Koketšego ya Mmušo go sa Šetšwe Ntwa Liberia

NTWA ya selegae e be e dutše e kgatlampana kua Liberia mo e ka bago ka godimo ga ngwaga-some. Bogareng bja 2003, marabele a be a šetše a lwetše gore a tsene ka motseng-mošate, e lego Monrovia. Dihlatse tša Jehofa tše dintši di ile tša gapeletšega go tšhaba magaeng a tšona, ka dinako tše dingwe leboelela. Dithoto di be di hulwa nako le nako.

Ka manyami, go ile gwa bolawa batho ba dikete ntweng ya ka mošate. Gare ga bona go be go e na le Dihlatse tše pedi, ngwanabo rena le kgaetšedi. Bana babo rena ba bangwe ba ile ba lebeletšana bjang le mathata, gomme go ile gwa dirwa’ng bakeng sa go ba thuša?

Thušo Bakeng sa Bao ba e Nyakago

Nakong ka moka ya mathata, ofisi ya lekala ya Dihlatse tša Jehofa ya Liberia e ile ya dira thulaganyo ya go nea thušo go bao ba e nyakago. Go ile gwa abja dijo, dilo tša bohlokwa tša ka lapeng le ditlabakelo tša tša kalafo. Nakong yeo marabele a bego a laola karolo ya boema-kepe, dijo di ile tša thoma go hlaela. Lekala le be le bone boemo bjo e sa le pele gomme le be le e-na le dithušo bakeng sa Dihlatse tše dikete tše pedi tšeo di bego di tšhabetše Diholong tša Mmušo go dikologa motse o mogolo. Bana babo rena ba ile ba aba dijo ka go lekanyetša moo di ilego tša swarelela go ba go fihla ge boema-kepe bo thoma go dirišwa gape. Bobedi lekala la Belgium le la Sierra Leone a ile a romela ditlabakelo tša tša kalafo ka sefofane, gomme bobedi lekala la Brithania le la Fora a ile a romela diaparo ka sekepe.

Go sa šetšwe go ba tlalelong, bana babo rena ba ile ba dula ba e-na le boemo bjo bobotse bja kgopolo le go dula ba thabile. Seo se boletšwego ke yo mongwe yoo a tšhabilego legaeng la gagwe ka makga a mararo e be e le se se tlwaelegilego go ba bantši. O itše: “A ke maemo ao re rutago batho ka ona; re phela mehleng ya bofelo.”

Go Arabela Ditabeng tše Dibotse

Go sa šetšwe khuduego ya setšhaba ka moka, Dihlatse di tšwela pele di e-ba le mafelelo a mabotse kudu tšhemong. Go bile le tlhora e phagamego ka go fetišiša ya bagoeledi ba Mmušo ba 3 879 ka January 2003, gomme ka February ba ile ba swara dithuto tša magae tša Beibele tše 15 227.

Batho ba arabela ditabeng tše dibotse ka go akgofa. Mohlala wa se o tšwa motsaneng wo o lego karolong ya ka borwa-bohlabela bja naga. Phuthego e ile ya rulaganyetša go bina Segopotšo sa lehu la Kriste motsaneng o mogolo wa Bewahn, wo o ka bago bokgole bja mosepelo wa diiri tše hlano go tloga moo gantši e kopanelago gona. Pele bana babo rena ba e-ya motsaneng go yo laletša batho Segopotšong, taletšo e ile ya newa ramotse wa Bewahn. Ge a se no e amogela, o ile a tšea Beibele ya gagwe, a ya go batho ba motse, gomme a bala lengwalo leo le bontšhitšwego taletšong, a ba kgothaletša go ya Segopotšong. Ka gona ge bagoeledi ba fihla, ba ile ba hwetša gore modiro wa bona o šetše o dirilwe! Ramotse, gotee le bana ba gagwe le basadi ba gagwe ba babedi, ba ile ba tla Segopotšong. Palo-moka ya bao ba bilego gona e bile batho ba 27. Ga e sa le go tloga ka yona nako yeo, ramotse o ile a tlogela go tsena Kereke ya Methodist, gomme a thoma go ithuta le Dihlatse, a ba a neela ka lefelo la go aga Holo ya Mmušo.

 Go Fetoga ga Boemo bja Kgopolo

Boitshwaro bja bana babo rena le bjona bo be bo dutše bo šoma ka katlego go fetoleng pono ya bao ba ganetšago therešo. Ela hloko mohlala wa monna yo a bitšwago Opoku. Modiredi wa mmulamadibogo yo a kgethegilego o ile a gahlana le yena tirelong ya tšhemo gomme a mo sepedišetša makasine wa Morokami. Opoku o be a kgahlegela sehlogo seo se lego ka makasineng eupša a se na tšhelete. Ge a hlalosa gore ga o lefelelwe, mmulamadibogo o ile a mo tlogelela makasine gomme a rulaganyetša go mo etela gape. Leetong la gagwe la go boela, Opoku o ile a botšiša mmulamadibogo gore: “Na o a ntseba? Batho ba lena ba bantši mo motseng wa Harper ba a ntseba. Ke be ke tlwaetše go raka bana ba lena sekolong!” Ke moka o ile a hlalosa gore e be e le yena hlogo ya sekolo se se phagamego sa motseng le gore o ile a tlaiša bana ba Dihlatse tša Jehofa ka ge ba be ba sa dumediše folaga.

Lega go le bjalo, mehlala e meraro ya lerato la Bokriste leo le ilego la bonagatšwa ke Dihlatse tša Jehofa e ile ya dira gore Opoku a hlahlobe boemo bja gagwe bja kgopolo lefsa. Sa pele, o ile a bona Dihlatse di hlokomela ngwanabo rena wa moya yoo a bego a babja o šoro. Di ile tša ba tša rulaganyetša gore a hwetše kalafo nageng ya kgaufsi. Opoku o be a nagana gore ngwanabo rena yoo yo a babjago e be e le motho yo a tumilego kudu gare ga Dihlatse eupša o ile a lemoga gore e be e fo ba Hlatse e tlwaelegilego. Sa bobedi, ka bo-1990, Opoku e be e le mofaladi kua Côte d’Ivoire. Ka letšatši le lengwe ge a be a nyorilwe, o ile a ya go yo reka meetse go lesogana le lengwe. Opoku o be a swere tšhelete e kgolo feela gomme lesogana le be le se na tšhentši, ka gona le ile la dumelela Opoku gore a tšee meetse ka ntle le tefo. Ge lesogana le be le nea Opoku meetse le ile la mmotšiša gore: “Na o nagana gore re tla ka ra bona nako yeo ka yona batho ba ba swanago le nna le wena ba tlago go fana dilo ka ntle le go kgopela tšhelete?” Opoku o ile a akanya gore e be e le yo mongwe wa Dihlatse tša Jehofa, gomme lesogana le ile la dumela gore ke lona Hlatse. Go ba le seatla se se bulegilego le botho ga ngwanabo rena yo go ile gwa mo kgahla kudu. Mafelelong, go rata ga mmulamadibogo yo a kgethegilego go mo nea makasine ka ntle le gore a o lefelele go ile gwa kgodiša Opoku gore pono ya gagwe ka Dihlatse e be e fošagetše le gore o be a swanetše go fetola boemo bja gagwe bja kgopolo. O ile a tšwela pele moyeng gomme mo nakong ye ke mogoeledi yo a sa kolobetšwago.

Gaešita le ge bana babo rena ba Liberia ba tšwela pele ba lebeletšane le maemo a thata kudu, ba bota Modimo le go tsebatša ka potego ditaba tše dibotse tša mabapi le maemo a kaone ka tlase ga pušo ya go loka ya Mmušo wa Modimo. Jehofa a ka se ke a lebala go šoma ga bona ka thata le lerato leo ba le bontšhago bakeng sa leina la gagwe.—Ba-Hebere 6:10.

[Caption on page 30]

MONROVIA

[Caption on page 31]

Nakong ya mathata, batho ba Jehofa ba nea thušo ya moya le ya nama go bao ba e nyakago