Dipotšišo tše Tšwago go Babadi

Jesu o be a bolela’ng ge a be a botša barutiwa ba gagwe gore: “Sathane ke mmone a e-wa lexodimong byalo ka lexadima”?

Jesu o be a sa tšwa go kgetha barutiwa ba gagwe ba 70, gomme a “ba roma ba mo êta-pele ka babedi [ka] babedi, ba ya metseng le metsaneng ka moka ye a tl’o xo tla xo yôna.” Ge ba 70 ba boa, ba be ba thabišitšwe ke go atlega ga modiro wa bona. Ba ile ba re: “Le meôya e mebe re be re e buša ka Leina la xaxo.” Ka nako yeo, Jesu o ile a re: “Sathane ke mmone a e-wa lexodimong byalo ka lexadima.”—Luka 10:1, 17, 18.

Mathomong, go ka bonagala eka Jesu o be a bolela ka tiragalo yeo e šetšego e diregile. Lega go le bjalo, nywageng e 60 ka morago ga ge Jesu a boletše mantšu a lego ka mo godimo, moapostola Johane yo a tšofetšego o ile a diriša polelo e swanago, ge a be a ngwala gore: “Nôxa e kxolo yeo ya rakwa; yôna ye ba rexo ké Diabolo le Sathane, motimetši wa lefase ka moka la batho. Ya lahlêlwa lefaseng; le Barongwa ba yôna ba lahlwa le yôna.”—Kutollo 12:9.

Ge Johane a be a ngwala mantšu ao, Sathane o be a sa dutše a dula legodimong. Re tseba bjang? Ka gobane Kutollo ke puku ya boporofeta, e sego ya histori. (Kutollo 1:1) Ka go rialo, mehleng ya Johane, Sathane o be a se a hlwa a lahlelwa lefaseng. Ge e le gabotse, bohlatse bo bontšha gore se ga se sa ka sa direga go ba go fihla kapejana ka morago ga ge Jesu a beilwe sedulong sa bogoši e le Kgoši ya Mmušo wa Modimo ka 1914. *—Kutollo 12:1-10.

Ka gona, ke ka baka la’ng Jesu a ile a bolela ka go rakwa ga Sathane legodimong bjalo ka ge eka go šetše go diregile? Diithuti tše dingwe di šišinya gore Jesu o be a kgalema barutiwa ba gagwe ka baka la go bontšha boikgodišo bjo bo sa swanelago. Ge e le gabotse, di dumela gore o be a bolela gore: ‘Le fentše batemona, eupša le se ke la ikgodiša. Sathane o ile a ba le boikgodišo, gomme seo se ile sa lebiša phedišong ya gagwe ya kapejana.’

Re ka se kgomarele kgopolo ya rena tabeng ye. Lega go le bjalo, go tloga go bonagala gore Jesu o be a thabile le barutiwa ba gagwe gomme a bolela ka bofelo bja Sathane bjo bo tlago. Jesu o be a tloga a tseba ka bonaba bja Diabolo bjo bošoro, go feta le ge e le ofe wa barutiwa ba gagwe. Nagana gore Jesu o ile a thaba gakaakang ge a e-kwa gore batemona ba matla ba be ba beilwe ka tlase ga taolo ya barutiwa ba gagwe ba sa phethagalago bao e lego batho! Go fenywa mo ga batemona e be e le ponelo-pele ya letšatši leo le tlago leo ka lona Jesu, e le Mikaele morongwa yo mogolo, a tlago go lwa le Sathane gomme a mo raka legodimong a mo rakela lefaseng.

Go molaleng gore ge Jesu a be a bolela gore o bone Sathane “a e-wa,” o be a gatelela kgonthišetšo ya go wa ga Sathane. Se se swana le diporofeto tše dingwe tša Beibele tšeo di bolelago ka ditiragalo tše di tlago bjalo ka ge eka di šetše di diregile. Ka mohlala, ela hloko kamoo tše dingwe tša dikarolo tša boporofeta tšeo di lego mabapi le Mesia go Jesaya 52:13–53:12 di boletšwego bjalo ka ge eka di šetše di diregile. Go bonagala Jesu a be a bontšha gore o dumela gore go rakwa ga Sathane legodimong go tla direga go etša ge Tatagwe a rerile. Le gona Jesu o be a kgonthišegile gore ka nako e beilwego ke Modimo, Sathane le batemona ba gagwe ba be ba tla lahlelwa sekoting gomme ka morago ba fedišwa gatee ya ba moka.—Ba-Roma 16:20; Ba-Hebere 2:14; Kutollo 20:1-3, 7-10.

[Mengwalo ya ka tlase]