‘Yang Le Dire Barutiwa’

“Ke neilwe matla ka moka lexodimong le lefaseng. Ké xôna yang Le dirê . . . barutiwa.”—MATEO 28:18, 19.

1, 2. (a) Ke kabelo efe yeo Jesu a ilego a e nea balatedi ba gagwe? (b) Ke dipotšišo dife tša mabapi le ditaelo tša Jesu tšeo di tlago go ahla-ahlwa?

E BE e le letšatši la seruthwane kua Isiraele ka 33 C.E., gomme barutiwa ba Jesu ba be ba bokane thabeng kua Galilea. Morena wa bona yo a tsošitšwego o be a le kgaufsi le go rotogela legodimong, eupša pele ga moo o be a e-na le selo se itšego sa bohlokwa seo a swanetšego go ba botša sona. Jesu o be a e-na le kabelo yeo a swanetšego go ba nea yona. Kabelo yeo e be e le efe? Barutiwa ba gagwe ba ile ba arabela bjang go yona? Le gona kabelo yeo e šoma bjang go rena lehono?

² Seo Jesu a se boletšego se begilwe go Mateo 28:18-20 ka gore: “Ke neilwe matla ka moka lexodimong le lefaseng. Ké xôna yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna. Xomme tsebang, ke na le lena ka mehla xo fihla bofelong bya lefase.” Jesu o ile a bolela mabapi le “matla ka moka,” “dithšaba ka moka,” “tšohle tše ke Le laetšexo tšôna” gotee le “ka mehla.” Ditaelo tša gagwe tšeo di akaretšago dipolelwana tšeo tše nne di rotoša dipotšišo tše itšego tša bohlokwa, tšeo di ka akaretšwago ka mabotšiši a rego, ke ka baka la’ng? kae? eng? le go fihlela neng? Anke re ahla-ahleng dipotšišo tše ka e tee ka e tee. *

“Ke Neilwe Matla ka Moka”

3. Ke ka baka la’ng re swanetše go kwa taelo ya go dira barutiwa?

³ Sa pele, ke ka baka la’ng re swanetše go kwa taelo ya go dira barutiwa? Jesu o itše: “Ke neilwe matla ka moka lexodimong le lefaseng. Ké xôna yang Le dirê . . . barutiwa.” Polelwana “ké xôna” e šupa go lebaka le legolo leo ka lona re swanetšego go kwa taelo ye. Ke ka gobane Jesu, yo a neilego taelo ye, o na le “matla ka moka.” Matla a gagwe ke a bogolo bjo bokaaka’ng?

4. (a) Matla a Jesu ke a bogolo bjo bokaaka’ng? (b) Kwešišo ya rena ka matla a Jesu e swanetše go kgoma bjang pono ya rena ka taelo ya go dira barutiwa?

⁴ Jesu o na le matla a go laola phuthego ya gagwe, gomme ga e sa le go tloga ka 1914 o ile a ba le matla Mmušong wa Modimo wo o bego o sa tšwa go hlongwa. (Ba-Kolose 1:13; Kutollo 11:15) Ke morongwa yo mogolo gomme o laola madira a legodimong a barongwa ba dimilione tše makgolo. (1 Ba-Thesalonika 4:16; 1 Petro 3:22; Kutollo 19:14-16) O neilwe matla ke Tatagwe gore a fediše “babuši bohle le ba matla bohle” bao ba ganetšago melao ya motheo ya go loka. (1 Ba-Korinthe  15:24-26; Ba-Efeso 1:20-23) Matla a Jesu ga se a lekanyetšwa feela go bao ba phelago. Le gona ke “moahlodi wa ba ba phelaxo le ba ba hwilexo” e bile o na le matla ao a a neilwego ke Modimo a go tsoša bao ba robetšego lehung. (Ditiro 10:42; Johane 5:26-28) Ka ntle le pelaelo taelo yeo e neilwego ke Yo a filwego matla a bjalo a magolo e swanetše go lebelelwa e le ya bohlokwa kudu. Ka go rialo, ka tlhompho le ka go rata re kwa taelo ya Kriste ya gore ‘re yo dira barutiwa.’

5. (a) Petro o ile a kwa bjang mantšu a Jesu? (b) Go kwa ga Petro ditaelo tša Jesu go ile ga tliša tšhegofatšo efe?

⁵ Mathomong a bodiredi bja gagwe bja lefaseng, Jesu o ile a ruta barutiwa ba gagwe ka tsela e kgahlišago gore go lemoga matla a gagwe le go kwa ditaelo tša gagwe go tla tliša ditšhegofatšo. Nakong e nngwe o ile a botša Petro yo e bego e le morei wa dihlapi gore: “Šuthišetša kua xo lexo bodiba, Le fološê malôkwa a lena Le swarê dihlapi.” Petro o be a kgonthišegile gore go be go se na dihlapi, ka gona o ile a botša Jesu gore: “Mong’ a-ka! Bošexo ka moka re letše rè itapiša, ra se kê ra bôna selô.” Lega go le bjalo, ka boikokobetšo Petro o ile a oketša ka gore: “Fêla, ke tlo fološa lôkwa kè kwile taelô ya xaxo.” Ka morago ga ge Petro a kwele taelo ya Kriste, o ile a tanya “bontši byo boxolo bya dihlapi.” A nyamile, Petro o ile “a khunama à inametše matôlô a Jesu, a re: Tšwaa mo xo nna, xobane ke monna wa mo-dira-dibe, Morêna!” Eupša Jesu o ile a araba ka gore: “Se boifê; xo tloxa byalo O tlo ba morei wa xo phutha batho.” (Luka 5:1-10; Mateo 4:18) Re ithuta’ng go tšwa pegong yeo?

6. (a) Pego ya mabapi le go swara dihlapi ka mohlolo e bontšha’ng mabapi le mohuta wa go kwa woo Jesu a o nyakago? (b) Re ka ekiša Jesu bjang?

⁶ Jesu o ile a nea Petro, Andrea le baapostola ba bangwe kabelo ya go ba “barei ba xo phutha batho,” e sego pele ga ge ba swara dihlapi ka tsela e makatšago, eupša ka morago ga tiragalo yeo. (Mareka 1:16, 17) Ka mo go kwagalago, Jesu ga se a ka a nyaka gore batho ba fo mo kwa. O ile a nea banna ba lebaka leo le kgodišago leo ka lona ba swanetšego go mo kwa. Go fo etša ge go kwa taelo ya Jesu ya gore ba fološetše malokwa a bona fase go ile gwa lebiša mafelelong a makatšago, go kwa taelo ya Jesu ya go ‘swara batho’ le gona go tla lebiša ditšhegofatšong tše dikgolo. Baapostola ba ile ba arabela ka tumelo e feletšego. Pego e phetha ka gore: “Xe ba bušeditše ma-sela-watlê lebopong, ba tloxêla tšohle ba mo latêla.” (Luka 5:11) Lehono, ge re dutše re kgothaletša ba bangwe go tšea karolo modirong wa go dira barutiwa, re ekiša Jesu. Ga re nyake gore batho ba fo dira seo re ba botšago sona, eupša re ba nea mabaka a kgodišago a gore ba kwe taelo ya Kriste.

Mabaka a Kgodišago le Maikemišetšo a Nepagetšego

7, 8. (a) Go na le mabaka afe a mangwe a Mangwalo bakeng sa go bolela ka Mmušo le go dira barutiwa? (b) Ke lengwalo lefe leo le go tutueletšago ka mo go kgethegilego go tšwela pele ka modiro wa boboledi? (Bona gape le mongwalo wa ka tlase.)

⁷ Ka baka la ge re dumela go matla a Kriste, re tšea karolo modirong wa go bolela ka Mmušo le wa go dira barutiwa. Ke mabaka afe a mangwe a Mangwalo a go dira modiro woo ao re ka a neago bao re kganyogago go ba tutueletša medirong e mebotse? Ela hloko mantšu a latelago ao a boletšwego ke Dihlatse tše botegago tše mmalwa go tšwa dinageng tše fapa-fapanego, le gona ela hloko kamoo mangwalo ao a bontšhitšwego a thekgago mantšu a bona ka gona.

⁸ Roy, o kolobeditšwe ka 1951: “Ge ke be ke ineela go Jehofa, ke ile ka holofetša go mo hlankela ka mehla. Ke nyaka go phetha kholofetšo ya-ka.” (Psalme 50:14; Mateo 5:37) Heather, o kolobeditšwe ka 1962: “Ge ke nagana ka sohle seo Jehofa a ntiretšego sona, ke nyaka go mo leboga ka go mo hlankela ka potego.” (Psalme 9:1, 9-11; Ba-Kolose 3:15) Hannelore, o kolobeditšwe ka 1954: “Nako e nngwe le e nngwe ge re le bodireding, re thekgwa ke barongwa—a tokelo e kaakang!” (Ditiro 10:30-33; Kutollo 14:6, 7) Honor, o kolobeditšwe ka 1969: “Ge nako ya Jehofa ya kahlolo e fihla, ga ke nyake gore motho le ge e le ofe tikologong ya gešo a latofatše Jehofa le Dihlatse tša gagwe ka gore ga ba šetše gomme a re, ‘le ka mohla ga se ka ka ka lemošwa!’” (Hesekiele 2:5; 3:17-19; Ba-Roma 10:16, 18) Claudio, o kolobeditšwe ka 1974: “Ge re dira boboledi, ‘Modimo o a re bona’ le gona ‘re sepela gotee le Kriste.’ Nagana  feela! Ge re le bodireding, re thabela go ba gotee le Bagwera ba rena ba paale.”—2 Ba-Korinthe 2:17. *

9. (a) Pego ya go rea dihlapi ga Petro le baapostola ba bangwe e utolla’ng mabapi le boikemišetšo bjo bo nepagetšego bja go kwa Kriste? (b) Boikemišetšo bjo bo nepagetšego bja go kwa Modimo le Kriste lehono ke bofe, gomme ka baka la’ng?

⁹ Le gona pego ya mabapi le go tanya dihlapi ka tsela e makatšago e bontšha bohlokwa bja go ba le boikemišetšo bjo bo nepagetšego bja go kwa Kriste—lerato. Ge Petro a be a re, “Tšwaa mo xo nna, xobane ke monna wa mo-dira-dibe,” Jesu ga se a ka a tloga, le gona ga se a ka a sola Petro ka gore o dirile sebe le ge e le sefe. (Luka 5:8) Le gona Jesu ga se a ka a bona Petro phošo ka ge a ile a mo kgopela gore a sepele. Go e na le moo, Jesu o ile a araba ka botho ka gore: “Se boifê.” Poifo e sa swanelago e be e tla ba boikemišetšo bjo bo fošagetšego bja go kwa Kriste. Go e na le moo, Jesu o boditše Petro gore yena le bagwera ba gagwe ba be ba tla ba le mohola e le barei ba batho. Lehono, le rena ka mo go swanago ga re diriše poifo goba maikwelo a bjalo a fošagetšego, a bjalo ka go ba le molato le go lewa ke dihlong, gore re gapeletše ba bangwe go kwa Kriste. Ke feela go kwa ka moya ka moka mo go theilwego leratong la go rata Modimo le Kriste moo go thabišago pelo ya Jehofa.—Mateo 22:37.

“Le Dirê Dithšaba ka Moka Barutiwa”

10. (a) Ke taba efe ya mabapi le taelo ya Jesu yeo e ilego ya rotoša tlhohlo e kgolo bakeng sa barutiwa ba gagwe? (b) Barutiwa ba ile ba arabela bjang taelong ya Jesu?

¹⁰ Potšišo ya bobedi yeo e botšišitšwego mabapi le taelo ya Kriste ke e rego, Modiro wo wa go dira barutiwa o swanetše go dirwa kae? Jesu o boditše balatedi ba gagwe gore: “Le dirê dithšaba ka moka barutiwa.” Pele ga nako ya bodiredi bja Jesu, batho ba ditšhaba ba be ba amogelega ge e ba ba be ba e-tla Isiraele go tlo hlankela Jehofa. (1 Dikxoši 8:41-43) Jesu ka noši o ile a ruta kudu ba-Juda ba tlhago, eupša gabjale o ile a botša balatedi ba gagwe go ya go batho ba ditšhaba ka moka. Ge e le gabotse, lefelo la go rea dihlapi, goba tšhemo ya go dira boboledi ya barutiwa ba  gagwe e be e dutše e lekanyeditšwe go “letangwana”—ba-Juda ba tlhago—eupša kgaufsinyane e be e tla akaretša “lewatle” ka moka la batho. Gaešita le ge phetogo ye e ile ya tliša tlhohlo go barutiwa, ba ile ba kwa taelo ya Jesu ka go akgofa. Nywaga ya ka tlase ga e 30 ka morago ga lehu la Jesu, moapostola Paulo o ile a kgona go ngwala gore ditaba tše dibotse di šetše di boletšwe e sego feela go ba-Juda eupša go “babopya bohle ba tlase xa lexodimo.”—Ba-Kolose 1:23.

11. Ke katološo efe ya ‘mafelo a go rea’ yeo e bego e dutše e direga ga e sa le go tloga mathomong a lekgolo la bo-20 la nywaga?

¹¹ Dinakong tša morago bjale, go dutše go bonwa koketšego e swanago tšhemong ya go dira boboledi. Mathomong a lekgolo la bo-20 la nywaga, ‘mafelo a go rea’ a be a le feela dinageng tše sego kae. Lega go le bjalo, morago nakong yeo balatedi ba Kriste ba ile ba ekiša mohlala wa Bakriste ba lekgolong la pele la nywaga gomme ka mafolofolo ba katološa tšhemo yeo ba bego ba dira boboledi go yona. (Ba-Roma 15:20) Mathomong a bo-1930, ba be ba dira barutiwa dinageng tše ka bago tše lekgolo. Lehono, ‘mafelo a rena a go rea’ a katološeditšwe dinageng tše 235.—Mareka 13:10.

“Ba Mebolêlô ya Mehuta-huta”

12. Boporofeta bjo bo hwetšwago go Sakaria 8:23 bo gatelela tlhohlo efe?

¹² Go dira barutiwa ditšhabeng ka moka ke tlhohlo, e sego feela tabeng ya bogolo bja tšhemo eupša gape le ka go fapa-fapana ga maleme. Jehofa o ile a bolela e sa le pele ka moporofeta Sakaria gore: “Morena wa mašaba ó re: Mehleng yeo banna ba lesome ba mebolêlô ya mehuta-huta ba tlo swara monna wa Mo-Juda ka kobô, ba re: A nkê re yê le lena, ka xobane re kwile xore Modimo ó na le lena.” (Sakaria 8:23, mongwalo o sekamego ke wa rena.) Phethagalong e kgolo ya boporofeta bjo, “monna wa mo-Juda” o swantšhetša mašaledi a Bakriste ba tloditšwego, mola “banna ba lesome” ba swantšhetša “lešaba le lexolo.” * (Kutollo 7:9, 10; Ba-Galatia 6:16) Lešaba le le legolo la barutiwa ba Kriste le be le tla hwetšwa ditšhabeng tše dintši, gomme bjalo ka ge Sakaria a bontšhitše, le tla be le bolela maleme a mantši. Na histori ya mehleng yeno ya batho ba Modimo e bontšha sebopego seo sa barutiwa? Ee, e a se bontšha.

13. (a) Ke tšwelopele efe mabapi le maleme yeo e diragetšego gare ga batho ba Modimo ba mehleng yeno? (b) Sehlopha sa molaki yo a botegago se arabetše bjang go go nyakega mo go oketšegago ga dijo tša moya ka maleme a fapa-fapanego? (Akaretša lepokisi le le rego “Dikgatišo Bakeng sa Difofu.”)

¹³ Ka 1950 leleme la setlogo la Dihlatse tša Jehofa tše ka bago tše tharo go tše dingwe le tše dingwe tše hlano lefaseng ka bophara e be e le Seisemane. Ka 1980 palo yeo e be e fetogile go ya go mo e ka bago batho ba babedi go ba bahlano, gomme lehono leleme la setlogo la Hlatse e tee go tše dingwe le tše dingwe tše hlano ke Seisemane. Sehlopha sa molaki yo a botegago yo bohlale se ile sa arabela bjang phetogong ye ya maleme? Se arabetše ka go aba dijo tša moya ka maleme a mangwe  a oketšegilego. (Mateo 24:45) Ka mohlala, ka 1950 dipuku tša rena di be di gatišwa ka maleme a 90, eupša lehono palo yeo e oketšegile go ya go a ka bago 400. Na go lebiša tlhokomelo ka mo go oketšegilego bathong ba dihlopha tša maleme a fapa-fapanego go tlišitše mafelelo? Ee! Palo-gare ya batho ba ka bago 5 000 ba “maleme ka moka” e ba barutiwa ba Kriste beke e nngwe le e nngwe ya ngwaga! (Kutollo 7:9) Le gona koketšego e tšwela pele. Dinageng tše dingwe “malokwa” a tanya batho ba bantši kudu!—Luka 5:6; Johane 21:6.

Na o ka Tšea Karolo Bodireding bjo bo Kgotsofatšago?

14. Re ka thuša bjang bao ba lego tšhemong ya gabo rena bao ba bolelago leleme lešele? (Akaretša lepokisi le le rego “Polelo ya Diatla le go Dira Barutiwa.”)

¹⁴ Dinageng tše dintši tša ka Bodikela, go fihla ga bafaladi go tlišitše tlhohlo ya go dira barutiwa ba “maleme ka moka” bao ba lego dinageng tšeo. (Kutollo 14:6) Re ka thuša bjang bao ba lego tšhemong ya gabo rena bao ba bolelago leleme le lengwe ka ntle le la rena? (1 Timotheo 2:4) Ge re bolela ka tsela ya seswantšhetšo, re ka diriša ditlabakelo tše di nepagetšego tša go rea dihlapi. Nea batho ba bjalo dipuku ka leleme leo ba le bolelago. Ge e ba go kgonega, rulaganyetša gore Hlatse yeo e bolelago segagabo bona e ba etele. (Ditiro 22:2) Gona bjale go bonolo go dira dithulaganyo tše, ka ge Dihlatse tše dintši di ithutile go bolela leleme le lengwe ka ntle le segagabo tšona e le gore di thuše batho bao ba tšwago dinageng dišele go ba barutiwa ba Kriste. Dipego di bontšha gore go thuša ka tsela ye ke phihlelo e putsago.

15, 16. (a) Ke mehlala efe yeo e bontšhago gore ke mo go putsago go thuša bao ba bolelago leleme lešele? (b) Ke dipotšišo dife tša mabapi le tirelo ya tšhemong ya leleme lešele tšeo re ka naganago ka tšona?

¹⁵ Ela hloko mehlala e mebedi go tšwa kua Netherlands, moo modiro o rulagantšwego wa go bolela ka Mmušo o dirwago ka maleme a 34. Banyalani ba Dihlatse ba ile ba ithapela go yo dira barutiwa gare ga bafaladi bao ba bolelago Sepoliši. Tsela yeo batho ba ilego ba arabela ka yona maitekong a bona e be e le e kgolo kudu moo monna a ilego a ikwa a tutueletšega go fokotša nako ya mošomo wa gagwe wa boiphedišo e le gore a hwetše letšatši le le oketšegilego ka beke gore a ithute Beibele le bao ba bontšhago kgahlego. Go se go ye kae, banyalani ba be ba swara dithuto tša Beibele tša ka godimo ga tše 20 beke e nngwe le e nngwe. Ba boletše gore: “Bodiredi bja rena bo re dira gore re thabe kudu.”  Batho bao ba dirago barutiwa ba ikwa ba thabile ka mo go kgethegilego ge bao ba kwago ditherešo tša Beibele ka leleme la gabo bona ba tutueletšega go bontšha tebogo. Ka mohlala, nakong ya seboka seo se bego se swerwe ka se-Vietnam, mokgalabje o ile a emelela gomme a kgopela tumelelo ya go bolela. A tletše megokgo ka mahlong a gagwe, o ile a botša Dihlatse gore: “Ke leboga maiteko ao le a dirago a go ithuta leleme la-ka le thata. Ke thaba kudu go ithuta dilo tše dintši tše di kgahlišago go tšwa ka Beibeleng botšofading bja-ka.”

¹⁶ Ka baka leo, ga se mo go makatšago gore bao ba hlankelago diphuthegong tša maleme a šele ba ikwa ba thabile kudu. Banyalani bao ba tšwago Brithania ba itše: “Bodiredi tšhemong ya leleme lešele ke o mongwe wa mehuta e kgahlišago kudu ya bodiredi yeo re kilego ra e thabela nywageng ya rena e 40 ya tirelo ya Mmušo.” Na o ka fetoša maemo a gago e le gore o tšee karolo bodireding bjo bjo bo kgahlišago? Ge e ba o sa dutše o tsena sekolo, na o ka ithuta leleme lešele bakeng sa go itokišetša mohuta wo wa bodiredi? Go dira bjalo go ka bula mojako o išago tseleng e kgotsofatšago ya bophelo yeo e tletšego ka ditšhegofatšo. (Diema 10:22) Ke ka baka la’ng o sa ahla-ahle se le batswadi ba gago?

Go Feto-fetoša Mekgwa ya Rena

17. Re ka fihlelela bjang batho ba oketšegilego tšhemong ya phuthego ya gabo rena?

¹⁷ Ka mo go kwagalago, bontši bja rena maemo ga a re dumelele go lahlela “malokwa” a rena ditšhemong tša maleme a šele. Lega go le bjalo, mohlomongwe re ka kgona go fihlelela batho ba oketšegilego go feta kamoo re dirago ka gona mo nakong ye tšhemong ya phuthego ya gabo rena. Bjang? Ka go feto-fetoša mekgwa ya rena, e sego molaetša wa rena. Ditikologong tše dintši palo e golago ya batho e dula meagong ya tšhireletšo ya maemo a godimo. Ba bangwe ba bantši ga ba gona ka gae ge re ba etela nakong ya bodiredi bja rena bja ntlo le ntlo. Ka gona re ka swanelwa ke go lahlela “malokwa” a rena ka dinako tše di fapa-fapanego le mafelong a fapa-fapanego. Ka go rialo re ekiša Jesu. O ile a hwetša ditsela tša go bolela le batho maemong a fapa-fapanego.—Mateo 9:9; Luka 19:1-10; Johane 4:6-15.

18. Ke bjang go nea bohlatse maemong a fapa-fapanego go ilego gwa itlhatsela e le mo go atlegilego? (Akaretša lepokisi le le rego “Go Dira Barutiwa Tšhemong ya Kgwebo.”)

¹⁸ Dikarolong tše dingwe tša lefase, go nea bohlatse le ge e le kae moo batho ba ka hwetšwago gona ke sebopego sa bohlokwa sa go dira barutiwa. Batho bao ba dirago barutiwa bao ba nago le phihlelo ba be ba dutše ba lebiša tlhokomelo e oketšegilego go neeng bohlatse mafelong a fapa-fapanego. Go oketša go go tšea karolo bodireding bja ntlo le ntlo, gabjale bagoeledi ba nea bohlatse maema-fofaneng, diofising, mabenkeleng, mafelong a go emiša dikoloi, maema-peseng, ditarateng, diphakeng, mabopong le mafelong a mangwe. Palo e kgolo ya Dihlatse tšeo di sa tšwago go kolobetšwa kua Hawaii e ile ya hwetšwa ka lekga la mathomo mafelong a bjalo. Go feto-fetoša mekgwa ya rena go re thuša go phetha ka botlalo taelo ya Jesu ya go dira barutiwa.—1 Ba-Korinthe 9:22, 23.

19. Ke dibopego dife tša taelo yeo Jesu a re neilego yona tšeo di tlago go ahla-ahlwa sehlogong se se latelago?

¹⁹ Kabelo yeo e neilwego ke Jesu ya go dira barutiwa e be e sa akaretše feela ditaba ka botlalo tša mabapi le gore ke ka baka lang le gore ke kae moo re swanetšego go dira modiro woo, eupša gape e be e le mabapi le gore ke eng seo re swanetšego go se ruta le gore ke go fihlela neng moo re swanetšego go dira bjalo. Dibopego tše tše pedi tša taelo yeo Jesu a re neilego yona di tla ahla-ahlwa sehlogong se se latelago.

[Mengwalo ya ka tlase]

[Dipotšišo tša Thuto]

[Lepokisi/Diswantšho go letlakala 10]

Dikgatišo Bakeng sa Difofu

Albert ke Mokriste yo e lego mogolo le modiredi wa nako e tletšego yo a dulago kua United States. Ke sefofu. Go diriša dipuku tša Beibele ka Braille go mo thuša gore e be yo a atlegilego kudu bodireding bja gagwe, go akaretša le medirong ya gagwe e le molebeledi wa tirelo. O swaragana bjang le kabelo ya gagwe ya ka phuthegong?

James yo e lego molebeledi yo a okamelago o re: “Le ka mohla ga se ra ka ra ba le molebeledi wa tirelo yo a atlegilego kudu phuthegong ya gabo rena go feta Albert.” Albert ke yo mongwe wa difofu tše 5 000 kua United States tšeo go theoša le nywaga, di amogetšego dikgatišo tša Beibele ka Braille ya Seisemane le ya Sepaniši. Ge e le gabotse, ga e sa le go tloga ka 1912 go ya pele, sehlopha sa molaki yo a botegago se abile dikgatišo tša ka godimo ga tše lekgolo tše di fapa-fapanego ka Braille. Ka go diriša mekgwa ya thekinolotši ya mehleng yeno, mafelo a go gatiša a Dihlatse tša Jehofa gabjale a tšweletša matlakala a dimilione ngwaga o mongwe le o mongwe ka maleme a ka godimo ga a lesome gomme a abja dinageng tša ka godimo ga tše 70. Na o tseba motho yo a ka holwago ke dikgatišo tša Beibele tšeo di lokišeleditšwego difofu?

[Lepokisi/Seswantšho go letlakala 11]

Polelo ya Diatla le go Dira Barutiwa

Dihlatse tše dikete lefaseng ka bophara, go akaretša le bafsa ba bantši bao ba fišegago, ba ithutile polelo ya diatla e le gore ba thuše difoa go ba barutiwa ba Kriste. Ka baka leo, kua Brazil e nnoši, difoa tše 63 di ile tša kolobetšwa ngwageng o mongwe wa morago bjale gomme Dihlatse tše 35 tša difoa moo gabjale di hlankela e le baebangedi ba nako e tletšego. Lefaseng ka bophara, go na le diphuthego le dihlopha tša ka godimo ga tše 1 200 tša polelo ya diatla. Tikologo e nnoši ya polelo ya diatla kua Russia ke yona tikologo e kgolo kudu lefaseng, ge re bolela ka bogolo bja yona, ka ge e akaretša Russia ka moka!

[Lepokisi go letlakala 12]

Go Dira Barutiwa Tšhemong ya Kgwebo

Ge e be e etetše batho ba kgwebo diofising moo ba šomago gona, Hlatse ya kua Hawaii e ile ya kopana le molaodi wa khamphani ya dinamelwa. Gaešita le ge a be a swaregile, monna yo o ile a dumela go ithuta Beibele ka metsotso e 30 ka beke ofising ya gagwe. Mesong e mengwe le e mengwe ya Laboraro, o botša bašomedi ba gagwe gore ba mo swarele megala ke moka yena o lebiša tlhokomelo ya gagwe e feletšego thutong. Hlatse e nngwe kua Hawaii e ithuta Beibele gatee ka beke le mong wa lebenkele la go lokiša dieta. Thuto e swarelwa khaontareng ya lebenkele. Ge moreki a tsena, Hlatse e boela ka thoko. Ge moreki a tloga, ba tšwela pele ka thuto.

Bobedi molaodi le mong wa lebenkele ba ile ba hwetšwa ka baka la ge Dihlatse di ile tša gata mogato wa pele wa go lahlela “malokwa” a tšona mafelong a fapa-fapanego. Na o ka nagana ka mafelo a tšhemong ya phuthego ya geno moo o ka hwetšago batho bao go lego thata go ba hwetša ka gae?

[Caption on page 12]

Na o ka hlankela tšhemong ya leleme lešele?

Na o a Gopola?

• Ke ka mabaka afe le gona ke ka boikemišetšo bofe moo re tšeago karolo modirong wa go bolela ka Mmušo le wa go dira barutiwa?

• Ke go fihlela bokgoleng bofe moo bahlanka ba Jehofa ba lehono ba ilego ba phethagatša taelo ya Jesu ya go dira barutiwa ba batho ba ditšhaba ka moka?

• Ke bjang re ka feto-fetošago ‘mokgwa wa rena wa go rea,’ le gona ke ka baka la’ng re swanetše go dira bjalo?