E Ba Le Sebete Bjalo Ka Jeremia
E Ba Le Sebete Bjalo Ka Jeremia
“Letêla Morêna, O tiê matla, O tlêmê pelo. Letêla Morêna.”—PSALME 27:14.
1. Ke tšhegofatšo efe e humilego yeo Dihlatse tša Jehofa di e thabelago?
DIHLATSE TŠA JEHOFA di dula paradeiseng ya moya. (Jesaya 11:6-9) Gare ga lefase le leo le tletšego mathata, di thabela tikologo ya moswana-noši ya moya le Bakriste-gotee le tšona, bao ba lego khutšong seng sa bona gotee le go ba khutšong le Jehofa Modimo. (Psalme 29:11; Jesaya 54:13) Le gona paradeise ya tšona ya moya e a gola. Bohle bao ba “diraxo thatô ya Modimo ka pelo e rataxo” ba tšea karolo go e katološeng. (Ba-Efeso 6:6) Bjang? Ka go phela ka go dumelelana le melao ya motheo ya Beibele le ka go ruta ba bangwe go dira se se swanago, ka go rialo di ba laletša go tšea karolo ditšhegofatšong tše di humilego tša paradeise yeo.—Mateo 28:19, 20; Johane 15:8.
2, 3. Bakriste ba therešo ba swanetše go kgotlelela’ng?
2 Lega go le bjalo, go dula ga rena paradeiseng ya moya ga go bolele gore ga se ra swanela go kgotlelela diteko. Re sa dutše re se ra phethagala gomme re tlaišwa ke mahlaba a bolwetši, botšofadi le go feleletša ka lehu. Go feta moo, re bona go phethagala ga diporofeto tšeo di lego mabapi le ‘mehla ya bofelo.’ (2 Timotheo 3:1) Dintwa, bosenyi, bolwetši, tlala le mathata a mangwe a šoro di hlasela batho ka moka, gomme Dihlatse tša Jehofa di a kgomega.—Mareka 13:3-10; Luka 21:10, 11.
3 Go sa šetšwe tše ka moka, ka moka ga rena re lemoga gore ka kua ntle ga tikologo e borutho ya paradeise ya rena ya moya go na le kganetšo e matla. Jesu o lemošitše balatedi ba gagwe gore: “[Lefase] le le hloile ka xe Le se ba xalô, ka xe ke Le hlaotše lefaseng. Xopolang Lentšu le ke Le boditšexo lôna ka re: Mohlanka xa a fete mong wa xaxwe. Xe Nna ba nthlomere, le lena ba tlo Le hlômara.” (Johane 15:18-21) Maemo ke ao a swanago lehono. Batho ba bantši ba sa dutše ba sa kwešiše mohuta wa borapedi bja rena goba go o tšeela godimo. Ba bangwe ba re swaya diphošo, ba a re kwera goba gaešita le—bjalo ka ge Jesu a lemošitše—go re hloya. (Mateo 10:22) Gantši re bahlaselwa ba tsebišo e fošagetšego le ditaba tša maaka a mašoro tšeo di gašwago ke mekero ya ditaba. (Psalme 109:1-3) Ee, ka moka ga rena re lebeletšana le maemo a hlohlago, gomme ba bangwe ba rena re ka thoma go nolega moko. Re ka kgotlelela bjang?
4. Re lebelela kae bakeng sa thušo ya gore re kgotlelele?
4 Jehofa o tla re thuša. Mopsalme o ngwadile ka tlase ga pudulelo gore: “Mahloko a moloki a atile; ’me Morêna ó mo nthša mo xo ôna ka moka.” (Psalme 34:19; 1 Ba-Korinthe 10:13) Bontši bja rena re ka hlatsela gore ge re holofela Jehofa ka mo go feletšego, o re nea matla a go kgotlelela bothata le ge e le bofe. Lerato la rena la go mo rata le lethabo leo le beilwego ka pele ga rena di re thuša go lwantšha go nolega moko le poifo. (Ba-Hebere 12:2) Ka go rialo, ge re lebeletšane le mathata, re tšwela pele re eme ka go tia.
Lentšu la Modimo le Ile la Matlafatša Jeremia
5, 6. (a) Re na le mehlala efe ya barapedi ba therešo bao ba ilego ba kgona go kgotlelela? (b) Jeremia o ile a arabela bjang ge a be a biletšwa go ba moporofeta?
5 Go theoša le histori, bahlanka ba botegago ba Jehofa ba hweditše lethabo go sa šetšwe maemo a thata. Ba bangwe ba phetše dinakong tša kahlolo ya ge Jehofa a be a bontšha bogale bja gagwe go bao ba sa botegego. Gare ga barapedi ba bjalo ba botegago go be go e na le Jeremia le batho ba sego kae ba mehleng ya gagwe, gotee le Bakriste ba lekgolong la pele la nywaga. Mehlala yeo ya histori e begilwe ka Beibeleng e le gore e re kgothatše, gomme re ka ithuta mo gontši ka go e hlahloba. (Ba-Roma 15:4) Ka mohlala, ela hloko Jeremia.
6 Ge e be e sa le yo monyenyane, Jeremia o ile a biletšwa go hlankela e le moporofeta kua Juda. Ye e be e se kabelo e bonolo. Ba bantši ba be ba rapela medimo ya maaka. Gaešita le ge Josia yoo e bego e le kgoši ge Jeremia a be a thoma bodiredi bja gagwe a be a botega, dikgoši ka moka tšeo di ilego tša latela di be di sa botege, gomme bontši bja bao ba bego ba ikarabela bakeng sa go ruta batho—baporofeta le baperisita—bo be bo sa emele therešo. (Jeremia 1:1, 2; 6:13; 23:11) Ka gona, Jeremia o ile a ikwa bjang ge Jehofa a be a mmiletša go ba moporofeta? O ile a boifa! (Jeremia 1:8, 17) Jeremia o ile a gopola karabelo ya gagwe ya mathomong: “’Me nna ka re: Joo Morêna Mong ’a-ka! Hleng xa ke tsebe xo bolêla ka xe kè sa le ngwana!”—Jeremia 1:6.
7. Jeremia o ile a lebeletšana le karabelo efe bathong ba tikologong ya gabo, gomme o ile a arabela bjang?
7 Bontši bja batho ba tikologong ya gabo Jeremia bo be bo sa thabele, gomme gantši o be a lebeletšana le kganetšo e matla. Lebakeng le lengwe, Pašuri yo e lego moperisita, o ile a mo otla gomme a laela gore a tsenywe ka setokising. Jeremia o begile kamoo a ilego a ikwa ka gona ka nako yeo: “Ka re: Nka se ke ka hlwa ke mo [Jehofa] gopola, nka se ke ka hlwa ke bolela ka leina la gagwe.” (PK) Mohlomongwe le wena ka dinako tše dingwe o ile wa ikwa ka tsela e swanago—o nyaka go lahlela toulo. Ela hloko seo se thušitšego Jeremia go kgotlelela. O itše: “Ke kwa mo pelong . . . [Lentšu la Modimo, goba molaetša o] mphiša bo-ka mollô o tukaxo, ó ntsene mašapong. Ka ipolaiša kxôtlêlêlo ka palêlwa.” (Jeremia 20:9) Na mantšu a Modimo a na le mafelelo a swanago le ao go wena?
Bagwera ba Jeremia
8, 9. (a) Moporofeta Uria o ile a bontšha bofokodi bofe, gomme ka mafelelo afe? (b) Ke ka baka la’ng Baruke a ile a nolega moko, gomme o ile a thušwa bjang?
8 Jeremia o be a se noši modirong wa gagwe wa boporofeta. O be a e-na le bagwera, gomme seo se swanetše go ba se ile sa mo kgothatša. Lega go le bjalo, ka dinako tše dingwe bagwera ba gagwe ga se ba dira dilo ka bohlale. Ka mohlala, moporofeta-gotee le yena yo a bitšwago Uria o be a swaregile ka go nea melaetša e lego malebana le Jerusalema le Juda ka “mantšu a a swanaxo le ôna-á ka moka a Jeremia.” Lega go le bjalo, ge Kgoši Joyakima a be a laela gore Uria a bolawe, moporofeta yo o ile a tšhabela Egipita ka ge a be a boifa. Seo ga se sa ka sa mo phološa. Banna ba kgoši ba ile ba mo hlomara, ba mo swara gomme ba mmušetša morago Jerusalema moo a ilego a bolawa. Seo se swanetše go ba se ile sa tšhoša Jeremia gakaakang!—Jeremia 26:20-23.
9 Mogwera yo mongwe wa Jeremia e be e le mongwaledi wa gagwe e lego Baruke. Baruke e be e le mothekgi yo mobotse wa Jeremia, eupša le yena ka nako e nngwe o ile a se sa lebiša tlhokomelo dilong tša moya. O ile a thoma go belaela ka gore: “Ke yo madi-mabe! Hleng mahloko a-ka Morêna ó a hlatlaxanya le ma-ja-pelô! Ke fedile matla ka phêxelô; mo nkaxo khutša [ga ke] xo bône!” A nolegile moko, Baruke o ile a thoma go se sa tšeela dilo tša moya godimo. Go sa dutše go le bjalo, ka botho Jehofa o ile a nea Baruke keletšo e bohlale, gomme o ile a phošollwa. Ke moka o ile a kgonthišetšwa gore o tla phologa phedišo ya Jerusalema. (Jeremia 45:1-5) Jeremia o swanetše go ba a ile a kgothatšega gakaakang ge Baruke a boetše boemong bja gagwe bjo bo leka-lekanego bja moya!
Jehofa o Ile a Thekga Moporofeta wa Gagwe
10. Ke dikholofetšo dife tša thekgo tšeo Jehofa a ilego a di holofetša Jeremia?
10 Sa bohlokwa kudu ke gore Jehofa ga se a ka a lahla Jeremia. O ile a kwešiša kamoo moporofeta wa gagwe a bego a ikwa ka gona gomme a mo nea matla le thekgo tšeo a bego a di nyaka. Ka mohlala, mathomong a bodiredi bja Jeremia ge a be a sa kgodišege mabapi le ditshwanelego tša gagwe, Jehofa o ile a mmotša gore: “Se boifê batho; Nna ke tlo ba le wêna, ka Xo hlakodiša! O r’yalo Morêna.” Ke moka, ka morago ga go nea moporofeta wa gagwe tsebišo ya mabapi le kabelo ya gagwe, Jehofa o itše: “Le xe ba tlo lwa naxô’, ba ka se Xo kxônê, xobane e a lexo le wene ké Nna, xore ke Xo hlakodišê. Ó r’yalo Morêna.” (Jeremia 1:8, 19) Seo e bile se se kgothatšago gakaakang! Le gona Jehofa o ile a phetha mantšu a gagwe.
11. Re tseba bjang gore Jehofa o ile a phethagatša kholofetšo ya gagwe ya gore o tla thekga Jeremia?
11 Ke ka baka leo, ka morago ga go tsenywa ka setokising gomme a lebeletšana le go kwerwa phatlalatša, Jeremia o ile a bolela ka kgodišego gore: “Morêna ó na le nna, Yêna Moxale yo matla. Ké tšôna di tl’o xo uša banthloi; ba ka se kxône selô; ba tlo lewa ke dihlong tše kxolo bà paletšwe.” (Jeremia 20:11) Nywageng ya ka morago ge go be go dirwa maiteko a go bolaya Jeremia, Jehofa o ile a tšwela pele a e-na le yena, gomme ka go swana le Baruke, Jeremia o ile a phologa phedišo ya Jerusalema e le motho yo a lokologilego, mola e le gore batlaiši ba gagwe le bao ba ilego ba hlokomologa ditemošo tša gagwe ba ile ba fedišwa goba ba išwa bothopša Babele.
12. Go sa šetšwe mabaka a go nolega moko, re swanetše go dula re gopola’ng?
12 Ka go swana le Jeremia, lehono Dihlatse tša Jehofa tše dintši di kgotlelela ditlaišo. Bjalo ka ge go boletšwe pejana, tše dingwe tša tše di bakwa ke go se phethagale ga rena, tše dingwe di bakwa ke kgakanego yeo lefase le ikhwetšago le le go yona, gomme tše dingwe di bakwa ke bao ba ganetšago modiro wa rena. Ditlaišo tše bjalo e ka ba tšeo di nolago moko. Ka go swana le Jeremia, re ka thoma go ipotšiša ge e ba re ka tšwetša tirelo ya rena pele. Ka kgonthe, ka dinako tše dingwe re ka letela go nolega moko. Go nolega moko go leka go tsenelela ga lerato la rena go Jehofa. Ka gona anke re ikemišetšeng go se dumelele go nolega moko go re dira gore re tlogele tirelo ya Jehofa bjalo ka ge Uria a dirile. Go e na le moo, anke re ekišeng Jeremia gomme re kgodišege ka thekgo ya Jehofa.
Kamoo re ka Lwantšhago go Nolega Moko ka Gona
13. Ke bjang re ka latelago mohlala wa Jeremia le wa Dafida?
13 Jeremia o be a boledišana le Jehofa Modimo ka mehla, a mmotša maikwelo a gagwe a tseneletšego gomme a mo kgopela matla. Woo ke mohlala o mobotse wo re swanetšego go o latela. Dafida wa bogologolo, yoo a ilego a lebelela go Mothopo o swanago wa matla, o ngwadile gore: “Morêna, sêkêxêla dipolêlô tša-ka tsebê, O kwê diphêxêlô tša-ka. O theetšê xe ke xoeletša, Wene Kxoši ya-ka le Modimo wa-ka! Ké Wene ke Xo rapêlaxo.” (Psalme 5:1, 2) Pego e buduletšwego ya bophelo bja Dafida e bontšha leboelela gore Jehofa o ile a arabela dithapelo tša Dafida tša go kgopela thušo. (Psalme 18:1, 2; 21:1-5) Ka tsela e swanago, ge re imelwa ke dikgateletšo goba mathata a rena a bonagala e le ao a sa fenyegego, ke mo go kgothatšago kudu go retologela go Jehofa ka thapelo gomme re mo tšhollele sa mafahleng a rena. (Ba-Filipi 4:6, 7; 1 Ba-Thesalonika 5:16-18) Jehofa ga a gane go re theetša. Go e na le moo, o re kgonthišetša gore ‘o a re babalela.’ (1 Petro 5:6, 7) Lega go le bjalo, e ka se be mo go kwagalago go rapela Jehofa ke moka ra se theetše seo a se bolelago, na ga go bjalo?
14. Mantšu a Jehofa a ile a kgoma Jeremia bjang?
14 Jehofa o bolela le rena bjang? Nagana gape ka Jeremia. Ka ge Jeremia e be e le moporofeta, Jehofa o ile a boledišana le yena ka go lebanya. Jeremia o hlalosa tsela yeo mantšu a Modimo a ilego a kgoma pelo ya gagwe ka gore: “Mantšu a xaxo a hweditšwe ya ba dijô tša-ka; mantšu a xaxo a nkušitše pelo a nthabiša, kè e-kwa kè bitšwa ka leina l’axo, Morêna Modimo wa mašaba.” (Jeremia 15:16) Ee, Jeremia o ile a thabela ntlha ya gore o be a dutše a bitšwa ka leina la Modimo, gomme mantšu a Gagwe a be a le bohlokwa go moporofeta yo. Ka baka leo, ka go swana le moapostola Paulo, Jeremia o be a fišegela go tsebatša molaetša wo a bego a o neilwe.—Ba-Roma 1:15, 16.
15. Re ka bjala bjang mantšu a Jehofa ka dipelong tša rena, gomme ke go nagana ka eng moo go tla dirago gore re ikemišetše gore re se ke ra homola?
15 Jehofa ga a bolele ka go lebanya le motho le ge e le ofe lehono. Lega go le bjalo, re na le mantšu a Modimo ka Beibeleng. Ka go rialo, ge e ba re tšeela godimo thuto ya rena ya Beibele gomme re naganišiša ka mo go tseneletšego ka seo re ithutago sona, le rena re tla ‘wišwa pelo le go thabišwa’ ke mantšu a Modimo. Le gona re ka thabišwa ke gore re rwele leina la Jehofa ge re e-ya go botša ba bangwe mantšu ao. Anke le ka mohla re se ke ra lebala ntlha ya gore ga go na batho ba bangwe lefaseng lehono bao ba tsebatšago leina la Jehofa. Ke Dihlatse tša gagwe feela tšeo di tsebatšago ditaba tše dibotse tša Mmušo o hlomilwego wa Modimo le go ruta ba boleta go ba barutiwa ba Jesu Kriste. (Mateo 28:19, 20) Re šegofaditšwe gakaakang! Ka baka la seo Jehofa a re neilego sona ka lerato, re ka homola bjang?
A re Beng Šedi ka Bagwera ba Rena
16, 17. Jeremia o be a e-na le pono efe ka bagwera, gomme re ka mo ekiša bjang?
16 Jeremia o bega selo se sengwe gape seo se ilego sa mo thuša go ba le sebete. O itše: “Xa ke ešo ka ka ke dula le bakweri kè thabišana nabô’; ke dula kè nnoši ka ’baka la ’atla sa xaxo, Ò ntladitše thselekêxô.” (Jeremia 15:17) Jeremia o be a kgetha gore a be noši go e na le gore a senywe ke bagwera ba babe. Le rena lehono re lebelela ditaba ka mo go swanago. Le ka mohla ga re lebale temošo ya moapostola Paulo ya gore “mehlamo e mebe e senya bokwala,” gape e ka senya le mekgwa e mebotse yeo re bilego le yona ka nywaga e mentši.—1 Ba-Korinthe 15:33.
17 Bagwera ba babe ba ka dumelela moya wa lefase gore o senye tsela ya rena ya go nagana. (1 Ba-Korinthe 2:12; Ba-Efeso 2:2; Jakobo 4:4) Ka gona, anke re tlwaetšeng matla a rena a go nagana go hlaola bagwera ba ba gobatšago gomme re ba pheme ka mo go feletšego. (Ba-Hebere 5:14) Ge nkabe Paulo a be a phela lefaseng lehono, o nagana gore o be a tla re’ng go Mokriste yo a bogelago dipaesekopo tša boitshwaro bjo bo gobogilego goba tša bošoro, goba dipapadi tša bošoro? O be a tla eletša bjang ngwanabo rena yo a bago le bogwera le batho bao a sa ba tsebego le ganyenyane ka go Internet? O be a tla nagana’ng ka Mokriste yo a fetšago diiri tše dintši a bapala dipapadi tša bidio goba a bogetše thelebišene eupša a se na mekgwa e mebotse ya go ithuta ka noši?—2 Ba-Korinthe 6:14b; Ba-Efeso 5:3-5, 15, 16.
Tšwela Pele o le Paradeiseng ya Moya
18. Ke’ng seo se tla re thušago gore re dule re le matla moyeng?
18 Re tšeela godimo paradeise ya rena ya moya. Mo lefaseng lehono ga go na selo seo se swanago le yona le ganyenyane. Gaešita le batho bao e sego badumedi ba bolela gabotse ka lerato, go naganela le botho bjoo Bakriste ba bo bontšhanago. (Ba-Efeso 4:31, 32) Lega go le bjalo, gona bjale re swanetše go lwantšha go nolega moko go feta le ge e le neng pele. Bagwera ba babotse, thapelo le mekgwa e mebotse ya go ithuta di ka re thuša go dula re le matla moyeng. Di tla re matlafaletša go lebeletšana le teko le ge e le efe ka go holofela Jehofa ka mo go feletšego.—2 Ba-Korinthe 4:7, 8.
19, 20. (a) Ke’ng seo se tla re thušago gore re kgotlelele? (b) Sehlogo se se latelago se lebišitšwe go bomang, le gona se tla tanya kgahlego ya bomang gape?
19 Le ka mohla ga se ra swanela go dumelela bao ba hloilego molaetša wa rena wa Beibele ba re tšhošetša gore re kwanantšhe tumelo ya rena. Ka go swana le manaba ao a ilego a tlaiša Jeremia, bao ba lwago le rena ba lwa le Modimo. Ba ka se fenye. Jehofa yo a lego matla kudu go feta baganetši ba rena o re botša gore: “Letêla Morêna, O tiê matla, O tlêmê pelo. Letêla Morêna.” (Psalme 27:14) Ge kholofelo ya rena go Jehofa e tsemile medu ka dipelong tša rena, anke re ikemišetšeng gore re se ke ra tlogela go dira se se lokilego. Anke re kgodišegeng gore, ka go swana le Jeremia le Baruke, re tla buna ge e ba re sa lape.—Ba-Galatia 6:9.
20 Go lwantšha go nolega moko ke ntwa ya ka mehla go Bakriste ba bantši. Lega go le bjalo, bafsa ba lebeletšane le ditlhohlo tše di kgethegilego. Eupša gape ba na le dibaka tše di kgahlišago. Sehlogo se se latelago se lebišitšwe ka go lebanya go bafsa bao ba lego gare ga rena. Le gona se tla tanya kgahlego ya batswadi le batho ka moka ba bagolo bao ba ineetšego ka phuthegong bao ka mantšu, ka mohlala gotee le ka thekgo e lebanyago ba lego boemong bja go thuša bafsa ka phuthegong.
[Dipotšišo tša Thuto]
O be o tla Araba Bjang?
• Ke ka baka la’ng re ka letela maemo a nolago moko, gomme re swanetše go lebelela go mang bakeng sa thušo?
• Jeremia o ile a fenya bjang go nolega moko go sa šetšwe go ba le kabelo e thata?
• Ke’ng seo se tla ‘wišago dipelo tša rena le go di thabiša’ gaešita le gare ga mathata?
[Caption on page 9]
Jeremia o be a nagana gore ke yo monyenyane kudu le gore ga a na phihlelo gore e ka ba moporofeta
[Caption on page 10]
Gaešita le ge a be a tlaišwa, Jeremia o be a tseba gore Jehofa o be a e na le yena ‘bjalo ka mogale yo matla’