Go Tsoma Ga Batho go

THABIŠA MODIMO

“GA SE gwa ka gwa ba le lekoko la batho leo Modimo a sego a ka a ba karolo ya lona, kudu-kudu karolo ya go laola le ya go bopa. Seo ke sa therešo gaešita le bathong bao ka boomo ba kgethago go se be badumedi.” Ke kamoo John Bowker a bolelago ka gona ka pukung ya gagwe ya God—A Brief History. Ka tsela le ge e le efe, go tsoma go hwetša Modimo le go amogelwa ke yena e be e dutše e le taba e tlwaelegilego boitshwarong bja batho. Go dikologa lefase, batho ba bantši ba na le kganyogo e tšwago pelong ya go nyaka go thabiša Modimo. Ke therešo gore tsela yeo ka yona ba lekago go dira se e fapana go ya ka ditumelo tša bona.

Ba bangwe ba dumela gore selo se tee feela sa bohlokwa gore o amogelwe ke Modimo ke gore o itshware gabotse. Ba bangwe ba nagana gore ba ka amogelwa ke Modimo ge e ba ba dira ditiro tša go thuša badiidi. Ke moka, menyanya le ditirelo tša bodumedi ke tša bohlokwa go batho ba dimilione.

Ka lehlakoreng le lengwe, go na le bao ba dumelago gore Modimo o kgole kudu le bona—o kgole kudu goba o swaregile kudu ka ditaba tše dingwe gore a ka lebiša tlhokomelo bathong ba tlwaelegilego. Go ya ka pego, radifilosofi Epicurus wa Gerika ya bogologolo o be a dumela gore ‘medimo e kgole kudu gore e ka go dira bošula go feta go go direla botse.’ Lega go le bjalo, ba bantši bao ba nago le dikgopolo tše bjalo ke badumedi. Ba bangwe ba ka ba ba neela dihlabelo le go dira ditirelo ka kholofelo ya go latša bagologolo ba bona.

O nagana’ng? Na Modimo o tloga a sa lemoge maiteko a rena a go nyaka go amogelwa ke yena? Na go a kgonega go rena gore re kgome pelo ya Modimo e bile re mo thabiše?