O Ile A Lwantšhana Le Teko Ka Thušo E Tšwago Beibeleng

Diteko di atile lefaseng lehono. Ga go bonolo go kgomarela ditekanyetšo tša Beibele. Ka mohlala, e ka ba tlhohlo go latela keletšo ya Beibele e rego: “Bootswa bo thšabeng-xê.”—1 Ba-Korinthe 6:18.

Yo mongwe wa Dihlatse tša Jehofa yo re tla mmitšago Sebastian, o be a šomela khamphani ya Scandinavia kua Poland. O ile a swanelwa ke go lwa ntwa e thata gore a kgomarele potego ya gagwe.

Sebastian o be a tsebja bjalo ka yo mongwe wa Dihlatse tša Jehofa. Ge bahlokomedi ba gagwe ba be ba leboga go šoma ga gagwe ka thata le mokgwa wa gagwe o mobotse, ba ile ba mo putsa ka go mo nea ditokelo tša go fapa-fapana mošomong. Lega go le bjalo, go ile gwa bonagala gore ditokelo tšeo di be di akaretša diboka tša tša kgwebo tšeo di bego di e-na le boithabišo bjo bo gobogilego.

Kapejana Sebastian o ile a thoma go ba le dipelaelo. “Mohlokomedi wa-ka o a tseba gore ke yo mongwe wa Dihlatse tša Jehofa. Ke ka baka leo a mpotago le go nkholofela. Ge e ba ke gana go kopanela le bona ke tla lahlegelwa ke mošomo wo go bego go le thata go o hwetša. Go ka thwe’ng ge e ba nka ba mmogedi feela?”

Ke moka Sebastian o ile a lemoga se se oketšegilego. O be a letetšwe gore a rulaganyetše gore bagweba-ka-mmele ba sepele le bareki ba dinageng dišele mantšiboa. O be a tla dira’ng?

Sebastian o ile a phetha ka go gopotša mohlokomedi wa gagwe ka boemo bja gagwe bja kgopolo bjo bo theilwego Beibeleng malebana le boitshwaro bjo bo gobogilego. Kapejana go ile gwa bonagala gore Sebastian ga a swanelege le gona mafelelong o be a tla swanelwa ke go tlogela mošomo. O ile a hwetša mošomo o mofsa wo o godišago mogolo wa tlase eupša a se sa lebeletšana le diteko tše bjalo tša boitshwaro bjo bo gobogilego. Ga bjale o na le letswalo le le hlwekilego.

O be o tla dira’ng ge e ba motho yo mongwe a go gapeletša gore o kopanele le go tshediša boitshwaro bjo bo gobogilego mahlo? Na o be o ka ikemišetša go dira phetogo e kgolo? Se ke seo Josefa wa bogologolo a ilego a se dira go etša ge go begilwe go Genesi 39:7-12.