Na O Matlafatšwa Ke Lentšu La Modimo?

GE O lebeletšane le diteko, o lebeletšana bjang le tšona ka katlego? Tabeng ya Jesu, go gopola lengwalo le le swanetšego go ile gwa mo thuša go lebeletšana le ditlhohlo tša Sathane. (Mateo 4:1-11) Ka mo go swanago, ge Kgoši Dafida a be a lebeletšane le diteko tša motho ka noši, o ile a matlafatšwa ke Lentšu la Modimo. O itše: “Mohla kè xoletšwe ke dipelaêlô ka teng xa-ka, ka bewa pelo ke dikhomotšô tša xaxo.”—Psalme 94:19.

Ka mo go swanago, go gopola lengwalo le re le ratago kudu go ka re homotša goba gwa re matlafatša ge re lebeletšane le diteko. Ka mohlala, Rex yo gabjale a nago le nywaga e 89, e bile moebangedi wa nako e tletšego go tloga ka 1931. Lega go le bjalo, o re: “Gantši ke ikwa ke sa swanelege ge ke neilwe kabelo e kgethegilego bodireding.” O ile a lebeletšana bjang le se ka katlego? “Ke gopola lengwalo la-ka leo ke le ratago kudu, Diema 3:5, leo le rego: ‘Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô.’ Go gopola le go diriša lengwalo le, go nthušitše go phetha dikabelo tša-ka ka katlego.”

Gaešita le ba banyenyane ba ka holwa ke go ba le lengwalo leo ba le ratago kudu. Jack wa nywaga e tshela o re lengwalo la gagwe leo a le ratago kudu ke Mateo 24:14. Lengwalo le le mo kgothaletša go yo dira boboledi le batswadi ba gagwe. O re: “Ke rata go yo nea bohlatse Mokibelo o mongwe le o mongwe le mma, tate le kgaetšedi’a-ka yo mogolo.”

Ka go swana le Jesu, na ka dinako tše dingwe o lebeletšana le ditlhohlo tše di lebanyago tumelo ya gago? Gona lengwalo la Ba-Filipi 4:13 e ka ba le lengwe la mangwalo a gago ao o a ratago kudu. Ka go swana le Kgoši Dafida, na o “xoletšwe ke dipelaêlô”? Gona go gopola lengwalo la Ba-Filipi 4:6, 7 go ka go thuša go lebeletšana le se ka katlego. Na ka dinako tše dingwe o belaela gore tirelo ya gago go Modimo ke ya lefeela? Gona go gopola lengwalo la 1 Ba-Korinthe 15:58 go tla go matlafatša.

Ka go swara ka hlogo mangwalo a swanetšego, re dumelela Lentšu la Modimo go ba le matla maphelong a rena. (Ba-Hebere 4:12) Mangwalo a bjalo ao re a ratago kudu a ka re nea bobedi matla le khomotšo.—Ba-Roma 15:4.