Palo 666 Ga e fo ba Nyepo

“Xo se bê le e a kxônaxo xo rêka le xo rekiša, xe e se eo a naxo le leswaô la leina la Sebata, le xe e le palô ya leina la sôna. Moo xo nyaka bohlale; e a naxo le thlaoloxanyô a a hlathê palô ya Sebata, xobane ké palô ya motho. Palô ya sôna ké makxolo a selêlaxo a naxo le masome a selêlaxo a metšô e selêlaxo.”—Kutollo 13:17, 18.

DITABA tše sego kae ka Beibeleng di tsošitše kgahlego e kgolo le go tshwenyega go etša ge go dirile boporofeta bja mabapi le leswao leo le makatšago goba leina la “sebata”—e lego palo 666. Thelebišeneng le go Internet, gotee le dipaesekopong, dipukung le dimakasineng, leswao la sebata e be e dutše e le kakanyo yeo go lebišwago tlhokomelo go yona ka go se kgaotše.

Ba bangwe ba dumela gore palo 666 ke leswao la ka Beibeleng la ba-lwa-le-Kriste. Ba bangwe ba bolela gore e emela sebopego se itšego sa leswao leo yo mongwe le yo mongwe a swanetšego go ba le lona, go etša mokgwailo goba microchip ye e bjetšwego mothong yeo e hlaolago motho e le mohlanka wa sebata. Lega go le bjalo ba bangwe ba dumela gore palo 666 ke leswao la bo-mopapa ba Katholika. Ka go tšeela legato dipalo tša se-Roma ka ditlhaka tšeo di lego ka sebopego sa leina la kgonthe la mopapa, e lego Vicarius Filii Dei (Vicar wa Morwa wa Modimo), gotee le go fetola dipalo ka gonyenyane, ba ile ba hwetša palo 666. Le gona go bolelwa gore palo yona yeo e ka balelelwa go tšwa leineng la Selatine la Mmušiši wa Roma Diocletian le go tšwa phetolelong ya Sehebere ya leina la Kesara Nero. *

Lega go le bjalo, dikgopolo-kakanywa tše le ditlhaloso tšeo di hlamilwego di fapane kudu le seo Beibele ka boyona e se bolelago mabapi le leswao la sebata, go etša ge re tla bona sehlogong se se latelago. Beibele e utolla gore bao ba nago le leswao la sebata ba tla welwa ke bogale bja Modimo ge a tliša bofelo tshepedišong ya dilo ya gona bjale. (Kutollo 14:9-11; 19:20) Ka gona, go kwešiša seo se bolelwago ke palo 666, go feta kudu go fo tlhatholla nyepo e raraganego. Ka mo go thabišago, Jehofa Modimo, e lego yena mothofatšo wa lerato le Mothopo wa seetša sa moya, ga se a tlogela bahlanka ba gagwe ba le lefsifsing tabeng ye e bohlokwa.—2 Timotheo 3:16; 1 Johane 1:5; 4:8.

[Mengwalo ya ka tlase]