Na Maemo a Gago a Laola Bophelo bja Gago?

MAEMO a gateletšago le mathata ke dilo tše di tlwaelegilego mo ‘dinakong tše tša mathata.’ (2 Timotheo 3:1) Mathata a mangwe e ka ba a nakwana gomme ka go rialo mafelelong a tla fela. A mangwe a dula a le gona ka dikgwedi goba gaešita le nywaga. Ka baka leo, ba bantši ba ikwa ka tsela yeo mopsalme Dafida a ilego a ikwa ka yona, yoo a ilego a llela Jehofa ka gore: “Ditlalêlô di xoletše pelo ya-ka; nnamolêlê dipitlaxanong.”—Psalme 25:17.

Na o katana le mathata a nolago moko? Ge e ba go le bjalo, o ka hwetša thušo le kgothatšo ka Beibeleng. Anke re ahla-ahleng maphelo a bahlanka ba babedi ba botegago ba Jehofa bao ba ilego ba lebeletšana le mathata ka katlego: Josefa le Dafida. Ka go ahla-ahla kamoo ba ilego ba arabela ka gona mathateng, re ka ithuta dithuto tše di šomago tšeo di tla re thušago go lebeletšana le mathata a swanago ka katlego lehono.

Go Lebeletšana le Ditlhohlo tše Kgolo

Nakong ya ge a be a e-na le nywaga e 17, Josefa o ile a ba le bothata bjo bogolo kudu ka lapeng la gabo. Bo-mogol’agwe ba ile ba bona gore Jakobo, e lego tatago bona, ‘o be a rata Josefa go feta bana ba gagwe ka moka.’ Ka baka leo, “ba mo hlôya, ba se sa kxôna xo bolêla xa-botse le yêna.” (Genesi 37:4) Re ka nagana ka go tshwenyega le kgateletšego tšeo boemo bjo bo ilego bja di bakela Josefa. Mafelelong, lehloyo la bana babo Josefa le ile la ba leo le tseneletšego kudu moo ba ilego ba mo rekiša bokgobeng.—Genesi 37:26-33.

Ge e be e le lekgoba kua Egipita, Josefa o ile a swanela ke go gana dikgoketšo tša boitshwaro bjo bo gobogilego tša mosadi wa mong wa gagwe. Ka go galefišwa ke ge a se a dumelelana le yena, o ile a latofatša Josefa ka maaka a gore o be a leka go mo kata. O ile a ‘išwa ngwakong wa kgolego’ moo “maoto a xaxwe ba [ilego ba] a lôka diphateng, pelo ya xaxwe ya tsêna xare xa dithsipi.” (Genesi 39:7-20; Psalme 105:17, 18) Seo e swanetše go ba e bile teko e kaakang! Ka nywaga e ka bago e 13, Josefa e be e le lekgoba goba mogolegwa ka baka la go  hloka toka moo a go tlišeditšwego ke ba bangwe, go akaretša le ditho tša lapa la gabo ka noši.—Genesi 37:2; 41:46.

Dafida wa Isiraeleng ya bogologolo le yena o ile a lebeletšana le diteko ge e be e le lesogana. Ka nywaga e mentši, o ile a gapeletšega go phela e le moneneri, a tsongwa bjalo ka phoofolo ke Kgoši Saulo. Bophelo bja Dafida bo be bo dula bo le kotsing. Lebakeng le lengwe, o ile a ya go moperisita Ahimeleke gore a mo fe dijo. (1 Samuele 21:1-7) Ka morago ga go tseba gore Ahimeleke o thušitše Dafida, Saulo o ile a laela gore Ahimeleke a bolawe, e sego yena a nnoši eupša gape le baperisita ka moka le malapa a bona. (1 Samuele 22:12-19) Na o ka nagana tsela yeo Dafida a ilego a tlalelwa ka yona ka ge a ile a baka kotsi ye ka tsela ya go se lebanye?

Nagana ka nywaga ya mathata le go swarwa gampe yeo Josefa le Dafida ba ilego ba e kgotlelela. Ka go ahla-ahla kamoo ba ilego ba swaragana le maemo a bona a thata ka gona, re ka ithuta dithuto tše bohlokwa. Anke re ahla-ahleng ditsela tše tharo tšeo ka tšona banna ba ba swanelwago ke go ekišwa.

Tlogela go Boloka Sekgopi le go ba le Lehloyo

Sa pele, banna ba ba botegago ba ile ba gana go tanywa molabeng wa go ba le lehloyo le go ba le sekgopi. Ge Josefa a be a le kgolegong, go ka ba go bile bonolo gore a dule a nagana ka mo go fošagetšego ka go ekwa ga gagwe ke bana babo, mohlomongwe a nagana kamoo a ka itefeletšago ka gona ge e ba a ka ba bona gape. Re tseba bjang gore Josefa o ile a gana tsela e bjalo ya go nagana yeo e senyago? Ela hloko tsela yeo a ilego a arabela ka yona ge a be a e ba le sebaka sa go itefeletša go bana babo bao ba bego ba tlile Egipita go tla go reka mabele. Pego e re: “[Josefa] a re xo ba kwa a ba fularêla a lla. . . . A laêla a re, mekotla ya [bana babo] e tlatšwê ka mabêlê [ke bahlanka ba gagwe]; a re thšêlêtê ya e mongwê le e mongwê e bušetšwe mokotleng wa xaxwe; a re ba neêlwê le mefaxô ya tsela.” Ka morago, ge a be a roma bana babo gore ba tliše tatago bona Egipita, Josefa o ile a ba kgothatša ka mantšu a rego: “Le se kê la tšama Lè tšere kxang!” Bobedi ka mantšu le ka ditiro, Josefa o ile a hlatsela gore ga se a dumelela lehloyo le sekgopi di senya bophelo bja gagwe.—Genesi 42:24, 25; 45:24.

Ka mo go swanago, Dafida ga se a hlagolela go ba le sekgopi go Kgoši Saulo. Mabakeng a mabedi Dafida o ile a ba le sebaka sa go bolaya Saulo. Lega go le bjalo, ge banna ba gagwe ba be ba mo kgothaletša gore a dire bjalo, Dafida o itše: “A Morêna a nthibêlê, xore mong wa-ka ke se mo dirê tšeo, ka iša letsôxô xo motlotšwa wa Morêna; ka xobane ké motlotšwa wa Morêna à le fao.” Dafida o ile a tlogelela taba ye go Jehofa, a botša banna ba gagwe gore: “Morêna ó Xôna. Morêna a ka se lesê xo mo ôtla xe letšatši la xaxwe le tlile a hwa, xoba a tšwêla ntweng ya mo xoxola.” Ka morago, Dafida o ile  a ba a hlama sefela sa go llela lehu la Saulo le morwa wa Saulo e lego Jonathane. Ka go swana le Josefa, Dafida ga se a ka a itumelela go fenywa ke go ba le sekgopi.—1 Samuele 24:4-7; 26:7-13; 2 Samuele 1:17-27.

Na re boloka maikwelo a go ba le sekgopi le go ba le lehloyo ge go hloka toka mo go itšego go re bakela bohloko? Se se ka direga gabonolo. Ge e ba re dumelela maikwelo a rena go re laola, mafelelo a ka itlhatsela e le a gobatšago kudu go rena go feta go hloka toka ka bogona. (Ba-Efeso 4:26, 27) Gaešita le ge re ka se kgone go laola seo ba bangwe ba se dirago, re ka laola karabelo ya rena. Go bonolo gore re tlogele go boloka sekgopi le go ba le lehloyo ge e ba re e-na le tumelo ya gore Jehofa o tla rarolla ditaba ka nako ya gagwe.—Ba-Roma 12:17-19.

Diriša Boemo bja Gago Gabotse

Thuto ya bobedi yeo re ka ithutago yona ke go se dumelele maemo a rena a senya bophelo bja rena. Re ka swarega kudu ka seo re ka se kgonego go se dira moo e lego gore ga re sa bona seo re ka kgonago go se dira. Ge e le gabotse, maemo a rena a thoma go re laola. Se se ka ba se ile sa diragalela Josefa. Go e na le moo, o ile a kgetha go diriša boemo bja gagwe gabotse. Ge a be a hlankela e le lekgoba, Josefa o ile “a hwetša mong wa xaxwe a mo lebeletše ka botho, ’me a ba mohlanka wa xaxwe, a mo dira molaki wa lapa la xaxwe.” Josefa o ile a ba le pono e swanago ge a be a le kgolegong. Ka baka la tšhegofatšo ya Jehofa le go šoma ga Josefa ka thata, “moloti wa kxôlêxô a mo xafêla baxôlêxwa bohle ba mo ngwakong woo; xomme tšohle tše di bexo di dirwa nthse, di be di dirwa ke Josefa.”—Genesi 39:4, 21-23.

Nywageng yeo Dafida a phetšego e le moneneri, le yena o ile a diriša maemo a gagwe gabotse. Ge a be a dula lešokeng la Parane, yena le banna ba gagwe ba ile ba šireletša mehlape ya Nabala dihlopheng tša bathopi ba dithoto. Yo mongwe wa badiši ba Nabala o itše: “Ba be ba re xora byalo ka morakô bošexo le mosexare.” (1 Samuele 25:16) Ka morago, nakong ya ge a be a dula Tsikilaga, Dafida o ile a hlasela metse ye e bego e dulwa ke manaba a Isiraele go ya ka borwa, ka go rialo a šireletša mellwane ya Juda.—1 Samuele 27:8; 1 Koronika 12:20-22.

Na re swanetše go dira boiteko bjo bo oketšegilego e le gore re diriše maemo a rena gabotse? Gaešita le ge go dira bjalo e ka ba tlhohlo, re ka atlega. Ge a be a naganišiša ka bophelo bja gagwe, moapostola Paulo o ngwadile gore: “Nna ke ithutile xo kxôlwa ke tše ke naxo le tšôna. . . . Ke tlwaetše tšohle, e ka ba xo hora le xo kwa tlala; e ka ba xo tlalêlwa ke dilô, e ka ba xo di hlôka.” Paulo o ile a hlagolela bjang boemo bjo bja kgopolo mabapi le bophelo? Ka go tšwela pele a ithekgile ka Jehofa. O ile a dumela gore: “Ke kxôna tšohle ka Eo a mphaxo matla.”—Ba-Filipi 4:11-13.

Letela Jehofa

Thuto ya boraro ke gore go e na le gore re diriše mekgwa yeo e sego ya mangwalo go fetoša maemo a rena, re swanetše go letela Jehofa. Morutiwa Jakobo o ngwadile gore: “Kxôtlêlêlô yôna a e bê le modirô wo o tletšexo, xore Le bê ba-boló-ka-tlalô ba ba se naxo senyalô, Le se bê le mo Le hlaetšaxo.” (Jakobo 1:4) Kgotlelelo e swanetše go dumelelwa go dira ‘modiro o tletšego’ ka go dumelela ga rena gore teko e fihle mafelelong ka ntle le go kgetha mekgwa yeo e sego ya mangwalo gore e e fediše kapejana. Ke moka tumelo ya rena e tla lekwa le go sekišwa, gomme matla a yona a thekgago a tla utollwa. Josefa le Dafida ba be ba e-na le kgotlelelo ya mohuta wo. Ga se ba ka ba leka go loga leano leo le bego le ka nyamiša Jehofa. Go e na le moo, ba ile ba leka ka mo ba ka kgonago ka gona go tlwaelana le maemo a bona. Ba ile ba letela Jehofa, gomme ba ile ba amogela ditšhegofatšo gakaakang ka baka la go dira bjalo! Jehofa o ile a diriša bobedi bja bona go lokolla le go eta batho ba gagwe pele.—Genesi 41:39-41; 45:5; 2 Samuele 5:4, 5.

Le rena ka mo go swanago re ka lebeletšana le maemo ao go ona re ka lekegago go nyaka ditharollo tšeo e sego tša mangwalo. Ka mohlala, na o nolegile moko ka baka la ge o se wa tšwa o hwetša molekane yo a swanetšego wa lenyalo? Ge e ba go le bjalo, phema teko le ge e le efe ya  go se kwe taelo ya Jehofa ya go ‘nyala feela Moreneng.’ (1 Ba-Korinthe 7:39) Na o na le mathata lenyalong la gago? Go e na le gore o ineele moyeng wa lefase woo o kgothaletšago karogano le tlhalo, lebeletšana le mathata ka katlego gotee le molekane wa gago. (Maleaki 2:16; Ba-Efeso 5:21-33) Na o na le mathata a go hlokomela lapa la gago ka baka la maemo a gago a tša boiphedišo? Go letela Jehofa go akaretša go phema mediro e belaetšago goba yeo e sego molaong ya go leka go hwetša tšhelete. (Psalme 37:25; Ba-Hebere 13:18) Ee, ka moka ga rena re swanetše go šoma ka thata e le gore re diriše maemo a rena gabotse gomme re dire boiteko bja go dumelela Jehofa gore a re putse. Ge re dutše re dira bjalo, anke re ikemišetšeng go letela Jehofa bakeng sa tharollo e kaone.—Mika 7:7.

Jehofa o tla go Thekga

Go naganišiša kamoo baanegwa ba ka Beibeleng ba bjalo ka Josefa le Dafida ba ilego ba lebeletšana ka gona le manyami le maemo a thata ka katlego go ka ba le mafelelo a holago go rena. Gaešita le ge dikanegelo tša bona di hlalositšwe ka matlakaleng a sego kae feela a Beibele, diteko tša bona di ile tša tšea nywaga e mentši. Ipotšiše gore: ‘Bahlanka ba bjalo ba Modimo ba ile ba ithuta bjang go amogela maemo a bona? Ba ile ba kgomarela bjang lethabo la bona? Ba ile ba swanelwa ke go hlagolela dika dife?

Le gona re dira gabotse go ela hloko kgotlelelo ya bahlanka ba Jehofa ba mehleng yeno. (1 Petro 5:9) Ngwaga o mongwe le o mongwe dimakasine tša Morokami le Phafoga! di na le diphihlelo tše dintši. Na o bala gotee le go naganišiša ka mehlala ya Bakriste ba bao ba botegago? Go oketša moo, ka diphuthegong tša gabo rena go na le bao ka potego ba kgotlelelago maemo a sa thabišego. Na o ba le bona ka mehla gotee le go ithuta go bona dibokeng tša phuthego?—Ba-Hebere 10:24, 25.

Ge o lebeletšane le maemo a hlohlago, kgonthišega gore Jehofa o na le taba le wena gomme o tla go thekga. (1 Petro 5:6-10) Šoma ka thata gore o se ke wa dumelela maemo a gago a laola bophelo bja gago. Latela mohlala wa Josefa, wa Dafida le wa ba bangwe ka go tlogela go boloka sekgopi, ka go diriša maemo a gago gabotse le ka go letela Jehofa bakeng sa tharollo e kaone. Batamela kgaufsi le yena ka thapelo le ka mediro ya moya. Ka tsela ye, le wena o tla bona gore o tla ba le lethabo le tlhalalo gaešita le dinakong tše thata.—Psalme 34:8.

[Seswantšho go letlakala 20, 21]

Josefa o ile a katanela gore a diriše maemo a gagwe gabotse

[Seswantšho go letlakala 23]

Dafida o ile a letela Jehofa bakeng sa tharollo ya mathata a gagwe