Na re Swanetše go Rapela Barongwa Bakeng sa Thušo?

NA KE mo go swanetšego go rapela barongwa dinakong tša tlalelo? Batho ba bantši ba nagana bjalo. Ge e le gabotse, New Catholic Encyclopedia e re: “Motho o rapela . . . barongwa . . . eupša e le feela ka kgopolo ya gore ba ka šoma e le bo-mmaditsela ba rena pele ga Modimo.” Na re swanetše go rapela barongwa gore ba šome e le bo-mmaditsela ba rena?

Lentšu la Modimo le nea maina a barongwa ba babedi feela ba ba botegago ba Modimo, e lego Mikaele le Gabariele. (Daniele 8:16; 12:1; Luka 1:26; Juda 9) Ka ge maina a a boletšwe ka Beibeleng, re lemoga gore morongwa yo mongwe le yo mongwe ke motho wa moya yo a kgethegilego yo a nago le leina, e sego feela matla a itšego ao e sego a motho. Lega go le bjalo, barongwa ba bangwe ba ile ba gana go utolla maina a bona. Ka mohlala, ge Jakobo a be a kgopela morongwa yo a bego a mo etetše gore a mmotše leina la gagwe, o ile a gana go dira bjalo. (Genesi 32:29; Baahlodi 13:17, 18) Ga gwa newa lelokelelo la maina a barongwa ka Beibeleng, ka go rialo seo se šireletša batho gore ba se ba nee tlhokomelo e sa swanelago.

O mongwe wa mediro ya barongwa ke go fetišetša batho melaetša e tšwago go Modimo. Ge e le gabotse, mantšu a mathomo a Sehebere le Segerika ao a fetoletšwego e le “morongwa,” a bolela “motseta.” Lega go le bjalo, barongwa ga ba šome e le bo-mmaditsela bao ba tlišago dithapelo tša batho sedulong sa bogoši sa Yo a Phagamego Kudu. Modimo o laetše gore dithapelo di lebišwe go yena ka leina la Morwa wa gagwe, Jesu Kriste, yo a itšego: ‘Se le kago se kgopela go Tate ka leina la-ka, o tla le nea sona.’—Johane 15:16; 1 Timotheo 2:5.

Le ka mohla Jehofa Modimo ga se a swarega kudu gore a ka re theetša ge e ba re mmatamela ka tsela e swanetšego. Beibele e nea kgonthišetšo ye: “Morêna ó kxaufsi le bohle ba mmitšaxo, le bohle ba e rexo xe ba mmitša ba rereša.”—Psalme 145:18.