Na Thato ya Modimo e a Dirwa?

“Thatô ya xaxo a e dirwê mono lefaseng byalo ka xe e dirwa lexodimong.”—Mateo 6:10.

JULIO le Christina ba ile ba bogela ka letšhogo ge bana ba bona ba bane ba e-fsa go fihlela ba e-hwa. Koloi ya bona ye e emego e ile ya thulwa ke mootledi yo a tagilwego, gomme ya thuthupa. Ngwana wa bohlano, e lego Marcos, o ile a phološwa mollong, eupša kgabo e be e fišitše mmele wa gagwe, gomme ya mo golofaletša sa ruri. O be a e-na le nywaga e senyane. Tatagwe o be a kwele bohloko kudu. O be a ikhomotša gotee le go homotša ba lapa la gagwe ka mantšu a rego: “Ye ke thato ya Modimo, re swanetše go e kwešiša, e ka ba e le e botse, e mpe goba e ka ba e le selo le ge e le sefe.”

Ge go direga tiragalo ya masetla-pelo e swanago le ye, ba bantši ba arabela ka tsela e swanago. Ba nea mabaka ka gore, ‘Ge e ba Modimo e le yo matla-ohle e bile a e na le taba le rena, seo se diregilego se swanetše go ba e le bakeng sa go re hola ka tsela e itšego, gaešita le ge go ka ba thata go se kwešiša.’ Na o dumelelana le se?

Pono ya gore selo le ge e le sefe seo se diregago se bonagatša thato ya Modimo, e ka ba se sebotse goba se sebe, gantši e theilwe mantšung a Jesu ao a lego go seo se bitšwago Thapelo ya Morena, ao a tsopotšwego ka mo godimo. Thato ya Modimo e a dirwa legodimong, na ga go bjalo? Ka go rapela gore “thatô ya xaxo a e dirwê mono lefaseng,” na go ra gore ga re dumele gore seo se diregago lefaseng ke thato ya Modimo?

Ba bantši ba belaetšwa ke pono ye. Go bona, e bonagatša Modimo e le yo a sa naganelego maikwelo a dibopiwa tša gagwe tšeo e lego batho. Ba botšiša gore, ‘Ke bjang Modimo yo lerato a ka nyakago gore dilo tše di boifišago di diragalele batho ba se nago molato? Ge e ba go e-na le thuto yeo go swanetšwego go ithutwa yona, na ge e le gabotse thuto yeo ke efe?’ Mohlomongwe ke kamoo le wena o ikwago ka gona.

Tabeng ye, ngwanabo Jesu ka motswadi o tee, e lego morutiwa Jakobo, o ngwadile gore: “Xo se kê xwa ba le e a rexo xe a lekwa, a re: ke lekwa ke Modimo; xobane Modimo xa a lekwe ke bobe; ’me le Yêna xa a leke motho.” (Jakobo 1:13) Modimo ga se mothopo wa bobe. Ka gona, go molaleng gore ga se dilo ka moka tšeo di diregago lefaseng lehono tšeo e lego thato ya Modimo. Mangwalo a bolela gape le ka thato ya motho, thato ya setšhaba, gaešita le thato ya Diabolo. (Johane 1:13; 2 Timotheo 2:26; 1 Petro 4:3) Na o dumela gore seo se diragaletšego lapa la Julio le Christina e be e ka se be thato ya Tate yo lerato wa legodimong?

Ka gona, Jesu o be a bolela’ng ge a be a ruta barutiwa ba gagwe gore ba rapele ka gore: “Thatô ya xaxo a e dirwê”? Na e be e fo ba kgopelo feela ya gore Modimo a tsene ditaba gare maemong a itšego goba na Jesu o be a re ruta go rapelela selo se sengwe sa bohlokwa le se sekaone, e lego phetogo yeo ka moka re ka e letelago? Anke re hlahlobeng ka mo go oketšegilego seo Beibele e se bolelago.

[Caption on page 3]

Car: Dominique Faget-STF/AFP/Getty Images; child: FAO photo/B. Imevbore