Mokgwa wa go Fihlelela Bophelo bjo Botelele le bjo bo Thabišago

BATHO ba bangwe ba bolela gore yo mongwe le yo mongwe o nyaka go gola, fela ga go yo a nyakago go tšofala. Batho ba bantši ge ba fihla nywageng ya go rola modiro ba fagahlela go ba le nako e ntši le go ba le boikarabelo bjo bonyenyane. Lega go le bjalo, ba boifa go hloka morero le go hloka mohola. Le gona ba boifa go phaelwa ka thoko, go se thabe le boemo bja tša maphelo bjo bo phuhlamago.

Ka gona, sephiri sa bophelo bjo bo thabišago ke sefe? Go ba le bagwera ba kgonthe le lapa leo le nago le lerato go thuša go tlišetša bobedi batho ba bagolo le bana lethabo. Eupša seo ba bangwe ba ka se direlago motšofadi bophelong ga se sa bohlokwa kudu. Seo se lego bohlokwa kudu ke seo motšofadi a ka se direlago ba bangwe.

Nyakišišo ya nako e telele go banyalani ba ba tšofetšego ba 423 e bontšhitše gore “go thekga batho ba bangwe go ka thuša go telefatša maphelo a rena ka noši.” Stephanie Brown, yo a bego a dira nyakišišo ye, o hlalositše gore: “Mafelelo a nyakišišo a bontšha gore ga se seo se hwetšwago ditswalanong tša rena le ba bangwe e lego seo se holago kudu; eupša ke seo re se neago.” Go nea mo go bjalo go ka akaretša go thuša ba bangwe ka mediro ya ka ntlong, go hlokomela bana, go ba direla mešongwana e mengwe, go ba thuša ka tša dinamelwa goba go theetša ge yo mongwe a nyaka go bolela.

Mo e ka bago nywaga e 2 000 e fetilego, Jesu Kriste o itše: “Lešexo la monei le phala la monewa.” (Ditiro 20:35) Mokgwa wa go fihlelela bophelo bjo botelele le bjo bo thabišago ga o tlišwe ke go ba le tšhelete e ntši pankeng goba dikalafo le dijo tša go lwantšha botšofadi. Go e-na le moo, o tlišwa ke go dula o le mafolofolo le go diriša nako ya gago le matla bakeng sa go humiša maphelo a ba bangwe.

Lega go le bjalo, go nea ga se gwa lekana bakeng sa go re phološa botšofading, bolwetšing le lehung. Ke Mmušo wa Modimo feela wo o tlago go fediša tše bjalo ka moka. Ka tlase ga pušo ya wona, bolwetši bo tla fedišwa gaešita “le lehu le ka se hlwê le e-ba xôna.” (Kutollo 21:3, 4; Jesaya 33:24) Ge e le gabotse, batho ba ba ikokobeditšego ba tla phela ka mo go sa felego ba thabile lefaseng la paradeise. (Luka 23:43) Dihlatse tša Jehofa di thabela go nea ba bangwe mokgwa wo o theilwego Beibeleng wa go fihlelela bophelo bjo botelele le bjo bo thabišago.