“Re tla Rata Gore, ‘Ee!’”

OFISI ya lekala ya Dihlatse tsa Jehofa kua Nigeria morago bjale e amogetše lengwalo leo karolo ya lona e rego:

“Morwa wa rena e lego Anderson, o hwile ge a e-na le nywaga e 14. Pele ga lehu la gagwe, o be a godiša dikgogo tše pedi. O be a nyaka go di rekiša e le gore ka morago a romele tšhelete ofising ya lekala e le moneelo wa modiro wa boboledi wa lefaseng ka bophara. Eupša o hwile pele di ka rekišwa.

“Rena bjalo ka batswadi ba gagwe, re ile ra godiša dikgogo le go di rekiša go ya ka kganyogo ya gagwe. Re romela tšhelete go lena e le moneelo wa Anderson. Ka baka la kholofetšo ya Jehofa, re kgodišegile gore kgaufsinyane—kgaufsinyane kudu—re tla bona Anderson gape. Re tla rata gore, ‘Ee!’ ge a botšiša ge e ba re ile ra phethagatša kganyogo ya pelo ya gagwe. Ka kgonthe, re lebeletše pele go tlo bona e sego Anderson feela eupša gape le ‘leru le lekaakao la dihlatse’ leo le tlago go tsošwa.”—Ba-Hebere 12:1; Johane 5:28, 29.

Bjalo ka ge go bontšhitšwe ka mo go kwagalago lengwalong le le lego ka mo godimo, go dumela tsogong ke kholofelo yeo e matlafatšago Bakriste ba therešo. A lethabo le le kaakang leo malapa a dimilione a tlago go ba le lona, ge go swana le ba lapa la gabo Anderson, ba amogela baratiwa ba bona bao ba lahlegilego ka baka la lenaba e lego lehu!—1 Ba-Korinthe 15:24-26.

Lentšu la Modimo le swere kholofelo ye e homotšago ya tsogo e le e nngwe ya dilo tše dintši tše dibotse kudu tšeo kgaufsinyana di tlago go direga lefaseng le lefsa la go loka ka tlase ga Mmušo wa Modimo. (2 Petro 3:13) Beibele ge e bolela ka seo Modimo a tlago go se direla batho ka nako yeo, e re: “Ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”—Kutollo 21:4.