Phihlelo

Boikgafo bjo Bonyenyane bo re Tlišeditše Ditšhegofatšo tše Dikgolo

KA GE GO ANEGA GEORGE LE ANN ALJIAN

Nna le mosadi wa-ka le ka mohla ga se ra ka ra nagana gore ka letšatši le lengwe re tla ka ra gakantšha lentšu “morutiši” le lentšu “legotlo.” Le ka mohla ga se ra ka ra nagana gore nywageng ya rena ya bo-60 re tla ba re naganišiša ka ditlhaka tšeo di ngwadilwego ka tsela e sa tlwaelegago ka maiteko a go leka go boledišana le batho bao ba tšwago Bohlabela bja Kgole. Lega go le bjalo, se ke seo nna le Ann re ilego ra se dira mafelelong a bo-1980. E re re go botše kamoo boikgafo bjo bonyenyane bjo re ilego ra bo dira go theoša le nywaga bo ilego bja re tlišetša ditšhegofatšo tše dintši.

KE BE ke e-tšwa lapeng la setlogo sa ma-Amernia gomme ke be ke tsena Kereke ya ma-Armenia. Ann e be e le wa Roma Katholika. Bobedi bja rena re ile ra tlogela ditumelo tša rena tša bodumedi ge re be re nyalana ka 1950. Ke be ke e-na le nywaga e 27, gomme Ann o be a e-na le nywaga e 24. Re ile ra dula phapošing yeo e bego e le ka godimo ga lebenkele la-ka la go hlatswa diaparo (dry-cleaning) kua Jersey City, New Jersey, U.S.A. Ka nako yeo ke be ke šetše ke e-na le kgwebo yeo ka nywaga e ka bago e mene.

Ka 1955 re ile ra reka ntlo e botse ya diphapoši tše tharo tša go robala kua Middletown, New Jersey. Ntlo yeo e be e le kgole ka dikhilomithara tše ka bago 60 le kgwebo ya-ka yeo ke bego ke šoma go yona matšatši a tshela ka beke. Ke be ke fihla gae ka morago ga nako bošegong bjo bongwe le bjo bongwe. Kgokagano e nnoši yeo ke bego ke e-na le yona le Dihlatse tša Jehofa e be e le ge di be di e-tla lebenkeleng la-ka nako le nako gomme di ntshepedišetša dipuku tša Beibele. Ke be ke bala dipuku ka kgahlego e kgolo. Gaešita le ge kgwebo ya-ka e be e tšea nako ya-ka e ntši le go tsepamiša ga-ka kgopolo, ke ile ka hlagolela tlhompho e tseneletšego bakeng sa Beibele.

Go se go ye kae ke ile ka lemoga gore seteišene sa radio sa Watchtower, e lego WBBR, se be se gaša mananeo a dithuto tša Beibele ka nako yeo ke bego  ke otlela ge ke e-ya le ge ke boa lebenkeleng la-ka. Ke ile ka theetša mananeo a ka kelohloko, gomme kgahlego ya-ka e ile ya gola go fihla bokgoleng bjoo ke ilego ka kgopela Dihlatse gore di nketele. Ka November 1957, George Blanton o ile a nketela legaeng la-ka gomme a thoma thuto ya Beibele le nna.

Lapa la Rena e ba le le Kopanego Borapeding bjo bo Sekilego

Ann o ile a ikwa bjang ka tše ka moka? E re a go anegele.

“Mathomong ke be ke ganetša ka mo go feteletšego. Ke be ke šitiša kudu nakong ya thuto ya George ya Beibele moo a ilego a phetha ka go yo ithutela lefelong le lengwe, gomme a dira bjalo ka dikgwedi tše seswai. Ka nako yeo, George o ile a thoma go ya dibokeng Holong ya Mmušo ka Disontaga. Ke nakong yeo mo ke ilego ka tseba gore o be a ikemišeditše ka thuto ya gagwe ya Beibele ka gobane leo e be e le lona letšatši la gagwe le nnoši la go se ye mošomong. Lega go le bjalo, o ile a dula e le monna yo a lokilego le tate—yo kaone le go feta—gomme boemo bja-ka bja kgopolo bo ile bja thoma go fetoga. Ge e le gabotse, ka dinako tše dingwe ge ke dutše ke phumola lerole tafolaneng ya ka phapošing ya bodulo ge go be go se na yo a lebeletšego, ke be ke tšea makasine wa Phafoga! woo George a bego a o tlogela moo ka mehla gomme ke o bala. Ka dinako tše dingwe, George o be a mpalela dihlogo tšeo di lego ka go Phafoga! tšeo di bego di sa bolele ka go lebanya ka dithuto tša bodumedi eupša e le tšeo ka dinako tšohle di bego di godiša Mmopi.

“Mantšiboeng a mangwe ge George a be a tšwile a ile thutong ya gagwe ya Beibele le Ngwanabo rena Blanton, ke ile ka tšea kgatišo e nngwe yeo ngwana wa rena wa nywaga e mebedi, e lego George, a bego a e beile tafoleng yeo e lego kgaufsi le malao a-ka. E be e bolela ka kholofelo bakeng sa bahu. Gaešita le ge ke be ke lapile, ke ile ka thoma go e bala ka gobane makgolo o be a sa tšwa go hwa, gomme ke be ke nyamile kudu. Kapejana ke ile ka bona le go kwešiša therešo ya Beibele ya gore bahu ga ba tlaišege lefelong le lengwe le gore ba tla boela bophelong ka tsogo ya nakong e tlago. Gatee-tee ke be ke šetše ke phafogile ka malaong, ke bala ka phišego le go thalela dintlha tšeo ke bego ke nyaka go di bontšha George ge a boa gae go tšwa thutong ya gagwe ya Beibele.

“Monna wa-ka o be a sa kgolwe gore ke sa dutše ke le yena motho yola a mo tsebago. Ge a be a tloga gae, ke be ke ganetša, gomme mo nakong ye ke be ke kgahlilwe kudu ke ditherešo tše di kgahlišago tša Beibele tšeo ke ithutilego tšona! Re ile ra se robale go ba go fihla diiring tša mesong re bolela ka Beibele. George o ile a ntlhalosetša morero wa Modimo ka lefase. Bošegong bjona bjoo ke ile ka mmotšiša ge e ba a ka se kgone go swarela thuto ya gagwe ka gae e le gore ke kgone go kopanela le bona.

“Ngwanabo rena Blanton o ile a kgothaletša gore le bana ba swanetše go ba gona thutong ya rena. Re be re nagana gore e sa le ba banyenyane kudu, ka ge yo mongwe a be a e-na le nywaga e mebedi gomme yo mongwe a e-na le e mene. Lega go le bjalo, Ngwanabo rena Blanton o ile a re bontšha Doiteronomio 31:12, yeo e rego: ‘O phuthêlê sethšaba mmôxô, banna le basadi le bana . . . ba kwê, ba ithutê.’(Mongwalo o sekamego ke wa rena.) Re ile ra thabela tlhahlo yeo gomme ra ba ra rulaganyetša gore bana ba nee dikarabo nakong ya thuto  ya Beibele. Re be re lokišeletša dikarabo tša rena re le gotee, eupša ga se ra ka ra ba botša seo ba swanetšego go se bolela. Re nagana gore se se ile sa thuša go hlahla bana ba rena gore ba dire therešo gore e be ya bona. Re tla dula re leboga tlhahlo yeo Ngwanabo rena Blanton a ilego a re nea yona e le go thuša lapa la rena gore le gole moyeng.”

Ditlhohlo Tšeo di Nyakago Boikgafo

Mo nakong ye ka ge re be re le ba kopanego go ithuteng Beibele, re be re e-na le ditlhohlo tše difsa tšeo re swanetšego go lebeletšana le tšona. Ka ge lebenkele la-ka le be le le kgole, gantši ke be ke sa boe gae go ba go fihla ka iri ya senyane mantšiboa. Ka baka la se, ke be ke sa kgone go ba gona dibokeng tša gare ga beke, gaešita le ge ke be ke kgona go ba gona ka Disontaga. Ka nako yeo, Ann o be a e ba gona dibokeng ka moka gomme o be a tšwela pele ka go akgofa. Le nna ke be ke nyaka go ba gona dibokeng ka moka gotee le go swara thuto ya lapa yeo e nago le morero. Ke be ke tseba gore ke swanetše go ikgafa ka tsela e itšego. Ka gona ke ile ka dira phetho ya go fokotša diiri tša-ka tša kgwebo, gaešita le ge ke be ke le kotsing ya go lahlegelwa ke ba bangwe ba bareki ba-ka.

Seo se ile sa šoma gabotse. Re be re lebelela thuto ya Beibele e le ya bohlokwa go swana le diboka tše dingwe tše hlano tša Holong ya Mmušo. Re be re e bitša seboka sa botshelela. Seo se be se bolela gore re be le letšatši le le kgethegilego le nako—Laboraro la beke e nngwe le e nngwe ka 8:00 p.m. Ka dinako tše dingwe ka morago ga dijo tša mantšiboa, ge re fetša go hlatswa dibjana, yo mongwe wa rena o be a tla re, “Nako ya ‘seboka’ e šetše e batametše!” Ann o be a tla thoma thuto ge e ba ke be ke fihlile ka morago ga nako, gomme ke be ke tšwela pele ka thuto gatee-tee ka morago ga ge ke se no fihla.

Selo se sengwe seo se ilego sa re boloka re matlafetše ebile re le batee bjalo ka lapa e be e le go bala temana ya letšatši re le gotee mesong. Lega go le bjalo, go ile gwa ba le bothata bja go rulaganyetša se. Yo mongwe le yo mongwe o be a tsoga ka nako ya gagwe. Re ile ra boledišana ka se gomme ra dira phetho ya gore ka moka re tla tsoga ka nako e swanago, ra fihlola ka 6:30 a.m., gomme ra ahla-ahla temana ya letšatši re le gotee. Se se ile sa ipontšha e le sa mohola kudu go rena. Ge barwa ba rena ba be ba gola, ba ile ba kgetha go tsenela tirelo ya Bethele. Re nagana gore dipoledišano tše tša ka mehla di ile tša kgatha tema boemong bja bona bja moya.

Ditokelo tša ka Morago ga Kolobetšo di be di Nyaka Boikgafo bjo Bogolo

Ke kolobeditšwe ka 1962, gomme ka morago ga go ba le kgwebo ya-ka ka nywaga e 21, ke ile ka e rekiša gomme ka hwetša mošomo tikologong ya gešo gore ke be kgaufsi le lapa la-ka e le gore re kgone go hlankela Jehofa re le gotee. Se se ile sa bula tsela bakeng sa ditšhegofatšo tše dintši. Re ile ra bea pakane ya gore re tla tsenela bodiredi bja nako e tletšego. Seo se ile sa thoma mathomong a bo-1970 ge morwa wa rena yo mogolo, e lego Edward, a be a e ba modiredi wa nako e tletšego goba mmulamadibogo wa ka mehla, kapejana ka morago ga go fetša sekolong se se phagamego. Go se go ye kae ka morago, morwa wa rena George o ile a thoma go bula madibogo, gomme Ann le yena kapejana o ile a latela. Boraro bja bona ba be ba nkgothatša kudu, ka gobane ba be ba mpotša diphihlelo tšeo ba bilego le tšona tirelong ya tšhemo. Re le lapa re ile ra boledišana ka tsela yeo ka yona re ka dirago gore bophelo bja rena bo be bonolo e le gore ka moka re kgone go ba tirelong ya nako e tletšego. Re ile ra phetha ka gore re rekiše ntlo. Re dutše ka ntlong yeo ka nywaga e 18 ebile re godišeditše bana ba rena moo. Re be re tloga re rata ntlo ya rena kudu, eupša Jehofa o ile a šegofatša phetho ya rena ya go e rekiša.

Edward o ile a laletšwa go ya Bethele ka 1972, gomme George, ka 1974. Gaešita le ge nna le Ann re be re ba hlologelwa kudu, ga se ra ka ra naganišiša ka tsela yeo ka yona e bego e tla ba mo go thabišago gore ba dule kgaufsi le rena, ba nyale le go ba le bana. Go e na le moo, re ile ra thabela gore barwa ba rena ba hlankela Jehofa kua Bethele. * Re dumelelana  le Diema 23:15, e rego: “Ngwan’a-ka! Xe pelo y’axo e hlalefa, le nna pelo ya-ka e tlo thaba.”

Re Ile ra Tsenela Tirelo ya Bobulamadibogo bjo bo Kgethegilego

Ka ge barwa ba rena ba babedi ba le Bethele, re ile ra tšwela pele re bula madibogo. Ke moka ka letšatši le lengwe ka 1975, re ile ra amogela lengwalo leo le re laletšago go tsenela modiro wa bobulamadibogo bjo bo kgethegilego tšhemong e sa abjago kua Clinton County, Illinois. Seo se ile sa re makatša gakaakang! Se se be se bolela gore re be re swanetše go tloga New Jersey, moo re bego re le kgaufsi le barwa ba rena kua New York ebile re e-na le bagwera le ba leloko. Lega go le bjalo, re ile ra lebelela kabelo ye e le e tšwago go Jehofa gomme ra dira boikgafo bjoo bo ilego bja re tlišetša ditšhegofatšo tše difsa.

Ka morago ga dikgwedi tše sego kae tša go šoma tšhemong e sa abjago, re ile ra thoma go swarela diboka holong yeo go swarelwago dipokano tša batho ba setšhaba kua Carlyle, Illinois. Eupša re be re nyaka lefelo leo re ka bokanago go lona ka mehla. Ngwanabo rena wa tikologong yeo le mosadi wa gagwe ba ile ba hwetša lefelo leo le bego le e-na le mokutwana o monyenyane kudu woo re ilego ra kgona go o hira. Re ile ra o hlwekiša—mokutwana gotee le tikologo ya wona ka moka—gomme ra o dira lefelo le lenyenyane la go swarela seboka. Re gopola ka lethabo pere yeo e bego e rata go tseba ka rena. Gantši e be e tsenya hlogo ya yona ka lefasetere gore e bone seo se bego se direga ka sebokeng!

Ge nako e dutše e e-ya, Phuthego ya Carlyle e ile ya thongwa, gomme re be re thabetše kudu gore re ile ra tšea karolo go se. Re be re thušwa ke banyalani ba bafsa ba babulamadibogo, e lego Steve le Karil Thompson, bao le bona ba bego ba tlile go tlo šoma tšhemong e sa abjago. Ba ga Thompson ba ile ba dula moo ka nywaga e mmalwa gomme ka morago ba ya Sekolong sa Beibele sa Watchtower sa Gilead ba ba ba hudugela kabelong ya boromiwa kua Afrika Bohlabela, moo ba hlankelago modirong wa bosepedi.

Go se go ye kae lefelo la rena le lenyenyane la go swarela seboka le be le thoma go tlala wa go falala, gomme re be re nyaka Holo e kgolwanyana. Ngwanabo rena yena yoo wa tikologong le mosadi wa gagwe ba ile ba re thuša gape ka go reka lefelo leo le bego le swanelega kudu bakeng sa Holo ya Mmušo. Re be re thabile gakaakang ge nywageng e sego kae ka morago re be re laletšwa go ya moletlong wa go neela Holo ya Mmušo yeo e sa tšwago go agwa kua Carlyle! Ke ile ka newa tokelo ya go fana ka polelo ya go neela Holo. Kabelo ya rena moo e be e le phihlelo e kgahlišago go rena, e le tšhegofatšo e tšwago go Jehofa.

Re Ile ra Bulegelwa ke Tšhemo e Mpsha

Ka 1979 re ile ra amogela kabelo e mpsha ya gore re ye kua Harrison, New Jersey. Re ile ra hlankela moo ka nywaga e ka bago 12. Nakong yeo re ile ra thoma thuto ya Beibele le mosadi wa mo-China, gomme se se ile sa lebiša dithutong tše dingwe tše dintši le batho ba ma-China. Go sa dutše go le bjalo, re ile ra lemoga gore barutwana ba dikete ba  ma-China le malapa a ona a be a dula tikologong ya rena. Ka baka la se, re ile ra kgothaletšwa go ithuta leleme la se-China. Gaešita le ge se se be se bolela go fetša nako letšatši le lengwe le le lengwe re ithuta leleme le, se ile sa feleletša ka dithuto tše dintši tše di thabišago tša Beibele le batho ba ma-China tikologong ya rena.

Nywageng yeo, re ile ra thabela maemo a mantši a segišago, kudu-kudu maitekong a rena a go leka go bolela se-China. Ka letšatši le lengwe Ann o ile a itsebiša e le “legotlo” la Beibele go e na le gore a re ke yena “morutiši” wa Beibele. Mantšu a a nyakile a swana kudu. Mong wa ntlo o ile a myemyela gomme a re: “Tsena hle. Le ka mohla ga se ka ka ka bolela le legotlo la Beibele.” Re sa dutše re thatafalelwa ke go bolela leleme le.

Ke moka re ile ra newa kabelo ya go ya lefelong le lengwe kua New Jersey moo re ilego ra kgona go tšwela pele re šoma tšhemong ya ma-China. Ka morago re ile ra laletšwa go hudugela Boston, Massachusetts, moo sehlopha sa ma-China se bego se dutše se gola mo e ka bago ka nywaga e meraro. E bile tokelo go rena go nea sehlopha se thekgo nywageng e šupa e fetilego le go thabela go se bona se fetoga phuthego ka January 1, 2003.

Ditšhegofatšo go tšwa Bophelong bja Boikgafo

Go Maleaki 3:10, re bala taletšo ya Jehofa go batho ba gagwe ya gore ba tliše dihlabelo tša bona e le gore a ba tšhollele ditšhegofatšo tša gagwe go ba go fihla ge go lekane. Re ile ra tlogela kgwebo yeo ke bego ke e kgahlegela kudu. Le gona re ile ra rekiša ntlo ya rena yeo re bego re e rata kudu. E bile re ile ra tlogela le dilo tše dingwe. Lega go le bjalo, ge re bapiša le ditšhegofatšo, boikgafo e be e le bjo bonyenyane.

Ka kgonthe, a ditšhegofatšo tše di humilego gakaakang tšeo Jehofa a re tšholletšego tšona! Re bile le kgotsofalo ya go bona bana ba rena ba arabela therešong, re bile le lethabo la go tsenela bodiredi bjo bo phološago maphelo bja nako e tletšego, le gona re ile ra bona ge Jehofa a hlokomela dinyakwa tša rena. Ka kgonthe, boikgafo bja rena bjo bonyenyane bo re tlišeditše ditšhegofatšo tše dikgolo!

[Mongwalo wa ka tlase]

[Seswantšho go letlakala 25]

Louise le George Blanton ba e na le Ann, ka 1991

[Seswantšho go letlakala 26]

Holo ya Mmušo ya kua Carlyle, e neetšwe ka June 4, 1983

[Seswantšho go letlakala 27]

Re e na le Phuthego ya Boston e sa tšwago go thongwa ya ma-China

[Seswantšho go letlakala 28]

Re e na le Edward, Connie, George le Grace