‘O re Rutile go Hlompha

Bodumedi bja Gagwe’

YO MONGWE wa Dihlatse tša Jehofa yo a tšwago profenseng ya Rovigo, kua Italy, o ile a lemoga gore o be a e-na le serurugi le gore boemo bja gagwe e be e le bjo bo beago bophelo kotsing. Ka morago ga go dula sepetlele ka makga a mmalwa, ao ka ona a ilego a kgopela go alafša ntle le ditšhelo tša madi, o ile a thušwa ka gae ke baoki bao ba tšwago tirelong ya lefelong leo ya baoki bao ba thušago balwetši bao ba swerwego ke kankere.

Tumelo e tiilego ya molwetši yo wa nywaga e 36 gotee le go ikemišetša ga gagwe go ba le tirišano di ile tša kgahliša ka mo go tseneletšego bašomi ba tša kalafo bao ba ilego ba mo oka. Pejana ga ge molwetši yo a ka bolawa ke kankere, yo mongwe wa baoki bao ba ilego ba mo thuša o ile a ngwala ka makasineng wa tša booki mabapi le phihlelo yeo a bilego le yona le molwetši yo a ilego a mmitša gore ke Angela.

“Angela o na le matšato, e bile o ikemišeditše go phela. O lemoga boemo bja gagwe gotee le bolwetši bja gagwe bjo bošoro, gomme go etša ge le ge e le mang wa rena a be a ka dira, o tsoma tharollo goba sehlare. . . . Rena baoki re ile ra tlwaelana le yena ganyenyane-ganyenyane. Ga se ra ka ra lebeletšana le kganetšo. Ka mo go fapanego, go bolela ga Angela ka bolokologi go ile gwa dira gore dilo ka moka di be bonolo. E be e le mo go thabišago go mo hlokomela, ka ge re be re tseba gore re be re tla ba le motho yo a botegago gomme ra holana. . . . Kapejana re ile ra lemoga gore bodumedi bja gagwe e be e tla ba lepheko tabeng ya go mo oka bolwetšing bja gagwe.” Yeo e be e le kgopolo ya mooki yo ka gobane o be a nagana gore Angela o swanetše go tšhelwa madi, e lego seo a ilego a se gana.—Ditiro 15:28, 29.

“Rena bjalo ka ditsebi tša tlhokomelo ya tša maphelo, re ile ra botša Angela gore re be re sa dumelelane le phetho ya gagwe, eupša ka thušo ya gagwe, re ile ra kwešiša seo bophelo bo bego bo se bolela go yena. Le gona re ile ra kwešiša bohlokwa bja bodumedi bja gagwe go yena gotee le go lapa la gabo. Angela ga se a lahlela toulo. Ga se a ineela bolwetšing. O na le sebete le boikemišetšo. O nyaka go phela, go lwela go phela le go tšwela pele a phela. O tsebaditše boikemišetšo bja gagwe, e lego tumelo ya gagwe. O na le boikemišetšo bjoo gantši re se nago bjona, tumelo, yeo go rena e sa tiago go swana le ya gagwe. . . . Angela o re rutile bohlokwa bja go hlompha bodumedi bja gagwe, selo seo se fapanego kudu le melao ya rena ya ditsebi. . . . Re dumela gore seo Angela a re rutilego sona ke sa bohlokwa bjo bogolo, ka gobane re kopana le batho ba mehuta ka moka, maemo a mehuta ka moka, madumedi a mehuta ka moka, ka gona re ka ithuta go ona gomme ra nea motho yo mongwe le yo mongwe yo re kopanago le yena selo se itšego.”

Ke moka sehlogo sa makasine woo se ile sa gogela tlhokomelo go Code of Professional Ethics bakeng sa Baoki ba Italy, yeo e amogetšwego ka 1999, yeo e rego: “Mooki o dira mediro ya gagwe, a naganela ditekanyetšo tša motho tša bodumedi, tša boitshwaro le tša setšo gotee le morafo le bong.” Ka dinako tše dingwe, go ka ba thata go dingaka le baoki go hlompha ditumelo tša molwetši tša bodumedi, eupša motho o tloga a tšeela godimo bao ba ikemišeditšego go dira bjalo.

Diphetho tšeo Dihlatse tša Jehofa di di dirago mabapi le boemo bja tšona bja tša maphelo le tlhokomelo ya tša kalafo ke tšeo di nagannwego gabotse. Di ela hloko ka mo go tseneletšego seo Mangwalo a se bolelago, gomme bjalo ka ge go bontšhitšwe tabeng ya Angela, ga se bafišegela-thoko. (Ba-Filipi 4:5) Lefaseng ka bophara, palo e oketšegago ya ditsebi tša tlhokomelo ya tša maphelo di ikemišeditše go hlompha letswalo la balwetši ba tšona ba Dihlatse.