Modimo o Tloga a E-na le Taba le Wena

KE GA tlhago go kgopela thušo go Modimo ge re lebeletšane le dikgateletšo tše dikgolo. Go feta moo, ke “e moxolo, ké yo matla a mantši, ké yo bohlale byo bo sa êlwexo.” (Psalme 147:5) O boemong bjo bo kaone kudu gore a ka re thuša go lebeletšana le mathata a rena ka katlego. Go oketša moo, Beibele e re kgothaletša gore ‘re tšhollele dipelo tša rena’ go yena. (Psalme 62:8) Ka gona, ke ka baka la’ng ba bantši gakaakaa ba nagana gore Modimo ga a arabe dithapelo tša bona? Na seo se bolela gore ga a na taba le batho?

Go e na le gore re akgofele go bea Modimo molato ka baka la seo se bonagalago e le go se gate mogato ka tsela le ge e le efe, nagana ka nako yeo ka yona o bego o le ngwana. Ge batswadi ba gago ba be ba sa kgotsofatše senyakwa sa gago se sengwe le se sengwe, na o kile wa ba bea molato wa gore ga ba go rate? Bana ba bantši ba dira bjalo. Lega go le bjalo, ge o godile o ile wa lemoga gore lerato le bontšhwa ka ditsela tše dintši le gore go phetha selo se sengwe le se sengwe seo ngwana a se kgopelago e tloga e se go bontšha lerato.

Ka mo go swanago, ge e ba Jehofa a sa arabe dithapelo tša rena ka mehla go ya kamoo re ratago ka gona, se ga se bolele gore o a re hlokomologa. Therešo ke gore, Modimo o bontšha ka ditsela tše dintši gore o na le taba le rena ka moka.

‘Ge re Phela ke ka Yena’

Sa pele, “xe re phela, rè sepela, rè le xôna” ke ka baka la Modimo. (Ditiro 17:28) Go re nea ga gagwe bophelo ruri go bontšha gore o a re rata!

Go oketša moo, Jehofa o re nea seo re se nyakago e le gore re tšwele pele re phela. Re bala gore: “Dikxomo O di hloxišetša byang, le dimela tša xo fêpa motho, tša xo nthša dilewa mo mobung.” (Psalme 104:14) Ge e le gabotse, Mmopi wa rena o dira se se fetago go fo re nea dinyakwa tša rena tša motheo tša bophelo. Ka seatla se se bulegilego o re nea “dipula dì e-tšwa lexodimong, à hoša dipelo tša rena ka dijô le ka thabô.”—Ditiro 14:17.

Lega go le bjalo, ba bangwe ba ka ipotšiša gore, ‘Ge e ba Modimo a re rata kudu gakaakaa, ke ka baka la’ng a dumelela gore re tlaišege?’ Na o tseba karabo ya potšišo yeo?

Na re Swanetše go Bea Modimo Molato?

Bontši bja dilo tšeo di tlaišago batho ke tšeo ba ipaketšego tšona. Ka mohlala, dikotsi tša ditiro tše dingwe tšeo di lego kotsi kudu di tsebja gabotse. Lega go le bjalo, batho ba kopanela boitshwarong bjo bo gobogilego bja tša botona le botshadi, ba diriša dino-tagi le dihlare-tagi tše dingwe gampe, ba diriša motšoko, ba tšea karolo dipapading tše kotsi, ba otlela ka lebelo kudu, bjalo-bjalo. Ge e ba boitshwaro bjo bjalo bjo bo beago bophelo kotsing bo feleletša ka tlaišego, ke mang yo a swanetšwego go bewa molato? Na ke Modimo goba na ke motho yo a dirago dilo ka tsela e sego ya bohlale? Lentšu la Modimo le le buduletšwego le re: “Le se kê la timêla; Modimo xa a kwêrwe. Se motho a se byalaxo, ké sôna se a tl’o xo se buna.”—Ba-Galatia 6:7.

Go oketša moo, batho gantši ba kwešana bohloko. Ge naga e tsoša ntwa, ka kgonthe ga se Modimo yo a swanetšwego go bewa molato ka baka la tlaišego yeo e tlago go latela. Ge sesenyi se hlasela badudi-gotee le sona, na Modimo o swanetšwe go bewa molato ka baka la kgobalo le ge e le efe goba lehu le ge e le lefe leo le tlago go latela? Ga go bjalo le gatee! Ge mmuši a tlaiša, a hlokofatša e bile a bolaya bao a ba bušago, na re swanetše go bea Modimo molato? Seo e be e tla ba se se sa kwagalego.—Mmoledi 8:9.

Lega go le bjalo, go thwe’ng ka batho ba dimilione bao ba phelago bodiiding bjo bošoro goba bao ba bolawago ke tlala? Na Modimo o swanetšwe go bewa molato? Aowa. Polanete yeo e lego legae la rena e re nea dijo tše dintši ka go fetišiša  tšeo di ka fepago batho ka moka. (Psalme 10:2, 3; 145:16) Ke go abja ka go se leka-lekane ga dijo tšeo Modimo a di neago ka boati moo go dirago gore go be le tlala le bodiidi bjo bo apareditšego. Le gona boithati bja batho bo dira gore bothata bjoo bo se ke bja rarollwa.

Sebaki sa Motheo

Lega go le bjalo, ke mang yo a swanetšwego go bewa molato ge motho yo mongwe a babja goba a e-hwa ka baka la botšofadi? Na o be o tla makatšwa ke go tseba gore Modimo ga se yena a swanetšwego go bewa molato gaešita le bakeng sa seo? Modimo ga se a bopela batho gore ba tšofale ba be ba hwe.

Ge batho ba pele ba babedi, e lego Adama le Efa, ba be ba bewa tšhemong ya Edene, Jehofa o ile a ba nea tebelelo ya bophelo bjo bo sa felego lefaseng la paradeise. Lega go le bjalo, o be a tloga a nyaka gore lefase le dulwe ke batho bao ba thabelago bohwa bja bona. Ka go rialo, o ile a dira gore ditebelelo tša bona tša bophelo bja nakong e tlago e be tšeo di ithekgilego ka maemo. Adama le Efa ba be ba tla phela Paradeiseng ge feela ba be ba ka dula ba ikokobeletša Mmopi wa bona yo lerato.—Genesi 2:17; 3:2, 3, 17-23.

Ka manyami, Adama le Efa ba ile ba rabela. Efa o ile a kgetha go theetša Sathane Diabolo. O ile a mo fora gomme ge e le gabotse o ile a bolela gore Modimo o be a tima Efa selo se sengwe seo e bego e le sa mohola go yena. Ka gona o ile a thoma go sepela tseleng ya boipušo a ba a leka go “ba byalo ka Modimo, [a] tseba botse le bobe.” Adama o ile a mo tlatša borabeleng bja gagwe.—Genesi 3:5, 6.

Ge ba dirile sebe ka tsela ye, Adama le Efa ba ile ba ipontšha e le bao ba sa swanelwego ke go phela ka mo go sa felego. Ba ile ba tlaišwa ke ditla-morago tše kotsi tša sebe. Matla a bona le mafolofolo a bona a ile a fela, gomme mafelelong ba ile ba hwa. (Genesi 5:5) Lega go le bjalo, borabele bja bona bo bile le ditla-morago tše šoro kudu. Re sa dutše re tlaišwa ke ditla-morago tša sebe sa Adama le Efa. Moapostola Paulo o ngwadile gore: “Sebe sè tsene lefaseng ka motho o tee [Adama], ’me lehu la tsêna ka sebe, lehu le aparetše batho bohle ka xe ba dirile dibe bohle.” (Ba-Roma 5:12) Ee, ka baka la borabele bja Adama le Efa, sebe le lehu di apareditše bathong ka moka go swana le bolwetši bjo bo bolayago.

Bohlatse bjo Matla Kudu bja Gore Modimo o na le Taba le Batho

Na seo se bolela gore dibopiwa ka moka tša Modimo tšeo e lego batho di be di  senyeditšwe sa ruri? Aowa, le gona mo re hwetša bohlatse bjo matla kudu bja gore Modimo o na le taba le rena. Ka boikgafo bjo bogolo, Modimo o ile a dira thulaganyo ya go phološa batho sebeng le lehung. Moputso wa go phološa batho e be e le bophelo bja Jesu bjo bo phethagetšego, bjo bo ilego bja newa ka go rata bakeng sa rena. (Ba-Roma 3:24) Ka go rialo, moapostola Johane o ile a ngwala gore: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) Ka baka la tiro ye e lemogegago kudu ya lerato, re sa dutše re e-na le tebelelo ya go phela ka mo go sa felego. Paulo o ngwaletše ba-Roma gore: “Batho ka moka ba tletšwe ke tokafalo e išaxo bophelong ka Yêna o tee.”—Ba-Roma 5:18.

Re ka kgodišega gore ka nako yeo e beilwego ke Modimo, go ka se sa ba le tlaišego goba lehu polaneteng ya Lefase. Go e na le moo, maemo ao go boletšwego ka ona e sa le pele ka pukung ya Kutollo a tla aparetša: “Šoo ngwakô wa Modimo mo xare xa batho; ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná. ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.” (Kutollo 21:3, 4) Mohlomongwe o ka re, ‘Le ka mohla nka se phele gore ke bone nako yeo.’ Lega go le bjalo, ntlha ke gore mohlomongwe go ka ba bjalo. Le gona le ge o ka hwa, Modimo a ka go tsoša bahung. (Johane 5:28, 29) Ke seo Modimo a re reretšego sona, gomme ke sona seo se tlago go direga. Ke mo go fošagetšego gakaakang go bolela gore Modimo ga a na taba le batho!

“Batamêlang Modimo”

Ke mo go homotšago go tseba gore Modimo o thomile tharollo e swarelelago le ya sa ruri bakeng sa bothata bja go tlaišega ga batho. Lega go le bjalo, go thwe’ng ka maemo a gona bjale? Re ka dira’ng ge e ba re lahlegelwa ke motho yo re mo ratago lehung goba ngwana wa rena a swarwa ke bolwetši? Ge e le gabotse, ga se ya hlwa e e-ba nako ya Modimo ya gore a tloše bolwetši le lehu. Beibele e bontšha gore re tla swanelwa ke go leta lebakanyana e le gore seo se ka rarollwa. Eupša Modimo ga se a re tlogela re se na thušo. Morutiwa Jakobo o itše: “Batamêlang Modimo, le Yêna a Le batamêlê.” (Jakobo 4:8) Ee, Mmopi wa rena o re laletša gore re be le tswalano ya kgaufsi ya motho ka noši le yena, le gona bao ba dirago bjalo le ka mohla ga ba palelwe ke go bona thekgo ya gagwe gaešita le maemong a thata kudu.

Re ka batamela bjang kgaufsi le Modimo? Kgoši Dafida o ile a botšiša potšišo e swanago nywaga-kgolong e ka bago e meraro e fetilego, ge a re: “Morêna, . . . Thabeng e kxêthwa ya xaxo xo ka axa mang?” (Psalme 15:1) Dafida o ile a araba potšišo ya gagwe ka noši ge a be a tšwela pele ka gore: “Ké yo a swerexo tsela ya bothakxa, a dira tša xo loka, a bua therešô ka pelo, wa leleme le-ila-dithsêlê, wa xo se senye e mongwê.” (Psalme 15:2, 3) Ka mantšu a mangwe, Jehofa o amogela bao ba latelago tsela yeo Adama le Efa ba e lahlilego. O batamela kgaufsi le bao ba dirago thato ya gagwe.—Doiteronomio 6:24, 25; 1 Johane 5:3.

Re ka dira thato ya Modimo bjang? Re swanetše go ithuta se ‘bolo le seo se kgahlago Modimo Mophološi wa rena,’ ke moka re kgethe go dira dilo ka go dumelelana le sona. (1 Timotheo 2:3) Seo se akaretša go monya tsebo e nepagetšego ya Lentšu la Modimo, e lego Beibele. (Johane 17:3; 2 Timotheo 3:16, 17) Se se akaretša seo se fetago go fo bala Beibele ka go e ga ka godimo. Re swanetše go ekiša ba-Juda ba lekgolong la pele la nywaga ba kua Berea bao ba kwelego ge Paulo a dira boboledi. Re bala ka bona gore: “Ba amoxetše Lentšu ka xo rata; ba hlwa bà bala mangwalô ka mehla bà nyaka mo a kwanaxo le tšeo ba bexo ba di kwa.”—Ditiro 17:11.

Ka mo go swanago lehono, go bala Beibele ka kelohloko go matlafatša tumelo ya rena go Modimo e bile go re thuša go aga tswalano ya kgaufsi le yena. (Ba-Hebere 11:6) Le gona go re thuša go kwešiša gabotse kamoo Jehofa a dirišanago ka gona le batho—e sego feela bakeng sa mehola ya nakwana eupša ka mo go kgethegilego bakeng sa mehola e swarelelago go bohle bao ba nago le tshekamelo e nepagetšego.

Ela hloko seo se bolelwago ke Bakriste ba sego kae bao ba nago le tswalano ya kgaufsi le Modimo. Danielle wa nywaga e 16 o re: “Ke rata Jehofa kudu e bile go na le dilo tše dintši tšeo nka  mo lebogago ka baka la tšona. O nneile batswadi ba lerato ba ba mo ratago e le ka kgonthe bao ba nthutilego go phela ka go dumelelana le Lentšu la gagwe.” Mokriste wa kua Uruguay o ngwala gore: “Pelo ya-ka e tletše tebogo, e bile ke tutueletšega go leboga Jehofa ka baka la botho bja gagwe bjo bo sa swanelago le ka baka la segwera sa gagwe.” Modimo o amogela gaešita le bana ba banyenyane kudu. Gabriela wa nywaga e šupa o re: “Ke rata Modimo go feta selo le ge e le sefe lefaseng ka moka! Ke na le Beibele ya-ka ka noši. Ke rata go ithuta ka Modimo le ka Morwa wa gagwe.”

Lehono, ba dimilione lefaseng ka bophara ba dumelelana ka pelo ka moka le mopsalme yo a itšego: “Xe e le nna ke natefêlwa ke xo ba kxaufsi le Modimo.” (Psalme 73:28) Ba thušitšwe gore ba lebeletšane ka katlego le mathata ao ba nago le ona gabjale, e bile ba na le kholofelo e kgonthišeditšwego ya go phela ka mo go sa felego lefaseng la Paradeise. (1 Timotheo 4:8) Ke ka baka la’ng o sa dire gore ‘go batamela Modimo’ e be pakane ya gago? Ge e le gabotse, re kgonthišetšwa ka gore: “Xa a kxolê, ó kxaufsi le e mongwê le e mongwê wa ba re lexo fá.” (Ditiro 17:27) Ee, Modimo o tloga a e-na le taba le wena!

[Caption on page 5]

Go ba le taba ga Jehofa ka rena go bonwa ka ditsela tše dintši

[Caption on page 7]

Gaešita le bana ba banyenyane ba ka batamela kgaufsi le Modimo

[Caption on page 7]

Lehono, Jehofa o re thuša go kgotlelela. Ka nako e beilwego, o tla tloša bolwetši le lehu