Bafsa, Na Le Thea Motheo Bakeng Sa Bokamoso?
Bafsa, Na Le Thea Motheo Bakeng Sa Bokamoso?
“Mexopolô ye ke Le xopolaxo ka yôna, ke a e tseba. . . . Ké mexopolô ya moláô, xa se ya bošula; ké ya xore ke Le neê tše di tlaxo, tše Le di holofetšexo.”—JEREMIA 29:11.
1, 2. Ke ka ditsela dife tše di fapa-fapanego tšeo ka tšona nywaga ya bofsa e ka lebelelwago ka yona?
BATHO ba bantši ba bagolo ba nagana ka bofsa e le nako e kgahlišago ya bophelo. Ba gopola matla le mafolofolo ao ba bego ba e-na le ona ge e be e sa le bafsa. Ba lebelela morago ka lerato nakong ya ge ba be ba e-na le boikarabelo bjo bonyenyane kudu, nakong ya ge ba be ba ithabiša kudu gomme bophelo ka moka bja dibaka tše dibotse bo le ka pele ga bona.
2 Ga go na pelaelo gore lena bao le lego bafsa le bona dilo ka tsela e fapanego. Le ka ba le e-na le mathata a go swaragana le diphetogo tša bofsa tša maikwelong le tša mmeleng. Le ka lebeletšana le kgateletšo e matla sekolong. Le ka swanelwa ke go dira boiteko bjo bo tseneletšego bja go ganetša go dirišwa gampe ga dihlare-tagi, bjala le boitshwaro bjo bo gobogilego. Le gona ba bantši ba lena ba lebeletšana le kgang ya boema-gare goba dikgang tše dingwe tše di lego mabapi le tumelo ya lena. Ee, bofsa e ka ba nako e thata. Go sa dutše go le bjalo, ke nako ya dibaka tše dibotse. Potšišo ke gore, O tla diriša bjang dibaka tšeo?
Thabela Bofsa bja Gago
3. Salomo o neile bafsa keletšo le temošo efe?
3 Batho ba bagolo ba tla go botša gore bofsa ga bo tšee nako e telele, gomme ba nepile. Ka nywaga e sego kae feela, bofsa bja gago bo tla ba bo fetile. Ka gona bo thabele o sa dutše o e-na le bjona! Yeo e be e le keletšo ya Kgoši Salomo yo a ngwadilego gore: “Wene Lesoxana! Ithabêlê Ò sa le bofseng bya xaxo, O tsefêlwa ke matšatši a bofseng bya xaxo. Swara ka tsela ye O e rataxo, ye mahlô a xaxo a e thabêlaxo.” Lega go le bjalo, Salomo o lemošitše bafsa ka gore: “Se hlohlê pelo ya xaxo, ’me mmele wa xaxo O o šexêlê bošula.” O tšwetše pele ka gore: “Bosoxana le hlôxô e nthso ke lefêla.”—Mmoledi 11:9, 10.
4, 5. Ke ka baka la’ng e le gabohlale gore bafsa ba lokišeletše bokamoso? Bontšha.
4 Na o kwešiša seo Salomo a bego a se bolela? Go bontšha se, nagana ka mofsa yo a amogelago mpho e kgolo, mohlomongwe bohwa bja tšhelete. O tla dira’ng ka yona? A ka e diriša ka moka ga yona bakeng sa go ithabiša—ka go swana le morwa wa lehlaswa wa seswantšhong sa Jesu. (Luka 15:11-23) Eupša go tla direga’ng ge tšhelete e fedile? Ka ntle le pelaelo o tla itshola gore o ile a dira dilo ka go se be le boikarabelo! Ka lehlakoreng le lengwe, a re re o diriša mpho yeo go lokišeletša bokamoso, mohlomongwe o beeletša bontši bja yona ka tsela e bohlale. Mafelelong ge a holwa ke peeletšo ya gagwe, na o nagana gore o tla itshola gore ga se a diriša tšhelete ya gagwe ka moka bakeng sa go ithabiša bofseng bja gagwe? Ga go bjalo le gatee!
5 Nagana ka nywaga ya gago ya bofsa e le mpho e tšwago go Modimo, ka ge e le yona. O tla e diriša bjang? O ka senya matla ao ka moka le mafolofolo ka go ikgotsofatša, o tloga boipshinong bjo bongwe go ya go bjo bongwe o sa nagane ka bokamoso. Lega go le bjalo, ge e ba o dira seo, go wena “bosoxana le hlôxô e nthso” e tla ba “lefêla.” Go kaone gakaakang go diriša bofsa bja gago ka mo go holago bakeng sa go lokišeletša bokamoso!
6. (a) Ke keletšo efe ya Salomo yeo e neago tlhahlo bakeng sa bafsa? (b) Jehofa o tla rata go direla bafsa eng, gomme mofsa a ka holwa bjang ke se?
6 Salomo o boletše molao wa motheo wo o ka go thušago go diriša nywaga ya gago ya bofsa ka tsela e bohlale. O itše: “Xopola Mmopi wa xaxo Ò sa le yo mofsa.” (Mmoledi 12:1) Seo ke senotlelo sa katlego—theetša Jehofa, gomme o dire thato ya gagwe. Jehofa o ile a botša ba-Isiraele ba bogologolo seo a bego a nyaka go ba direla sona ka gore: “Xobane mexopolô ye ke Le xopolaxo ka yôna, ke a e tseba. . . . Ké mexopolô ya moláô, xa se ya bošula; ké ya xore ke Le neê tše di tlaxo, tše Le di holofetšexo.” (Jeremia 29:11) Le gona Jehofa o tla rata go go nea ‘tše di tlago, gotee le kholofelo.’ Ge e ba o mo gopola ka ditiro tša gago, dikgopolo le diphetho, o tla bona bokamoso bjoo le kholofelo yeo.—Kutollo 7:16, 17; 21:3, 4.
‘Batamela Kgaufsi le Modimo’
7, 8. Mofsa a ka batamela bjang kgaufsi le Modimo?
7 Jakobo o re kgothaleditše gore re gopole Jehofa ge a be a re tutueletša gore: “Batamêlang Modimo, le Yêna a Le batamêlê.” (Jakobo 4:8) Jehofa ke Mmopi, Mmuši wa legodimong, yo a swanelwago ke borapedi le tumišo ka moka. (Kutollo 4:11) Ka baka leo, ge re batamela kgaufsi le yena, o tla batamela kgaufsi le rena. Na kgahlego e bjalo e lerato ga e ruthetše pelo ya gago?—Mateo 22:37.
8 Re batamela kgaufsi le Jehofa ka ditsela tše mmalwa. Ka mohlala, moapostola Paulo o re: “Tiišang thapêlô. Le phakxamê mo xo yôna Lè leboxa.” (Ba-Kolose 4:2) Ka mantšu a mangwe, hlagolela mokgwa wa go rapela. O se ke wa kgotsofatšwa ke go fo re amene ka morago ga ge tatago goba Mokriste-gotee le wena ka phuthegong a go emetše ka thapelo. Na o kile wa tšhollela Jehofa sa mafahleng a gago gomme wa mmotša seo o se naganago, seo o se boifago le gore o lebeletšane le ditlhohlo dife? Na o kile wa mmotša dilo tšeo o bego o tla lewa ke dihlong go di ahla-ahla le motho le ge e le ofe? Dithapelo tša kgonthe le tše di tšwago pelong di tliša maikwelo a khutšo. (Ba-Filipi 4:6, 7) Di re thuša gore re batamele kgaufsi le Jehofa le gore re kwe gore o batamela kgaufsi le rena.
9. Mofsa a ka theetša Jehofa bjang?
9 Re bona tsela e nngwe ya go batamela kgaufsi le Jehofa mantšung a a buduletšwego: “Kwaa keletšô, O êlêtšêxê, O hlalefêlê tša ka mosô.” (Diema 19:20) Ee, ge e ba o theetša Jehofa gomme o mo kwa, o thea motheo bakeng sa bokamoso. O ka bontšha bjang gore o theetša Jehofa? Ka ntle le pelaelo o ba gona dibokeng tša Bokriste ka mehla gomme o theetša dikarolo tša lenaneo. Le gona, o “xodiša tat’axo le mm’axo” ka go ba gona thutong ya lapa ya Beibele. (Ba-Efeso 6:1, 2; Ba-Hebere 10:24, 25) Seo ke se sebotse. Lega go le bjalo, go tlaleletša moo, na o ‘reka nako’ bakeng sa go lokišeletša diboka, go bala Beibele ka mehla le go dira nyakišišo? Na o leka go diriša seo o se badilego, e le gore o tle o sepele bjalo ka ‘motho yo bohlale’? (Ba-Efeso 5:15-17, bapiša le NW; Psalme 1:1-3.) Ge e ba o dira bjalo, o batamela kgaufsi le Jehofa.
10, 11. Ke mehola efe e megolo yeo bafsa ba e hwetšago ge ba theetša Jehofa?
10 Mantšung a mathomo a puku ya Diema, mongwadi yo a buduletšwego o hlalosa morero wa puku yeo ya Beibele. O re ke “tša xo tseba bohlale le thutô, tša xo hlatha dipolêlô tša thlaolaxanyô, Xo amoxêlwê thutô le thlalefô le bothakxa le molaô le tše boló, Mo-hlôka-tsebô a fiwê maanô, ’soxana le fiwê tsebô le kêlêlô.” (Diema 1:1-4) Ka baka leo, ge o dutše o bala le go diriša mantšu a Diema—gotee le Beibele ka moka ga yona—o tla hlagolela go loka le go botega, gomme Jehofa o tla thabela go batamela ga gago kgaufsi le yena. (Psalme 15:1-5) Ge o dutše o hlagolela kahlolo e botse, bohlale, tsebo le bokgoni bja go nagana, diphetho tša gago e tla ba tše kaone.
11 Na ke mo go sa kwagalego go letela gore mofsa a gate mogato ka bohlale ka tsela ye? Aowa, ka gobane bontši bja bafsa ba Bakriste bo dira bjalo. Ka baka leo, ba bangwe ba a ba hlompha gomme ‘ga ba nyatše bosogana bja bona.’ (1 Timotheo 4:12) Batswadi ba bona ba ikgantšha ka bona ka mo go nepagetšego, gomme Jehofa o re ba thabiša pelo ya gagwe. (Diema 27:11) Gaešita le ge e le ba bafsa, ba ka kgodišega gore mantšu a a buduletšwego a šoma go bona: “Šetša moloki O bônê yo boló; monna wa moláô ó tlo bôna ditloxolo.”—Psalme 37:37.
Dira Dikgetho tše Dibotse
12. Ke efe e nngwe ya dikgetho tše bohlokwa yeo bafsa ba e dirago, gomme ke ka baka la’ng kgetho yeo e na le mafelelo a nako e telele?
12 Bofsa ke nako ya go dira dikgetho, tšeo tše dingwe tša tšona di nago le mafelelo a sa ruri. Dikgetho tše dingwe tšeo o di dirago gona bjale di tla go kgoma ka nywaga e mentši e tlago. Dikgetho tše bohlale di feleletša ka bophelo bjo bo thabišago le bjo bo atlegilego. Dikgetho tše di sego bohlale di ka senya bophelo bja gago ka moka. Ela hloko kamoo seo e lego sa therešo ka dikgetho tše pedi tšeo o swanetšego go di dira. Ya pele: O kgetha go gwerana le bomang? Ke ka baka la’ng seo e le sa bohlokwa? Ge e le gabotse, seema se se buduletšwego se re: “Šika le bahlale O hlalefê; mokxônana-le-mašilo ó tlo thsereana.” (Diema 13:20) Ka mantšu a mangwe, re feleletša re swana le bao re gweranago le bona—e ka ba e le ba bohlale goba e le ditlaela. O ka kgetha go ba motho wa mohuta ofe?
13, 14. (a) Ka ntle le go gwerana le batho ka go lebanya, bogwera bo akaretša’ng? (b) Ke phošo efe yeo bafsa ba swanetšego go e phema?
13 Ge o nagana ka bogwera, ka ntle le pelaelo o nagana ka go ba le batho. Seo ke therešo, eupša go akaretšwa mo gontši. Ge o bogela lenaneo la thelebišene, o theetša mmino, o bala padi, o e-ya paesekopong goba o diriša didirišwa tše itšego ka go Internet, o ba le bogwera. Ge e ba bogwera bjoo bo kgotsofatša ditshekamelo tša bošoro le tša boitshwaro bjo bo gobogilego goba bo kgothaletša go dirišwa gampe ga dihlare-tagi, botagwa goba selo le ge e le sefe se sengwe seo se thulanago le melao ya motheo ya Beibele, o gwerana le “setlaêla,” seo se dirago dilo bjalo ka ge eka Jehofa o be a se gona.—Psalme 14:1.
14 Mohlomongwe o nagana gore ka ge o e ba gona dibokeng tša Bokriste gomme o le mafolofolo ka phuthegong, o tiile ka mo go lekanego gore o ka se kgongwe ke paesekopo e šoro goba alepamo ya mmino yeo e nago le melodi e mebose eupša e e-na le mantšu a belaetšago. Mohlomongwe o nagana gore go ka se be le ditla-morago tše kotsi ge e ba o fo gaša mahlo mokerong wa diswantšho tša go kgothaletša bootswa ka go Internet. Moapostola Paulo o go botša gore o fošitše! O re: “Mehlamo e mebe e senya bokwala.” (1 Ba-Korinthe 15:33) Ka manyami, Bakriste ba bantši ba bafsa bao ba bego ba kgahliša ba ile ba dira gore mekgwa ya bona e mebotse e senywe ke bagwera bao e sego ba bohlale. Ka gona, ikemišetše go phema bagwera ba bjalo. Ge e ba o dira bjalo, o tla latela keletšo ya Paulo e rego: “Le se kê la ipapetša le ba mehla yeno; šatoxang ka xo mphsafala kxopolô, xore Le tlê Le hlaoloxanyê se e lexo thatô ya Modimo, e lexo se botse le se se kxahlišaxo, se e lexo sa botlalô.”—Ba-Roma 12:2.
15. Kgetho ya bobedi yeo bafsa ba swanetšego go e dira ke efe, gomme ke dikgateletšo dife tšeo ka dinako tše dingwe di bewago go bona tabeng ye?
15 Kgetho ya bobedi yeo o lebeletšanego le yona ke ye. Go tla tla nako yeo ka yona o tla swanelwago ke go dira kgetho ya gore o nyaka go dira eng ge o fetša sekolo. Ge e ba o dula nageng yeo e nago le tlhaelelo ya dibaka tša mošomo, o ka ikwa o gateletšegile go amogela mošomo o kaone woo o hwetšagalago. Ge e ba o dula nageng e humilego, go ka ba le dikgetho tše dintši tša mešomo, e mengwe ya yona e le yeo e lekago kudu. Ka maikemišetšo a mabotse, barutiši ba gago goba batswadi ba gago ba ka go kgothaletša go dira mošomo woo o neago tšhireletšo ya tša ditšhelete, gaešita le lehumo. Lega go le bjalo, go itlwaeletša mošomo woo go ka lekanyetša o šoro nako yeo o ka e fetšago o hlankela Jehofa.
16, 17. Hlalosa kamoo mangwalo a fapa-fapanego a ka thušago mofsa go ba le pono e leka-lekanego ka mošomo.
16 Gopola go lebelela ka Beibeleng pele ga ge o ka dira phetho. Beibele e re kgothaletša go šoma e le gore re iphediše, ka go rialo e re bontšha gore re rwele boikarabelo bja go itlhokomela. (2 Ba-Thesalonika 3:10-12) Lega go le bjalo, go na le dilo tše dingwe tšeo di akaretšwago. Re go kgothaletša gore o bale mangwalo a latelago gomme o nagane kamoo a ka thušago mofsa gore e be yo a leka-lekanego tabeng ya go kgetha mošomo: Diema 30:8, 9; Mmoledi 7:11, 12; Mateo 6:33; 1 Ba-Korinthe 7:31; 1 Timotheo 6:9, 10. Ka morago ga go bala ditemana tšeo, na o bona pono ya Jehofa tabeng ye?
17 Mošomo wa boiphedišo le ka mohla ga se wa swanela go ba o bohlokwa kudu moo e lego gore o tla pele ga tirelo ya rena go Jehofa. Ge e ba o ka swanelegela mošomo o kgotsofatšago ka thuto ya sekolo se se phagamego, go lokile. Ge e ba o nyaka tlwaetšo e oketšegilego ka morago ga sekolo se se phagamego, seo ke selo seo o ka se ahla-ahlago le batswadi ba gago. Lega go le bjalo le ka mohla o se ke wa lahlegelwa ke pono ka “dilo tša bohlokwa bjo bogolo”—dilo tša moya. (Ba-Filipi 1:9, 10, NW) O se ke wa dira phošo yeo Baruke, e lego mongwaledi wa Jeremia a ilego a e dira. O ile a se sa tšeela godimo tokelo ya gagwe ya tirelo gomme a “inyakêla tše kxolo.” (Jeremia 45:5) O ile a lebala ka lebakanyana gore ga go na ‘selo se segolo’ lefaseng le seo se tla mmatametšago kgaufsi le Jehofa goba sa mo thuša go phologa phedišo ya Jerusalema. Selo se se swanago se ka bolelwa ka rena lehono.
Tšeela Dilo tša Moya Godimo
18, 19. (a) Bontši bja baagišani ba gago bo swerwe ke’ng, gomme o swanetše go ikwa bjang ka bona? (b) Ke ka baka la’ng ba bantši ba sa ikwe ba swerwe ke tlala ya moya?
18 Na o kile wa bona diswantšho tša mekerong ya ditaba tša bana ba dinageng tšeo di hlasetšwego ke tlala? Ge e ba o kile wa di bona, o swanetše go ba o ile wa ba kwela bohloko. Na ka mo go swanago o kwela batho ba tikologong ya geno bohloko? Ke ka baka la’ng o swanetše go ba kwela bohloko? Ka gobane bontši bja bona bo bolawa ke tlala. Bo bolawa ke tlala yeo go porofetilwego ka yona ke Amosi ge a re: “Ó r’yalo Morêna Mong ’a bohle. Xo tla matšatši a ke tl’o xo romêla tlala mo faseng, e sexo tlala ya boxôbê, e sexo lenyôra la meetse; e tlo ba xo lla xo kwa Lentšu la Morêna.”—Amosi 8:11.
19 Ke therešo gore bontši bja bao ba swerwego ke tlala ye ya moya ga ba ‘lemoge dinyakwa tša bona tša moya.’ (Mateo 5:3, bapiša le NW.) Ba bantši ga ba ikwe ba swerwe ke tlala ya moya. Ba bangwe ba ka ba ba ikwa ba fepegile gabotse. Eupša ge e ba ba ikwa bjalo, ke ka gobane ba iphepa ka “bohlale bya lefase” bja go se re selo, bjoo bo akaretšago dilo tše di bonagalago, phopholetšo ya tša thutamahlale, dikgopolo mabapi le boitshwaro le dilo tše dingwe tše bjalo. Ba bangwe ba nagana gore “bohlale” bja mehleng yeno bo dira gore dithuto tša Beibele e be tšeo di šiilwego ke nako. Lega go le bjalo, “lefase lè šitilwe xo hlatha Modimo ka bohlale bya lôna.” Bohlale bja lefase bo ka se go thuše go batamela kgaufsi le Modimo. Ga se selo eupša e fo ba ‘bošilo go Modimo.’—1 Ba-Korinthe 1:20, 21; 3:19.
20. Ke ka baka la’ng e se mo go kwagalago go nyaka go ekiša batho bao ba sa rapelego Jehofa?
20 Ge o lebelela diswantšho tšeo tša bana bao ba swerwego ke tlala, na o nyaka go swana le bona? Ga go bjalo le gatee! Lega go le bjalo, bafsa ba bangwe ka malapeng a Bakriste ba bontšhitše kganyogo ya go ba bjalo ka batho bao ba swerwego ke tlala ya moya bao ba ba dikologilego. Mohlomongwe bafsa ba bjalo ba nagana gore bafsa bao ba lego lefaseng ga ba na mathata, ba thabela bophelo. Ba lebala gore bafsa ba bjalo ba arogane le Jehofa. (Ba-Efeso 4:17, 18) Le gona ba lebala ditla-morago tše mpe tša tlala ya moya. Tše dingwe tša tše ke boimana bjo bo sa nyakegego bja bafsa ba ba lego mahlalagading le ditla-morago tše di bago gona mmeleng le maikwelong ka baka la boitshwaro bjo bo gobogilego, go kgoga, botagwa le go dirišwa gampe ga dihlare-tagi. Tlala ya moya e baka moya wa borabele, go hloka kholofelo mo gogolo le go se be le morero bophelong.
21. Re ka itšhireletša bjang go amogeleng boemo bja kgopolo bjo bo fošagetšego bja bao ba sa rapelego Jehofa?
21 Ka gona, ge o le sekolong gare ga bao e sego barapedi-gotee le wena ba Jehofa, o se ke wa laolwa ke boemo bja bona bja kgopolo. (2 Ba-Korinthe 4:18) Ba bangwe ba tla bolela ka go kodutla ka dilo tša moya. Go oketša moo, mekero ya ditaba e tla gaša phatlalatšo ya maaka ka tsela e bohlale, ya bontšha gore ke ga tlhago go dira boitshwaro bjo bo gobogilego, go tagwa goba go diriša polelo e sa hlwekago. Lwantšha tutuetšo yeo. Tšwela pele o kopanela ka mehla le batho ‘bao ba nago le tumelo le letswalo leo le se nago molato.’ Ka mehla o “tiêlêlê modirong wa Morêna.” (1 Timotheo 1:19; 1 Ba-Korinthe 15:58) Dula o swaregile medirong ya Holong ya Mmušo le tirelong ya tšhemo. Nywageng ya gago ya go tsena sekolo, ka dinako tše dingwe tšea karolo tirelong ya bobulamadibogo bja go thuša. Matlafatša pono ya gago ya moya ka tsela ye, gomme o ka se lahlegelwe ke teka-tekano ya gago.—2 Timotheo 4:5.
22, 23. (a) Ke ka baka la’ng ka dinako tše dingwe Mokriste yo mofsa a ka dira dikgetho tšeo ba bangwe ba sa di kwešišego? (b) Bafsa ba kgothaletšwa go dira’ng?
22 Ka ntle le pelaelo go ba le pono ya moya ka dilo go tla lebiša go direng diphetho tšeo ba bangwe ba ka se di kwešišego. Ka mohlala, lesogana le lengwe la Mokriste le be le e-na le bokgoni bja mmino e bile e le morutwana yo a nago le bokgoni kudu thutong e nngwe le e nngwe sekolong. Ge le alogile, le ile la šoma le tatago lona kgwebong ya go hlwekiša mafasetere e le gore le tšwele pele ka modiro wa lona woo le o kgethilego wa go ba moebangedi wa nako e tletšego, goba mmulamadibogo. Barutiši ba lona ga se ba ka ba kwešiša mabaka a phetho ya lona, eupša ge e ba o batametše kgaufsi le Jehofa, re kgodišegile gore o a a kwešiša.
23 Ge o dutše o nagana kamoo o tla dirišago matla a bohlokwa a bofsa bja gago, ‘thea motheo wa mehla e tlo go tla gore o fihlele bjo e lego bophelo bja ruri.’ (1 Timotheo 6:19) Ikemišetše go ‘gopola Mmopi wa gago yo Mogolo’ bofseng bja gago—le bophelong bja gago ka moka. Yeo ke tsela e nnoši ya go thea motheo wa bokamoso bjo bo atlegilego, le bokamoso bja sa ruri.
[Dipotšišo tša Thuto]
Phetho ya Gago ke Efe?
• Ke keletšo efe e buduletšwego yeo e thušago bafsa go rulaganyeng ga bona bokamoso?
• Ke ditsela dife tše dingwe tšeo mofsa a ka ‘batamelago kgaufsi le Modimo’?
• Ke diphetho dife tše dingwe tšeo mofsa a di dirago tšeo di tlago go kgoma bokamoso bja gagwe?
[Caption on page 15]
Na o tla dumelela mediro ya motho ka noši e go feletša matla a gago ka moka gotee le mafolofolo a bofsa?
[Caption on page 17]
Bakriste ba bafsa bao ba lego bohlale ba boloka pono ya bona ya moya e le e botse