O ka Thabiša Modimo

NA GE e le gabotse re ka tutuetša tsela yeo Modimo a ikwago ka yona? Na Modimo a ka kgona go thaba? Tlhaloso e nngwe ya pukuntšu bakeng sa lentšu “Modimo” ke “mo-ba-gona yo a phagamego.” Go thwe’ng ge e ba mo-ba-gona yo e be e fo ba matla? Na re be re ka letela gore matla ao a se nago maikwelo a thabe? Le gatee. Lega go le bjalo, nagana ka seo Beibele e se bolelago ka Modimo.

Jesu Kriste o itše: “Modimo ké Môya.” (Johane 4:24) Moya ke mohuta wa bophelo wo o fapanego le wa batho. Gaešita le ge o sa bonagale mahlong a batho, moya o na le mmele—“mmele wa môya.” (1 Ba-Korinthe 15:44; Johane 1:18) Ge e diriša dika-polelo, Beibele e bolela gape ka Modimo e le yo a nago le mahlo, ditsebe, diatla, bjalo bjalo. * Le gona Modimo o na le leina—Jehofa. (Psalme 83:18) Ka gona, Modimo wa ka Beibeleng ke motho wa moya. (Ba-Hebere 9:24) “Ké . . . Modimo e a phelaxo, Kxoši ya mehleng.”—Jeremia 10:10.

E le motho wa kgonthe yo a phelago, Jehofa o kgona go nagana le go dira dilo. O bonagatša dika le maikwelo, dilo tšeo a di ratago le tšeo a sa di ratego. Ge e le gabotse, Beibele e tletše ka dipolelo tšeo di utollago gore ke dilo dife tšeo di mo thabišago goba tšeo di sa mo thabišego. Ka ge medimo yeo e dirilwego ke batho le medimo ya diswantšho e fo bonagatša mekgwa goba dika tša bahlami ba yona ba batho, Modimo yo matla ohle, e lego Jehofa, e tloga e le yena Mothomi wa maikwelo ao a a bjetšego bathong.—Genesi 1:27; Jesaya 44:7-11.

Ka ntle le pelaelo, Jehofa ke “Modimo yo a thabilego.” (1 Timotheo 1:11, NW) Ga a thabišwe feela ke mediro ya gagwe ya tlholo eupša gape o thabišwa ke go phetha morero wa gagwe. Ka moporofeta Jesaya, Jehofa o tsebatša gore: “Ke dira tšohle tše ke di rataxo. . . . Ke boletše; ke tlo di tliša. Ke rerile; ke tlo dira.” (Jesaya 46:9-11) Mopsalme o opetše ka gore: “Morêna a thabêlê dibopiwa tša xaxwe.” (Psalme 104:31) Eupša go na le mothopo o mongwe gape wa lethabo go Modimo. O re: “Ngwan’a-ka! Hlalefa, O nthabiše pelo.” (Diema 27:11) Nagana ka se se bolelwago ke seo—re ka thabiša Modimo!

Kamoo re ka Thabišago Pelo ya Modimo ka Gona

Nagana kamoo hlogo ya lapa e lego Noage a ilego a thabiša pelo ya Jehofa. Noage “ó hweditše Modimo à mo lebeletše ka botho” ka gobane “e be e le monna wa xo loka, a se na bosodi mo xo ba mehleng ya xaxwe.” Phapano e kgolo yeo e bego e le magareng ga Noage le batho ba babe ba mehleng ya gagwe ke gore tumelo le boikokobetšo bja gagwe e be e le tše di thabišago Modimo  moo go bego go ka bolelwa gore “Noaxe e be . . . é le wa xo sepela à na le Modimo.” (Genesi 6:6, 8, 9, 22) “Ké ka tumêlô xe Noa a dirile polokêlô à laetšwe ke Modimo . . . a phološa ba lapá la xaxwe.” (Ba-Hebere 11:7) Jehofa o be a thabišwa ke Noage gomme a mo šegofatša le ba lapa la gagwe ka go ba phološa mehleng yeo ya bošoro historing ya batho.

Mopatriareka Aborahama le yena o be a kwešiša maikwelo a Jehofa ka mo go tseneletšego. Tsebo ya gagwe e tseneletšego ka tsela ya Modimo ya go nagana e ile ya ba molaleng kudu ge Jehofa a be a mo tsebiša gore Sodoma le Gomora di be di tla fedišwa ka baka la bokgopo bja tšona. Aborahama o be a tseba Jehofa ka mo go lekanego gore a ka phetha ka gore ga go kgonege gore Modimo a fediše moloki gotee le yo mobe. (Genesi 18:17-33) Nywaga e mentši ka morago, e le ge a theetša taelo ya Modimo, Aborahama o ile “à tliša Isaka xore e bê sedimo” ka gobane “mo pelong ya xaxwe a re: Modimo le xo tsoša mohu ó a kxôna.” (Ba-Hebere 11:17-19; Genesi 22:1-18) Aborahama o ile a itumelelanya le maikwelo a Modimo le go bontšha tumelo e bjalo e tiilego le boikokobetšo moo a ilego “a bitšwa Moratiwa wa Modimo.”—Jakobo 2:23.

Monna yo mongwe yo a ilego a katanela go thabiša pelo ya Modimo e be e le Kgoši Dafida wa Isiraele ya bogologolo. Mabapi le yena, Jehofa o itše: “Ke hweditše Dafida morwa wa Isai monna wa xo kxahla pelo ya-ka; ké yêna a tl’o xo dira tše ke di rataxo ka moka.” (Ditiro 13:22) Pele a e-lwa le senatla Goliata, Dafida o ile a bea kholofelo ya gagwe e feletšego go Modimo gomme a botša Kgoši Saulo wa Isiraele gore: “Morêna e a mphemetšexo maró a tau le a tauana, ó tlo mphemela xe ke lwa le Mo-Filisita yó.” Jehofa o ile a šegofatša kholofelo ya Dafida go Yena, ka go dira gore Dafida a bolaye Goliata. (1 Samuele 17:37, 45-54) Dafida o be a sa nyake gore e be ditiro tša gagwe feela tšeo di kgahlago Jehofa eupša le gore gape a ‘kgahlwe ke dipolelo tša molomo wa gagwe le dikeleletšo tša pelo ya gagwe.’—Psalme 19:14.

Go thwe’ng ka rena? Re ka thabiša Jehofa bjang? Ge re dutše re ithuta ka mo go oketšegilego ka maikwelo a Modimo, re tla thoma go tseba seo re ka se dirago gore re thabiše pelo ya Modimo. Ka gona, ge re dutše re bala Beibele, ke gabohlokwa gore re dire maiteko a go ithuta ka maikwelo a Modimo e le gore re “tlatšwê tsebô ya xo tseba thatô ya xaxwe, [re] bê le bohlale ka moka le thlaoloxanyô ya Môya . . . xore [re] swarê ka tsela ye e loketšexo ba Morêna, e bê xo mo kxahla xohle.” (Ba-Kolose 1:9, 10) Tsebo ka morago e re thuša go aga tumelo. Ye ke ya bohlokwa ka gobane “xo kxahla Modimo xa xo kxônexe xe xo se tumêlô.” (Ba-Hebere 11:6) Ee, ka go dira maiteko a go aga tumelo e tiilego le go dira gore maphelo a rena a dumelelane le thato ya Jehofa, re ka thabiša pelo ya gagwe. Ka nako e swanago, re swanetše go ela hloko gore re se ke ra kweša Jehofa bohloko.

O se ke wa Kweša Modimo Bohloko

Mohlala wa kamoo Jehofa a ka kwago bohloko ka gona o hwetšwa pegong ya mabapi le mehla ya Noage. Ka nako yeo, “lefase lè [be le] tletše tša sehloxo. Xe Modimo a lebêlêla lefase a bôna lè senyexile, nama ka moka è sentše tsela ya yôna lefaseng.” Modimo o ile a ikwa bjang ge a hlahloba bokgopo le bošoro bjo? Beibele e re: “Morêna a napa a šexama, a re motho ke mo diretše’ng lefaseng, a nyama pelo.” (Genesi 6:5, 6, 11, 12) Modimo o ile a nyamišwa ke gore boitshwaro bja batho e be e šetše e le bjo bobe moo a ilego a fetola boemo bja gagwe bja kgopolo mabapi le moloko wo o kgopo wa pele ga Meetse-fula. Ka baka la go nyamišwa ga gagwe ke bokgopo bja bona, Modimo o ile a fetola boemo bja gagwe bja kgopolo bja go ba Mmopi wa batho go ya go bja go ba mofediši wa bona.

Jehofa gape o ile a nyama ge batho ba gagwe ka noši, e lego setšhaba sa bogologolo sa Isiraele, ba be ba hlokomologa ka go se kgaotše maikwelo a gagwe le tlhahlo ya gagwe e lerato.  Mopsalme o llile ka gore: “Ké xa-ntši-ntši bà mo hlanoxêla kua lešokeng, ba mmefêla xôna-kwa lehanateng. Ba fêla ba boêla xo leka Modimo, ba šexamiša Yêna Mokxêthwa wa Isiraele.” Lega go le bjalo, ke “yo kxauxêlô, ó lebalêla dibe, xa a iše thsenyexong; ó xomiša kxalefô xa-ntši, ó lesa xo tsoša boxale bya xaxwe ka moka.” (Psalme 78:38-41) Gaešita le ge ba-Isiraele ba marabele ba be ba tlaišwa ka mo go swanetšego ke ditla-morago tša bobe bja bona ka noši, Beibele e re botša gore “mehlakong ya bôná yohle, [Modimo] ó be a hlaka le Yêna.”—Jesaya 63:9.

Go sa šetšwe bohlatse bjo bontši bja maikwelo a Modimo a lerato go bona, batho ba Isiraele ba ile “ba dira bahlanka ba Modimo sekwêrô, ba nyatša se ba se boletšexo, ba fôtla baporofeta ba xaxwe; kxalefô ya Morêna ya ba ya xolêla sethšaba sa xaxwe, xwa hlôkwa moreku.” (2 Koronika 36:16) Mafelelong, mokgwa wa bona wa go rabela ka manganga o ile wa “nyamiša Môya w’axwe o mokxêthwa” go fihla bokgoleng bjoo Jehofa a ilego a se sa hlwa a ba amogela. (Jesaya 63:10) Mafelelo e ile ya ba afe? Modimo ka mo go swanetšego o ile a se sa ba nea tšhireletšo ya gagwe, gomme masetla-pelo a ile a ba wela ge ba-Babele ba be ba fenya Juda gomme ba senya Jerusalema. (2 Koronika 36:17-21) Ke mo go nyamišago gakaakang ge batho ba kgetha go phegelela tsela ya bophelo ya sebe yeo e kgopišago le yeo e nyamišago Mmopi wa bona!

Beibele e re nea bohlatse bja gore Modimo o kwešwa bohloko kudu ke boitshwaro bjo bo sa lokago. (Psalme 78:41) Dilo tšeo di kgopišago—gaešita le tše di hlaswegago—go Modimo di akaretša boikgogomošo, go bolela maaka, polao, go diriša maleatlana, bonoge, go rapela bagologolo, boitshwaro bjo bo hlephilego, bosodoma, go se botege lenyalong, kopano ya botona le botshadi le wa leloko le go gatelelwa ga badiidi.—Lefitiko 18:9-29; 19:29; Doiteronomio 18:9-12; Diema 6:16-19; Jeremia 7:5-7; Maleaki 2:14-16.

Jehofa o ikwa bjang ka borapedi bja medimo ya diswantšho? Ekisodo 20:4, 5 e re: “O se ke wa itirêla modimo wa xo betlwa, le xe e le seswanthšô se sengwê sa tše di lexo kwa lexodimong, le xe e le sa tše di lexo mono lefaseng le sa tše di lexo meetseng ka tlase xa lefase. O se ke wa di khunamêla, O se kê wa di dirêla.” Ka baka la’ng? Ka gobane modimo wa seswantšho “Morêna Modimo wa xaxo ó a [o] hlaswa.” (Doiteronomio 7:25, 26) Moapostola Johane o lemošitše ka gore: “Bana ba-ka! Phafoxêlang medimo e šele.” (1 Johane 5:21) Le gona moapostola Paulo o ngwadile gore: “Baratwa ba-ka thšabang medirô ya medimo e šele.”—1 Ba-Korinthe 10:14.

Tsoma go Amogelwa ke Modimo

Modimo “ó kwana le baloki.” “Ó kxahlwa ke ba tsela ya xo loka.” (Diema 3:32; 11:20) Ka mo go fapanego, bao ba phegelelago go kgopiša Modimo ka go hlokomologa ka manganga goba go nyatša maikwelo a gagwe a go loka go se go ye kae ba tla buna ditla-morago tša go palelwa ke go mo kgahliša. (2 Ba-Thesalonika 1:6-10) Ka kgonthe, go se go ye kae o tla fediša bokgopo ka moka bjo bo apareditšego lehono.—Psalme 37:9-11; Tsefanya 2:2, 3.

Lega go le bjalo, Beibele e bolela ka mo go kwagalago kudu gore Jehofa “xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Petro 3:9) O bona go le kaone kudu gore a bontšhe maikwelo a gagwe a lerato go baloki bao ba mo ratago go e na le gore a hlaswe bao ba kgethago go se fetoge. Jehofa ga a kgahlwe ‘ke lehu la modira-dibe, eupša o kgahlwa ke ge modira-dibe a boa a lahla tsela ya gagwe, a phela.’—Hesekiele 33:11.

Ka gona ga go na motho yo a nyakago go ba mohlaselwa wa kgalefo ya Jehofa. “Morêna ké wa dikxauxêlô tše ntši, ké yo pelo-thlomoxi.” (Jakobo 5:11) Ka go ba le kholofelo e feletšego  maikwelong a Modimo, o ka ‘lahlela dipelaelo tša gago ka moka go yena, ka gobane ke yena a go belaelelago.’ (1 Petro 5:7) Kgonthišega gore bao ba thabišago pelo ya Modimo ba na le tebelelo e kgahlišago ya go thabela go amogelwa ke yena le go gwerana le yena. Ka go rialo, ke mo go akgofilego kudu gona bjale go feta le ge e le neng pele ‘go tšwela pele re leka go hlatha se se kgahlago Morena.’—Ba-Efeso 5:10.

Ke mo go kgahlišago gakaakang gore Modimo ka botho bja gagwe bjo bo sa re swanelago o utollotše dika tša gagwe tše di kgahlišago le maikwelo a gagwe! Le gona go matleng a gago go thabiša pelo ya gagwe. Ge e ba o kganyoga go dira bjalo, re go kgothaletša gore o ikopanye le Dihlatse tša Jehofa tša tikologong ya geno. Di tla thabela go go bontšha seo di hweditšego e le se se šomago le se se kgonegago boitekong bja tšona bja go leka go thabiša Modimo.

[Mengwalo ya ka tlase]

[Lepokisi go letlakala 7]

Ke ka Baka La’ng Beibele e Hlalosa Modimo ka Dika tša Batho?

Ka ge ‘Modimo e le Moya,’ re ka se kgone go mmona ka mahlo a rena a kgonthe. (Johane 4:24) Ka gona Beibele e diriša dika-polelo, tše bjalo ka ditshwantšhišo, ditshwantšhanyo le go diriša dika tša batho dilong tšeo e sego batho go re thuša go kwešiša matla a Modimo, bogolo bja gagwe le mediro ya gagwe. Ka gona, gaešita le ge re sa tsebe gore mmele wa Modimo wa moya o bopegile bjang, Beibele e bolela ka Modimo e le yo a nago le mahlo, ditsebe, diatla, matsogo, menwana, maoto le pelo.—Genesi 8:21; Ekisodo 3:20; 31:18; Jobo 40:9; Psalme 18:9; 34:15.

Polelo e bjalo e hlalosago ga e bolele gore mmele wa Modimo wa moya o na le ditho tše di swanago le tšeo mebele ya batho e nago le tšona. Go diriša dika tša batho dilong tšeo e sego batho ga se gwa swanelwa go kwešišwa ka tsela ya kgonthe. Go fo thuša batho go ba le kwešišo e kaone ka Modimo. Ka ntle le dika-polelo tše bjalo, go be go tla ba thata, ge e ba go be go ka se kgonege gore tlhaloso le ge e le efe ka Modimo e kwešišege go batho feela. Lega go le bjalo, seo ga se bolele gore semelo sa Jehofa Modimo se hlamilwe ke batho. Beibele e hlalosa ka tsela e kwalago gore batho ba bopilwe ka seswantšho sa Modimo—e sego gore Modimo o bopilwe ka seswantšho sa batho. (Genesi 1:27) Ka ge bangwadi ba Beibele ba be ba ‘buduletšwe ke Modimo,’ tlhaloso ya bona ka semelo sa Modimo ge e le gabotse ke tlhaloso ya gagwe ka noši ka dika tša gagwe tša motho ka noši—e lego dika tšeo a di bjetšego ka ditekanyo tše di fapanego go dibopiwa tša gagwe tšeo e lego batho. (2 Timotheo 3:16, 17) Go e na le gore e be dika tša batho go Modimo, ge e le gabotse ke dika tša Modimo go batho.

[Caption on page 4]

Courtesy of Anglo-Australian Observatory, photograph by David Malin

[Caption on page 4]

Noage o hweditše Modimo a mo lebeletše ka botho

[Caption on page 5]

Aborahama o ile a itumelelanya le maikwelo a Modimo

[Caption on page 6]

Dafida o ile a bea kholofelo ya gagwe ka moka go Jehofa

[Caption on page 7]

Ge o dutše o bala Beibele, o ka ithuta kamoo o ka thabišago Modimo ka gona