Na o Swanetše go ba Setho sa Kereke?

‘GA SE ka swanela go ba setho sa kereke goba go ya kerekeng ka mehla e le gore ke dumele go Modimo!’ Ke kamoo batho ba bantši ba ikwago ka gona mabapi le go ba setho sa kereke goba sa mokgatlo le ge e le ofe wa bodumedi. Ge e le gabotse, ba bangwe ba bolela gore ba ikwa ba le kgaufsi kudu le Modimo ge ba thabela tlhago ba le ka ntle go feta ge ba le ditirelong tša bodumedi ka kerekeng. Lehono, batho ba bantši ba nagana gore go gwerana le sehlopha goba mokgatlo wa bodumedi ga se sona senyakwa sa go dumela go Modimo.

Lega go le bjalo, ba bangwe ba tloga ba nagana se se fapanego. Ba phegelela gore go ba setho sa kereke le go ba gona kerekeng go a nyakega, e bile ke gabohlokwa, ge e ba motho a nyaka go amogelwa ke Modimo. Ka gona, ke taba ya bohlokwa bjo bogolo go motho yo mongwe le yo mongwe, e sego feela bakeng sa bao ba nyakago go ithuta ka madumedi ka baka la kgahlego ya go nyaka go tseba dipalo-palo le ditherešo tše dingwe. Boemong le ge e le bofe, ka ge tswalano ya rena le Modimo e akaretšwa, na e be e ka se be mo go kwagalago go tseba pono ya Modimo tabeng ye? Ka gona, ke’ng seo re ka ithutago sona ka Lentšung la gagwe, Beibele, mabapi le taba ye?

Kamoo Modimo a Ilego a Dirišana le Batho Nakong e Fetilego

Nywageng e nyakilego go ba e 4 400 e fetilego, mafula a magolo a ile a hlasela lefase ka moka. Tiragalo e bjalo e be e ka se lebalege gabonolo, gomme batho lefaseng ka bophara ba na le dipego mabapi le yona historing ya bona ya pele. Gaešita le ge ditaba ka botlalo di fapana, dipego tše di swana ka dilo tše dintši, go akaretša le therešo ya gore go ile gwa phologa batho ba sego kae feela gotee le diphoofolo tše dingwe.

Na baphologi ba Meetse-fula e be e fo ba batho bao ba bego ba e-na le mahlatse ka mo go lekanego go ka fo phologa phedišo? Pego ya Beibele e bontšha gore go be go se bjalo. Ka mo go lemogegago, Modimo ga se a ka a tsebiša motho yo mongwe le yo mongwe mabapi le go tla ga Meetse-fula. Go e na le moo, o ile a botša Noage, yo ka morago a ilego a lemoša batho ba mehleng ya  gagwe ka go tla ga Meetse-fula.—Genesi 6:13-16; 2 Petro 2:5.

Go phologa go be go ithekgile ka go ba karolo ya sehlopha se se bopaganego le go ikemišetša go amogela tlhahlo ya Modimo yeo e bego e neilwe Noage. Gaešita le diphoofolo tša ka arekeng tšeo di phologilego Meetse-fula ga se tša dira bjalo ka ntle le thušo ya sehlopha se. Ditaelo tše di lebanyago di ile tša newa Noage gore a dire dithulaganyo tše di swanetšego bakeng sa go phološa maphelo a diphoofolo.—Genesi 6:17–7:8.

Ka morago ga nywaga-kgolo e mentši, ditlogolwana tša Noage ka morwa wa gagwe Seme di ile tša ba bokgobeng kua Egipita. Lega go le bjalo, morero wa Modimo e be e le go di lokolla le go di tliša nageng yeo a bego a e holofeditše rakgolokhukhu wa tšona Aborahama. Mo le gona, se se be se sa utollelwa motho yo mongwe le yo mongwe eupša pele se ile sa utollelwa bao ba bego ba kgethilwe gore e be baetapele ba tšona—Moše le ngwanabo, Arone. (Ekisodo 3:7-10; 4:27-31) Ka morago ga ge bao e bego e le makgoba ba lokolotšwe Egipita e le sehlopha, ba ile ba newa Molao wa Modimo kua Thabeng ya Sinai gomme ba dirwa setšhaba sa Isiraele.—Ekisodo 19:1-6.

Go lokollwa go ile gwa kgonega go ba-Isiraele ba bangwe feela ka ge ba be ba gwerane le sehlopha seo se hlomilwego ke Modimo e bile ba latela tlhahlo ya baetapele bao ba kgethilwego ba sehlopha se. Ba-Egipita ba itšego ba ile ba ba ba direlwa dithulaganyo tša gore ba gwerane le sehlopha se seo go bego go le molaleng gore se amogelwa ke Modimo. Ge ba-Isiraele ba be ba tloga Egipita, batho ba ba ile ba sepela le bona, ka gona ba ipea boemong bja go amogela tšhegofatšo ya Modimo.—Ekisodo 12:37, 38.

Ke moka, lekgolong la pele la nywaga, Jesu o ile a thoma modiro wa gagwe wa boboledi, wa go kgoboketša batho gotee gore e be barutiwa ba gagwe. O ile a dirišana le bona e le sehlopha, gaešita le ge a ile a ba a lebiša tlhokomelo ya gagwe e lerato go batho ka o tee ka o tee go ya ka dinyakwa tša bona. Jesu o ile a botša baapostola ba gagwe ba 11 ba botegago gore: “Ba ba kxotleletšexo le Nna melekong ya-ka ké bô-lena. Xomme ke Le bea mmušô, byalo ka xe Tate a mpeile mmušô.” (Luka 22:28, 29) Ka morago, moya o mokgethwa wa Modimo o ile wa theogela go barutiwa ge ba be ba le gotee e le sehlopha.—Ditiro 2:1-4.

Mehlala ye e bontšha gabotse gore nakong e fetilego Modimo ka mehla o be a dirišana le batho ba gagwe e le sehlopha se se rulagantšwego. Batho ba sego kae bao Modimo a ilego a dirišana le bona ka go lebanya—Noage, Moše, Jesu le ba bangwe—ge e le gabotse O be a ba diriša bakeng sa go boledišana le sehlopha seo se bego se bopagane. Ga go na lebaka la go dumela gore Modimo o dirišana le bahlanka ba gagwe lehono ka tsela e fapanego. Ke therešo gore se se rotoša potšišo e nngwe: Na go ba setho sa sehlopha le ge e le sefe sa bodumedi go lekane? Re tla ahla-ahla potšišo ye e bohlokwa sehlogong se se latelago.

[Caption on page 4]

Modimo o be a dutše a dirišana le batho ba gagwe ka nako e telele e le sehlopha se se rulagantšwego