‘Le Ba Rute Go Boloka Tšohle Tše Ke Le Laetšego Tšona’

“Ké xôna yang Le dirê . . . barutiwa . . . ka xo ba ruta xo boloka tšohle tše ke Le laetšexo tšôna.”—MATEO 28:19, 20.

1. Ke poledišano efe yeo e bilego gona magareng ga morutiwa Filipi le monna yo a tšwago Ethiopia?

MONNA yo a tšwago Ethiopia o be a tšere leeto la go ya Jerusalema. Moo o be a rapela Modimo yo a bego a mo rata, Jehofa. Le gona go molaleng gore o be a rata le Lentšu la Modimo leo le buduletšwego. Ge a be a boela gae a le ka koloing ya gagwe, o be a bala kopi ya mangwalo a moporofeta Jesaya ge Filipi, e lego morutiwa wa Kriste, a be a gahlana le yena. Filipi o ile a botšiša mo-Ethiopia yo gore: “Afa tše O di balaxo O a di kwa?” Monna yo o ile a araba ka gore: “Nka kxôna bya’ng xe ke se na wa xo nthlahla tseleng?” Filipi o ile a tšwela pele go thuša morutwana yo wa kgonthe wa Mangwalo gore e be morutiwa wa Kriste.—Ditiro 8:26-39.

2. (a) Ke ka tsela efe karabo yeo e neilwego ke mo-Ethiopia e bego e e-na le morero? (b) Ke dipotšišo dife tšeo di lego mabapi le taelo ya Kriste ya go dira barutiwa tšeo re tlago go di ahla-ahla?

² Karabo ya mo-Ethiopia ke ya bohlokwa kudu. O itše: “Nka kxôna bya’ng xe ke se na wa xo nthlahla tseleng.” (Mongwalo o sekamego ke wa rena.) Ee, o be a nyaka tlhahlo, motho yo a tlago go mo etelela pele. Ka tsela ya wona e nnoši, mantšu a a bontšha bohlokwa bja taelo e lebanyago yeo Jesu a ilego a e akaretša taelong ya gagwe ya go dira barutiwa. Ke taelo efe? Bakeng sa go hwetša karabo, a re tšweleng pele ka go ahla-ahla ga rena mantšu a Jesu ao a hwetšwago go Mateo kgaolo 28. Sehlogo se se fetilego se lebišitše tlhokomelo dipotšišong tša gore ke ka baka la’ng? le gore kae? Gabjale re tla ahla-ahla dipotšišo tše dingwe tše pedi tše oketšegilego tšeo di lego mabapi le taelo ya Kriste ya go dira barutiwa—re ba rute eng? le gona go fihlela neng?

“Ka xo ba Ruta xo Boloka Tšohle tše ke le Laetšexo Tšôna”

3. (a) Ke bjang motho e bago morutiwa wa Jesu Kriste? (b) Go dira barutiwa go akaretša go ruta’ng?

³ Ke eng seo re swanetšego go se ruta bakeng sa go thuša ba bangwe go ba barutiwa ba Kriste? Jesu o laetše balatedi ba gagwe gore: “Ké xôna yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna.” (Mateo 28:19, 20) Ka gona, re swanetše go ruta dilo tšeo Kriste a di laetšego. * Lega go le bjalo, ke eng seo se tla thušago go kgonthišetša gore motho yo a rutwago ditaelo tša Jesu e ka se be feela morutwana eupša o tla tšwela pele a le bjalo? Ntlha e nngwe ya bohlokwa e bonwa go kgetheng ga Jesu mantšu ka kelohloko. Ela hloko gore ga se a fo re: ‘Le ba rute dilo tšohle tše ke le laetšego tšona.’ Go e na le moo, o itše: ‘Le ba rute go boloka tšohle tše ke le laetšego tšona.’ (Mateo 19:17) Seo se bolela’ng?

4. (a) Go boloka taelo go bolela’ng? (b) Bontšha kamoo re rutago motho go boloka ditaelo tša Kriste.

⁴ Go boloka taelo go bolela go “dumelelanya ditiro tša motho” le taelo—go e kwa, goba go e boloka. Ka gona, re ruta bjang motho go latela, goba go kwa dilo tšeo Kriste a di laetšego? Go ba gona, nagana tsela yeo ka yona mohlahli wa  baotledi a rutago barutwana ba gagwe go latela melao ya tsela. Mohlahli a ka ruta barutwana ba gagwe melao ya tsela ge ba le ka phapošing. Lega go le bjalo, e le gore a rute barutwana ba gagwe go kwa melao yeo, o swanetše go hlahla barutwana ge ba dutše ba otlela gare ga dikoloi tše dingwe gomme ba katanela go diriša seo ba ithutilego sona. Ka mo go swanago, ge re ithuta Beibele le batho, re ba ruta ditaelo tša Kriste. Lega go le bjalo, re swanetše gore gape re hlahle barutwana ge ba dutše ba katanela go diriša ditaelo tša Kriste maphelong a bona a letšatši le letšatši le bodireding. (Johane 14:15; 1 Johane 2:3) Ka gona, go phethagatša thomo ya Kriste ka mo go feletšego ya go dira barutiwa go nyaka gore re be bobedi barutiši le bahlahli. Ka tsela yeo, re ekiša mohlala wo o beilwego ke Jesu le ke Jehofa ka boyena.—Psalme 48:14; Kutollo 7:17.

5. Ke ka baka la’ng motho yo re ithutago Beibele le yena a ka dika-dika go kwa taelo ya Kriste ya go dira barutiwa?

⁵ Go ruta ba bangwe go boloka ditaelo tša Jesu go akaretša go ba thuša go kwa taelo ya go dira barutiwa. Go ba bangwe bao re ithutago Beibele le bona, woo e ka ba modiro o thata. Gaešita le ge nakong e fetilego e be e le ditho tše mafolofolo tša kereke e itšego ya Bojakane, ga go na pelaelo gore barutiši ba bona ba nakong e fetilego ba bodumedi ga se ba ka ba ba ruta go ya go dira barutiwa. Baetapele ba bangwe ba dikereke ba dumela ka bolokologi gore ge e le mabapi le go ruta mohlape wa bona go dira modiro wa boebangedi, dikereke tša Bojakane di palelwa ka mo go feletšego. Seithuti sa Beibele e lego John R. W. Stott ge se be se bolela mabapi le taelo ya Jesu ya go ya lefaseng gomme go thušwe batho ba mehuta ka moka go ba barutiwa se itše: “Go palelwa ga rena ke go kwa seo se bolelwago ke taelo ye ke bofokodi bjo bogolo kudu bja Bakriste ba baebangedi modirong wa boebangedi lehono.” Se okeditše ka gore: “Re sekamela go tsebatša molaetša wa rena re le kgole. Ka dinako tše dingwe re bonagala bjalo ka batho bao ba goeletšago keletšo bathong bao ba nwelelago gomme rena re le lebopong leo le šireletšegilego. Ga re phonkgele ka gare gore re ba phološe. Re tšhaba go koloba.”

6. (a) Ge re thuša morutwana wa Beibele, ke bjang re ka ekišago mohlala wa Filipi? (b) Re ka bontšha bjang go ba le taba ga rena ge morutwana wa Beibele a thoma go tšea karolo modirong wa boboledi?

⁶ Ge e ba motho yo re ithutago Beibele le yena nakong e fetilego e be e le karolo ya bodumedi bjoo ditho tša bjona ‘di tšhabago go koloba,’ e ka ba tlhohlo go yena go fenya poifo ya gagwe ya go boifa meetse, ge re bolela ka tsela ya seswantšhetšo, gomme a kwa taelo ya Kriste ya go dira barutiwa. O tla nyaka thušo. Ka gona, re swanetše gore re se ke ra fela pelo ge re dutše re mo nea mohuta wa thuto le tlhahlo tšeo di nweletšago kwešišo ya gagwe gomme tša mo tutueletša go  gata mogato, go etša ge dithuto tša Filipi di ile tša bonegela mo-Ethiopia gomme tša mo tutueletša go kolobetšwa. (Johane 16:13; Ditiro 8:35-38) Go oketša moo, kganyogo ya rena ya go ruta barutwana ba Beibele go boloka taelo ya go dira barutiwa e re tutueletša go šoma le bona bakeng sa go ba hlahla ge ba gata megato ya bona ya mathomo go ruteng ka Mmušo.—Mmoledi 4:9, 10; Luka 6:40.

‘Dilo Tšohle’

7. Go ruta ba bangwe go “boloka tšohle” go akaretša go ba ruta ditaelo dife?

⁷ Ga re ipeele mellwane ya gore re fo ruta barutiwa ba bafsa go dira barutiwa. Jesu o re laetše go ruta ba bangwe go “boloka tšohle” tšeo a di laetšego. (Mongwalo o sekamego ke wa rena.) Seo ka ntle le pelaelo se akaretša ditaelo tše pedi tše dikgolo kudu—go rata Modimo le go rata moagišani. (Mateo 22:37-39) Ke bjang morutiwa yo mofsa a ka rutwago go latela ditaelo tšeo?

8. Bontšha kamoo morutiwa yo mofsa a ka rutwago taelo ya go bontšha lerato.

⁸ Nagana gape ka seswantšho sa morutwana yo a ithutago go otlela. Ge morutwana a dutše a otlela gare ga dikoloi tše dingwe a sepela le mohlahli wa gagwe, morutwana ga a ithute feela ka go theetša mohlahli wa gagwe eupša gape le ka go lebelela baotledi ba bangwe. Ka mohlala, mohlahli a ka lebiša tlhokomelo go mootledi yoo ka botho a dumelelago yo mongwe go tsena ka pele ga gagwe gare ga dikoloi tše dingwe; goba mootledi yoo ka bohlale a fokotšago mabone a koloi ya gagwe e le gore a se ke a fahla baotledi ba dikoloi tšeo di tlago; goba mootledi yoo ka go rata a neago motho yo a mo tsebago thušo yoo koloi ya gagwe e senyegilego. Mehlala e bjalo e ruta morutwana dithuto tše bohlokwa tšeo a ka di dirišago ge a otlela. Ka mo go swanago, morutiwa yo mofsa yo a sepelago tseleng e išago bophelong ga a ithute feela go morutiši wa gagwe, eupša gape o ithuta le mehlaleng e mebotse yeo a e bonago ka phuthegong.—Mateo 7:13, 14.

9. Morutiwa yo mofsa o ithuta bjang seo se bolelwago ke go kwa taelo ya go bontšha lerato?

⁹ Ka mohlala, morutwana wa Beibele a ka bona motswadi yo a se nago molekane yo a dirago boiteko bjo bogolo bja go tla Holong ya Mmušo le bana ba gagwe ba banyenyane. A ka bona motho yo a gateletšegilego yoo ka potego a tlago dibokeng go sa šetšwe go tlaišwa ga gagwe ke kgateletšego, mohlologadi yo a tšofetšego yoo a išago batšofadi ba bangwe sebokeng se sengwe le se sengwe sa phuthego, goba mofsa yo a lego mahlalagading yoo a tšeago karolo go hlwekišeng Holo ya Mmušo. Morutwana wa Beibele a ka bona mogolo wa phuthego yoo ka potego a etelelago pele tirelong ya tšhemo go sa šetšwe boikarabelo bja gagwe bjo bogolo ka phuthegong. A ka kopana le Hlatse yeo e golofetšego e bile e sa kgone go tšwa ka ntlong eupša yeo e lego mothopo wa kgothatšo ya moya go bohle bao ba e etelago. Morutwana a ka bona banyalani bao ba dirago diphetogo tše dikgolo maphelong a bona e le gore ba hlokomele batswadi ba bona bao ba tšofetšego. Ka go bona Bakriste ba bjalo ba botho, bao ba nago le thušo le bao ba ka botwago, morutwana yo mofsa o ithuta ka mohlala seo se bolelwago ke go kwa taelo ya Kriste ya go rata Modimo le moagišani, kudu-kudu badumedi-gotee le yena. (Diema 24:32; Johane 13:35; Ba-Galatia 6:10; 1 Timotheo 5:4, 8; 1 Petro 5:2, 3) Ka tsela ye, setho se sengwe le se sengwe sa phuthego ya Bokriste se ka kgona—e bile se swanetše—go ba morutiši le mohlahli.—Mateo 5:16.

“Xo Fihla Bofelong bya Lefase”

10. (a) Re tla tšwela pele re dira barutiwa ka lebaka le le kaaka’ng? (b) Ke mohlala ofe woo Jesu a o beilego mabapi le go phetha dikabelo?

¹⁰ Ke go fihlela neng moo re swanetšego go tšwela pele ka go dira barutiwa? Go fihlela bofelong bja lefase goba mafelelong a tshepedišo ye ya dilo. (Mateo 28:20) Na re tla kgona go phethagatša sebopego se sa taelo ya Jesu? Re le phuthego ya lefaseng ka bophara, re ikemišeditše go dira bjalo. Nywageng e fetilego, ka lethabo re ile ra diriša nako ya rena, matla a rena le ditlabakelo tša rena bakeng sa go hwetša bao ba ‘sekametšego ka mo go swanetšego bophelong bjo bo sa felego.’ (Ditiro 13:48, bapiša le NW.) Gona bjale, lefaseng ka bophara Dihlatse tša Jehofa di fetša palo-gare ya diiri tša ka godimo ga dimilione tše  tharo letšatšing le lengwe le le lengwe la ngwaga modirong wa go bolela ka Mmušo le wa go dira barutiwa. Re dira bjalo ka gobane re latela mohlala wa Jesu. O itše: “Sejô sa-ka ké xe ke dira thatô ya E a nthomilexo, xe ke phêtha medirô ya xaxwe.” (Johane 4:34, mongwalo o sekamego ke wa rena.) Yeo le yona ke kganyogo ya rena e tšwago pelong. (Johane 20:21) Re nyaka go dira go feta go fo thoma modiro woo re o neilwego; re nyaka go o phetha.—Mateo 24:13; Johane 17:4.

11. Go diragetše’ng ka ba bangwe ba bana babo rena ba Bakriste le dikgaetšedi, gomme re swanetše go ipotšiša’ng?

¹¹ Lega go le bjalo, go a re nyamiša go lemoga gore ba bangwe ba badumedi-gotee le rena ba tapile moyeng, gomme ka baka leo, ba goga maoto goba ba kgaoditše go kwa taelo ya Kriste ya go dira barutiwa. Na go na le tsela le ge e le efe yeo re ka ba thušago ka yona gore ba tsošološe bogwera bja bona le phuthego ke moka ba thome lefsa go tšea karolo ga bona go direng barutiwa? (Ba-Roma 15:1; Ba-Hebere 12:12) Tsela yeo Jesu a ilego a thuša baapostola ba gagwe ge ba be ba le boemong bja go fokola ka nakwana e bontšha seo re ka se dirago lehono.

Bontšha go ba le Taba ka ba Bangwe

12. (a) Pejana ga lehu la Jesu, baapostola ba gagwe ba ile ba dira’ng? (b) Jesu o ile a dirišana bjang le baapostola ba gagwe go sa šetšwe go bontšha ga bona bofokodi bjo bogolo?

¹² Mafelelong a bodiredi bja Jesu mo lefaseng, ge lehu la gagwe le be le le kgaufsi, baapostola ba ile ba ‘mo tlogela gomme ba tšhaba.’ Bjalo ka ge Jesu a ile a bolela e sa le pele, ba ile ba “xašanywa, e mongwê le e mongwê a ya mo a yaxo.” (Mareka 14:50; Johane 16:32) Jesu o ile a dirišana bjang le badirišani-gotee le yena bao ba bego ba fokodišitšwe moyeng? Kapejana ka morago ga tsogo ya gagwe, Jesu o ile a botša ba bangwe ba balatedi ba gagwe gore: “Se thšoxeng! Sepelang Le botšê bana bešo Le re ba yê Galilea. Xôna-kua ba tlo mpôna.” (Mateo 28:10) Gaešita le ge baapostola ba be ba bontšhitše mafokodi a magolo, Jesu o ile a ba bitša “bana bešo.” (Mateo 12:49) O be a se a ba hlapa diatla. Ka tsela ye, Jesu o be a e-na le kgaugelo le tebalelo, go fo etša ge Jehofa a e-na le kgaugelo le tebalelo. (2 Dikxoši 13:23) Re ka ekiša Jesu bjang?

13. Re swanetše go lebelela bjang bao ba fokolago moyeng?

¹³ Re swanetše go tshwenyega ka mo go tseneletšego ka bao ba gogago maoto goba bao ba kgaoditšego go tšea karolo bodireding. Re sa dutše re gopola mediro ya lerato yeo badumedi-gotee le rena bao ba ilego ba e dira nakong e fetilego—ba bangwe mohlomongwe ka nywaga-some. (Ba-Hebere 6:10) Re tloga re hlologela bogwera bja bona. (Luka 15:4-7; 1 Ba-Thesalonika 2:17) Lega go le bjalo, re ka bontšha bjang go tshwenyega ga rena ka bona?

14. Ka go ekiša Jesu, re ka thuša bjang motho yo a fokolago?

 ¹⁴ Jesu o ile a botša baapostola bao ba nyamilego gore ba swanetše go ya Galilea gomme ba tla mmona fao. Ge e le gabotse, Jesu o ile a ba laletša gore ba be gona sebokeng se se kgethegilego. (Mateo 28:10) Ka mo go swanago lehono, re kgothaletša bao ba fokolago moyeng gore ba be gona dibokeng tša phuthego ya Bokriste, gomme re ka swanelwa ke go ba kgothatša ka lekga leo le fetago letee gore ba dire bjalo. Tabeng ya baapostola, taletšo e ile ya tšweletša dienywa, ka ge “barutiwa ba lesome le motšô o tee [ba ile] ba ya Galilea, thabeng ye Jesu a ba laetšexo.” (Mateo 28:16) Re thaba gakaakang ge ka mo go swanago bao ba fokolago ba arabela ditaletšong tša rena tše borutho gomme ba thomološa go ba gona dibokeng tša Bokriste!—Luka 15:6.

15. Re ka latela bjang mohlala wa Jesu ka go amogela bao ba fokolago bao ba tlago lefelong la rena la diboka?

¹⁵ Re tla arabela bjang ge Mokriste yo a fokolago a e-tla Holong ya Mmušo? Ge e le gabotse, Jesu o ile a dira’ng ge a be a bona baapostola ba gagwe, bao tumelo ya bona e bego e ile ya fokodišwa ka lebakanyana, ba le lefelong leo le beilwego bakeng sa seboka? “Jesu [o ile] a batamêla a bolêla le bôná.” (Mateo 28:18) Ga se a ka a ba lebelela a le kgole eupša o ile a ya go bona. Nagana gore baapostola ba swanetše go ba ba ile ba imologa gakaakang ge Jesu a gata mogato woo wa pele! Anke le rena ka mo go swanago re gate mogato wa pele gomme re amogele ka borutho bao ba fokolago moyeng bao ba dirago boiteko bja go boela ka phuthegong ya Bokriste.

16. (a) Re ka ithuta’ng mokgweng woo ka wona Jesu a ilego a dirišana le balatedi ba gagwe? (b) Re ka ekiša bjang pono ya Jesu ka bao ba fokolago? (Bona mongwalo wa ka tlase.)

¹⁶ Ke’ng se sengwe gape seo Jesu a ilego a se dira? Sa pele, o ile a dira tsebišo e rego: “Ke neilwe matla ka moka.” Sa bobedi, o ile a fana ka kabelo ya gore: ‘Ke gona yang le dire barutiwa.’ Sa boraro, o ile a dira kholofetšo ya gore: “Ke na le lena ka mehla.” Eupša na o lemogile seo Jesu a sego a se dira? Ga se a ka a sola barutiwa ka baka la mafokodi a bona le dipelaelo. (Mateo 28:17) Na tsela ya gagwe ya go bea taba e bile e atlegago? Ee. Go se go ye kae, baapostola ba be ba thomile gape ba ‘ruta le go kwatša ebangedi.’ (Ditiro 5:42) Ka go latela mohlala wa Jesu wa mabapi le kamoo re swanetšego go lebelela le go swara bao ba fokolago ka gona, re ka bona mafelelo a swanago ao a ruthetšago pelo ka phuthegong ya gabo rena. *—Ditiro 20:35.

“Ke na le Lena ka Mehla”

17, 18. Ke dikgopolo dife tšeo di matlafatšago tšeo di lego mantšung a Jesu a rego “ke na le lena ka mehla”?

¹⁷ Mantšu a mafelelo a taelo ya Jesu ao a rego, “ke na le lena ka mehla,” a na le kgopolo e matlafatšago bakeng sa bohle bao ba katanelago go  phetha taelo ya Kriste ya go dira barutiwa. (Mongwalo o sekamego ke wa rena.) Ga re na lebaka la go boifa kganetšo le ge e le efe yeo manaba a ka e tlišago malebana le modiro wa rena wa go bolela ka Mmušo le mehuta le ge e le efe ya go thomeletša yeo ba ka e tlišago malebana le rena. Ka baka la’ng? Ka gobane Jesu, e lego Moetapele wa rena, yoo a nago le “matla ka moka lexodimong le lefaseng,” o na le rena e le gore a re thekge!

¹⁸ Le gona kholofetšo ya Jesu ya gore “ke na le lena ka mehla,” ke mothopo wa kgothatšo e kgolo. (Mongwalo o sekamego ke wa rena.) Ge re dutše re katanela go phetha taelo ya Kriste ya go dira barutiwa, ga re thabele feela matšatši a thabišago eupša gape re lebeletšana le matšatši a nyamišago. (2 Koronika 6:29) Ba bangwe ba rena re feta dinakong tšeo di nyamišago ge re dutše re llela lehu la motho yo re mo ratago kudu. (Genesi 23:2; Johane 11:33-36) Ba bangwe ba lebeletšane le botšofadi, ge boemo bja tša maphelo le matla di phuhlama. (Mmoledi 12:1-6) Go sa dutše go le bjalo ba bangwe ba lebeletšana le matšatši ao ka ona ba nolwago moko ke maikwelo a kgateletšego. (1 Ba-Thesalonika 5:14) Le gona palo e oketšegago ya rena e katana le mathata a šoro a tša boiphedišo. Lega go le bjalo, go sa šetšwe ditlhohlo tše bjalo, re a atlega bodireding bja rena ka gobane Jesu o na le rena “ka mehla,” go akaretša le matšatšing a thata kudu maphelong a rena.—Mateo 11:28-30.

19. (a) Taelo ya Jesu ya go dira barutiwa e na le ditaelo dife? (b) Ke’ng seo se dirago gore re kgone go phetha taelo ya Kriste?

¹⁹ Bjalo ka ge re bone sehlogong se le se se fetilego, taelo ya Jesu ya go dira barutiwa e akaretša dibopego ka moka. Jesu o re boditše lebaka leo ka lona re swanetšego go phetha taelo ya gagwe le gore re swanetše go e phethela kae. Le gona o re boditše seo re swanetšego go se ruta le gore re swanetše go dira seo go fihlela neng. Ka kgonthe, go phetha thomo ye e kgolo ke tlhohlo. Eupša ka thekgo ya matla a Kriste le go ba gona ga gagwe le rena, re ka e phetha! Na ga o dumele?

[Mengwalo ya ka tlase]

[Dipotšišo tša Thuto]

[Caption on page 15]

Re swanetše go ba barutiši le bahlahli

[Caption on page 17]

Morutiwa yo mofsa o ithuta dithuto tša bohlokwa mohlaleng wo o bewago ke ba bangwe

O tla Araba Bjang?

• Re ruta bjang ba bangwe go boloka seo Jesu a se laetšego?

• Ke dithuto dife tšeo morutwana yo mofsa a ka ithutago tšona go ba bangwe ka phuthegong?

• Re ka dira’ng bakeng sa go thuša bao ba fokolago moyeng?

• Re hwetša matla le khomotšo efe go tšwa kholofetšong ya Jesu ya gore “ke na le lena ka mehla”?