Pušo Ya Mmušo Wa Modimo Selo Sa Kgonthe Lehono

“Ke bjang dinaga tše dintši gakaakaa, tša ditšo tše di fapanego gakaakaa e bile di le megatong e fapanego ya tšwelopele, di ka dumelelanago? Go boletšwe gore ke tlhaselo e tšwago polaneteng e nngwe feela yeo e tla kopanyago moloko wa batho.” —The Age, e lego kuranta ya Australia.

NA KE tlhaselo e tšwago polaneteng e nngwe? Go sa šetšwe gore seo se tla kopanya ditšhaba ka moka tša lefase goba go se bjalo, boporofeta bja Beibele bo tloga bo bolela ka bothata bjo bo tlago bjoo bo tla dirago gore ditšhaba ka moka tša lefase di ipope ngatana e tee. Le gona, ke therešo gore bothata bo tla tlišwa ke madira a tšwago polaneteng e nngwe.

Kgoši Dafida wa Isiraeleng ya bogologolo o boletše ka tsela ya boporofeta ka boemo bja lefase le. Ka tlase ga pudulelo ya Modimo o ngwadile gore: “Maxoši a lefase a a tsoxa, le babuši ba lakana xo lwa le Morêna le Motlotšwa w’axwe. Ba re: A re kxaoleng ditlêmô tšé tša bôná, re lahlê dinti tšé tša bôná!” (Psalme 2:2, 3; Ditiro 4:25, 26) Ela hloko gore babuši ba lefase ba tla lakana go lwa le Jehofa, e lego Mmopi wa legohle gotee le motlotšwa wa gagwe goba Kgoši ya gagwe e kgethilwego, Jesu Kriste. Seo se tla direga bjang?

Go ya ka tatelano ya mabaka ya Beibele le diporofeto tše di phethagaditšwego, Mmušo wa Modimo o hlomilwe legodimong ka ngwaga wa 1914 gomme Jesu Kriste ke Kgoši ya wona. * Ka nako yeo ditšhaba tša lefase di be di e-na le kgopolo  e tee e swanago. Go e na le go ikokobeletša bogoši bja Mmušo wa Modimo o sa tšwago go hlongwa, di ile tša tsenela ntwa ya go lwela go buša—Ntwa e Kgolo, goba Ntwa ya I ya Lefase.

Jehofa Modimo o nagana’ng ka karabelo e bjalo ya babuši bao e lego batho? “Mo-dula-maxodimo ó a ba thsêxa; Yêna Mong ’a bohle ó a ba nyatša. Ó tlo bá a búa nabô’ à befetšwe, ó tlo ba thšoša a xalefile.” Ke moka, Jehofa o tla botša Morwa wa gagwe, e lego Kgoši ya Mmušo gore: “Nkxopêlê, ke Xo fê dithšaba, e be lefa l’axo, le maxomô a lefase e bê a xaxo. O tlo ba rôba ka molamó wa thsipi; O tlo ba phšatla wa pitša tša letsopa.”—Psalme 2:4, 5, 8, 9.

Go pšhatlwa mo ga mafelelo ga ditšhaba tšeo di ganetšago ka molamo wa tšhipi go tla direga Aramagedone, goba Haramagedone. Puku ya mafelelo ya Beibele, e lego Kutollo, e hlalosa tiragalo ye ya makgaola-kgang e le ‘ntwa ya mohla-mogolo wa Modimo Ra-matla-ohle,’ yeo go yona “dikxoši tša lefase ka moka” di kgoboketšwago gotee. (Kutollo 16:14, 16) Ka tlase ga tutuetšo ya batemona, ditšhaba tša lefase mafelelong di tla ba boteeng ka morero o swanago—wa go lwa kgahlanong le Modimo yo Matla ohle.

Nako yeo ka yona batho ba tlago go bokana gotee bakeng sa go lwa kgahlanong le bogoši bja Modimo e batamela ka lebelo. Se se makatšago ke gore “botee” bja bona bo ka se ke bja ba hola ka selo. Go e na le moo, ditiro tša bona e tla ba ketapele ya khutšo yeo e bego e le kgale e letetšwe ya batho ka moka. Go bjalo bjang? Ntweng yeo ya mafelelo, Mmušo wa Modimo “o tlo phšatla mebušô e mengwê ka moka [ya lefase] wa e fediša; xe e le wôna, o tlo êma xo ya xo ile.” (Daniele 2:44) Mmušo wa Modimo, e sego mokgatlo le ge e le ofe wa batho, e tla ba mmušo wo o tlago go phethagatša kganyogo ya batho ya go nyaka khutšo ya lefase.

Molaodi yo Mogolo wa Pušo ya Mmušo

Ke wona Mmušo woo batho ba bantši ba botegago ba bego ba o rapelela ge ba re: “Mmušô wa xaxo a o tlê; thatô ya a xaxo a e dirwê mono lefaseng byalo ka xe e dirwa lexodimong.” (Mateo 6:10) Go e na le gore e be selo sa boikgopolelo, Mmušo wa Modimo ke pušo ya kgonthe yeo e phethagaditšego mediro e kgahlišago ga e sa le go tloga ge e hlongwa kua legodimong ka 1914. Anke re lebeleleng tše dingwe tša dilo tša bohlokwa tšeo di bontšhago gore Mmušo wa Modimo ke selo sa kgonthe e bile o šoma ka mo go feletšego lehono.

Sa pele, o na le ofisi ya bohlokomedi e matla le e nago le bokgoni yeo e eteletšwego pele ke Kgoši e beilwego sedulong sa bogoši, e lego Jesu Kriste. Ka 33 C.E., Jehofa Modimo o ile a bea Jesu Kriste go ba Hlogo ya phuthego ya Bokriste. (Ba-Efeso 1:22) Ga e sa le go tloga ka nako yeo, Jesu o be a dutše a diriša bohlogo bja gagwe, ka go rialo a bontšha bokgoni bja gagwe bja go laola. Ka mohlala, ge tlala e kgolo e be e wela Judea lekgolong la pele la nywaga, phuthego ya Bokriste e ile ya gata mogato ka go akgofa bakeng sa go thuša ditho tša yona. Modiro wa tlhakodišo o ile wa rulaganywa, gomme Baranaba le Saulo ba ile ba romelwa moo ka ditlabakelo tša thušo go tšwa Antiokia.—Ditiro 11:27-30.

Gabjale re ka lebelela mo gontši go Jesu Kriste ka ge pušo ya Mmušo e šetše e buša. Nakong le ge e le efe ge dikotsi—ditšhišinyego tša lefase, ditlala, mafula, madimo a magolo, madimo goba go thuthupa ga dithabamollo—di direga, phuthego ya Bokriste ya Dihlatse tša Jehofa e arabela ka go akgofa go dinyakwa tša badumedi-gotee le yona le tša ba bangwe bao ba lego mafelong a  sentšwego. Ka mohlala, ge dithabamollo tše di senyago di be di hlasela El Salvador ka January le February 2001, mediro ya tlhakodišo e ile ya rulaganywa dikarolong ka moka tša naga, gomme dihlopha tša Dihlatse tša Jehofa tše di tšwago Canada, Guatemala le United States di ile tša thuša. A mararo a mafelo a tšona a borapedi le nywako ya ka godimo ga e 500 e ile ya agwa lefsa ka go akgofa.

Balata ba Pušo ya Mmušo wa Modimo

Ga e sa le go tloga go hlongweng ga wona ka 1914, Mmušo wa Modimo wa legodimong o be o kgoboketša le go rulaganya balata ba wona go tšwa bathong ba lefase ka moka. Se ke go phethagatšwa ga boporofeta bjo bo kgahlišago bjo bo begilwego ke Jesaya bjo bo rego: “Bofelong bya mabaka thaba ya Ntlo ya Morêna [borapedi bja gagwe bja therešo bjo bo phagamego] e tlo ba e thekxilwe xodimo xa dithaba, . . . ’me dithšaba tšohle di tlo thšoloxêla mo xo yôna.” Boporofeta bjo bo bontšha gore “merafo-rafo” e tlo rotogela thabeng yeo gomme ya yo amogela ditaelo le melao ya Jehofa.—Jesaya 2:2, 3.

Tiragalo ye e feleleditše ka mokgatlo o bohlokwa kudu wa mehleng yeno—borwarre bja ditšhaba-tšhaba bja Bakriste ba ka godimo ga 6 000 000 bao ba lego dinageng tša ka godimo ga tše 230 lefaseng. Dikopanong tša ditšhaba-tšhaba tša Dihlatse tša Jehofa, babogedi gantši ba makatšwa ke go bona lerato, khutšo le botee gare ga mašaba a magolo a batho, ao a fenyago mapheko a botšhaba, a setšo le a polelo. (Ditiro 10:34, 35) Na o ka se dumele gore e le gore mmušo o kgone go kgoboketša gotee dihlopha tša merafo tše makgolo ka khutšo le kwano, o swanetše go ba le bokgoni e bile e be o tsepamego—le gona e be wa kgonthe?

Mmušo wa Modimo le Thuto

Mmušo o mongwe le o mongwe o na le ditekanyetšo tšeo baagi ba wona ba lebeletšwego gore ba di fihlelele, gomme yo mongwe le yo mongwe yo a nyakago go phela ka tlase ga mmušo woo o swanetše gore a fihlelele ditekanyetšo tšeo. Ka mo go swanago, Mmušo wa Modimo o na le ditekanyetšo tšeo ka moka bao ba tlago go swanelegela go ba balata ba wona ba swanetšego go di fihlelela. Lega go le bjalo, go dira gore batho ba bantši bao ba nago le ditlogo tše di fapanego kudu ba kgone go amogela ditekanyetšo tše di swanago le go phela ka go dumelelana le tšona e tloga e le mošomo o mogolo kudu. Ka gona, ye ke e nngwe ya dilo tšeo di neago bohlatse bja go ba ga kgonthe ga Mmušo wa Modimo—lenaneo la wona la thuto le le šomago ka katlego le leo le sa fihlelelego feela menagano le go e fetola eupša le kgomago le pelo ka tsela e swanago.

Pušo ya Mmušo e phetha bjang mošomo wo o thata? Ka mokgwa wa baapostola wa go dira boboledi “malapeng” gomme ba ruta Lentšu la Modimo go motho ka o tee ka o tee. (Ditiro 5:42; 20:20) Mohuta wo wa thuto ke o šomago gakaaka’ng? Jacques Johnson, e lego moruti wa Katholika, o ile a ngwala ka kuranteng ya Canada ya beke le beke mabapi le maiteko a gagwe a go leka go kgodiša mosadi yo mongwe gore a se ke a ithuta le Dihlatse tša Jehofa. O itše: “Ke be ke maketše kudu gomme ka lemoga gore ke be ke phuthela moya ka kobo. Ke ile ka thoma go lemoga  gore go theoša le dikgwedi tše sego kae basadi ba ba Dihlatse tša Jehofa ba ile ba aga ditswalano tšeo di nago le morero le mosadi yo yo mofsa yo a bego a palelwa ke go tšwa ka gae ka baka la bolwetši. Ba ile ba itswalanya le yena ka go mo thuša, ka go gwerana le yena le ka go aga ditlemo tše di nago le morero tša pelo. Go se go ye kae o ile a ba setho se mafolofolo sa bodumedi bja bona gomme go be go se na seo nka se dirago go thibela seo gore se se ke sa direga.” Go etša ge pelo ya motho yo yo e bego e le Mokatholika e ile ya tutuetšwa ke molaetša wa Beibele wo o bego o rutwa ke Dihlatse tša Jehofa le ke boitshwaro bja tšona bja Bokriste, dipelo tša ba dimilione lefaseng ka bophara di tutuetšwa ka tsela e bjalo.

Mohuta wo wa thuto—thuto ya Mmušo—o theilwe Beibeleng, gomme o theile mekgwa le ditekanyetšo tša wona boitshwarong. O ruta batho go ratana le go hlomphana go sa šetšwe setlogo sa bona. (Johane 13:34, 35) Le gona o thuša batho go arabela keletšong e rego: “Le se kê la ipapetša le ba mehla yeno; šatoxang ka xo mphsafala kxopolô, xore Le tlê Le hlaoloxanyê se e lexo thatô ya Modimo, e lexo se botse le se se kxahlišaxo, se e lexo sa botlalô.” (Ba-Roma 12:2) Ka go tlogela yeo e bego e le tsela ya bona ya bophelo gomme ka lethabo ba phela ka go dumelelana le melao le melao ya motheo ya pušo ya Mmušo, ba dimilione ba hweditše khutšo le lethabo gabjale gotee le tebelelo e kgahlišago ya bokamoso.—Ba-Kolose 3:9-11.

Thušo e kgolo ya go thuša go fihlelela botee bjo bja lefaseng ka bophara ke makasine wo wa Morokami. Ka mekgwa e rulagantšwego ya bofetoledi le didirišwa tša go gatiša maleme a mantši, dihlogo tše dikgolo tša Morokami di gatišwa sammaletee ka maleme a 135, gomme babadi ba wona ba ka godimo ga 95 lekgolong lefaseng ka bophara ba ka bala makasine wo ka leleme la bona ka nako e tee.

Mongwadi yo e lego mo-Mormon o ile a lokeletša masolo a boromiwa ao a atlegago ao e sego a kereke ya gagwe. O ile a lokeletša Morokami le Phafoga!, tšeo di gatišitšwego ke Dihlatse tša Jehofa e le tšona dimakasine tše kaone tša boebangedi gomme a re: “Ga go na yo le ka mohla a bego a ka bea Morokami goba Phafoga! molato wa go bjala dipelaelo—ka mo go fapanego, dimakasine tše di tšweletša maikwelo a go phakgama ao ke a hweditšego ka sewelo ka dikgatišong tša madumedi a mangwe. Morokami le Phafoga! ke tšeo di lapološago ka ditaba tša tšona tšeo di theilwego dilong tša therešo, tšeo di nyakišišitšwego gabotse le tšeo e lego tša bohlokwa lefaseng le la kgonthe.”

Go na le bohlatse bjo bontši bja gore Mmušo wa Modimo ke selo sa kgonthe e bile o šoma ka mo go feletšego. Dihlatse tša Jehofa ka lethabo le ka mafolofolo di boledišana le baagišani ba tšona ka “ditaba tše tše dibotse tša mmušo,” gomme di ba laletša gore e be balata ba wona. (Mateo 24:14, NW) Na tebelelo e bjalo ke e kgahlišago go wena? O ka thabela ditšhegofatšo tšeo di tlišwago ke go gwerana le bao ba rutwago ditekanyetšo tša Mmušo gomme ba leka go phela ka go dumelelana le tšona. Se sekaone le go feta ke gore o ka tla wa thabela tebelelo ya go phela tlase ga pušo ya Mmušo lefaseng le lefsa leo le holofeditšwego leo go lona “xo axilexo tokô.”—2 Petro 3:13.

[Mengwalo ya ka tlase]

[Caption on page 5]

Ka 1914 ditšhaba di ile tša tsena ntweng ya lefase

[Caption on page 6]

Modiro wa tlhakodišo wa boithapi ke bohlatse bja lerato la Bokriste leo le šomago

[Caption on page 7]

Dihlatse tša Jehofa lefaseng ka bophara di holwa ke lenaneo le le swanago la thuto