Na o Tsepeletše Moputsong?

BOLWETŠI bjo bo keka ganyenyane-ganyenyane. Mathomong, bo fokotša go bona ga motho ka mahlakoreng. Ge bo tlogelwa bo sa alafša, bo ka tsenelela go ya bogareng bja go bona. Mafelelong, bo ka baka bofofu ka mo go feletšego. Bolwetši bjo ke’ng? Ke glaucoma—sebaki se segolo sa bofofu.

Go fo etša ge re ka lahlegelwa ganyenyane-ganyenyane le ka mokgwa o sa lemogegego ke go bona ka tsela ya kgonthe, re ka lahlegelwa le ke sebopego se bohlokwa kudu sa go bona—pono ya rena ya moya. Ka gona, ke gabohlokwa gore re lebelele ditaba tša moya e le tša bohlokwa bjo bogolo.

Go Tsepelela Moputsong

Gare ga dilo “tše di sa bonwexo” mahlong a rena a kgonthe, ke moputso o kgahlišago wa bophelo bjo bo sa felego bjo Jehofa a bo neago babotegi ba gagwe. (2 Ba-Korinthe 4:18) Ke therešo gore lebaka le legolo leo ka lona Bakriste ba hlankelago Modimo ke gore ba a mo rata. (Mateo 22:37) Lega go le bjalo, Jehofa o nyaka gore re lebelele pele moputsong wa rena. O nyaka gore re mo lebelele e le Tate yo a fago kudu le yo ‘a putsago bao ba mo nyakago.’ (Ba-Hebere 11:6) Ka gona, bao ruri ba tsebago Modimo le go mo rata ba tšeela godimo ditšhegofatšo tša gagwe tše di holofeditšwego gomme ba hlologetše go phethagatšwa ga tšona.—Ba-Roma 8:19, 24, 25.

Babadi ba bantši ba makasine wo gotee le wo o sepedišanago le wona e lego Phafoga!, ba thabela diswantšho tšeo di bontšhago lefase la Paradeise leo le tlago. Ke therešo gore ga re tsebe gabotse gore lefase la Paradeise le tla lebelelega bjang, gomme diswantšho tšeo di gatišwago e fo ba diswantšho tša bokgabo tšeo di theilwego ditemaneng tša Beibele tše bjalo ka Jesaya 11:6-9. Lega go le bjalo, mosadi yo mongwe wa Mokriste o itše: “Ge ke bona diswantšho tša Paradeise e tlago ka go Morokami le Phafoga!, ke di hlahlobišiša kudu go etša ge motho a tla dira bjalo ka poroutšha ya tša maeto. Ke leka go ipona ka leihlo la kgopolo ke le moo ka gobane mo ke moo ruri ke holofetšego go ba gona ka nako ya Modimo e swanetšego.”

Moapostola Paulo o ile a ikwa ka tsela e swanago mabapi le ‘go biletšwa ga gagwe legodimong.’ Ga se a ka a itebelela e le yo a šetšego a fihleletše seo ka gobane o be a swanetše go ipontšha a botega go fihla bofelong. Eupša o ile a tšwela pele a “ôbêlêla tša kwa pele.” (Ba-Filipi 3:13, 14) Ka mo go swanago, Jesu o kgotleletše lehu koteng ya tlhokofatšo “ka baka la lethabo leo le bego le beilwe ka pele ga gagwe.”—Ba-Hebere 12:2, NW.

Na o kile wa belaela ge e ba o tla tsena lefaseng le lefsa? E tloga e le mo gobotse go se ikholofele go feta tekano, ka ge go hwetša ga rena moputso wa bophelo go ithekgile ka go dula ga rena re botega go fihla bofelong. (Mateo 24:13) Lega go le bjalo, ge e ba re dira sohle seo re ka se kgonago go fihlelela dinyakwa tša Modimo, re na le mabaka ka moka a go holofela go hwetša moputso. Gopola gore Jehofa “xa a rate xe xo na le ba ba lahlêxaxo;  ó rata xe bohle ba ka fihlêla thsokoloxô.” (2 Petro 3:9) Ge e ba re bota Jehofa, o tla re thuša go fihlelela pakane ya rena. Ka kgonthe, go tsoma mabaka a go dira gore bao ba lekago ka potego go mo kgahliša ba se swanelege go lwantšhana le semelo sa gagwe.—Psalme 103:8-11; 130:3, 4; Hesekiele 18:32.

Go tseba kamoo Jehofa a ikwago ka gona ka batho ba gagwe go re nea kholofelo—e lego seka seo se lego bohlokwa go swana le tumelo. (1 Ba-Korinthe 13:13) Lentšu la Segerika le le fetoletšwego e le “kholofelo” ka Beibeleng le rwele kgopolo ya go “holofela se sebotse” ka phagahlo. A naganne ka kholofelo e bjalo, moapostola Paulo o ngwadile gore: “Se re se dumaxo ké xore ka moka xa lena Le bônwê Lè na le phišêxô e byalo, xo fêlê xo phêthêxa se re se holofetšexo, xo bê xo fihlê bofêlô, Xore Le se kê la ba ba botšwá eupya ka tumêlô Le kxôtlêlêlê Le bê baetši ba bao ba ruilexo tše di holofedišitšwexo.” (Ba-Hebere 6:11, 12) Ela hloko gore ge e ba re tšwela pele re hlankela Jehofa ka potego, re ka kgodišega ka go phethagala ga kholofelo ya rena. Ka go se swane le dikholofelo tše dintši tša lefase, kholofelo ye “xa e lahletše.” (Ba-Roma 5:5) Ka gona, re ka boloka bjang kholofelo ya rena e phadima gomme re tsepeletše go yona?

Kamoo re ka Kaonefatšago Pono ya Rena ya Moya

Mahlo a rena a kgonthe a ka se kgone go tsepelela dilong tše pedi ka nako e tee. Go bjalo le ka pono ya rena ya moya. Go tsepelela dilong tša tshepedišo ya gona bjale, ruri go tla šira ka tsela e itšego lefase le lefsa le le holofeditšwego la Modimo ka megopolong ya rena. Ge nako e dutše e e-ya, seswantšho se seo se sa bonalego gabotse se ka no se sa ipiletša goba sa fo nyamelela. Seo se ka ba kotsi gakaakang! (Luka 21:34) Ka gona, ke gabohlokwa gakaakang gore re boloke ‘leihlo le le lokilego’—e lego leihlo leo le dulago le tsepeletše Mmušong wa Modimo le moputsong wa bophelo bjo bo sa felego!—Mateo 6:22.

Go boloka leihlo le le lokilego ga se ka mehla go lego bonolo. Mathata a letšatši le letšatši a nyaka tlhokomelo ya rena, gomme ditšhitišo—gaešita le diteko—di ka direga. Ka tlase ga maemo a, ke bjang re ka dulago re tsepeletše Mmušong le lefaseng le lefsa leo le holofeditšwego la Modimo ka ntle le go hlokomologa mediro e mengwe e bohlokwa? Anke re ahla-ahleng ditsela tše tharo.

Ithute Lentšu la Modimo letšatši le letšatši. Go bala Beibele ka mehla le go ithuta dikgatišo tše di theilwego Beibeleng go re thuša go boloka menagano ya rena e tsepamišeditšwe dilong tša moya. Ke therešo gore re ka ba re ithutile Lentšu la Modimo ka nywaga e mentši, eupša re swanetše go tšwela pele re ithuta lona go etša ge re nyaka go tšwela pele re e-ja dijo tša nama e le gore re tšwele pele re phela. Ga re kgaotše go ja e le feela ka baka la gore re jele dijo tše dintši nakong e fetilego. Ka gona, go sa šetšwe gore re tlwaelane le Beibele gakaakang, go yona re nyaka phepo e tšwelago pele le ya ka mehla ya moya e le gore re boloke kholofelo ya rena e phela gomme tumelo ya rena le lerato di le matla.—Psalme 1:1-3.

Naganišiša ka tebogo ka  Lentšu la Modimo. Ke ka baka la’ng go naganišiša go le bohlokwa? Go bohlokwa ka baka la mabaka a mabedi. La pele, go naganišiša go re thuša gore re kgone go tsenya ka kgopolong seo re se balago le go hlagolela tebogo e tšwago pelong bakeng sa sona. La bobedi, go naganišiša go dira gore re se lebale Jehofa, mediro ya gagwe e makatšago le kholofelo yeo a e beilego ka pele ga rena. Ka mohlala: Ba-Isiraele bao ba tlogilego Egipita le Moše ba ile ba bona ka mahlo a bona dipontšho tša matla a Jehofa a boifišago. Le gona, ba ile ba latswa tšhireletšo ya gagwe ge a dutše a ba fihliša bohweng bja bona. Lega go le bjalo, go se go ye kae, ge ba-Isiraele ba fihlile lešokeng gomme ba lebile Nageng ya Kholofetšo, ba ile ba thoma go ngongorega, ba bontšha go hloka tumelo mo go šoro. (Psalme 78:11-17) Bothata bja bona e be e le eng?

Batho ba ile ba šuthiša go tsepelela ga bona go Jehofa le kholofelong e kgahlišago yeo a e beilego pele ga bona gomme ba go šuthišetša boiketlong bja bona bja nakwana le dilong tša nama. Go sa šetšwe dipontšho tša mehlolo le dimakatšo tšeo bona ka noši ba di hlatsetšego, ba-Isiraele ba bantši ba ile ba fetoga babelaedi ba go hloka tumelo. Psalme 106:13 e re: “Ba se diêxe xo lebala ’tirô tša [Jehofa].” (Mongwalo o sekamego ke wa rena.) Go se šetše mo go bjalo mo go sa lokafatšwego go ile gwa dira gore moloko woo o se tsene Nageng ya Kholofetšo.

Ka gona, ge o bala Mangwalo goba dithušo tša go ithuta Beibele, iphe nako ya go naganišiša ka seo o se balago. Go naganišiša mo go bjalo go bohlokwa bakeng sa go phela ga gago gabotse moyeng le go gola. Ka mohlala, ge o bala Psalme 106 yeo ka boripana e tsopotšwego ka mo godimo, naganišiša ka dika tša Jehofa. Ela hloko kamoo a ilego a kgotlelela le go gaugela ba-Isiraele. Bona kamoo a ilego a dira seo a ka se kgonago go ba thuša go fihla Nageng ya Kholofetšo. Ela hloko kamoo ba ilego ba tšwela pele ba rabela go yena. Nagana ka tlalelo le bohloko tša Jehofa ge kgaugelo le kgotlelelo tša gagwe di be di lekwa go fihla tekanyong e itšego ke batho bao ka manganga ba bego ba sa leboge. Go feta moo, ka go naganišiša ka ditemana 30 le 31, tšeo di hlalosago go emela ga Finease go loka ka go tia le ka sebete, re kgodišega gore Jehofa ga a lebale babotegi ba gagwe le gore o ba putsa kudu.

Diriša melao ya motheo ya Beibele bophelong bja gago. Ge re dutše re latela melao ya motheo ya Beibele, re iponela ka noši gore keletšo ya Jehofa e a šoma. Diema 3:5, 6 e re: “Bô΄ta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” Nagana mabapi le kamoo tsela ya go hloka boitshwaro ya batho e ilego ya baka mathata a monagano, a maikwelo le a mmele. Ka go lemalela boithabišo bja nakwana, batho ba bjalo ba buna nywaga—gaešita le bophelo ka moka—ya madimabe. Ka mo go fapanego kudu, bao ba sepelago ‘tseleng e pitlaganego’ ba latswa e sa le pele bophelo tshepedišong e mpsha gomme se se ba kgothaletša go tšwela pele tseleng e išago bophelong.—Mateo 7:13, 14; Psalme 34:8.

Go diriša melao ya motheo ya Beibele e ka ba tlhohlo. Ka dinako tše dingwe, tharollo yeo e sego ya mangwalo e ka bonagala e holofetša kimologo ya kapejana boemong bjo bo lekago. Ka mohlala, dinakong tša mathata a tša ditšhelete,  re ka lekega ka go bea dikgahlego tša Mmušo boemong bja bobedi. Lega go le bjalo, bao ba dirago dilo ka tumelo le go kgomarela pono ya bona ya moya, ba kgodišegile gore mafelelong “ba-šia-Modimo ba tlo lêtlêxêlwa.” (Mmoledi 8:12) Ka dinako tše dingwe Mokriste a ka swanelwa ke go šoma nako e oketšegilego, eupša le ka mohla a a se ke a swana le Esau yo a ilego a nyatša dilo tša moya, a di phaela ka thoko e le tše di sego bohlokwa.—Genesi 25:34; Ba-Hebere 12:16.

Jesu o hlalositše gabotse boikarabelo bja rena re le Bakriste. Re swanetše go ‘tsoma mmušo wa Modimo pele le toko ya wona.’ (Mateo 6:33) Ge e ba re dira bjalo, Jehofa o tla re bontšha lerato la gagwe la bo-tate ka go kgonthišetša gore re na le seo re se nyakago ka lehlakoreng la nama. Ruri ga a nyake gore re ikimetše ka go belaela ka dilo tšeo a bolelago gore o tla di hlokomela. Pelaelo e bjalo e sa swanelago e ka swana le glaucoma ya moya—ge e ba e hlokomologwa, ganyenyane-ganyenyane e tla fokotša go bona ga rena gore re bone feela dilo tše di bonagalago gomme mafelelong e re dire gore re foufale moyeng. Ge e ba re dula boemong bjoo, letšatši la Jehofa le tla re wela godimo go “etša sefu.” Seo e tla ba masetla-pelo gakaakang!—Luka 21:34-36.

Dula o Tsepeletše Moputsong go Etša Jošua

Anke re duleng re tsepeletše kholofelong ya rena e kgahlišago ya Mmušo, re bee mediro e mengwe maemong a yona a swanetšego. Ka go phegelela mokgweng wa ka mehla wa go ithuta, go naganišiša le go diriša melao ya motheo ya Beibele, re ka dula re kgodišegile ka kholofelo ya rena go etša ge Jošua a dirile. Ge a be a hlahlile ba-Isiraele go tsena Nageng ya Kholofetšo, o itše: “A nkè Le lemoxeng ka pelo ka moka le ka môya ka moka, xe xo sa ka xwa hlaêla le setee sa tše botse tše Morêna Modimo wa lena a Le boletšexo ka tšôna; ka moka di tšweletše; xa xo na le setee se se hlokexilexo.”—Jošua 23:14.

Eka kholofelo ya Mmušo e ka go matlafatša, gomme anke e go thabiše go etša ge e bonagatšwa dikgopolong, maikwelong, diphethong le medirong ya gago.—Diema 15:15; Ba-Roma 12:12.

[Caption on page 21]

Na o kile wa belaela ge e ba o tla tsena lefaseng le lefsa?

[Caption on page 22]

Go naganišiša ke karolo e bohlokwa ya thuto ya Beibele

[Caption on page 23]

Dula o tsepeletše dikgahlegong tša Mmušo