Lengwalo le le Yago go Noage

“NOAGE yo a Rategago, ke badile ka Beibeleng ka makga a mmalwa ka wena le kamoo o ilego wa aga areka yeo wena le ba lapa la gago le ilego la phološwa Meetse-fuleng ka yona.”

Ke kamoo lengwalo le le tsenetšego phadišano ya barutwana ba nywaga e 14 go ya go e 21, la ngwanenyana wa nywaga e 15 yo a bitšwago Minnamaria le thomago ka gona. Phadišano e be e rulagantšwe ke ba tša ditirelo tša poso ba Finland, sehlopha sa barutiši sa Leleme la Setlogo le Mokgatlo wa Dipuku wa Finland. Batšea-karolo ba be ba swanetše go ngwala lengwalo le le theilwego pukung e itšego. Le be le ka ngwalelwa mongwadi wa puku yeo goba moanegwa wa yona. Barutiši ba ile ba kgetha mangwalo a ditaodišo a fetago 1 400 a barutwana gomme ba a iša go bahlahlobi ba phadišano. Ke moka bahlahlobi ba ile ba kgetha le le kaone kudu, a lesome a maemong a bobedi le a lesome a maemong a boraro. Minnamaria o be a thabišitšwe ke gore lengwalo la gagwe le be le beilwe sehlopheng sa boraro.

Ke ka baka la’ng Minnamaria, morutwana wa mahlalagading a ngwaletše Noage, motho yo a phetšego nywageng e ka bago 5 000 e fetilego? O a hlalosa: “Beibele e bile selo sa pele seo se tlilego kgopolong ya-ka. Ke tlwaelane kudu le baanegwa ba Beibele. Ke badile mo gontši ka bona moo ba bonagalago e le ba kgonthe go nna. Ke kgethile Noage ka gobane bophelo bja gagwe e be e le bjo bo thabišago le bjo bo fapanego le bja-ka.”

Lengwalo la Minnamaria le le yago go Noage le phetha ka mantšu a: “O sa dutše o le mohlala wa tumelo le wa go kwa. Bophelo bja gago bo tutueletša batho ka moka bao ba balago Beibele gore ba phele ka go dumelelana le tumelo ya bona.”

Lengwalo le la mofsa yo a balago Beibele le bontšha gabotse gore Beibele ka kgonthe ke ‘e phelago, le e matla’ bathong ba bagolo le ba banyenyane.—Ba-Hebere 4:12.