Na Modimo o Ikarabela ka Mathata a Rena?

GE MORWEDI wa Marion yo a godilego a be a tlaišwa ke kgobalo e šoro ya bjoko, Marion o ile a dira seo ba bantši ba rena re ka bego re ile ra se dira. * O ile a rapelela thušo go Modimo. Marion o re: “Ke be ke sa kgone go gopola nako le ge e le efe yeo ka yona ke ilego ka ikwa ke lahlegile e bile ke le noši.” Ka morago, boemo bja morwedi wa gagwe bo ile bja mpefala, gomme Marion o ile a thoma go ba le dipelaelo ka Modimo. O ile a botšiša gore: “Ke ka baka la’ng se se direga?” O be a sa kgone go kwešiša lebaka leo ka lona Modimo yo lerato yo a bilego a e-na le taba le batho a bego a ka mo lahla.

Phihlelo ya Marion ke e tlwaelegilego kudu. Batho ba bantši lefaseng ka moka ba ile ba ikwa ba lahlilwe ke Modimo dinakong tša mathata. Ka morago ga go bolawa ga setlogolo sa gagwe, Lisa o re: “Ke sa dutše ke tlaišwa ke ‘dipotšišo tša mabapi le lebaka leo ka lona Modimo a dumelelago dilo tše mpe di direga.’ Ga se ka lahlegelwa ka mo go feletšego ke tumelo go Modimo, eupša e tloga e fetogile.” Ka mo go swanago, ka morago ga go lebeletšana le kotsi ya bošilo yeo e akaretšago morwa wa gagwe wa lesea, mosadi yo mongwe o itše: “Modimo ga se a ka a nkhomotša go seo se diregilego. Ga se a ka a mpontšha gore o na le taba le nna goba go mpontšha gore o nkwela bohloko.” O okeditše ka gore: “Nka se ke ka lebalela Modimo le ka mohla.”

Ba bangwe ba ba le maikwelo a go galefela Modimo ge ba lebelela lefase leo le ba dikologilego. Ba bona dinaga tšeo di apareditšwego ke bodiidi le tlala, bafaladi ba ntwa bao ba lego tlalelong, bana ba bantši bao e lego ditšhiwana ka baka la AIDS le batho ba dimilione bao ba tlaišwago ke malwetši a mangwe. Ge ba lebeletšane le dilo tše le manyami a mangwe a swanago le ao, ba bantši ba bea Modimo molato bakeng sa seo se bonagalago e le go se gate ga gagwe mogato.

Lega go le bjalo, therešo ke gore Modimo ga se a swanelwa go bewa molato ka baka la mathata ao a tlaišago batho. Ge e le gabotse, go na le mabaka a kwagalago a go dumela gore Modimo go se go ye kae o tla dirolla tshenyo yeo e tlišeditšwego lapa la batho. Re go laletša gore o phetle sehlogong se se latelago gomme o bone gore Modimo o tloga a e-na le taba le rena.

[Mengwalo ya ka tlase]