Go Nea Bohlatse bjo bo sa Rulaganyetšwago Tšhemong Ya Batho Ba Ba Bolelago Seisemane Kua Mexico

MOAPOSTOLA Paulo o ile a nea bohlatse bjo bo sa rulaganyetšwago e le ge a diriša ka bohlale nako yeo a e feditšego a emetše basepedi-gotee le yena kua Athene. Beibele e bega gore: “A bolêla . . . Lepatlelong a bolêla ka mehla le bao a tianaxo le bôná.” (Ditiro 17:17) Jesu le yena o ile a nea bohlatse bjo bo sa rulaganyetšwago go mosadi wa mo-Samaria kgaufsi le sediba, leetong la gagwe la go tloga Judea go ya Galilea. (Johane 4:3-26) Na o diriša sebaka se sengwe le se sengwe go bolela ka ditaba tše dibotse tša Mmušo wa Modimo?

Tšhemo ya batho ba ba bolelago Seisemane kua Mexico e tloga e swanelegela bohlatse bjo bo sa rulaganyetšwago. Baeti ba go tlo boga naga ba etela mafelo a maikhutšo, barutwana ba Yunibesithing ba a tla le go tloga, gomme batho ba tšwago dinageng di šele bao ba tlilego maikhutšong kua Mexico gantši ba ya diphakeng le mabenkeleng a go jela. Dihlatse tša Jehofa tše dintši tšeo di tsebago Seisemane di šetše di e-na le bokgoni bja go thoma dipoledišano le batho ba bjalo. Ge e le gabotse, di phafogela dibaka tša go bolela le motho le ge e le ofe yo a bonagalago a e-tšwa nageng e šele goba yo a bolelago Seisemane. Anke re boneng gore di dira se bjang.

Gantši batho ba ba tšwago dinageng tše dingwe bao ba hlankelago tšhemong ya ba ba bolelago Seisemane ba fo itsebiša go batho bao ba tlogago ba bonagala gore ba tšwa dinageng di šele gomme ba ba botšiša gore ba tšwa kae. Se ge e le gabotse se lebiša go potšišo ya mabapi le seo Hlatse e se dirago kua Mexico le go e nea sebaka sa go bolela ka ditumelo tša yona. Ka mohlala, Gloria, yo a bego a hlankela moo go nyakegago thušo e kgolo gona tšhemong ya Seisemane ya Oaxaca, o hwetša go le bonolo ka mo go kgethegilego go thoma dipoledišano ka tsela yeo. Ge a be a boela gae go tšwa modirong wa go nea bohlatse bjo bo sa rulaganyetšwago lefelong le le bulegilego la ka toropong, Gloria o ile a emišwa ke banyalani ba bangwe bao ba tšwago Engelane. Mosadi o ile a bolela gore: “Ga ke kgolwe gore ke bona mosadi wa motho-moso a sepela ditarateng tša Oaxaca!” Go e na le gore a kgopišwe ke seo, Gloria o ile a sega, gomme ba ile ba thoma go boledišana mabapi le lebaka leo ka lona a bego a le Mexico. Mosadi o ile a laletša Gloria go ya legaeng la gagwe bakeng sa komiki ya kofi. Ka morago ga go dira dithulaganyo, Gloria o ile a sepediša dimakasine tša Morokami le Phafoga!, eupša mosadi o ile a di gana ka go bolela gore e be e le mo-ila-modimo. Gloria o ile a araba ka gore o thabela go boledišana le ba-ila-modimo le gore o be a tla rata go kwa kgopolo ya gagwe ka sehlogo se se rego “Na re Nyaka Mafelo a Borapedi?” Mosadi o ile a di amogela ka gore: “Ge e ba o ka nkgodiša, gona o tla be o fihleletše selo se sengwe e le ka kgonthe.” Go ile gwa latela dipoledišano tše mmalwa tše di kgahlišago ba dutše ba e-nwa kofi. Banyalani ka morago ba ile ba boela Engelane, eupša dipoledišano di tšwetšwa pele ka go romelana melaetša ka Electronic.

 Gloria o ile a ba a thoma go boledišana le Saron, e lego morutwana yo a tšwago Washington, D.C., yoo a bego a šoma mošomo wa boithapi le basadi ba setlogo sa fao gore a fetše master’s degree ya gagwe. Ka morago ga go reta Saron bakeng sa maiteko a gagwe, Gloria o ile a hlalosa lebaka leo ka lona a bego a le Mexico. Se se ile sa lebiša poledišanong e botse ya mabapi le Beibele le seo Modimo a bego a ka se se direle feela badiidi eupša a bego a tla se direla batho ka moka. Saron o ile a bolela gore e be e le mo go makatšago gore le ka mohla ga se a ka a bolela le Dihlatse kua United States, eupša motho wa pele yo a gahlanego le yena kua Mexico e be e le yo mongwe wa Dihlatse tša Jehofa! Saron o ile a amogela thuto ya Beibele gomme a thoma go ba gona dibokeng tša Bokriste di sa tloga fase.

Batho ba bantši ba ba tšwago dinageng di šele ba hudugetše mafelong a maikhutšo a kgaufsi le lebopo la kua Mexico, e le ge ba nyaka maemo a mohuta o itšego a paradeise. Laurel o diriša se bakeng sa go thoma dipoledišano kua Acapulco, ka go botšiša batho ge e ba Acapulco e swana kudu le paradeise go feta moo ba tšwago gona le gore ke eng seo ba se ratago ka yona. Ke moka o hlalosa gore go se go ye kae lefase ka moka e tla ba paradeise ya kgonthe. Go diriša mokgwa wo go mosadi wa mo-Canada yo a kopanego le yena ofising ya ngaka ya diphoofolo go ile gwa lebiša thutong ya Beibele. Na mokgwa o swanago o ka šoma ka katlego moo o dulago gona?

‘Kua Ntle le Mapatlelong’

Gantši poledišano e thongwa kua ditarateng le mafelong a bulegilego a batho bohle ka go botšiša gore: “Na o bolela Seisemane?” Batho ba bantši ba Mexico ba a se bolela ka baka la mošomo wa bona goba ka gobane ba ile ba dula United States.

Banyalani ba Dihlatse ba ile ba batamela mokgekolo yo mongwe setarateng yoo a bego a sepedišwa ke mooki ka setulo sa digole. Ba ile ba mmotšiša ge e ba a be a bolela Seisemane. O ile a araba ka gore o be a se bolela ka gobane o ile a dula United States ka nywaga e mentši. O ile a amogela Morokami le Phafoga!, tšeo le ka mohla a sa kago a di bala, gomme o ile a ba nea leina la gagwe, e lego Consuelo, gotee le aterese. Ka morago ga go nyaka aterese matšatšing a mane ka morago, ba ile ba hwetša gore o be a dula legaeng la batšofadi leo le bego le hlokometšwe ke baitlami ba basadi ba Katholika. Mathomong go ikopanya le Consuelo go be go le thata ka gobane baitlami ba basadi ba be ba ba gononela gomme ba bolela gore Consuelo o be a ka se kgone go ba amogela. Banyalani ba ile ba kgopela baitlami ba basadi gore ba tsebiše Consuelo gore ba gona le gore ba be ba nyaka go mo dumediša. Consuelo o ile a amogela banyalani. Ga e sa le go tloga ka yona nako yeo, mosadi yo wa nywaga e 86 o be a dutše a thabela thuto ya Beibele ya ka mehla, go sa šetšwe dipolelo tše di sa kgahlišego tša baitlami ba basadi. Le gona o ile a ba gona go tše dingwe tša diboka tša Bokriste.

Diema 1:20 e re: “Bohlale bo xowa bò le kua ntlê; bo hlaboša ’ntšu kwa mapatlelong.” Hlokomela kamoo seo se diregilego ka gona lefelong le le bulegilego la kua San Miguel de Allende. Mesong e mengwe, Ralph o ile a batamela monna yo mongwe yo a lego nywageng ya gagwe ya bo-50 yo a bego a dutše pankeng. Monna o ile a makatšwa kudu ke go sepedišetšwa Morokami le Phafoga! gomme a anegela Ralph phihlelo ya gagwe.

O ile a ba lešole kua Vietnam, gomme ka baka la kgateletšego ya maikwelo yeo e bakilwego ke go bona mahu a mantši kudu o ile a šarakana monagano nakong ya tirelo ya gagwe ya bohlabani. Ba ile ba mo tloša moo ntwa e bego e le šoro gona gomme ba mo iša kampeng ya mašole. Moo, o ile a  newa kabelo ya go hlapiša ditopo tša mašole e le go di lokišeletša gore di romelwe United States ka sekepe. Mo nakong ye, nywageng e 30 ka morago, o sa dutše a tlaišwa ka mo go sa kgaotšego ke ditoro tše di tšhošago le go ba le maikwelo a poifo. Mesong yeo, ge a be a dutše lefelong le le bulegilego, o be a rapelela thušo ka setu.

Monna yo e bego e le lešole o ile a amogela dipuku gotee le taletšo ya gore a tle Holong ya Mmušo. Ka morago ga go ba gona sebokeng, o ile a bolela gore diiring tšeo tše pedi tša ge a le ka Holong ya Mmušo, o ile a ikwa a e-na le khutšo ka lekga la pele nywageng e 30. Monna yo o be a etetše San Miguel de Allende ka dibeke tše sego kae feela, eupša o ile a thabela dithuto tša Beibele tše sego kae le go ba gona dibokeng ka moka go ba go fihla a boela gae. Dithulaganyo di ile tša dirwa bakeng sa gore thuto ya gagwe e tšwetšwe pele.

Go Nea Bohlatse bjo bo sa Rulaganyetšwago Mošomong le Sekolong

Na o dira gore batho ba go tsebe o le yo mongwe wa Dihlatse tša Jehofa mošomong wa gago? Adrián, yo a rekišago mafelo a bodulo a nakong ya maikhutšo kua Cape San Lucas, o dira bjalo. Ka baka leo, mošomi-gotee le yena e lego Judy o anega gore: “Nywageng e meraro feela e fetilego, ge e ba o ka ba o ile wa mpotša gore ke tlo fetoga yo mongwe wa Dihlatse tša Jehofa, nkabe ke ile ka bolela gore, ‘Le ka mohla!’ Eupša ke ile ka dira phetho ya gore ke nyaka go bala Beibele. Ke be ke nagana gore, ‘Go ka ba thata bjang, ka ge ke be ke rata go bala?’ Ge e le gabotse, ga ke nagane gore ke ile ka kgona go bala matlakala a ka godimo ga a tshela pele ke lemoga gore ke nyaka thušo. Motho a nnoši yoo ke ilego ka nagana ka yena e be e le mošomi-gotee le nna yo a bitšwago Adrián. Ke be ke rata go bolela le yena ka gobane e be e le yena motho a nnoši yo a lokilego mošomong.” Adrián ka go akgofa o ile a ithapela go ya le mmeeletšwa wa gagwe, e lego Katie, go yo araba dipotšišo ka moka tša Judy. Katie o ile a thoma thuto ya Beibele le yena, gomme go se go ya kae ka morago Judy o ile a ba Hlatse e kolobeditšwego.

Go thwe’ng ka go nea bohlatse bjo bo sa rulaganyetšwago sekolong? Dihlatse tše pedi di be di tsena diklase tša Sepaniši kua Yunibesithing eupša ka letšatši le lengwe di ile tša se ye klaseng e le gore di yo ba gona kopanong ya Bokriste. Ge di be di boa klaseng, di ile tša kgopelwa gore di anege ka Sepaniši mabapi le seo di bego di dutše di se dira. Di ile tša diriša sebaka ka bohlale bakeng sa go nea bohlatse gabotse ka mo go ka kgonegago ka Sepaniši. Morutiši, e lego Silvia, o be a kgahlegela boporofeta bja Beibele kudu. O ile a amogela thuto ya Beibele ka Seisemane gomme ga bjale ke mogoeledi wa ditaba tše dibotse. Ditho tše mmalwa tša lapa la gagwe le tšona di a ithuta. Silvia o re: “Ke hweditše seo ke bego ke dutše ke se nyaka bophelong bja-ka.” Ee, go nea bohlatse bjo bo sa rulaganyetšwago go ka tšweletša dienywa tše dibotse.

Go amogela baeng go ka feleletša ka go nea bohlatse. Jim le Gail, bao ba hlankelago kua San Carlos, Sonora, ba hweditše seo e le sa therešo. Mosadi yo a bego a sepela-sepela le dimpša tša gagwe ka 6:00 a.m. o ile a ema gore a rete jarata ya bona. Jim le Gail ba ile ba mo laletša gore a tlo nwa kofi. E be e le ka lekga la pele nywageng e 60 a e-kwa ka Jehofa le ka tebelelo ya bophelo bjo bo sa felego. Go ile gwa thongwa thuto ya Beibele.

 Adrienne le yena o dirišana le batho bao a sa ba tsebego ka botho. O be a e-ja lebenkeleng la go jela kua Cancún ge mošemanyana a be a mmatamela gomme a mmotšiša ge e ba e be e le mo-Canada. Ge a be a araba ka gore ke yena, mošemanyana o ile a hlalosa gore yena le mmagwe ba be ba leka go thuša kgaetšedi’agwe ka pego ya sekolong yeo e lego mabapi le ma-Canada. Mmagwe, yo a bego a bolela Seisemane o ile a ya go bona. Ka morago ga go araba dipotšišo tša bona ka go se fele pelo tša mabapi le ma-Canada, Adrienne o ile a re: “Eupša go tloga go e-na le lebaka la bohlokwa leo ka lona ke tlilego mo go tšwa Canada—go thuša batho go ithuta ka Beibele. Na le tla kgahlegela seo?” Mosadi o ile a araba ka gore o tla ba le kgahlego. O be a tlogetše kereke ya gagwe nywageng e lesome e fetilego gomme o be a leka go ithuta Beibele ka boyena. Adrienne o ile a tšea dinomoro tša gagwe tša mogala le aterese ya gagwe gomme thuto ya Beibele e kgotsofatšago e ile ya thongwa.

‘Lahlela Bogobe bja Gago Bodibeng’

Go bolela ka therešo ya Beibele ka dinako tšohle gantši go feleletša ka go nea bohlatse go batho bao ba ilego ba hwetša sebaka se senyenyane goba bao ba sego ba ka ba hwetša sebaka sa go kwa ka molaetša wa Mmušo. Khefing e tletšego kudu ya kgaufsi le toropo yeo e lego boema-kepeng bja Zihuatanejo, Hlatse e ile ya laletša batho ba babedi bao ba tšwago nageng e šele gore ba tlo dula le yona tafoleng ya yona, ka ge khefi e be e tletše. Banyalani ba ba be ba dutše ba sepela ka sekepe go tloga lefelong le lengwe go ya go le lengwe ka nywaga e šupa. Ba ile ba tšweletša maikwelo a bona a sa kgahlišego ka Dihlatse tša Jehofa. Ka morago ga tiragalo ya khefing, Hlatse e ile ya etela banyalani seketswaneng sa bona gomme ya ba laletša go tla legaeng la yona. Ba ile ba amogela dimakasine tša ka godimo ga tše 20 le dipuku tše 5 gomme ba holofetša gore ba tla ikopanya le Dihlatse boema-kepeng bjo bo latelago bjoo bo bontšhitšwego lenaneong la bona la leeto.

Jeff le Debb ba ile ba bona lapa la batho bao ba tšwago nageng e šele le e-na le ngwana yo mobotse wa ngwanenyana lefelong la go jela la batho bohle leo le lego mabenkeleng a kua Cancún. Ge ba be ba reta ngwana, batswadi ba gagwe ba ile ba ba laletša gore ba tlo ja pizza le bona. Go ile gwa bonagala gore lapa le le be le e-tšwa India. Ba be ba se ba ka ba kwa ka Dihlatse tša Jehofa le ka mohla, goba go bona dipuku tša rena. Ba ile ba tloga mabenkeleng le dikgatišo tše dingwe tša Dihlatse.

Selo se sengwe se se swanago se diragaletše banyalani bao ba sa tšwago go nyalana ba ma-China kua sehlakahlakeng sa baeti ba go tlo boga naga sa Mujeres. Ba ile ba kgopela Jeff gore a ba tšee seswantšho, e lego seo a ilego a se dira ka lethabo. Ke moka o ile a lemoga gore gaešita le ge ba ile ba dula United States nywageng e 12 e fetilego, ga se ba ka ba bona goba go kwa ka Dihlatse tša Jehofa! Poledišano e kgahlišago e ile ya thoma. Jeff o ile a ba kgothaletša gore ba nyake Dihlatse ge ba boetše gae.

Go ka ba go e na le tiragalo e kgethegilego tikologong ya lena yeo e ka go neago sebaka sa go nea bohlatse bjo bo sa rulaganyetšwago. Ge mopresidente wa United States a be a yo etela mopresidente wa Mexico polaseng ya gagwe kgaufsi le Guanajuato, babegi ba ditaba go tšwa lefaseng ka moka ba ile ba bega ka tiragalo ye. Lapa le lengwe la Dihlatse le ile la dira phetho ya go diriša sebaka se ka bohlale bakeng sa go dira boboledi ka Seisemane. Karabelo e be e le e kgahlišago. Ka mohlala, mmegi yo mongwe o ile a bega ditaba ka dintwa tše mmalwa, tše bjalo ka tšeo di lego kua Kosovo le Kuwait. Mošomi-gotee le yena o ile a hwela matsogong a gagwe ka morago ga go thuntšhwa ke motho yo a bego a utame. Ge a e-kwa ka tsogo, mmegi wa ditaba o ile a leboga Modimo a sekišitše megokgo mahlong a gagwe ge a ile a mo dumelela gore a tsebe gore bophelo bo na le morero. O boletše gore gaešita le ge a ka se ke a bona banyalani ba Dihlatse gape, o tla tšwela pele a gopola ditaba tše tše dibotse tšeo di tšwago Beibeleng.

Go etša ge go ka bonwa, mafelelo a bohlatse bjo bo bjalo gantši ga a tsebje. Lega go le bjalo, Kgoši Salomo yo bohlale o itše: “Boxôbê bya xaxo bo lahlêlê bodibeng; O tlo buša wa bo hwetša xò fetile mehla e mentši.” Le gona o itše: “Byala peu ya xaxo e sa le bosasa, le ka mantšibua ’atla s’axo se se khutšê; xa O tsebe ye e tl’o xo mela; xoba xo tlo mela yeno xoba yela, xoba ka dipedi.” (Mmoledi 11:1, 6) Ee, ‘lahlela bogobe bja gago’ ka phišego bodibeng gomme o ‘bjale peu ya gago’ ka seatla se se bulegilego, go etša ge go ile gwa dira Paulo le Jesu le kamoo go dirago Dihlatse tše tša mehleng yeno tša tšhemong ya batho ba ba bolelago Seisemane kua Mexico.