Na Re Swanetše Go Direla Ba Bangwe Botse Goba Go Phema Go Ba Direla Bobe?

“SEO o sa nyakego gore batho ba go direle sona, le wena o se ba direle sona.” Polelwana ye ya mabapi le boitshwaro e boletšwe ke morutiši le radifilosofi yo a tsebegago kudu wa mo-China e lego Confucius. Lehono, mo e ka bago nywaga e 2 500 ka morago, ba bantši ba sa dutše ba dumela gore motho o dirile tiro e botse feela ka go gana go direla ba bangwe bobe le ge e le bofe.

Go ba gona, molao wo wa boitshwaro wa Confucius o na le mohola o itšego. Ka lehlakoreng le lengwe, Beibele e utolla sebopego se sengwe sa boitshwaro bja batho le ditirišano tša bona. Ka ntle le go bolela ka sebe seo se akaretšago go direla magagabo rena diphošo, Beibele e bolela ka sebe seo se akaretšago go tlogela ka boomo go se dire selo. Morutiwa wa Mokriste e lego Jakobo o ngwadile gore: “Motho e a tsebaxo botse byo a kaxo bo dira, ’me a se bo dire, ó ôba molato wa sebe.” (Jakobo 4:17) Go e na le go fo laela Bakriste gore ba se direle ba bangwe bobe, Jesu Kriste o ile a nea taelo ye: “Tšohle tše Le rataxo xore batho ba Le dirêlê tšôna, le lena Le ba dirêlê tšôna-tšeo.”—Mateo 7:12.

Mathomong Modimo o be a rerile gore batho ka moka ba sware ba bangwe ka tsela yeo ba ka ratago gore le bona ba swarwe ka yona. O beile mohlala o mobotse ge a bontšha tlhokomelo ya gagwe e botse ka tsela yeo a bopilego batho: “Ké mo Modimo a bopilexo motho a mmopa ka xo ithswanthša, a mmopa ka xo swanthša ka Yêna Modimo; a ba bopa monna le mosadi.” (Genesi 1:27) Se se bolela gore Modimo ka lerato o neile batho letswalo, e lego leo ge e ba le tlwaeditšwe gabotse le bego le tla ba hlahla gore ba sware ba bangwe gabotse ka tsela yeo ba ka ratago le bona ba ka swarwa ka yona.

Ba bantši lehono ba tlaišwa ke go hloka kholofelo le go hloka thušo ka baka la ditiro tša batho bao e lego baithati. Go molaleng gore seo se nyakegago ga e fo ba go se direle ba bangwe bobe le go ba ba kotsi go ba bangwe, go e na le moo, ke go direla ba bangwe botse le go ba thuša. Ka baka la se, Dihlatse tša Jehofa ka boithapo di gata mogato o mobotse wa go thuša ba bangwe go ithuta ka kholofelo e kgahlišago yeo e hwetšwago Lentšung la Modimo. Ge di etela baagišani ba tšona ka ditaba tše dibotse go tšwa ka Beibeleng, di dira seo ka moya wa lerato, di direla ba bangwe seo di tla ratago go direlwa sona.