Go Hlokomela Batšofadi—boikarabelo Bja Bakriste

“Le tlo ba la tšofala kè sa fêla kè le Yêna-é, kè Le kuka Lè le ’hlôxô tše pududu.”—JESAYA 46:4.

1, 2. Ke bjang tlhokomelo ya Tatago rena wa legodimong e fapanago le yeo e newago ke batswadi bao e lego batho?

BATSWADI bao ba ratago bana ba bona kudu ba ba hlokomela boseeng, bjaneng le nywageng ya mahlalagading. Gaešita le ge bafsa ba fihlile boemong bja go ba batho ba bagolo gomme ba e-na le malapa a bona ka noši, bo-tatago bona le bo-mmago bona ba tšwela pele go ba nea tlhokomelo e lerato le thekgo.

² Gaešita le ge seo batho ba ka se direlago bana ba bona se lekanyeditšwe, Tatago rena wa legodimong ka mehla o kgona go nea bahlanka ba gagwe ba botegago tlhokomelo e lerato le thekgo. Ge a be a bolela le batho ba gagwe ba kgethilwego ba mehleng ya bogologolo, Jehofa o itše: “Le tlo ba la tšofala kè sa fêla kè le Yêna-é, kè Le kuka Lè le ’hlôxô tše pududu.” (Jesaya 46:4) A ke mantšu a kgonthišetšago gakaakang go Bakriste ba tšofetšego! Jehofa ga a lahle bao ba dulago ba mmotegela ka go se kwanantšhe. Go e na le moo, o holofetša go ba matlafatša, go ba thekga le go ba hlahla maphelong a bona, gaešita le go fihla botšofading.—Psalme 48:14.

3. Ke’ng seo se tlago go ahla-ahlwa sehlogong se?

³ Ke bjang re ka ekišago go tshwenyega ga Jehofa ka lerato bakeng sa batšofadi? (Ba-Efeso 5:1, 2) Anke re ahla-ahleng ditsela tšeo ka tšona bana, balebeledi ba phuthego le Bakriste ka o tee ka o tee ba ka hlokomelago dinyakwa tša ditho tše di godilego tša borwarre bja rena bja lefaseng ka bophara.

Boikarabelo bja Rena re le Bana

4. Ke boikarabelo bofe bjo bana bao e lego Bakriste ba nago le bjona ka batswadi ba bona?

⁴ “Xodiša tat’axo le mm’axo.” (Ba-Efeso 6:2; Ekisodo 20:12) Ka tsopolo ye e bonolo eupša e le yeo e nago le morero go tšwa ka Mangwalong a Sehebere, moapostola Paulo o gopoditše bana ka boikarabelo bjo ba nago le bjona go batswadi ba bona. Eupša mantšu a a šoma bjang go hlokomeleng  batšofadi? Mohlala o ruthetšago pelo go tšwa mehleng ya pele ga Bokriste o tla re thuša go araba potšišo ye.

5. (a) Ke’ng seo se bontšhago gore Josefa o be a sa lebala boikarabelo bja gagwe bja go hlokomela tatagwe? (b) Go hlompha batswadi ba rena go bolela’ng, gomme ke mohlala ofe o mobotse woo Josefa a o beilego tabeng ye?

⁵ Ka nywaga ya ka godimo ga e 20, Josefa ga se a ka a bonana le tatagwe yo a tšofetšego, e lego mopatriareka Jakobo. Lega go le bjalo, go molaleng gore Josefa o be a sa dutše a rata Jakobo ka ge e le tatagwe. Ge e le gabotse, ge Josefa a be a ikutolla go bana babo, o ile a botšiša gore: “A tate ó sa phela?” (Genesi 43:7, 27; 45:3) Ka nako yeo, naga ya Kanana e be e hlasetšwe ke tlala. Ka gona, Josefa o ile a romela lentšu go tatagwe, a re: “Tlaa xó nna, O se diêxê. O tlo axa naxeng ya Gosene, xore O bê kxaufsi le nna . . . Ke tlo xo babalêla Ò le fá.” (Genesi 45:9-11; 47:12) Ee, go hlompha batswadi ba ba tšofetšego go akaretša go ba šireletša le go ba hlokomela ka dilo tše di bonagalago ge ba le boemong bja go se kgone go itlhokomela. (1 Samuele 22:1-4; Johane 19:25-27) Josefa o ile a amogela boikarabelo bjo ka lethabo.

6. Ke bjang Josefa a ilego a bontšha lerato la kgonthe la go rata tatagwe, gomme ke bjang re ka ekišago mohlala wa gagwe?

⁶ Ka tšhegofatšo ya Jehofa, Josefa o be a fetogile e mongwe wa banna ba ba humilego kudu le bao ba nago le matla kudu ba Egipita. (Genesi 41:40) Eupša ga se a ka a itebelela a le bohlokwa kudu goba a swaregile kudu go ka hlompha tatagwe wa nywaga e 130. Ka morago ga go tseba gore Jakobo (goba Isiraele) o be a batamela, “ya ba xôna Josefa a tlemilexo koloi ya xaxwe, a tšwêla xo xahlanetša Isiraele tat’axwe kwa Gosene. Xe a tšwêlêla xo yêna, a mo xokarêla a lla, a fetša lebaka à lla.” (Genesi 46:28, 29) Kamogelo ye e be e le selo se se fetago pontšho e tlwaelegilego ya tlhompho. Josefa o be a rata tatagwe yo a tšofetšego kudu gomme o be a sa lewe ke dihlong tša go bontšha lerato la gagwe. Ge e ba re e-na le batswadi ba ba tšofalago, na le rena re bontšha lerato la rena la go ba rata ka tsela e kgolo?

7. Ke ka baka la’ng Jakobo a ile a kganyoga go bolokwa Kanana?

⁷ Boineelo bja Jakobo go Jehofa bo ile bja dula bo le matla go fihla bofelong bja bophelo bja gagwe. (Ba-Hebere 11:21) Ka baka la tumelo ya gagwe dikholofetšong tša Modimo, Jakobo o ile a kgopela gore setopo sa gagwe se bolokwe Kanana. Josefa o ile a hlompha tatagwe ka go dumelelana le kgopelo ye, go sa šetšwe ditshenyagalelo tše dikgolo le maiteko ao a bego a akaretšwa.—Genesi 47:29-31; 50:7-14.

8. (a) Tutuetšo ya rena e kgolo ya go hlokomela batšofadi ke efe? (b) Ke’ng seo mohlanka yo mongwe wa nako e tletšego a ilego a se dira e le gore a hlokomele batswadi ba gagwe ba ba tšofalago? (Bona lepokisi le le lego go letlakala 17.)

⁸ Ke’ng seo se ilego sa tutueletša Josefa go hlokomela tatagwe? Le ge lerato le maikwelo a tebogo go yo a mo neilego bophelo le yo a mo fepilego e be e le dintlha tše kgolo, ka ntle le pelaelo Josefa gape o ile a ikwa a e-na le kganyogo ya kgonthe ya go thabiša Jehofa. Le rena re swanetše go ba le kganyogo e swanago. Paulo o ngwadile gore: “Xe mohlôlôxadi a na le bana le xe e le ditloxolo, xo bôná-bao sa pele a e bê xo ithuta borapedi ka lapa; e bê xo leboxa batswadi ba bôná. Ké xôna xo thakxa le xo kxahla Modimo.” (1 Timotheo 5:4) Ka kgonthe, lerato la go rata Jehofa le poifo ya borapedi ya go mmoifa di tla re  tutueletša go hlokomela batswadi ba ba tšofalago, go sa šetšwe gore ke ditlhohlo dife tšeo go dira bjalo go ka di akaretšago. *

Kamoo Bagolo ba Bontšhago go Tshwenyega ga Bona

9. Ke bomang bao Jehofa a ba beilego go diša mohlape, go akaretša le Bakriste ba ba tšofetšego?

⁹ Kgaufsi le bofelo bja bophelo bja gagwe bjo botelele, Jakobo o ile a bolela ka Jehofa e le “yêna Modimo e a ntišitšexo xo tloxa setloxong sa-ka xo fihla lehono.” (Genesi 48:15) Lehono, Jehofa o diša bahlanka ba gagwe ba lefaseng ka go diriša balebeledi ba Bakriste, goba bagolo, ka tlase ga tlhahlo ya Morwa wa gagwe Jesu Kriste, “modiši e moxolo.” (1 Petro 5:2-4) Ke bjang balebeledi ba ka ekišago Jehofa ge ba dutše ba hlokomela ditho tše di tšofetšego tša mohlape?

10. Go dirilwe’ng bakeng sa go nea Bakriste ba ba tšofetšego thušo ya dilo tše di bonagalago? (Bona lepokisi le le lego go letlakala 19.)

¹⁰ Kapejana ka morago ga go thewa ga phuthego ya Bokriste, baapostola ba ile ba kgetha “banna ba ba šupaxo . . . ba ba tletšexo Môya-mokxêthwa le bohlale” gore ba hlokomele ‘dikabo tša letšatši le letšatši’ tša dijo gare ga bahlologadi ba Bakriste ba bahloki. (Ditiro 6:1-6) Ka morago, Paulo o ile a laela Timotheo wa molebeledi go lokeletša bahlologadi ba ba tšofetšego bao ba beago mohlala gare ga bao ba bego ba tla hwetša thušo ya dilo tše di bonagalago. (1 Timotheo 5:3, 9, 10) Ka mo go swanago, balebeledi ba phuthego lehono ba rulaganya ka go rata thušo e šomago bakeng sa Bakriste ba ba tšofetšego ge se se nyakega. Lega go le bjalo, go hlokomela batšofadi ba ba botegago go akaretša mo gontši.

11. Ke’ng seo Jesu a ilego a se bolela mabapi le mohlologadi wa modiidi yo a ilego a neela moneelo o monyenyane?

¹¹ Ge a be a le kgaufsi le go phetha bodiredi bja gagwe bja mo lefaseng, Jesu o ile a dula fase tempeleng gomme “a bôna ka mo lešaba le thšêlaxo dithšêlêtê polokelong.” Ke moka motho yo mongwe o ile a tanya kgahlego ya gagwe. Pego e re: “Xwa tla mosadi wa mohlôlôxadi wa modiitšana, a thšêla dithšêlêtyana tše pedi [tše] di bopaxo peni e tee.” Jesu o ile a biletša barutiwa ba gagwe go yena gomme a ba botša gore: “Ruri, ke a Le botša, mosadi eo wa mohlôlôxadi wa modiitšana ó thšetše xa-xolo xo fetiša bohle ba ba thšetšexo fá polokelong. Xobane bao bohle ba nthšitše xo tše di ba tlaletšexo; xe e le yêna ó nthšitše bohumanexing bya xaxwe, a thšêla tšohle tše a bexo a na natšô’, è le tšohle tše a bexo a tlo phela ka tšôna.” (Mareka 12:41-44) Ge e le mabapi le tekanyo ya tšhelete yeo e neilwego, moneelo wa mohlologadi yo o be o le o monyenyane, eupša Jesu o be a tseba kamoo Tatagwe wa  legodimong a tšeelago godimo dipontšho tše bjalo tša boineelo bja pelo ka moka. Go sa šetšwe nywaga ya mohlologadi yoo wa modiidi, Jesu ga se a ka a tšeela fase seo a se dirilego.

12. Ke bjang bagolo ba ka bontšhago tebogo ya bona bakeng sa tema yeo e kgathwago ke Bakriste ba ba tšofetšego?

¹² Ka go swana le Jesu, balebeledi ba Bakriste ga ba tšeele fase seo batšofadi ba se dirago bakeng sa go godiša borapedi bja therešo. Bagolo ba na le lebaka la go reta batšofadi bakeng sa go tšea ga bona karolo bodireding, bakeng sa go tšea ga bona karolo dibokeng, bakeng sa tutuetšo ya bona e botse ka phuthegong le bakeng sa kgotlelelo ya bona. Mantšu a tšwago pelong a kgothatšo a ka thuša batšofadi go hwetša “lebaka la go thaba” tirelong ya bona e kgethwa, ka go rialo ba phema go nolega moko ka baka la go ipapetša le Bakriste ba bangwe ka seo ba kgonago go se dira goba go bapetša seo ba se dirago le dilo tšeo ba di fihleletšego nakong e fetilego.—Ba-Galatia 6:4, NW.

13. Ke ka ditsela dife bagolo ba ka dirišago ditalente le phihlelo ya batšofadi?

¹³ Bagolo ba ka lemoga thekgo ya bohlokwa yeo e newago ke Bakriste ba ba tšofetšego ka go diriša phihlelo ya bona le ditalente. Ka dinako tše dingwe batšofadi bao ba beago mohlala ba ka dirišwa dipontšhong goba dipoledišanong. Mogolo yo mongwe o re: “Batheetši ba tloga ba ela hloko gomme ba a theetša ge ke boledišana le ngwanabo rena goba kgaetšedi yo a tšofetšego yo a godišeditšego bana therešong.” Bagolo ka phuthegong e nngwe ba bega gore kgaetšedi wa mmulamadibogo wa nywaga e 71 o be a dutše a atlega go thušeng bagoeledi ba Mmušo gore ba be gona ka mehla tirelong ya tšhemo. Le gona o ba kgothaletša go dira “dilo tša motheo,” tše bjalo ka go bala Beibele le temana ya letšatši gomme ba naganišiše ka seo ba se badilego.

14. Ke bjang sehlopha se sengwe sa bagolo se ilego sa bontšha tebogo bakeng sa molebeledi-gotee le bona yo a tšofetšego?

¹⁴ Le gona bagolo ba tšeela godimo tema e kgathwago ke balebeledi-gotee le bona bao ba tšofetšego. José, yoo a lego nywageng ya gagwe ya bo-70 gomme a hlanketše e le mogolo ka nywaga-some, morago bjale o ile a lebeletšana le go buiwa mo gogolo. A lebeletšane le lebaka le le letelele la go fola, o ile a nagana ka go tlogela tokelo ya gagwe ya go hlankela e le molebeledi yo a  okamelago. José o re: “Karabelo ya bagolo ba bangwe e ile ya mmakatša. Go e na le gore ba amogele tšhišinyo ya-ka, ba ile ba botšiša gore ke thušo efe e šomago yeo ke bego ke e nyaka e le gore ke tšwele pele ke phetha boikarabelo bja-ka.” Ka thušo ya mogolo yo mofsa, José o ile a kgona go tšwela pele a hlankela ka lethabo e le molebeledi yo a okamelago, gomme se e bile tšhegofatšo go phuthego. Mogolo-gotee le yena o re: “Bana babo rena ba tšeela godimo modiro wa José e le mogolo. Ba a mo rata le go hlompha phihlelo ya gagwe le mohlala wa tumelo. O humiša phuthego ya gabo rena.”

Go Hlokomelana

15. Ke ka baka la’ng Bakriste ka moka ba swanetše go tshwenyega ka katlego ya batšofadi bao ba lego gare ga bona?

¹⁵ Ga se feela bana bao ba nago le batswadi ba ba tšofetšego le bahlanka bao ba kgethilwego bao ba swanetšego go tshwenyega ka batšofadi. Ge a bapetša phuthego ya Bokriste le mmele wa motho, Paulo o ngwadile gore: “Modimo xe a hlatlaxanya mmele, ó ratile xore sethô se bôtlana e bê sôna se xodišwaxo. Xore mo mmeleng xo se kê xwa ba le thšitanô, dithô di babalêlanê ka xo kwana.” (1 Ba-Korinthe 12:24, 25) E le gore phuthego ya Bokriste e šome ka botee, setho se sengwe le se sengwe se swanetše go tshwenyega ka katlego ya badumedi-gotee le sona, go akaretša le batšofadi.—Ba-Galatia 6:2.

16. Ke bjang re ka bontšhago go ba le kgahlego go motšofadi ge re e ba gona dibokeng tša Bokriste?

¹⁶ Diboka tša Bokriste di nea sebaka se sebotse sa go bontšha go ba le taba ga rena le batšofadi. (Ba-Filipi 2:4; Ba-Hebere 10:24, 25) Na re diriša nako bakeng sa go boledišana le batšofadi ditiragalong tše bjalo? Gaešita le ge e ka ba mo go nepagetšego go botšiša mabapi le go phela ga bona gabotse mmeleng, na re ka ‘hlallela neo ya moya,’ mohlomongwe ka go abelana le bona phihlelo e agago goba kgopolo e tšwago Mangwalong? Ka ge batšofadi ba bangwe ba sa kgone go sepelela kgole, e tla ba go bontšha botho go ya go bona go e na le gore re letele gore bona ba tle go rena. Ge e ba go kwa e le bothata, re ka swanelwa ke go bolela ka go nanya le go bolela ka mo go kwagalago. Le gona e le gore go be le “go kgothatšana” ga kgonthe, re swanetše go theetša ka kelohloko seo motšofadi a se bolelago.—Ba-Roma 1:11, 12, NW.

17. Re ka bontšha bjang go tshwenyega ga rena ka Bakriste ba ba tšofetšego bao ba sa kgonego go tšwa ka gae?

¹⁷ Go thwe’ng ge e ba batšofadi ba itšego ba sa kgone go ba gona dibokeng tša Bokriste? Jakobo 1:27 e bontšha gore ke boikarabelo bja rena go “hlôla dišuana le bahlôlôxadi mahlokong a bôná.” Se sengwe gape seo se bolelwago ke lediri la Segerika leo le fetoletšwego e le ‘go hlola’ ke “go eta.” (Ditiro 15:36) Le gona batšofadi ba thabela  diketelo tša rena gakaakang! Ge a be a golegilwe kua Roma mo e ka bago ka 65 C.E., “mokxalabyê” Paulo o ile a ikhwetša a le noši. O be a hlologetše go bona mošomi-gotee le yena Timotheo gomme a ngwala gore: “Phêxêlêla xo tla xo nna ka pelá.” (Filemone 9; 2 Timotheo 1:3, 4; 4:9) Gaešita le ge e se bagolegwa ba kgonthe, batšofadi ba bangwe ga ba kgone go tšwa ka gae ka baka la mathata a tša maphelo. Ge e le gabotse, ba ka ba ba re, ‘Hle, dira sohle seo o ka se kgonago go nketela kapejana.’ Na re arabela dikgopelong tše bjalo?

18. Ke mehola efe e ka tlišwago ke go etela ga rena batšofadi?

¹⁸ Le ka mohla o se ke wa tšeela fase mafelelo a holago a go etela ngwanabo rena goba kgaetšedi wa moya yo a tšofetšego? Ge Mokriste yo a bitšwago Onesiforo a be a le Roma, o ile a nyaka Paulo a babaletše, a mo hwetša, gomme ka morago ga moo ‘o be a fela a mo tlišetša dilapološi.’ (2 Timotheo 1:16, 17, PK) Kgaetšedi yo mongwe yo a tšofetšego o re: “Ke rata go fetša nako ke e-na le bafsa. Seo ke se ratago kudu ke gore ba ntshwara bjalo ka setho sa lapa la bona. Seo se nkgothatša kudu.” Mokriste yo mongwe yo a tšofetšego o re: “Ke tloga ke leboga kudu ge motho yo mongwe a nthomela karata, a nteletša mogala gore a bolele le nna ka metsotso e sego kae feela goba a nketela ka lebakanyana. Go a lapološa.”

Jehofa o Putsa Bao ba Nago le Taba le Batšofadi

19. Ke ditšhegofatšo dife tšeo di tlišwago ke go hlokomela batšofadi?

¹⁹ Go hlokomela batšofadi go feleletša ka ditšhegofatšo tše dintši. Go gwerana le batšofadi le go kgona go diriša tsebo le phihlelo ya bona ke tokelo. Bahlokomedi ba hwetša lethabo le legolo leo le tlišwago ke go nea, gotee le maikwelo a go fihlelela selo se itšego le khutšo ya ka gare ya gore ba phethagaditše boikarabelo bja bona bja Mangwalo. (Ditiro 20:35) Go feta moo, bao ba hlokomelago batšofadi ga se ba swanela go boifa gore bona ka noši ba tla hlokomologwa nywageng ya bona ya botšofadi. Lentšu la Modimo le re kgonthišetša gore: “Xo nôna mo-setša-wa-xabô; moxêla-bang’ le yêna ó tlo xêlwa.”—Diema 11:25.

20, 21. Jehofa o lebelela bjang bao ba hlokomelago batšofadi, gomme boikemišetšo bja rena e swanetše go ba bofe?

²⁰ Jehofa o putsa bana bao ba boifago Modimo, balebeledi le Bakriste ba bangwe ba lego botho bao ka go hloka boithati ba hlokomelago dinyakwa tša badumedi-gotee le bona ba ba tšofetšego. Moya o bjalo o dumelelana le seema se: “Thlalla-badiidi ó adima Morêna; ’me Yêna ó tlo mmušetša tše a di neilexo bála.” (Diema 19:17) Ge e ba lerato le re tutueletša go bontšha kgaugelo go batho ba maemo a tlase le badiidi, Modimo o lebelela go nea mo go bjalo e le kadimo yeo a e lefago ka ditšhegofatšo. Le gona o re putsetša go nea barapedi-gotee le rena ba ba tšofetšego tlhokomelo e lerato, bao bontši bja bona ‘e lego badiidi lefaseng eupša e le bahumi tumelong.’—Jakobo 2:5.

²¹ Moputso wa Modimo ke o mogolo gakaakang! O akaretša bophelo bjo bo sa felego. Go bontši bja bahlanka ba Jehofa, moputso wo e tla ba bophelo bjo bo sa felego lefaseng la paradeise, moo ditla-morago tša sebe sa leabela di tla tlošwago gomme batšofadi bao ba botegago ba tlago go thabela go tsošološwa ga matla a bona a bofsa. (Kutollo 21:3-5) Ge re letetše nako yeo ya lethabo, anke re tšweleng pele re phethagatša boikarabelo bja rena bja Bokriste bja go hlokomela batšofadi.

[Mengwalo ya ka tlase]

[Dipotšišo tša Thuto]

[Lepokisi go letlakala 17]

Ge Batswadi ba Gagwe ba be ba Nyaka Thušo

Philip o be a hlankela e le moithapi mošomong wa tša meago kua Liberia ka 1999 ge a be a amogela ditaba tša gore tatagwe o be a babja o šoro. A kgodišegile gore mmagwe a ka se kgone go lebeletšana le boemo ka katlego a nnoši, o ile a dira phetho ya go boela gae gore a yo rulaganyeletša tatagwe tlhokomelo ya tša kalafo.

Philip o gopola gore: “Go be go se bonolo go boela gae, eupša ke ile ka ikwa ke swanetše go thoma pele ka go hlokomela batswadi ba-ka.” Nywageng e meraro e latetšego, o ile a hudušetša batswadi ba gagwe legaeng leo le swanelago kudu gomme ka thušo ya Bakriste-gotee le yena ba lefelong leo, a hwetša bodulo bjo bo ka kgotsofatšago dinyakwa tša tatagwe tše di kgethegilego.

Gabjale mmago Philip o itokišeditše gakaone go ka lebeletšana le mathata a tatago Philip a mašoro a tša maphelo. Morago bjale, Philip o ile a kgona go amogela taletšo ya go šoma e le moithapi ofising ya lekala ya Dihlatse tša Jehofa kua Macedonia.

[Lepokisi go letlakala 19]

Ga se ba Hlokomologa Dinyakwa tša Gagwe

Ge Ada, Mokriste wa nywaga e 85 wa kua Australia a be a sa kgone go tšwa legaeng la gagwe ka baka la boemo bjo bo fokolago bja tša maphelo, bagolo ba phuthego ba ile ba rulaganyetša go nea thušo. Ba ile ba rulaganya sehlopha sa badumedi-gotee le bona bao ba bego ba ka mo thuša. Bana babo rena ba le dikgaetšedi ba ile ba thabela go dira mediro e bjalo ka go hlwekiša, go hlatswa, go apea le go dira mešongwana e mengwe.

Thušo yeo e ile ya thongwa mo e ka bago ngwaga-some o fetilego. Go fihla gabjale, Dihlatse-gotee le yena tša Jehofa tša ka godimo ga tše 30 di thušitše go hlokomela Ada. Di tšwela pele go mo etela, di mmalela dikgatišo tša Beibele, di mmotša ka tšwelopele ya moya ya bao ba lego ka phuthegong gotee le go rapela le yena ka mehla.

Mogolo wa Mokriste wa lefelong leo o boletše gore: “Bao ba hlokomelago Ada ba go lebelela e le tokelo go mo thuša. Ba bantši ba tutueditšwe ke tirelo ya gagwe ya potego go theoša le nywaga-some, gomme go thata go bona go fo hlokomologa dinyakwa tša gagwe.”

[Caption on page 16]

Na re bontšha batswadi bao ba tšofetšego lerato ka tsela e kgolo?

[Caption on page 18]

Bohle ka phuthegong ba ka bontšha lerato la bona la go rata badumedi-gotee le bona ba ba tšofetšego

Dikarabo tša Gago ke Dife?

• Ke bjang bana ba ka hlomphago batswadi ba ba tšofetšego?

• Ke bjang bagolo ba bontšhago go leboga ditho tše di tšofetšego tša mohlape?

• Ke’ng seo Bakriste ka o tee ka o tee ba ka se dirago bakeng sa go bontšha kgahlego ya bona ya kgonthe ka batšofadi?

• Ke ditšhegofatšo dife tšeo di tlišwago ke go hlokomela Bakriste ba ba tšofetšego?