Na Dithapelo tša Gago di ka Dira Phapano?
Na Dithapelo tša Gago di ka Dira Phapano?
KE MANG go rena yo a sa kago a lebeletšana le maemo a thata kudu ao re sa kago ra kgona go a laola? Beibele e bontšha gore moapostola Paulo o be a tseba gore thapelo e ka kgoma mafelelo a maemo a bjalo.
Ge Paulo a be a golegilwe ka go hloka toka kua Roma, o ile a kgopela badumedi-gotee le yena gore ba mo rapelele, o okeditše ka gore: “Ke Le rapêla xa-xoloxolo xore Le dirê byalo, xore ke bušetšwê xo lena ka pelá.” (Ba-Hebere 13:18, 19) Lebakeng le lengwe, Paulo o ile a bolela kholofelo ya gagwe ya gore Modimo o be a tla araba dithapelo tša gore a lokollwe kapejana. (Filemone 22) Paulo o ile a lokollwa kapejana gomme a thoma lefsa modiro wa gagwe wa boromiwa.
Eupša na thapelo e ka fetola e le ka kgonthe mafelelo a mathata a gago? Mohlomongwe. Lega go le bjalo, gopola gore thapelo ga e fo ba tirelo e tlwaetšwego ya bodumedi. Ke poledišano ya kgonthe le Tatago rena yo lerato le yo matla yo a lego legodimong. Re swanetše go ikwa re lokologile go bolela ka go lebanya kudu dithapelong tša rena, eupša ka morago ga moo re lete ka go se fele pelo gore re bone kamoo Jehofa a di arabago ka gona.
Modimo a ka no se arabe thapelo e nngwe le e nngwe ka go lebanya goba a ka no se e arabe ka tsela goba ka nako yeo re e letetšego. Ka mohlala, Paulo o ile a rapela leboelela ka “phatša nameng” ya gagwe. Modimo ga se a tloša bothata bja Paulo, go sa šetšwe gore e be e le bofe, eupša o ile a homotša Paulo ka go mo matlafatša ka mantšu a: “Kxauxêlô ya-ka a e Xo lekanê, xobane matla a-ka a iphêtha phokolong.”—2 Ba-Korinthe 12:7-9.
Le rena ka mo go swanago re ka ba le kholofelo ya gore le ge Modimo a ka se tloše bothata bjo itšego, a ka “bea sebaka sa xo tlo efoxa, xore [re] kxônê xo kxôtlêlêla.” (1 Ba-Korinthe 10:13) Kgaufsinyane, Modimo o tla tloša ditlaišego ka moka tša batho. Mo nakong ye, go retologela go “Mokwi wa dithapêlô” go ka dira phapano.—Psalme 65:2.