Na O Thabela ‘Molao Wa Jehofa’?

‘Go thabile motho yo a thabelago molao wa Jehofa.’—PSALME 1:1, 2.

1. Ke ka baka la’ng rena bjalo ka bahlanka ba Jehofa re thabile?

JEHOFA o a re thekga le go re šegofatša bjalo ka bahlanka ba gagwe ba botegago. Ke therešo gore re lebeletšana le diteko tše dintši. Lega go le bjalo, re thabela le lethabo la kgonthe. Se ga se makatše, ka gobane re hlankela ‘Modimo yo a thabilego,’ gomme moya wa gagwe o mokgethwa o tšweletša lethabo ka dipelong tša rena. (1 Timotheo 1:11; Ba-Galatia 5:22) Lethabo ke boemo bja go thaba e le ka kgonthe bjo bo tlišwago ke selo seo se letetšwego goba go fihlelela selo se itšego se sebotse. Le gona Tatago rena wa legodimong ka ntle le pelaelo o re nea dimpho tše dibotse. (Jakobo 1:17) Ga go makatše gore re thabile!

2. Ke dipsalme dife tšeo re tlago go di ahla-ahla?

² Lethabo le gatelelwa kudu ka pukung ya Dipsalme. Ka mohlala, se ke sa therešo ka Psalme 1 le 2. Balatedi ba Jesu Kriste ba mathomong ba ile ba bolela gore psalme ya bobedi e hlamilwe ke Kgoši Dafida wa Isiraele. (Ditiro 4:25, 26) Mohlami yo a sa bolelwego ka leina wa psalme ya mathomo o thoma kopelo ya gagwe e buduletšwego ka mantšu a rego: “Yo šexo [“yo a thabilego,” NW] ké monna eo a sa sepelexo à lailwe ke bakxôpô.” (Psalme 1:1) Sehlogong se le se se latelago, anke re boneng kamoo Psalme 1 le 2 e re neago lebaka la go thaba.

Sephiri sa Lethabo

3. Go ya ka Psalme 1:1, ke mabaka afe a mangwe ao ka ona motho yo a boifago Modimo e lego yo a thabilego?

³ Psalme 1 e bontšha lebaka leo ka lona motho yo a boifago Modimo a thabilego. Ge a nea mabaka a mangwe a lethabo le le bjalo, mopsalme o opela ka gore: “Yo šexo ké monna eo a sa sepelexo à lailwe ke bakxôpô, a se xatê tsela ya ba-dira-dibe, a se dulê ’tulong tša bakweri.”—Psalme 1:1.

4. Ke tsela efe e beago mohlala yeo e ilego ya phegelelwa ke Tsakaria le Elisabetha?

⁴ E le gore re thabe e le ka kgonthe, re swanetše go dira ka go dumelelana le dinyakwa tša Jehofa tša go loka. Tsakaria le Elisabetha, bao ba bilego le tokelo e thabišago ya go ba batswadi ba Johane Mokolobetši, “ba be ba lokile pele xa Modimo . . . bà e-ya ka ditaêlô ka moka tša Morêna bà se na bosodi.” (Luka 1:5, 6) Re ka thaba ge e ba re phegelela tsela e swanago gomme re gana ka go tia go ‘sepela re lailwe ke bakgopo’ goba go hlahlwa ke keletšo ya bona ya go se boife Modimo.

5. Ke’ng seo se ka re thušago go phema ‘tsela ya badiradibe’?

⁵ Ge e ba re gana tsela ya go nagana ya batho ba babe, re tla be re sa ‘gate tseleng ya badiradibe.’ Ge e le gabotse, re tloga re ka se hwetšwe moo gantši ba lego gona—mafelong a boithabišo bjo bo gobogilego goba a go tsebja ka bobe. Go thwe’ng ge e ba re lekega go tlatša badiradibe boitshwarong bja bona bjo e sego  bja mangwalo? Gona anke re rapeleleng thušo ya Modimo e le gore re dire dilo ka go dumelelana le mantšu a moapostola Paulo a rego: “Le se kê la ba ba xo ikxokêla jokong e šele ya ba ba sa dumelexo; tokô e ka amana bya’ng le bokxôpô? Seetša se ka amana bya’ng le lefsifsi?” (2 Ba-Korinthe 6:14) Ge e ba re ithekga ka Modimo gomme re e-na le “pelo-thsekexi,” re tla gana moya le mokgwa wa bophelo wa badiradibe gomme re tla ba le maikemišetšo le dikganyogo tšeo di hlwekilego gotee le ‘tumelo e se nago boikaketši.’—Mateo 5:8; 1 Timotheo 1:5.

6. Ke ka baka la’ng re swanetše go itiša malebana le bakweri?

⁶ E le gore re thabiše Jehofa, ka ntle le pelaelo ‘ga se ra swanela go dula ditulong tša bakweri.’ Ba bangwe ba kwera taba ya go boifa Modimo ka boyona, eupša ‘mehleng ye ya bofelo,’ bao e bego e le Bakriste gomme ba fetoga bahlanogi gantši ba itlhatsela e le bao ba nyatšago kudu dikwerong tša bona. Moapostola Petro o ile a lemoša badumedi-gotee le yena gore: “Baratexi, . . . sa pele se Le swanetšexo xo se tseba ké sé: Mehleng ya bofêlô xo tlo tsoxa bakweri ka dikwêrô, ba xo ya ka tsela ya dikxanyoxô tša bôná. E tlo ba ba ba rexo: Di kae tša xe xo thwe Morêna ó tlo boa? xobane e sa le mola bô-tate bà ithôbalêla, le lehono dilô ka moka di sa dutše di swana le tša mathomong a thlôlô.” (2 Petro 3:1-4) Ge e ba le ka mohla re sa ‘dule ditulong tša bakweri,’ re tla phema kotsi yeo ka ntle le pelaelo e tlago go ba wela.—Diema 1:22-27.

7. Ke ka baka la’ng re swanetše go ela hloko mantšu a Psalme 1:1?

⁷ Ka ntle le ge e ba re ka ela hloko mantšu a pele a Psalme 1, re ka lahlegelwa ke boemo bja rena bja moya bjo re bo hweditšego ka go ithuta Mangwalo. Ge e le gabotse, re ka fetelela. Mogato wa rena wa mathomo wa go lahlegelwa ke boemo bja rena bja moya e ka ba ge e ba re latela keletšo ya ba babe. Ke moka re ka gwerana le bona ka mehla. Ge nako e dutše e tšwela pele, re ka ba ra fetoga bahlanogi ba dikwero bao ba se nago tumelo. Go molaleng gore go gwerana le batho ba babe go ka godiša moya wa go se boife Modimo ka go rena gomme go ka fediša tswalano ya rena le Jehofa Modimo. (1 Ba-Korinthe 15:33; Jakobo 4:4) Anke le ka mohla re se ke ra dumelela seo se re diragalela!

8. Ke’ng seo se tlago go re thuša go dula re tsepamišeditše menagano ya rena dilong tša moya?

⁸ Thapelo e tla re thuša go dula re tsepamišeditše menagano ya rena dilong tša moya le go phema go gwerana le ba babe. Paulo o ngwadile gore: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô.  Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.” Moapostola o kgothaleditše gore go naganwe ka dilo tše e lego tša therešo, tša bohlokwa kudu, tša toka, tša bohlweki, tše di rategago, tše di bolelwago gabotse, tše botse le tšeo di retwago. (Ba-Filipi 4:6-8) Anke re direng ka go dumelelana le keletšo ya Paulo gomme le ka mohla re se ke ra ikwetša boemong bja ba babe.

9. Gaešita le ge re phema mekgwa e mebe, re leka bjang go thuša batho ba mehuta ka moka?

⁹ Gaešita le ge re gana mekgwa e mebe, re nea bohlatse ka bohlale go ba bangwe, go etša ge moapostola Paulo a ile a bolela le Mmušiši wa Roma e lego Filikisi mabapi le ditaba “tša tokô le tša boithswarô le tša kahlolô ye e tl’o xo ba xôná.” (Ditiro 24:24, 25; Ba-Kolose 4:6) Re bolela ditaba tše dibotse tša Mmušo bathong ba mehuta ka moka, gomme re ba swara ka tsela e botho. Re kgodišegile gore bao ba ‘sekametšego ka mo go swanetšego bophelong bjo bo sa felego’ e tla ba badumedi gomme ba thabela molao wa Modimo.—Ditiro 13:48, bapiša le NW.

O Thabela Molao wa Jehofa

10. Ke’ng seo se tlago go re thuša go dira gore seo re se balago se dulele ruri ka menaganong le ka dipelong tša rena dinakong tša thuto ya motho ka noši?

¹⁰ Mopsalme o tšwela pele go bolela mabapi le motho yo a thabilego gore: “Sa xaxwe ya ba xo thabêla molaô wa Morêna, molaô woo a o akanya [ka lentšu la tlasana, NW] mosexare le bošexo.” (Psalme 1:2) Ka ge re le bahlanka ba Modimo, re ‘thabela molao wa Jehofa.’ Ge go kgonega, dinakong tša thuto ya motho ka noši le ge re naganišiša, re ka bala “ka lentšu la tlasana,” re bolela mantšu. Go dira se ge re bala karolo le ge e le efe ya Mangwalo go tla re thuša go dira gore seo re se balago se dulele ruri ka menaganong le ka dipelong tša rena.

11. Ke ka baka la’ng re swanetše go bala Beibele “mosexare le bošexo”?

¹¹ “Molaki e a bôtêxaxo yo bohlale” o re kgothaleditše gore re bale Beibele letšatši le letšatši. (Mateo 24:45) Ka baka la kganyogo e matla ya gore re tlwaelane gakaone le molaetša wa Jehofa wo a o neilego batho, ke mo gobotse gore re bale Beibele “mosexare le bošexo”—ee, gaešita le dinakong tšeo re sa kgonego go robala ka baka la mabaka a itšego. Petro o re kgothaleditše gore: “Le etšê masea a sa tš’o xo bêlêxwa, Le llêlê lebese la Lentšu lé le sa forexo, xore Le xolê ka lôna Le fihlêlê phološô.” (1 Petro 2:1, 2) Na o thabela go bala Beibele letšatši le letšatši le go naganišiša ka Lentšu la Modimo le merero ya gagwe bošego? Mopsalme o ile a dira bjalo.—Psalme 63:6.

12. Re tla dira’ng ge e ba re thabela molao wa Jehofa?

¹² Lethabo la rena la ka mo go sa felego le ithekgile ka go thabela ga rena molao wa Modimo. O phethagetše e bile o lokile, gomme go o boloka go na le moputso o mogolo. (Psalme 19:7-11) Morutiwa Jakobo o ngwadile gore: “E a boxêlaxo ruri a bôna se se lexo molaong o tletšexo wa khunoloxô ’me a tiišetša moo, eo xa se mokwi e a xakwaxo, ké modiri wa modirô; ké yêna a tl’o xo dira è le wa lehlôxônôlô.” (Jakobo 1:25) Ge e ba re tloga re thabela molao wa Jehofa, letšatši le ka se fete re se ra ela hloko ditaba tša moya. Ka kgonthe, re tla tutueletšega go ‘fenyeka madiba a diphiri tša Modimo’  le go etiša dikgahlego tša Mmušo pele bophelong.—1 Ba-Korinthe 2:10-13; Mateo 6:33.

O ba Bjalo ka Sehlare

13-15. Ke ka kgopolo efe re ka bago bjalo ka sehlare seo se bjetšwego kgaufsi le mothopo wa meetse a mantši?

¹³ Ge a tšwela pele go hlalosa moloki, mopsalme o re: “[O] swana le sehlare-se-šingwa-nokeng ya meetse, sa xo enywa dienywa [ka] lebaka la xôna, sa xo se pône matlakala; ’me tšohle tše a di diraxo di a lêtlêxa.” (Psalme 1:3) Ka go swana le batho ba bangwe ka moka bao ba sa phethagalago, rena bao re hlankelago Jehofa re lebeletšana le mathata bophelong. (Jobo 14:1) Re ka lebeletšana le tlaišo le diteko tše dingwe tše di fapa-fapanego tšeo di tswalanago le tumelo ya rena. (Mateo 5:10-12) Lega go le bjalo, ka thušo ya Modimo, re kgona go kgotlelela diteko tše ka katlego, go etša ge sehlare se se phetšego gabotse se kgona go lebeletšana le diphefo tše matla kudu.

¹⁴ Sehlare seo se bjetšwego kgaufsi le mothopo o sa gopego wa meetse ga se pone ge go fiša goba nakong ya komelelo. Ge e ba re le batho bao ba boifago Modimo, matla a rena a tšwa Mothopong o sa gopego—Jehofa Modimo. Paulo o ile a lebelela go Modimo bakeng sa thušo gomme o be a ka kgona go bolela gore: “Ke kxôna tšohle ka Eo [Jehofa] a mphaxo matla.” (Ba-Filipi 4:13) Ge re hlahlwa le go fepša moyeng ke moya o mokgethwa wa Jehofa, ga re pone, ra ba bao ba sa enywego dienywa goba ra hwa moyeng. Re enywa dienywa tirelong ya Modimo le gona re bontšha dienywa tša moya wa gagwe.—Jeremia 17:7, 8; Ba-Galatia 5:22, 23.

¹⁵ Ka go diriša mohuta wa lentšu la Sehebere leo le fetoletšwego e le “swana,” mopsalme o diriša tshwantšhanyo. O bapiša dilo tše pedi tšeo di sa swanego, gaešita le ge di e-na le seka seo di swanago ka sona. Batho ga ba swane le dihlare, eupša go molaleng gore go phela gabotse ga sehlare seo se bjetšwego kgaufsi le mothopo wa meetse a mantši go ile gwa gopotša mopsalme ka katlego ya moya ya bao ba ‘thabelago molao wa Jehofa.’ Ge e ba re thabela molao wa Modimo, matšatši a rena a ka ba bjalo ka a sehlare. Ge e le gabotse, re ka phela ka mo go sa felego.—Johane 17:3.

16. Ke ka baka la’ng le gona ke bjang ‘tšohle tšeo re di dirago di atlegago’?

¹⁶ Ge re dutše re sepela tseleng e lokilego, Jehofa o re thuša go kgotlelela kgatelelo ya diteko le mathata. Re thabile e bile re enywa dienywa tirelong ya Modimo. (Mateo 13:23; Luka 8:15) ‘Tšohle tše re di dirago di a atlega’ ka gobane morero wa rena o mogolo ke go dira thato ya Jehofa. Ka ge merero ya gagwe ka mehla e atlega gomme re thabela melao ya gagwe, re a atlega moyeng. (Genesi 39:23; Jošua 1:7, 8; Jesaya 55:11) Se ke sa therešo gaešita le ge re lebeletšana le mathata.—Psalme 112:1-3; 3 Johane 2.

Ba Babe ba Bonagala ba Atlega

17, 18. (a) Mopsalme o swantšha ba babe le eng? (b) Gaešita le ge ba babe ba atlega dilong tše di bonagalago, ke ka baka la’ng ba se na tšhireletšego ya ka mo go sa felego?

¹⁷ Boemo bja ba babe bo tloga bo fapana gakaakang le bja baloki! Ba babe ba ka bonagala ba atlega dilong tše di bonagalago ka lebakanyana, eupša ga ba atlege moyeng. Se se molaleng go tšwa mantšung a mopsalme a tšwelago pele ao a rego: “Bakxôpô bôná xa ba byalo. Ba swana le moko mo-tšewa-ke-phefô. Ka xôna bakxôpô xa ba ême kahlolong; babe xa ba ême ’kxotleng la baloki.” (Psalme 1:4, 5) Ela hloko gore mopsalme o re, “bakxôpô bôná xa ba byalo.” O ra gore ga ba swane le batho bao ba boifago Modimo, bao ba sa tšwago go bapišwa le dihlare tšeo di enywago dienywa le tšeo di phelago ka mo go sa felego.

¹⁸ Gaešita le ge ba babe ba atlega dilong tše di bonagalago, ga ba na tšhireletšego ya sa ruri. (Psalme 37:16; 73:3, 12) Ba bjalo ka monna wa mohumi yo a se nago tlhaologanyo yo Jesu a boletšego ka yena seswantšhong ge a be a kgopelwa go dira phetho tabeng yeo e lego mabapi le bohwa. Jesu o ile a botša bao ba bego ba le gona gore: “Phafoxang, Le ilê mexabaru; xobane bophelô bya motho xa bo tšwe lehumong le xo tše a di ruilexo.” Jesu o ile a swantšha ntlha ye ka go bolela gore naga ya monna yo mongwe wa mohumi e ile ya enywa gabotse moo a ilego a loga leano la go  phušola matlolo a gagwe gomme a age a magolo e le gore a boloke dilo tša gagwe ka moka tše dibotse. Ke moka monna yo o ile a rulaganya go ja, go nwa le go ithabiša. Eupša Modimo o ile a re: “O setlaêla! Ka byôna bošexo byó môya wa xaxo o tlo tlošwa xo wene; ’me tšeo O di bolokilexo e tlo ba tša mang?” Ge a gatelela ntlha ya gagwe, Jesu o okeditše ka gore: “Ké tšôna tša e a ikxobêlaxo mahumô à sa ruele Modimong.”—Luka 12:13-21.

19, 20. (a) Hlalosa mokgwa wa bogologolo wa go fola mabele le go a fefera. (b) Ke ka baka la’ng ba babe ba swantšhwa le mooko?

¹⁹ Ba babe ga se ba “ruela Modimong.” Ka baka leo, ga ba na tšhireletšego le go tsepama go swana le mooko, e lego matlakala a masese ao a khupeditšego dithoro tša mabele. Ka morago ga ge mabele a be a bunnwe mehleng ya bogologolo, a be a išwa seboeng, e lego tikologo e bataletšego yeo ka mo go tlwaelegilego e lego mmotong. Lefelong leo ke moo dilei tše di nago le mafsika a bogale goba meno a tšhipi ka mahlakoreng a wona a tlase di bego di gogwa mabeleng ke diphoofolo e le gore di thokge makgaba gomme di tloše dithoro mookong. Se se latelago, leselo le be le dirišwa go rwala mabele ka moka gomme a ološwa moyeng wo o fokago. (Jesaya 30:24) Dithoro tša mabele di be di wela ka seboeng, mola moya o be o fokela mahlaka ka lehlakoreng le go foka mooko. (Ruthe 3:2) Ka morago ga ge mabele a sefilwe e le gore go tlošwe mafsikana le dilo tše bjalo ka wona, a be a loketše go ka bolokwa goba go šilwa. (Luka 22:31) Eupša mooko o be o se sa hlwa o le gona.

²⁰ Go fo etša ge dithoro tša mabele di be di wela fase gomme tša bolokwa mola mooko o be o tšewa ke phefo, ka mo go swanago baloki ba tla dula ba le gona gomme ba babe ba tla tlošwa. Lega go le bjalo, ka ntle le pelaelo re thabela gore badiradibe ba bjalo kgaufsinyane ba tla be ba fedišeditšwe sa ruri. Ge ba tlošitšwe, batho bao ba thabelago molao wa Jehofa ba tla šegofatšwa kudu. Ka kgonthe, mafelelong batho bao ba kwago ba tla amogela mpho ya Modimo ya bophelo bjo bo sa felego.—Mateo 25:34-46; Ba-Roma 6:23.

‘Tsela e Šegofaditšwego ya Baloki’

21. Jehofa o ‘tseba baloki’ bjang?

²¹ Psalme ya mathomo e phetha ka mantšu a a rego: “Tsela ya baloki e tsebya ke Morêna; ’me tsela ya bakxôpô yôna ké ya xo lôba.” (Psalme 1:6) Modimo o ‘tseba baloki’ bjang? Go ba gona, ge e ba re sepela tseleng ya go loka, re ka  kgonthišega gore Tatago rena wa legodimong o bona tsela ya rena ya bophelo bja go boifa Modimo gomme o re lebelela re le bahlanka ba gagwe ba amogelegago. Ke moka, re ka kgona e bile re swanetše go lahlela dipelaelo tša rena ka moka godimo ga gagwe ka kgodišego ya gore o tloga a e-na le taba le rena.—Hesekiele 34:11; 1 Petro 5:6, 7.

22, 23. Go tla direga’ng ka ba babe le ka baloki?

²² “Tsela ya baloki” e tla dula e le gona ka mo go sa felego, eupša batho ba babe bao ba sa nyakego go phošollwa ba tla fedišwa ka baka la kahlolo ya Jehofa e šoro. Le gona “tsela” ya bona, goba mokgwa wa bona wa bophelo, o tla fela gotee le bona. Re ka ba le kgodišego go phethagaleng ga mantšu a Dafida a rego: “Xo se xokae e mobe ó tlo ba a ile; O tlo bôxa lešope, yêna à se xôna. Ba bolêta e tlo ba bôná beng ba naxa; ba tlo thaba ka botlalô bya moláô. Baloki e ba beng ba naxa, ba dula mo xo yôna ka mehla le ka mehla.”—Psalme 37:10, 11, 29.

²³ Re tla thaba gakaakang ge e ba re ka ba le tokelo ya go phela lefaseng la paradeise ge ba babe ba sa hlwe ba le gona! Ke moka ba boleta le baloki ba tla thabela khutšo ya kgonthe ka gobane ka mehla ba tla thabela ‘molao wa Jehofa.’ Lega go le bjalo, pele ga moo, ‘taelo ya Jehofa’ e swanetše go phethwa. (Psalme 2:7a) Sehlogo se se latelago se tla re thuša go bona gore taelo yeo ke eng le gore e tla bolela eng go rena le go lapa ka moka la batho.

[Dipotšišo tša Thuto]

[Caption on page 11]

Thapelo e tla re thuša go phema go gwerana le ba babe

[Caption on page 12]

Ke ka baka la’ng moloki a swana le sehlare?

O tla Araba Bjang?

• Ke ka baka la’ng motho yo a boifago Modimo e lego yo a thabilego?

• Ke’ng seo se bontšhago gore re thabela molao wa Jehofa?

• Ke bjang motho a ka swanago le sehlare seo se nošetšwago gabotse?

• Ke bjang tsela ya baloki e fapanago le ya ba babe?