga go lokollwa ga ba-Isiraele bokgobeng bja Egipita. (Ekisodo 12:6, 14; Lefitiko 23:5) Ka baka leo, lehu la ‘Kriste paseka ya rena’ le swanetše go gopolwa gatee feela ngwaga le ngwaga, e sego beke le beke goba letšatši le letšatši. (1 Ba-Korinthe 5:7) Ge ba bina Sejo sa Morena sa Mantšiboa, Bakriste ba latela mokgwa o swanago bjale ka ge Jesu a dirile ge a be a se hloma.

Bjale-ge, ke eng seo se bolelwago ke mantšu a Paulo a rego: “Ka mehla xe Le e-ja senkxwa sé, Lè e-nwa senwêlô sé, Le tsebatšê lehu la Morêna xo fihla xe a e-tla”? (1 Ba-Korinthe 11:26) Temaneng ye, Paulo o dirišitše lentšu leo le bolelago gore “nako le nako ge” goba “neng le neng.” Ka  go rialo, o be a bolela gore neng le neng ge Bakriste ba tloditšwego ba e-ja diswantšhetšo, ba be ba tla tsebatša tumelo ya bona sehlabelong sa Jesu sa topollo.

Bakriste ba tloditšwego ba be ba tla gopola lehu la Kriste “xo fihla xe a e-tla.” Go gopola mo go be go tla tšwela pele go fihlela Kriste a e-tla bakeng sa go amogela balatedi ba gagwe ba tloditšwego legodimong ka go ba tsošetša bophelong bja moya nakong ya “maboô” a gagwe. (1 Ba-Thesalonika 4:14-17) Se se dumelelana le mantšu a Kriste go baapostola ba 11 ba botegago a rego: “Xe ke ya xo Le lokišetša sebaka, ke tlo boa ka Le tšea, xore mo Nna ke lexo xôna le lena Le bê xôna.”—Johane 14:3.

Segopotšo se Bolela’ng go Wena?

Na go bohlokwa go ja diswantšhetšo tša Segopotšo e le gore re ka holega sehlabelong sa Jesu le go hwetša bophelo bjo bo sa felego lefaseng? Aowa. Ka Beibeleng, ga go na selo seo se bontšhago gore batho ba boifago Modimo ba bjalo ka Noage, Aborahama, Sara, Isaka, Rebeka, Josefa, Moše le Dafida le ka mohla ba tla ja diswantšhetšo tše ka morago ga go tsošetšwa lefaseng. Go e na le moo, bona le ba bangwe ka moka bao ba kganyogago bophelo bjo bo sa felego lefaseng ba tla swanelwa ke go bontšha tumelo go Modimo le Kriste le tokišetšong ya Jehofa ya sehlabelo sa Jesu sa topollo. (Johane 3:36; 14:1) Gore o hwetše bophelo bjo bo sa felego, le wena o swanetše go bontšha tumelo e bjalo. Go ba gona ga gago segopotšong sa lehu la Kriste sa ngwaga le ngwaga go tla go gopotša sehlabelo seo se segolo gomme go swanetše go nweletša tebogo ya gago ka sona.

Moapostola Johane o gateletše bohlokwa bja sehlabelo sa Jesu ge a be a re: “Ke Le ngwalêla ditaba tšé [batlotšwa-gotee], xore Le se kê la dira dibe. Xe xo ka ba le e a diraxo dibe, xôna re na le Morapeledi xo Tata wešo, Jesu Kriste Yêna Moloki. Ké Yêna seloba sa dibe tša rena; xomme xa se sa tša rena fêla; ké Yêna seloba sa dibe tša lefase ka moka.” (1 Johane 2:1, 2) Batlotšwa ba ka bolela gore sehlabelo sa Jesu se bipa dibe tša bona. Eupša ebile ke mohuta wa sehlabelo sa dibe tša lefase ka moka seo se dirago gore bophelo bjo bo sa felego bo kgonege bakeng sa batho bao ba kwago!

Na o tla ba gona ka April 4, 2004 go tla go gopola lehu la Jesu? Segopotšo se se tla swarwa lefaseng ka bophara ke Dihlatse tša Jehofa mafelong ao di bokanago go ona. Ge e ba o e-ba gona, o tla holega ka go theetša polelo e bohlokwa kudu ya Beibele. O tla gopotšwa ka bontši bja dilo tšeo Jehofa Modimo le Jesu Kriste ba re diretšego tšona. Ebile e tla ba mo go putsago moyeng go bokana le bao ba nago le tlhompho e tseneletšego kudu ka Modimo, Kriste le sehlabelo sa Jesu sa topollo. Tiragalo ye e ka ba ya matlafatša kganyogo ya gago ya go bontšhwa botho bjo bo sa swanelago bja Modimo bjo bo lebišago bophelong bjo bo sa felego. O se ke wa dumelela selo se go šitiša. E-ba gona segopotšong se se se ruthetšago pelo seo se tumišago le go kgahliša Tatago rena wa legodimong, Jehofa Modimo.

[Caption on page 5]

Lehu la Jesu le tswalanywa le dipontšho tše pedi tša lerato tše dikgolo ka go fetišiša

[Caption on page 6]

Senkgwa se se sa omelwago le beine ke diswantšhetšo tše di swanelago tša mmele wa Jesu wo o se nago sebe le madi a gagwe a tšholotšwego