Dialoga tša Gilead di Tšwela Pele e le Babuni ba Fišegago!

“PUNÔ ké e ntši; ’me badiri xa ba nene. Ké xôna kxopêlang Mong wa punô a romêlê badiri punong ya xaxwe.” (Mateo 9:37, 38) Mantšu ao a ile a ba le se a se bolelago ka mo go kgethegilego go barutwana ba alogago ba sehlopha sa bo-116 sa Sekolo sa Beibele sa Watchtower sa Gilead ka ge ba be ba lokela go ya dikabelong tša bona tša boromiwa.

Ka Mokibelo, March 13, 2004, palo-moka ya batho ba 6 684 e ile ya bokana Lefelong la tša Thuto la Watchtower kua Patterson, New York, le mafelong a kgokagantšwego ka sathalaete bakeng sa lenaneo la go aloga, leo go lona sehlopha se ilego sa amogela keletšo ya go laelana le kgothatšo. Ka moka ga rena re ka holwa ke keletšo yeo e ilego ya newa, ge re dutše re šoma ka phišego punong ya moya.

Mantšu a go bula a Theodore Jaracz, e lego setho sa Sehlopha se Bušago e bile e le sealoga sa sehlopha sa bošupa sa Gilead, a ile a gatelela mantšu a Jesu a rego: “Yang Le dirê dithšaba ka moka barutiwa.” (Mateo 28:19, 20) Ao e be e le mantšu a swanetšego gakaakang, ka ge dialoga di be di romelwa go hlankela dinageng tše 20 tše di fapa-fapanego! O ile a gopotša barutwana gore tlhahlo e tšwago ka Lentšung la Modimo e ba hlamile ka mo go feletšego go ba bašomi ba fišegago punong e bohlokwa kudu ya moya.—Mateo 5:16.

Kamoo le ka Bago Babuni Bao ba Nago le Tšweletšo

Seboledi sa mathomo lenaneong e bile Robert Wallen, yo a bego a dutše a dirišana kgaufsi le Sekolo sa Gilead ka nywaga e mentši. Ge a bolela ka sehlogo se se rego, “Botse bja Kwelobohloko,” o ile a botša barutwana gore: “Kwelobohloko ke leleme leo gaešita le difoa di ka le kwago gomme difofu tša le bona.” Jesu o be a etše hloko ka mo go tseneletšego kgateletšo ya ba bangwe gomme a nyaka go e fokotša. (Mateo 9:36) Barutwana ba tla hwetša dibaka tše dintši tša go dira ka mo go swanago—modirong wa boboledi, ka phuthegong, legaeng la baromiwa le manyalong a bona ka noši. Seboledi se ile sa ba kgothaletša gore: “Anke botse bja kwelobohloko bo bonagale maphelong a lena ge le dutše le hlankela ba bangwe. Ke feela mekgwa ya lena e mebotse yeo e lekanego bakeng sa bophelo bja lena bja letšatši le letšatši legaeng la baromiwa. Ka go rialo, ikemišetšeng go ikapeša kwelobohloko.”—Ba-Kolose 3:12.

Se se latelago, Gerrit Lösch, e lego setho sa Sehlopha se bušago e bile e le sealoga sa sehlopha sa bo-41 sa Gilead, o ile a ahla-ahla sehlogo se se rego “Bagoeledi ba Phološo.” (Jesaya 52:7) E le gore batho ba phološwe ge tshepedišo ye ya gona bjale ya dilo e fedišwa, ba swanetše go monya tsebo e nepagetšego go tšwa Lentšung la Modimo, ba dire boipolelo bja phatlalatša bja tumelo ya bona gomme ba kolobetšwe. (Ba-Roma 10:10; 2 Timotheo 3:15; 1 Petro 3:21) Lega go le bjalo, lebaka la motheo la go tsebatša phološo ga se go phološa batho, eupša ke go tumiša Modimo. Ka go rialo, Ngwanabo rena Lösch o ile a eletša bao e bego e tla ba baromiwa gore: “Išang molaetša wa  Mmušo magomong a lefase, gomme le be bagoeledi ba fišegago ba phološo, tše ka moka e le bakeng sa go tumiša Jehofa.”—Ba-Roma 10:18.

Lawrence Bowen e lego mohlahli wa Gilead o ile a botšiša potšišo e rego, “O Phadima Gakaaka’ng?” O ile a šupa mantšung a Jesu ao a begilwego go Mateo 6:22 gomme a kgothaletša barutwana ba alogago go boloka leihlo la bona le “lokile” e le gore ba “bonagatše seetša sa moya seo se tumišago Jehofa le go hola magagabo bona.” Go tloga mathomong a bodiredi bja gagwe, Jesu o ile a bea mohlala o phethagetšego tabeng ye ka go dula a lebišitše tlhokomelo ya gagwe go direng thato ya Modimo. Go naganišiša ka dilo tše di kgahlišago tšeo Tatagwe a mo rutilego tšona legodimong go ile gwa thuša Jesu go kgotlelela diteko tšeo di tlišitšwego ke Sathane lešokeng. (Mateo 3:16; 4:1-11) Jesu o ile a bontšha go bota Jehofa ka mo go feletšego go phethagatšeng seo Modimo a bego a mo abetše go se dira. Ka mo go swanago, e le gore ba lebeletšane ka katlego le ditlhohlo tše di lego ka pele, baromiwa ba swanetše go tšwela pele ka mekgwa e mebotse ya go ithuta Beibele gomme ba ithekge ka Jehofa ka mo go feletšego.

Mark Noumair, e lego mohlahli wa Gilead e bile e le sealoga sa sehlopha sa bo-77 sa Gilead, o ile a phetha lelokelelo le la dipolelo, a bolela ka sehlogo se se rego “Ke Rena ba re Seatleng sa Gago.” (Jošua  9:25) O ile a kgothaletša barutwana go ekiša boemo bja kgopolo bja ba-Gibeoni ba bogologolo. Gaešita le ge Gibeoni e be e le “motse o moxolo . . . ’me banna ba xôna ka moka e be e le baxale,” ba-Gibeoni ga se ba ka ba nyaka botumo goba ba letela go hwetša dilo ka tsela ya bona. (Jošua 10:2) Ka go rata ba ile ba hlankela ka tlase ga ba-Lefi e le ‘baphaphi ba dikgong le bagi ba meetse’ bakeng sa go thekga borapedi bja Jehofa. (Jošua 9:27) Ge e le gabotse, ditho tša sehlopha se se alogago di boditše Jošua yo Mogolo, e lego Jesu Kriste gore: “Ké rena bá; re seatleng sa xaxo.” Gabjale, ge ba thoma dikabelo tša bona dinageng di šele, ba swanetše go amogela modiro le ge e le ofe woo Jošua yo Mogolo a ba neago wona gore ba o dire.

Diphihlelo le Dipoledišano

“Bulang Mangwalo ka mo go Feletšego” e bile sehlogo sa poledišano yeo Wallace Liverance, e lego sealoga sa sehlopha sa bo-61 sa Gilead e bile e le yo mongwe wa bahlahli, a bilego le yona le sehlopha sa barutwana. Ba ile ba anega le go diragatša diphihlelo tšeo ba di thabetšego bodireding bja tšhemo lebakeng la ge ba le sekolong. Go be go le molaleng gore thuto ya bona e tseneletšego ya Mangwalo nakong ya dikgwedi tše hlano tša tlwaetšo e kgomile dipelo tša bona gomme ya ba tutueletša go abelana le ba bangwe seo ba ithutilego sona. (Luka 24:32) Nakong ya thuto ya dikgwedi tše hlano, morutwana yo mongwe o ile a kgona go abelana seo a bego a dutše a ithuta sona le moratho wa gagwe. Se se ile sa kgothaletša moratho wa gagwe go nyaka phuthego ya lefelong la gabo le go thoma thuto ya gagwe ka noši ya Beibele. Gabjale e šetše e le mogoeledi yo a sa kolobetšwago.

Ka morago ga diphihlelo tše, Richard Ashe le John Gibbard ba ile ba etelela pele dipoledišano le bahlanka ba mmalwa ba botegago ba Jehofa ba nako e telele, go akaretša le balebeledi ba basepedi bao ba bego ba amogela tlwaetšo e kgethegilego Lefelong la tša Thuto la Watchtower. E be e le dialoga dihlopheng tša pejana tša Sekolo sa Gilead. Yo mongwe o ile a gopola gore nakong ya ge thuto e be e tšwela pele ka klaseng Ngwanabo rena Knorr o ile a bolela gore: “Gilead o tla ithuta kudu. Eupša ge e ba o e-tšwa o kukile magetla, re tla ba re paletšwe. Re nyaka gore o tšwe o e-na le pelo e botse.” Bana babo rena ba basepedi ba ile ba eletša sehlopha se gore se swanetše go tshwenyega ka batho le dinyakwa tša bona, go dirišana le ba bangwe go swana le Kriste le go amogela ka boikokobetšo kabelo le ge e le efe yeo se e newago. Ka ntle le pelaelo go diriša keletšo ye go tla thuša baromiwa ba bafsa go ba bao ba nago le tšweletšo dikabelong tša bona.

Tšwelang Pele le le Babuni ba Fišegago!

Batheetši ba ile ba ba le sebaka sa go theetša Stephen Lett, e lego yo mongwe wa ditho tša Sehlopha se Bušago. O ile a neela polelo ya thwadi lenaneong, yeo e bego e e-na le sehlogo se se rego, “Tšwelang Pele le le Babuni ba Fišegago!” (Mateo 9:38) Punong ya kgonthe, nako ya go buna mabele e lekanyeditšwe. Go nyakega gore babuni ba šome ka thata. Seo se bohlokwa kudu gakaakang nakong ya bofelo bja tshepedišo ye ya dilo! Punong e kgolo ya moya, maphelo a kotsing. (Mateo 13:39) Ngwanabo rena Lett o ile a kgothaletša dialoga gore di se ke tša ‘tšwafa modirong,’ eupša di be le ‘phišego moyeng’ gomme di ‘hlankele Jehofa’ punong ye yeo e ka se tsogego ya boeletšwa gape. (Ba-Roma 12:11) Seboledi se ile sa tsopola mantšu a Jesu a rego: “Lebêlêlang Le bônê mašemo, xobane a šetše a šweufaletše xo bunwa.” (Johane 4:35) Ke moka se ile sa kgothaletša dialoga go bontšha phišego ya tšona bakeng sa modiro wa go buna ka go dira boiteko bja kgonthe bja go fihlelela batho ka nako yeo ba hwetšagalago ka yona gotee le moo ba ka hwetšwago gona le ka go diriša ka mo go holago dibaka ka moka tša go nea bohlatse bjo bo sa rulaganyetšwago. Go dula re phafogetše go bula dibaka go ka thuša gore go nea bohlatse bjo bo atlegilego go kgonege. Jehofa ke Modimo yo a fišegago, le gona o letetše gore ka moka ga rena re mo ekiše gomme re šome ka thata punong ya moya.—2 Dikxoši 19:31; Johane 5:17.

Bakeng sa go phetha lenaneo, modula-setulo e lego Ngwanabo rena Jaracz o ile a fetiša ditumedišo go tšwa diofising tša makala tše mmalwa gomme a nea barutwana di-diploma tša bona. Yo mongwe wa dialoga o ile a bala lengwalo leo le tšwago sehlopheng, leo le bontšhago tebogo e tseneletšego bakeng sa tlwaetšo yeo se e amogetšego. Ka mo go lego molaleng, lenaneo la go aloga la sehlopha sa bo-116 le dirile gore ka moka bao ba bego ba le gona e be bao ba ikemišeditšego kudu go tšwela pele e le babuni ba fišegago.

[Caption on page 25]

DIPALO-PALO TŠA SEHLOPHA

Palo ya dinaga tše di emetšwego: 6

Palo ya dinaga tšeo ba abetšwego go tšona: 20

Palo ya barutwana: 46

Palo-gare ya nywaga: 34,2

Palo-gare ya nywaga therešong: 17,2

Palo-gare ya nywaga bodireding bja nako e tletšego: 13,9

[Caption on page 26]

Sehlopha sa bo-116 sa Sekolo sa Beibele sa Watchtower sa Gilead

Lelokelelong le le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga go le letshadi go ya go le letona mothalading o mongwe le o mongwe.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith,  N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.