Ge Thato ya Modimo e Dirwa Lefaseng

GE Jesu a be a ruta barutiwa ba gagwe go rapela ka gore, “Mmušô wa xaxo a o tlê thatô ya xaxo a e dirwê mono lefaseng,” o be a bolela bjalo ka motho yo a kilego a dula legodimong le Tatagwe. (Mateo 6:10; Johane 1:18; 3:13; 8:42) Boemong bja Jesu bja pele ga ge a e ba motho, o be a kile a phela nakong yeo dilo ka moka tšeo di bego di direga bobedi legodimong le lefaseng di bego di dumelelana le thato ya Modimo. Tšeo e be e le dinako tša katlego le kgotsofalo.—Diema 8:27-31.

Tlholo ya Modimo ya pele e bile dibopiwa tša moya, “Barongwa ba xaxwe, . . . baxale ba matla ba xo dira ka Lentšu la xaxwe.” E be e le “bahlanka ba xaxwe ba xo dira tše di mo kxahlaxo” e bile e sa dutše e le bona. (Psalme 103:20, 21) Na o mongwe le o mongwe wa bona o be a e-na le thato ya gagwe ka noši? Ee, ge go be go bopša lefase, ‘bana ba ba Modimo ba ile ba opa magofsi.’ (Jobo 38:7) Go opa ga bona magofsi go be go bonagatša lethabo la bona ka seo Modimo a bego a se rerile, gomme ba ile ba dumelelanya thato ya bona le ya gagwe.

Ka morago ga go bopa lefase, Modimo o ile a le lokišeletša gore le dulwe ke batho gomme mafelelong a bopa monna wa pele le mosadi. (Genesi kgaolo 1) Na se le sona se be se swanetše go opelwa magofsi? Pego e buduletšwego e re: “Ya re xe Modimo a lebêlêla tšohle tše a di dirilexo, a bôna e le tše botse kudu,” ee, di se na bosodi, e le tše di phethagetšego.—Genesi 1:31.

Na thato ya Modimo e be e le efe bakeng sa batswadi ba rena ba pele gotee le bana ba bona? Go ya ka Genesi 1:28, le yona e be e le e botse kudu: “Modimo a ba šexofatša, a bolêla le bôná a re: Tswalang Le atê, tlalang lefase, Le le fenyê Le bušê ’hlapi tša lewatlê le ’nonyana tša xodimo, le nyabanyaba yohle ya diphedi mó ’faseng.” E le gore ba phethe taelo yeo e kgahlišago, batswadi ba rena ba pele ba be ba tla swanelwa ke gore ba tšwele pele ba phela—ka mo go sa felego—gomme go be go tla ba bjalo le ka bana ba bona. Ga go na selo seo se ilego sa bonala se tla feleletša ka masetla-pelo, go hloka molao, manyami goba lehu.

Ye e be e le nako yeo ka yona thato ya Modimo e bego e dirwa bobedi legodimong le lefaseng. Bao ba bego ba phela ka go dumelelana le thato ya gagwe ba be ba hwetša lethabo le legolo ka go dira bjalo. Go senyegile kae?

Go ile gwa rotoga tlhohlo e sa letelwago ya malebana le Modimo. Ga se gore e be e le yeo e ka se rarollegego. Lega go le bjalo, e ile ya dira gore go be le nako e telele ya manyami yeo e bego e tla baka kgakanego e kgolo mabapi le thato ya Modimo bakeng sa batho. Ka moka ga rena re bahlaselwa ba se. Tlhohlo yeo e be e le efe?

Thato ya Modimo Nakong ya Borabele

O mongwe wa ‘bana ba Modimo’ ba moya o ile a bona gore a ka kgona go tsena-tsenana le thato ya Modimo bakeng sa batho, gomme leano la gagwe e be e le go ikhweletša mehola. Ge sebopiwa se sa moya se dutše se naganišiša ka taba ye ka mo go oketšegilego, ke mo e ilego ya bonagala e kgonega gomme ya thoma go ba e kgahlišago kudu. (Jakobo 1:14, 15) Se ka ba se ile sa nea mabaka ka gore ge e ba se be se ka dira gore batho ba babedi ba pele ba theetše sona go e na le gore ba theetše Modimo, gona Modimo o be a tla gapeletšega gore a kgotlelele pušo ya lenaba. Se ka ba se ile sa nagana gore Modimo o be a ka se ba fediše, ka gobane seo se be se tla bolela go palelwa ga morero  wa Modimo. Go e na le moo, Jehofa Modimo o be a tla swanelwa ke go fetoša morero wa gagwe, a amogele boemo bja morwa yo wa gagwe wa moya yoo dibopiwa tša Gagwe tšeo e lego batho di bego di tla ba di mo theetša mo nakong ye. Ka mo go swanetšego, lerabele leo ka morago le ile la bitšwa Sathane, yeo e bolelago, “Moganetši.”—Jobo 1:6.

Ka go dumelelana le kganyogo ya gagwe, Sathane o ile a batamela mosadi. O ile a mo kgothaletša gore a hlokomologe thato ya Modimo gomme a thome go ipuša boitshwarong, ka go bolela gore: ‘Le ka se ke la hwa lehu. Le tla ba bjalo ka Modimo la tseba botse le bobe.’ (Genesi 3:1-5) Go mosadi, se se be se bonagala e le selo seo se bego se tla mo tlišetša tokologo, gomme o ile a se amogela e le selo seo se bego se bonagala e le tsela e kaone ya bophelo. Ka morago, o ile a kgodiša monna wa gagwe gore a eme le yena.—Genesi 3:6.

Ye e be e se thato ya Modimo bakeng sa batho ba ba babedi. E be e le thato ya bona. Le gona e be e tla tliša mafelelo a kotsi. Modimo o be a šetše a ba boditše gore tsela e bjalo e be e tla ba lebiša lehung. (Genesi 3:3) Ba be ba sa bopelwa gore ba itaole ka katlego ka ntle le Modimo. (Jeremia 10:23) Go oketša moo, e be e tla ba ba sa phethagalago, gomme go se phethagale le lehu ga bjale di be di tla fetišetšwa baneng ba bona. (Ba-Roma 5:12) Sathane o be a ka se kgone go dirolla mafelelo a.

Na ditiragalo tše di ile tša fetola sa ruri morero wa Modimo goba thato ya gagwe bakeng sa batho le lefase? Aowa. (Jesaya 55:9-11) Eupša di ile tša rotoša dipotšišo tšeo di bego di nyaka go arabja: Na batho ba ka “ba byalo ka Modimo, [ba] tseba botse le bobe,” go etša ge Sathane a be a boletše? Ka mantšu a mangwe, ge re ka newa nako e lekanego, na re ka itirela diphetho tša se se lokilego le se se fošagetšego, se se nago le mohola le se kotsi, dikarolong ka moka tša bophelo? Na Modimo o swanetšwe ke go kwewa ka mo go feletšego, ka gobane ditsela tša gagwe tša go buša e le tše kaone? Na thato ya gagwe e swanetšwe ke go kwewa ka mo go feletšego? O be o tla araba bjang dipotšišo tše?

Go be go e na le tsela e tee feela ya go araba dipotšišo tše pele ga mahlo ka moka a dibopiwa tše di hlalefilego: Go dumelela bao ba nyakago go ipuša gore ba bone ge e ba ba ka atlega. Go fo ba fediša go be go ka se arabe dipotšišo tšeo di rotošitšwego. Go dumelela moloko wa batho gore o tšwele pele o ipuša ka nako e lekanego go be go tla rarolla ditaba ka gobane mafelelo a be a tla ba molaleng. Modimo o bontšhitše gore o be a tla sepediša ditaba ka tsela ye ge a be a botša mosadi gore o be a tla ba le bana. Ka go rialo lapa la batho le be le tla thoma. Ka baka la se, re a phela lehono!—Genesi 3:16, 20.

Lega go le bjalo, se ga se bolele gore Modimo o be a tla dumelela batho gotee le morwa wa lerabele wa moya gore ba dire seo ba se ratago ka mo go feletšego. Modimo ga se a ka a tlogela pušo ya gagwe goba go tlogela morero wa gagwe. (Psalme 83:18) O beile se molaleng ka go bolela e sa le pele ka mafelelo a go fedišwa ga mohlohleletši wa borabele le go fedišwa ga mafelelo ka moka a mabe. (Genesi 3:15) Ka gona, go tloga mathomong lapa la batho le be le e-na le kholofelo ya kimollo.

Go sa le bjalo, batswadi ba rena ba pele ba be ba ikarotše pušong ya Modimo gotee le go arola bana ba bona bao ba sa tlago go belegwa. Gore Modimo a thibele mafelelo ka moka a nyamišago a phetho ya bona go be go nyakega gore a ba rute thato ya gagwe ka kgapeletšo ka dinako tšohle ge sebaka se bulega. Go be go tla swana le go se ba dumelele gore ba bone ge e ba ba ka atlega go ipuša ka ntle le Modimo.

Ke therešo gore batho ba be ba ka kgetha pušo ya Modimo. Ba be ba ka ithuta ka thato ya Modimo bakeng sa batho nakong ye gomme ba phela  ka go dumelelana le yona kgaufsi ka mo go ka kgonegago. (Psalme 143:10) Lega go le bjalo, ba be ba tla hlagelwa ke mathata ge feela kgang ya go ipuša ga batho ka mo go feletšego e be e sa dutše e sa rarollwa.

Mafelelo a diphetho tša batho ka noši a ile a thoma go bonagala mathomong. Leitšibolo la lapa la batho, e lego Kaine, le ile la bolaya ngwanabo lona Abele ka gobane “ya xaxwe medirô è le e mebe, ’me ya ngwan’abô è le ya xo loka.” (1 Johane 3:12) Ye e be e se thato ya Modimo, ka gobane Modimo o be a lemošitše Kaine gomme ka morago a mo otla. (Genesi 4:3-12) Kaine o be a kgethile go ipuša boitshwarong e lego seo se bego se kgothaletšwa ke Sathane; ka go rialo o ‘tswetšwe ke o mobe.’ Ba bangwe le bona ba ile ba dira ka mo go swanago.

Nywageng ya ka godimo ga e 1 500 ya histori ya batho, “Modimo yêna ó bone lefase lè senyêxa lè e-ya, lefase lè tletše tša sehloxo.” (Genesi 6:11) Go be go nyakega gore go gatwe mogato o tiilego bakeng sa go šireletša lefase tshenyegong. Modimo o ile a gata mogato ka go tliša meetse-fula a lefase ka moka le go šireletša lapa le tee la go loka leo le bego le sa dutše le phela—Noage, mosadi wa gagwe, barwa ba gagwe le basadi ba bona. (Genesi 7:1) Ka moka ga rena re ditlogolo tša bona.

Ke moka, ga e sa le go tloga ka yona nako yeo historing ya batho, Modimo o ile a nea tlhahlo bakeng sa bao ba bego ba tloga ba kganyoga go tseba thato ya gagwe. O ile a budulela banna ba botegago gore ba bege ka ditsela tša gagwe tša go boledišana le motho le ge e le ofe yoo a bego a lebeletše go yena bakeng sa tlhahlo. Ditsela tše tša poledišano di begilwe ka Beibeleng. (2 Timotheo 3:16) Ka lerato o ile a dumelela batho ba botegago gore ba be le tswalano le yena, gaešita le go ba bagwera ba gagwe. (Jesaya 41:8) Le gona o ile a ba nea matla ao ba bego ba a nyaka gore ba kgotlelele diteko tše thata tšeo batho ba ilego ba lebeletšana le tšona nywaga-keteng ye ya boitaolo. (Psalme 46:1; Ba-Filipi 4:13) Re ka leboga gakaakang thušo ye ka moka!

“Thatô ya Xaxo a e Dirwê” ka mo go Feletšego

Seo Modimo a se dirilego go fihla bokgoleng bjo ga se thato ya gagwe e feletšego bakeng sa batho. Moapostola wa Mokriste Petro o ngwadile gore: “Se re se letetšexo ka xo kwa dikholofedišô tša xaxwe ké maxodimo a mafsa le lefase le lefsa, moo xo axilexo tokô.” (2 Petro 3:13) Polelo ye ya seswantšhetšo e šupa go mmušo o mofsa wo o tlago go buša godimo ga batho gotee le lekoko le lefsa la batho bao ba tlago go ba ka tlase ga mmušo woo.

A diriša polelo e kwagalago, moporofeta Daniele o ngwadile gore: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng. . . . O tlo phšatla mebušô e mengwê ka moka wa e fediša; ge e le wôna, o tlo êma xo ya xo ile.” (Daniele 2:44) Boporofeta bjo bo bolela e sa le pele ka bofelo bja tshepedišo ye ya lehono ya dilo yeo e paletšwego gotee le go tšeelwa ga yona legato ke Mmušo goba pušo ya Modimo. Tše ke ditaba tše dibotse gakaakang! Dintwa le boithati tšeo di tladitšego lefase le la lehono ka bošoro le tšeo gape di tšhošetšago go senya lefase di tla fela ka letšatši le lengwe gomme tša lebalwa.

Na dilo tše di tla direga neng? Barutiwa ba Jesu ba ile ba botšiša gore: “Tšeo di tlo dirêxa neng? O re botše le mahlolá a re tl’o xo bôna ka ôna, xe xo fihla maboô a xaxo le bofêlô bya mabaka ano.” E le karolo ya karabo ya gagwe, Jesu o itše: “Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.”—Mateo 24:3, 14, NW.

Ke taba yeo e tsebjago ke batho bohle ya gore modiro wo wa boboledi mo nakong ye o dirwa lefaseng ka bophara. O swanetše go ba o bone se tikologong ya geno. Ka pukung ya gagwe ya These Also Believe, Moprofesara Charles S. Braden o ngwala gore: “Dihlatse tša Jehofa di tloga di apareditše lefase e le ka kgonthe ka go nea bohlatse ga tšona. . . . Ga go na sehlopha se tee sa bodumedi mo lefaseng seo se bontšhitšego phišego le go phegelela mo gogolo boitekong bja go phatlalatša ditaba tše dibotse tša Mmušo go feta Dihlatse tša Jehofa.” Dihlatse di tsebatša ditaba tše tše dibotse ka mafolofolo dinageng tša ka godimo ga tše 230 gomme ka maleme a nyakilego go ba 400. Modiro wo wo go boletšwego ka wona e sa le pele le ka mohla ga se wa ka wa dirwa tekanyong ya lefaseng  ka moka nakong e fetilego. Ke bjo bongwe bja bohlatse bjo bontši bja gore nako ga bjale e a batamela bakeng sa gore Mmušo woo o tšeele mebušo ya batho sebaka.

Mmušo wo Jesu a boletšego gore go be go tla bolelwa ka wona ke wona wo a ilego a re ruta go o rapelela thapelong ya gagwe ya mohlala ge a re: “Mmušô wa xaxo a o tlê thatô ya xaxo a e dirwê mono lefaseng byalo ka xe e dirwa lexodimong.” (Mateo 6:10) Ee, Mmušo woo ke sedirišwa seo Modimo a tlago go se diriša bakeng sa go phetha morero wa gagwe, e lego thato ya gagwe bakeng sa batho le lefase.

Seo se bolela’ng? E re Kutollo 21:3, 4 e arabe: “Ka kwa lentšu le lexolo lè e-tšwa lexodimong lè re: Šoo ngwakô wa Modimo mo xare xa batho; ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná. ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.” Ke moka thato ya Modimo e tla ba e dirwa e le ka kgonthe lefaseng le legodimong—ka mo go feletšego. * Na o ka se rate go ba karolo ya yona?

[Mengwalo ya ka tlase]

[Caption on page 5]

Go ipuša ka ntle le thato ya Modimo go tlišitše masetla-pelo