Dipotšišo tše Tšwago go Babadi

Ke ka baka la’ng 1 Ba-Korinthe 10:8 e re ba-Isiraele ba 23 000 ba ile ba bolawa ka letšatši letee ka baka la go dira bootswa, mola Numeri 25:9 e nea palo ya 24 000?

Go na le mabaka a mmalwa ao a ka tlaleletšago phapanong ya dipalo tšeo di neilwego ditemaneng tše tše pedi. Lebaka le bonolo e ka ba gore palo ya kgonthe mo gongwe e magareng ga 23 000 le 24 000, ka go rialo e dumelela palo gore e balelwe palong ya kgaufsi-ufsi ka mahlakoreng ka moka.

Ela hloko kgonagalo e nngwe. Moapostola Paulo o tsopotše pego ya ba-Isiraele ge ba be ba le Sithima e le mohlala wa temošo go Bakriste ba Korinthe ya bogologolo, e lego motse o bego o tsebja ka tsela ya ona ya bophelo ya go hloka molao. O ngwadile gore: “Le xôna re se kê ra dira bootswa, ra etša ba bangwê ba bôná ba naxo ba dira bootswa, xwa fedišwa ba dikete tše masome a mabedi a metšô e meraro ka ’tšatši le tee.” Ge a bolela ka bao ba ilego ba bolawa ke Jehofa ka baka la ge ba be ba dirile bootswa, Paulo o neile palo ya 23 000.—1 Ba-Korinthe 10:8.

Lega go le bjalo, Numeri kgaolo 25 e re botša gore “ba-Isiraele xe ba latêla Baali-Peoro ka mokxwa, wó, boxale bya Morêna bya ba tukêla.” Ke moka, Jehofa o ile a laela Moše gore a bolaye “baxolo bohle ba sethšaba.” Ka morago, Moše o ile a laela baahlodi gore ba phethe taelo yeo. Mafelelong, ge Finease a be a gata mogato ka go akgofa bakeng sa go bolaya mo-Isiraele yo a bego a tlišitše mosadi wa mo-Midiane mešašeng, “ya ba xôna xo fêla xa kôtlô.” Pego e phetha ka go bolela gore: “Ba ba hwilexo ka kôtlô yeo ké ba dikete tše masome a mabedi a metšô e menê.”—Numeri 25:1-9.

Go molaleng gore palo e neilwego go Numeri e akaretša “baxolo bohle ba sethšaba” bao ba bolailwego ke baahlodi le bao ba bolailwego ke Jehofa ka go lebanya. Go swanetše go ba go bile le bagolo ba sekete bao ba bolailwego ke baahlodi, seo sa tliša palo go 24 000. Go sa šetšwe gore bagolo ba goba baetapele ba dirile bootswa, ba bile le karolo menyanyeng goba ba dumelelane le bao ba bego ba dira bjalo, ba be ba e-na le molato wa go “latêla Baali-Peoro.”

Mabapi le lentšu “latêla,” puku e nngwe ya Beibele ya nyakišišo e hlalosa gore le ka bolela “go ikgomaretša go motho yo mongwe.” Ba-Isiraele e be e le batho bao ba ineetšego go Jehofa, eupša ge ba be ba “latêla Baali-Peoro,” ba ile ba senya tswalano ya bona ya boineelo go Modimo. Nywaga e ka bago 700 ka morago, Jehofa o ile a bolela ka ba-Isiraele ka moporofeta Hosea gore: “Bôná ba tsêna xo Baali Peoro; ba ikxêthêla tša dihlong, ba hlaswêxa byalo ka yêna moratwa eo wa bôná.” (Hosea 9:10) Bohle bao ba ilego ba dira bjalo ba be ba swanelwa ke kahlolo e šoro ya Modimo. Ka gona, Moše o ile a gopotša barwa ba Isiraele gore: “Mahlô a lena a bone se Morêna a se dirilexo Baali-Peoro; ka xobane bohle ba ba latetšexo Baali-Peoro, Morêna Modimo wa xaxo ó ba fedišitse a ba nthša mo xo wêna.”—Doiteronomio 4:3.