Mehlolo Ya Jesu Na Ke Ya Kgonthe Goba Ke Nonwane?

“BA TLIŠA ba bantši ba ba naxo le meôya e mebe [go Jesu Kriste]; ’me Jesu a lêlêka meôya yeo e mebe ka xo bolêla le yôna, a fodiša bohle ba ba babyaxo.” (Mateo 8:16) “Yêna [Jesu] a tsoxa, a kxalema ledimo, a bolêla le lewatlê, a re: Homola O re ‘tuu’! Ledimo la okobala, ’me xwa ruthêla ruri.” (Mareka 4:39) O nagana’ng ka dipolelo tše? Na o dumela gore di hlalosa ditiragalo tša kgonthe tša histori, goba na o nagana gore ke dikanegelo tša seswantšhetšo, tšeo e fogo ba dinonwane?

Ba bantši lehono ba na le dipelaelo tše dikgolo mabapi le go ba ga kgonthe ga mehlolo ya Jesu. Mehleng ye ya dithelesekopo le dimaekrosekopo, ya go dira dinyakišišo lefaufaung le ya mokgwa wa go laola dikarolwana tša leabela, go bonagala batho ba dika-dika go dumela dipego tša mabapi le ditiro tša mehlolo le tšeo di phagametšego matla a batho.

Ba bangwe ba nagana gore dipego tša mehlolo ke tša boikgopolelo goba ke tshwantšhetšo. Go ya ka mongwadi wa puku yeo e bolelago gore e nyakišiša ka Jesu yo go thwego ke wa kgonthe, dikanegelo tša mabapi le mehlolo ya Kriste e fo ba “didirišwa tša tša papatšo” tša go tšwetša pele Bokriste.

Ba bangwe ba lebelela mehlolo ya Jesu e le bofora bjo bo lego molaleng. Ka dinako tše dingwe Jesu ka boyena o bewa molato wa bofora. Go ya ka Justin Martyr wa lekgolong la bobedi la nywaga C.E., bantšha-diphošo ba Jesu “ba ile ba ba ba mmitša ramaleatlana le mofori wa batho.” Ba bangwe ba bolela gore Jesu “ga se a dira mehlolo ya gagwe e le moporofeta wa mo-Juda,  eupša e le ramaleatlana, yo a neilwego tlwaetšo ditempeleng tša boheitene.”

Go Hlalosa Seo se sa Kgonegego

O ka ba o nagana gore dipelaelong tše bjalo, go na le lebaka la motheo leo ka lona batho ba dika-dikago go dumela mehlolong. Ba fo hwetša go le thata, e bile go sa kgonege, go amogela kgopolo ya gore matla a phagametšego a tlhago a ka šoma. Mofsa yo mongwe yo a ipitšago moila-Modimo o itše: “Mehlolo ga e fo direga—le gatee.” Ke moka o ile a tsopola mantšu a radifilosofi wa Scotland wa lekgolong la bo-18 la nywaga e lego David Hume, yo a ngwadilego gore: “Mohlolo ke go robja ga melao ya tlhago.”

Lega go le bjalo, ba bantši ba tla ba šedi kudu mabapi le go tiiša gore tiragalo e itšego ga e kgonege. The World Book Encyclopedia e bitša mohlolo gore ke “tiragalo yeo e ka se hlaloswego ka melao yeo e tsebjago ya tlhago.” Go ya ka tlhaloso yeo, go sepela lefaufaung, didirišwa tša dipoledišano tšeo di sa dirišego dithapo le go laolwa ga sathalaete lefaufaung di ka ba di ile tša bonagala e le “mehlolo” go ba bantši bao ba phetšego lekgolong la nywaga le le fetilego. Ka kgonthe ga se ga bohlale go bolela gore mehlolo ga e kgonege feela ka gobane re ka se kgone go e hlalosa go ithekgilwe ka kwešišo yeo re nago le yona gabjale.

Ge e ba re hlahloba bjo bongwe bja bohlatse bja Mangwalo bjo bo lego mabapi le mehlolo yeo e dirilwego ke Jesu Kriste, re tla hwetša’ng? Na mehlolo ya Jesu ke ya kgonthe goba ke nonwane?