Go Tseba Sebata le Leswao

la Sona

NA O thabela go hlatholla nyepo? Gore o dire bjalo, o tsoma dilo tše di ka go hlahlago tšeo di ka go thušago gore o kgone go hwetša tlhathollo ya yona. Ka Lentšung la gagwe leo le buduletšwego, Modimo o nea dilo tše di nyakegago tšeo di ka re hlahlago ge e le mabapi le palo 666, leina goba leswao la sebata seo go bolelwago ka sona go Kutollo kgaolo 13.

Sehlogong se, re tla lebelela ditsela tše nne tše dikgolo tša go nea mabaka—dilo tša bohlokwa tšeo di ka re hlahlago—tšeo di tlago go utolla seo se bolelwago ke leswao la sebata. Re tla ahla-ahla (1) kamoo ka dinako tše dingwe maina a ka Beibeleng a kgethwago ka gona, (2) seo sebata e lego sona, (3) seo se bolelwago ke go ba ga palo 666 “palô ya motho” le (4) go ba bohlokwa ga palo 6 le lebaka leo ka lona e ngwadilwego ka makga a mararo e lego, 600 hlakanya le 60 hlakanya le 6 goba 666.—Kutollo 13:18.

Maina a ka Beibeleng —Ga e fo ba Maina Feela

Maina a ka Beibeleng gantši a na le seo a se bolelago ka tsela ya bohlokwa, kudu-kudu ge a neilwe ke Modimo. Ka mohlala, ka ge Aborama e be e tlo ba tatago ditšhaba, Modimo o ile a fetola leina la mopatriareka yo go ba Aborahama, leo le bolelago gore “Tatago Mašaba.” (Genesi 17:5) Modimo o ile a botša Josefa le Maria gore ba ree ngwana wa Maria yo a bego a tlo belegwa gore ke Jesu, yeo e bolelago gore “Jehofa ke Mophološi.” (Mateo 1:21; Luka 1:31) Ka go dumelelana le leina leo le nago le morero, ka bodiredi bja Jesu le lehu la gagwe la sehlabelo, Jehofa o ile a dira gore phologo ya rena e kgonege.—Johane 3:16.

Ka mo go swanetšego, leina-palo 666 leo le neilwego ke Modimo le swanetše go ba le emela seo Modimo a bonago e le go bonagatšwa ga dika tša sebata. Ge e le gabotse, gore re kwešiše dika tšeo re swanetše go tseba sebata ka bosona le go ithuta ka ditiro tša sona.

Sebata se Utolotšwe

Puku ya Beibele ya Daniele e hlabiša seetša se segolo mabapi le seo se bolelwago ke dibata tša seswantšhetšo. Kgaolo 7 e na le seswantšho se sebotse kudu sa “dibata tše nnê tše ditona-tona”—tau, phiri, nkwe le sebata se se tšhošago kudu seo se nago le meno a magolo a tšhipi. (Daniele 7:2-7) Daniele o re botša gore dibata tše di emela “dikgoši” goba mebušo ya bopolitiki, yeo e bušago mebušong e megolo ka go hlatlamana.—Daniele 7:17, 23.

Mabapi le sebata seo se lego go Kutollo 13:1, 2, The Interpreter’s Dictionary of the Bible e bontšha gore se “kopantše dika ka moka tša dibata tše nne tšeo di lego ponong ya Daniele . . . Ka mo go swanetšego, sebata se sa pele [seo se lego ka go Kutollo] se emela matla a kopantšwego a mebušo ka moka ya bopolitiki yeo e ganetšago Modimo mo lefaseng.” Taba ye e kgonthišetšwa ke Kutollo 13:7, yeo e bolelago ka sebata gore: “Sa fiwa matla a xo buša meloko le merafô le maleme le dithšaba tšohle.” *

 Ke ka baka la’ng Beibele e diriša dibata e le go swantšhetša mebušo ya batho? Bonyenyane ka baka la mabaka a mabedi. La pele, ka baka la pego ya tšhollo ya madi e boifišago yeo mebušo e bilego le yona go theoša le nywaga-kgolo. Radihistori Will le radihistori Ariel Durant ba ngwadile gore: “Ntwa ke e nngwe ya dilo tšeo di sa fetogego historing e bile ga se ya ka ya fokotšega ge go thoma tlhabologo le pušo ka batho.” E tloga e le therešo gakaakang gore “motho [o] buša motho xore a mo senyê”! (Mmoledi 8:9) Lebaka la bobedi ke gore “nôxa [Sathane] ya se fa matla a yôna, le sedulô sa boxoši bya yôna, le boxoši byo boxolo.” (Kutollo 12:9; 13:2) Ka baka leo, pušo ya batho e thomilwe ke Diabolo, ka go rialo e bonagatša dika tša gagwe tše di boifišago, boemo bja kgopolo bjo bo swanago le bja noga.—Johane 8:44; Ba-Efeso 6:12.

Lega go le bjalo, se ga se bolele gore mmuši yo mongwe le yo mongwe yo e lego motho ke sedirišwa sa Sathane ka go lebanya. Ge e le gabotse, ka lehlakoreng le lengwe, mebušo ya batho e šoma e le “bahlankedi ba Modimo,” e dira gore lekoko la batho e be le le tsepamego, gomme ka ntle le yona go be go tla tlala tšharakano. Le gona babuši ba bangwe ba ile ba šireletša ditshwanelo tša batho tša motheo, go akaretša le tshwanelo ya go tšea karolo borapeding bja therešo—e lego selo seo Sathane a sa se nyakego. (Ba-Roma 13:3, 4; Esera 7:11-27; Ditiro 13:7) Lega go le bjalo, ka baka la tutuetšo ya Diabolo, ga go na motho goba mokgatlo wa batho woo o ilego wa kgona go tliša khutšo ya sa ruri le tšhireletšego bathong. *—Johane 12:31.

“Palô ya Motho”

Lebaka la boraro leo le ka re hlahlago mabapi le seo se bolelwago ke palo 666 ke taba ya gore e bitšwa “palô ya motho.” Polelwana ye e be e ka se šupe go motho, ka gobane Sathane—e sego motho le ge e le ofe—o na le matla a go buša sebata. (Luka 4:5, 6; 1 Johane 5:19; Kutollo 13:2, 18) Go e na le moo, go ba ga sebata le “palô ya motho” goba leswao, go bolela gore se bonagatša mekgwa ya motho, e sego ya moya goba ya motemona, gomme ka go rialo se bile se bonagatša le dika tše itšego tša batho. Dika tše e ka ba e le dife? Beibele e araba ka gore: “[Batho] ba dirile dibe bohle, ba hlaya letaxô la Modimo.” (Ba-Roma 3:23) Ka go rialo, go ba ga sebata le “palô ya motho” go bontšha gore mebušo e bonagatša boemo bja batho bja sebe, e lego leswao la sebe le go se phethagale.

Histori e hlatsela se. Yo e bego e le Mongwaledi wa Mmušo wa United States Henry Kissinger o itše: “Tlhabologo e nngwe le e nngwe yeo e kilego ya ba gona mafelelong e ile ya fela. Histori ke pego ya maiteko ao a ilego a palelwa, ya maikemišetšo ao a bego a sa lemogwe . . . Ka gona, bjalo ka radihistori, motho o swanetše go phela ka  maikwelo a sa phemegego a manyami.” Tsheka-tsheko e botegago ya Kissinger e nea bohlatse bja therešo ye ya motheo ya Beibele e rego: “Motho tsela y’axwe xa’ e buše; le monna mo a yaxo xa’ ikiše, le xe a xata a tiiša.”—Jeremia 10:23.

Ka ge bjale re tsebile sebata le go kwešiša tsela yeo Modimo a se lebelelago ka gona, re boemong bja go hlahloba karolo ya mafelelo ya nyepo ya rena—palo tshela le lebaka leo ka lona e ngwadilwego ka makga a mararo—e lego 600 hlakanya le 60 hlakanya le 6.

Ke ka Baka La’ng Tshela e Boeleditšwe ka Makga a Mararo?

Ka Mangwalong, dipalo tše itšego di bohlokwa ka tsela ya seswantšhetšo. Ka mohlala, palo šupa gantši e dirišwa go swantšhetša selo se se feletšego goba se se phethagetšego mahlong a Modimo. Ka mohlala, beke ya Modimo ya tlholo e na le ‘matšatši’ a šupa goba lebaka le le oketšegilego la nako, leo ka lona Modimo a ilego a phetha ka mo go feletšego morero wa gagwe wa tlholo ka lefase. (Genesi 1:3–2:3) ‘Mantšu’ a Modimo a swana le silifera yeo e šetšego e “tološitšwe xa-šupa,” ka go rialo e sekišitšwe ka tsela e phethagetšego. (Psalme 12:6; Diema 30:5, 6) Naamane wa molephera o ile a botšwa gore a hlape ka Nokeng ya Jorodane ka makga a šupa ao ka morago ga ona a ilego a fodišwa ka mo go feletšego.—2 Dikxoši 5:10, 14.

Tshela e hlaelela ka tee gore e be šupa. Na e ka se be seswantšhetšo se se swanetšego bakeng sa selo seo se sa phethagalago goba seo se sa felelago mahlong a Modimo? Ee, go tloga go le bjalo! (1 Koronika 20:6, 7) Go feta moo, go ngwala tshela ka makga a mararo, go etša palo 666, go gatelela ka matla go se phethagale moo. Gore ye ke pono e nepagetšego go gatelelwa ke taba ya gore palo 666 ke “palô ya motho,” go etša ge re šetše re bone. Ka gona, ditiro tša kgale tša sebata, go ba ga sona le “palô ya motho” le palo 666 ka boyona ka moka di šupa go phetho e tee feela yeo e lego molaleng—tlhaelelo e feletšego le go palelwa mahlong a Jehofa.

Go bonagatšwa ga go palelwa ga sebata go dira gore re gopole seo se ilego sa bolelwa ka Kgoši Belesatsara wa Babele ya bogologolo. Ka Daniele, Jehofa o ile a botša mmuši yoo gore: “O etšwe boima wa hwetšwa O le yo bohwêfê.” Belesatsara o ile a bolawa bošegong bjona bjoo, gomme Mmušo o matla wa Babele o ile wa wa. (Daniele 5:27, 30) Ka mo go swanago, kahlolo ya Modimo yeo e yago go sebata sa tša bopolitiki le go bao ba swailwego ka leswao la sona e bolela bofelo bja sebata seo le bathekgi ba sona. Lega go le bjalo, mo nakong ye Modimo a ka se fediše feela tshepedišo ya tša bopolitiki eupša o tla fediša mohlala o mongwe le o mongwe wa pušo ya batho. (Daniele 2:44; Kutollo 19:19, 20) Ka go rialo, ke gabohlokwa gakaakang gore re efoge go ba le leswao leo le bolayago la sebata!

Leswao le Hlalositšwe

Gatee-tee ka morago ga go utolla palo 666, Kutollo e bolela ka balatedi ba 144 000 ba Kwana, e lego Jesu Kriste, bao diphatleng tša bona go ngwadilwego leina la gagwe le leina la Tatagwe, e lego Jehofa. Maina a a hlaola bao ba bitšwago ka ona e le ba Jehofa le Morwa wa gagwe, yoo ba thabelago  go nea bohlatse ka yena. Ka mo go swanago, bao ba nago le leswao la sebata ba ipolela e le bao ba ikokobeletšago sebata. Ka go rialo, go sa šetšwe gore leswao le ka letsogong le letona goba phatleng, ka tsela ya seswantšhetšo, ke seka seo se hlaolago yoo a bitšwago ka lona e le yo a neago thekgo ya borapedi go tshepedišo ya bopolitiki ya lefase yeo e swanago le sebata. Bao ba nago le leswao ba nea “Kesara” seo ka tshwanelo e lego sa Modimo. (Luka 20:25; Kutollo 13:4, 8; 14:1) Ba dira se bjang? Ka go nea tlhompho ya borapedi go mmušo wa bopolitiki, diswantšho tša wona le matla a wona a tša bohlabani, woo go ona ba tsomago kholofelo le phološo. Borapedi le ge e le bofe bjoo ba bo neago Modimo wa therešo e fo ba boipolelo bja molomo.

Ka mo go fapanego, Beibele e re kgothaletša gore: “Se boteng maxoši e lexo bana ba batho, bao xo sexo phološô xo bôná. Môya wa motho o a tloxa, ’me yêna o boêla mmung wa xaxwe; mohla woo ké mo xo fêlaxo maanô a motho.” (Psalme 146:3, 4) Bao ba theetšago keletšo yeo e bohlale ga ba nyame kudu ge mebušo e palelwa ke go phethagatša dikholofetšo tša yona goba ge baetapele bao ba nago le tutuetšo e kgolo ba e-wa ditulong tše di phagamego.—Diema 1:33.

Se ga se bolele gore Bakriste ba therešo ba fo dula gomme ba se dire selo ka mathata a batho. Ka mo go fapanego, ba bolela ka mafolofolo ka mmušo o nnoši woo o tlago go rarolla mathata a batho—Mmušo wa Modimo woo ba o emelago.—Mateo 24:14.

Mmušo wa Modimo—Kholofelo e Nnoši ya Batho

Ge a be a le lefaseng, Jesu o ile a dira gore Mmušo wa Modimo e be sehlogo se segolo sa boboledi bja gagwe. (Luka 4:43) Thapelong ya gagwe ya mohlala, yeo ka dinako tše dingwe e bitšwago Thapelo ya Morena, Jesu o ile a ruta balatedi ba gagwe go rapelela Mmušo woo gore o tle le gore thato ya Modimo e dirwe mo lefaseng. (Mateo 6:9, 10) Mmušo wo ke pušo yeo e tlago go buša lefaseng ka moka, e sego go tšwa motseng-mošate o itšego wa mo lefaseng, eupša go tšwa legodimong. Ka go rialo, Jesu o ile a o bitša “mmušô wa maxodimo.”—Mateo 11:12.

Ke mang yo a swanelwago gakaone ke go ba Kgoši ya Mmušo woo go feta Jesu Kriste, yoo a ilego a hwela balata ba gagwe ba nakong e tlago? (Jesaya 9:5, 6; Johane 3:16) Go se go ye kae Mmuši yo yo a phethagetšego, yoo ga bjale e lego sebopiwa se matla sa moya, o tla lahlela sebata, dikgoši tša sona le madira a sona ka “bodibeng bya mollô o tukaxo thsêbêla,” e lego seka seo se bontšhago phedišo e feletšego. Eupša ga go felele fao. Jesu gape o tla fediša Sathane, e lego selo seo le ka mohla go sego motho yo a ka kgonago go se dira.—Kutollo 11:15; 19:16, 19-21; 20:2, 10.

Mmušo wa Modimo o tla tliša khutšo go balata ba ona ka moka bao ba kwago. (Psalme 37:11, 29; 46:8, 9) Gaešita le manyami, bohloko le lehu di ka se sa hlwa di e ba gona. A tebelelo e kgahlišago gakaakang go bao ba dulago ba se na leswao la sebata!—Kutollo 21:3, 4.

[Mengwalo ya ka tlase]

[Lepokisi go letlakala 5]

Dilo Tšeo di ka Neago Tlhahlo ka Seo se Bolelwago ke Palo 666

1. Maina a ka Beibeleng gantši a bolela se sengwe ka dika le bophelo bja bao ba bitšwago ka ona, go etša boemong bja Aborahama, Jesu le ba bangwe ba bantši. Ka mo go swanago leina-palo la sebata le emela dika tša sona.

2.Ka pukung ya Beibele ya Daniele, dibata tše di fapa-fapanego di emela mebušo ya batho yeo e hlatlamanago. Sebata se se momaganego seo se lego go Kutollo 13:1, 2 se emela tshepedišo ya bopolitiki ya lefase ka bophara yeo e matlafatšwago le go laolwa ke Sathane.

3.Go ba ga sebata le “palô ya motho” go bontšha gore se na le dika tša motho e sego tša motemona. Ka go rialo, se bonagatša go palelwa ga batho moo go bakwago ke sebe le go se phethagale.

4.Mahlong a Modimo, palo tshela, yeo e sa felelago gore e be šupa yeo ka Beibeleng e bolelago go felela le go phethagala, e bontšha go se phethagale. Leswao 666 le gatelela go se felele moo ka go bušeletša palo ye ka makga a mararo.

[Caption on page 6]

Starving child: UNITED NATIONS/Photo by F. GRIFFING

[Caption on page 6]

Pušo ya batho e ipontšhitše e le e palelwago, gomme e emelwa gabotse ke palo 666

[Caption on page 7]

Jesu Kriste o tla tliša pušo e phethagetšego lefaseng