Ba Hloilwe Ntle Le Lebaka

“Ba fo nthlôya.”—JOHANE 15:25.

1, 2. (a) Ke ka baka la’ng ba bangwe ba makala ge Bakriste ba bolelwa gampe, eupša ke ka baka la’ng dipolelo tše bjalo di sa swanela go re makatša? (b) Ke kgopolo efe ya lentšu “hloya” yeo re tlago go e ahla-ahla sehlogong se? (Bona mongwalo wa ka tlase.)

DIHLATSE TŠA JEHOFA di katanela go phela ka melao ya motheo yeo e hwetšwago ka Lentšung la Modimo. Ka baka leo, di tumile gabotse dinageng tše dintši. Lega go le bjalo, ka dinako tše dingwe di ile tša bolelwa gampe. Ka mohlala, mohlankedi wa mmušo motseng wa St. Petersburg, Russia, o ile a gopola gore: “Re ile ra botšwa ka Dihlatse tša Jehofa e le sehlotswana se itšego sa ka sephiring le seo se bolayago bana le go ipolaya.” Eupša ka morago ga go šoma le Dihlatse tša Jehofa modirong o lego mabapi le kopano ya ditšhaba-tšhaba, yena mohlankedi yoo o ile a bolela gore: “Gabjale ke bona batho ba tlwaelegilego, bao ba myemyelago . . . Ba na le khutšo e bile ba fodile, gomme ba ratana kudu.” O okeditše ka gore: “Ke tloga ke sa kwešiše lebaka leo ka lona batho ba bolelago maaka a bjalo ka bona.”—1 Petro 3:16.

² Bahlanka ba Modimo ga ba thabišwe ke ge ba bitšwa ka mo go fošagetšego gore ke badiradibe, lega go le bjalo ga ba makale ge batho ba bolela gampe ka bona. Jesu o ile a lemoša balatedi ba gagwe e sa le pele gore: “Xe lefase lè Le hlôya, Le tsebê xore le thomile xo hlôya Nna. . . . Ké xore xo phêthêxê Lentšu le le ngwadilwexo molaong wa bôná, la re: Ba fo nthlôya.” * (Johane 15:18-20, 25; Psalme 35:19; 69:4) Pejana o be a ile a botša barutiwa ba gagwe gore: “Xe Mong wa ngwakô bà mmiditše Beletsebulu, ba ngwakô wa xaxwe a ba ka se ba dire tše di fetišaxo tšeo?” (Mateo 10:25) Bakriste ba kwešiša gore go kgotlelela kgobošo e bjalo ke karolo ya “kota ya tlhokofatšo” yeo ba e amogetšego ge ba be ba fetoga balatedi ba Kriste.—Mateo 16:24, NW.

3. Ke go fihla bokgoleng bofe moo barapedi ba therešo ba ilego ba tlaišwa?

³ Go tlaišwa ga barapedi ba therešo go na le histori e telele, go balelwa morago kua go “Abele moloki.” (Mateo 23:34, 35) Ga go lekanyetšwe go ditiragalo tše sego kae tšeo di diragetšego gatee feela. Jesu o boletše gore balatedi ba gagwe e tla ba “ba ba hloilwexo ke bohle” ka baka la leina la gagwe. (Mateo 10:22, mongwalo o sekamego ke wa rena.) Go oketša moo, moapostola Paulo o ngwadile gore bahlanka ba Modimo ka moka—go akaretša yo mongwe le yo mongwe wa rena—ba swanetše go letela go tlaišwa. (2 Timotheo 3:12) Ke ka baka la’ng se se direga?

Mothopo wa Lehloyo Leo le sa Lokafatšwego

4. Beibele e utolla bjang mothopo wa lehloyo ka moka leo le sa lokafatšwego?

⁴ Lentšu la Modimo le utolla gore go tloga mathomong, go be go dutše go e-na le mohlohleletši yo a sa bonwego. Ela hloko polao e sehlogo ya monna wa pele wa tumelo e lego Abele. Beibele e bolela gore morwarragwe wa mmolai e lego Kaine, ‘o tswetšwe ke e mobe,’ e lego Sathane Diabolo. (1 Johane 3:12) Kaine o ile a bontšha boemo bja kgopolo bja Sathane, gomme Diabolo o ile a mo diriša go phethagatša maano a gagwe a mabe. Le gona Beibele e hlabiša seetša ka tema e kgathwago ke Sathane ditlhaselong tše šoro go Jobo le Jesu Kriste. (Jobo 1:12; 2:6, 7; Johane 8:37, 44; 13:27) Puku ya Kutollo ga e tlogele pelaelo mabapi le mothopo wa tlaišo ya balatedi ba Jesu ge e re: “Diabolo ó tlo lahlêla ba bangwê ba lena kxolexong xore Le lekwê.” (Kutollo 2:10, mongwalo o sekamego ke wa rena.) Ee, Sathane  ke mothopo wa lehloyo ka moka leo le sa lokafatšwego malebana le batho ba Modimo.

5. Ke ka baka la’ng Sathane a hloile barapedi ba therešo?

⁵ Ke ka baka la’ng Sathane a hloile barapedi ba therešo? Leanong leo le bontšhago tekanyo ya go itšeela ga gagwe godimo kudu, Sathane o ile a lwa le “Kxoši Ra-mabaka-a-neng-le-neng,” e lego Jehofa Modimo. (1 Timotheo 1:17; 3:6) O phegelela go bolela gore Modimo o na le melao e thata ka mo go sa swanelago bogošing bja gagwe go dibopiwa tša gagwe le gore ga go na yo a hlankelago Jehofa ka maikemišetšo a mabotse, gore batho ba dira bjalo feela ka mabaka a boithati. Sathane o bolela gore ge e ba a ka dumelelwa go leka batho, a ka dira gore yo mongwe le yo mongwe wa bona a tlogele go hlankela Modimo. (Genesi 3:1-6; Jobo 1:6-12; 2:1-7) Ka go thomeletša Jehofa ka gore ke mogateledi, moaketši le yo a paletšwego, Sathane o nyaka go ipea go ba mmuši wa legohle. Ka baka leo, bogale bja gagwe malebana le bahlanka ba Modimo bo tutuetšwa ke kganyogo ya gagwe ya go nyaka go rapelwa.—Mateo 4:8, 9.

6. (a) Re akaretšwa bjang go kgang ya bogoši bja Jehofa re le motho ka noši? (b) Go kwešiša kgang ye go re thuša bjang go kgomarela potego ya rena? (Bona lepokisi leo le lego go letlakala 16.)

⁶ Na o bona kamoo kgang ye e kgomago bophelo bja gago ka gona? Bjalo ka mohlanka wa Jehofa, ka ntle le pelaelo o hweditše gore gaešita le ge go dira thato ya Modimo go nyaka boiteko bjo bo tseneletšego, mehola ya go dira bjalo ke e phagamego kudu. Lega go le bjalo, go thwe’ng ge e ba maemo a bophelo bja gago a dirile gore go be thata, gaešita le go kwešwa bohloko ke gore o tšwele pele o dumelelana le melao le melao ya motheo ya Jehofa? Le gona go thwe’ng ge e ba go bonagala o sa holege? Na o tla phetha ka gore e tloga e se ga mohola go tšwela pele o hlankela Jehofa? Goba na lerato la go rata Jehofa le go tšeela godimo dika tša gagwe tše di kgahlišago go tla go tutueletša go tšwela pele o sepela ka ditsela tša gagwe ka moka? (Doiteronomio 10:12, 13) Ka go dumelela Sathane gore a re tlišetše mathata a itšego, Jehofa o neile yo mongwe le yo mongwe wa rena sebaka sa go nea karabo ya gagwe ka noši tlhohlong ya Sathane.—Diema 27:11.

‘Ge Batho ba le Goboša’

7. Ke leano lefe le lengwe leo Diabolo a le dirišago bakeng sa go leka go re aroša go Jehofa?

⁷ Gabjale anke re hlahlobišišeng e nngwe ya ditiro tša boradia tšeo Sathane a di dirišago maitekong a go hlatsela lehlakore la gagwe la kgang ye—go diriša ga gagwe kgobošo ya maaka. Jesu o ile a bitša Sathane gore ke “rra-xo-moaketši.” (Johane 8:44) Leina Diabolo leo le nago le tlhaloso, le le bolelago gore “Mothomeletši,” le hlaola motho yoo e le mothomeletši yo mogolo wa Modimo, wa lentšu la gagwe leo le holago le wa leina la gagwe le le kgethwa. Diabolo o diriša dipolelo tše di sa kgahlišego, ditatofatšo tša maaka le maaka a matala bakeng sa go hlohla bogoši bja Jehofa, gomme o diriša wona maano a a swanago bakeng sa go senya leina la bahlanka ba Modimo ba botegago ka go se kwanantšhe. Ka go goboša Dihlatse tše, a ka dira gore teko e šoro e be e thata kudu gore di e kgotlelele.

8. Ke bjang Sathane a ilego a goboša Jobo, gomme ka mafelelo afe?

⁸ Nagana ka seo se ilego sa wela Jobo, yoo leina la gagwe le bolelago gore “Mohlaselwa wa Bonaba.” Go tlaleletša tabeng ya go bakela go lahlegelwa ga Jobo ke mokgwa wa go iphediša, bana ba gagwe le boemo bja gagwe bjo bobotse bja tša maphelo, Sathane o ile a dira gore Jobo a bonagale e le modira-dibe yoo a bego a otlwa ke Modimo.  Le ge a be a hlomphega kudu, Jobo o ile a nyatšega, gaešita le go nyatšwa ke ba leloko la gabo le bagwera ba paala. (Jobo 19:13-19; 29:1, 2, 7-11) Go oketša moo, ka go diriša bahomotši ba maaka, Sathane o ile a nyaka go ‘robaganya Jobo ka dipolelo,’ sa pele ba bolela ka boradia gore o swanetše go ba a dirile sebe se segolo gomme ba mo ahlola ka go lebanya bjalo ka mofoši. (Jobo 4:6-9; 19:2; 22:5-10) Seo e swanetše go ba e bile se se nolago moko gakaakang go Jobo!

9. Ke bjang Jesu a ilego a dirwa gore a bonagale e le sesenyi?

⁹ Ka ge e le mothekgi yo mogolo wa bogoši bja Jehofa, Morwa wa Modimo o ile a ba mohlaselwa yo mogolo wa bonaba bja Sathane. Ge Jesu a be a e-tla lefaseng, Sathane o be a nyaka go mo dira gore a bonagale a šilafetše moyeng, go etša ge a dirile ka Jobo, a dire gore Jesu a bonagale e le modira-dibe. (Jesaya 53:2-4; Johane 9:24) Batho ba ile ba mmitša setagwa le sejato gomme ba bolela gore o ‘be a e-na le moya o mobe.’ (Mateo 11:18, 19; Johane 7:20; 8:48; 10:20) O ile a latofatšwa ka mo go fošagetšego ka kgobošo. (Mateo 9:2, 3; 26:63-66; Johane 10:33-36) Se se ile sa gateletša Jesu ka gobane o be a tseba gore se be se tliša kgobogo e sa swanelago go Tatagwe. (Luka 22:41-44) Mafelelong, Jesu o ile a kokotelwa bjalo ka sesenyi seo se rogakilwego. (Mateo 27:38-44) Ka go kgomarela potego e phethagetšego, Jesu o ile a kgotlelela kudu “xe ba-dira-dibe ba mo xanetša.”—Ba-Hebere 12:2, 3.

10. Ke bjang mehleng yeno mašaledi a batlotšwa e bilego bahlaselwa ba Sathane?

¹⁰ Mehleng yeno, mašaledi a balatedi ba Kriste bao ba tloditšwego le wona ka mo go swanago e bile bahlaselwa ba bonaba bja Diabolo. Sathane o hlaloswa e le “mmexi wa bana ba bô [Kriste] e a bexo a ba bexa pele xa Modimo mosexare le bošexo.” (Kutollo 12:9, 10) Go tloga nakong ya ge a be a rakwa legodimong gomme a lahlelwa tikologong ya lefaseng, Sathane o matlafaditše maiteko a gagwe a go bonagatša bana babo Kriste e le balahlwa bao ba lešago dihlong. (1 Ba-Korinthe 4:13) Dinageng tše dingwe, ba ile ba bitšwa ka boradia gore ke sehlotswana se kotsi sa bahlanogi, go etša ge Bakriste ba lekgolong la pele la nywaga ba be ba bitšwa bjalo. (Ditiro 24:5, 14; 28:22) Bjalo ka ge go bontšhitšwe mathomong, ba ile ba senywa leina ka phatlalatšo ya maaka. Lega go le bjalo, e “le ba xo rêtwa le ba xo xobošwa, ba xo tumišwa le ba xo sêbya,” bana babo Kriste ba tloditšwego, ba thekgwa ke bagwera ba bona ba “dinku tše dingwê,” ka boikokobetšo ba ile ba katanela go ‘kgomarela melao ya Modimo le go nea bohlatse ka Jesu.’—2 Ba-Korinthe 6:8; Johane 10:16; Kutollo 12:17.

11, 12. (a) Ke’ng seo e ka bago sebaki sa e nngwe ya kgobogo yeo Bakriste ba lebeletšanago le yona? (b) Ke ka ditsela dife Mokriste a ka tlaišegago ka go hloka toka ka baka la tumelo ya gagwe?

¹¹ Ke therešo gore ga se kgobošo ka moka yeo bahlanka ba Modimo e le motho ka o tee ka o tee ba lebeletšanago le yona e lego bakeng sa ‘go tlaišetšwa toko.’ (Mateo 5:10) Mathata a mangwe e ka ba ditla-morago tša mafokodi a rena ka noši. Ga go na lebaka le le kgethegilego la gore ge ‘re sentše gomme re otlwa, re kgotlelele.’ Lega go le bjalo, ge Mokriste ‘ka baka la ge a itsebela Modimo, a rwešwa mahloko gomme a hlakišwa a se na molato, ke selo se se amogelegago’ mahlong a Jehofa. (1 Petro 2:19, 20) Se se ka direga ka tlase ga maemo afe?

¹² Ba bangwe ba ile ba swarwa ka tsela e šoro ka baka la ge ba ile ba gana go tšea karolo go metlwae yeo e sego ya mangwalo ya dipoloko. (Doiteronomio 14:1) Bafsa ba Dihlatse e bile bahlaselwa ba go bitšwa ka maina a go nyatšiša ka baka la go kgomarela ditekanyetšo tša Jehofa tša boitshwaro. (1 Petro 4:4) Batswadi ba bangwe ba Bakriste ba ile ba latofatšwa ka mo go fošagetšego gore “ga ba šetše” goba “ke ba bašoro” ka baka la ge ba ile ba nyakela bana ba bona kalafo yeo e sa dirišego madi. (Ditiro 15:29) Bakriste ba lahlilwe ke ba leloko le ke baagišani feela ka baka la go ba bahlanka ba Jehofa. (Mateo 10:34-37) Batho ba bjalo ka moka ba latela mohlala o beilwego ke baporofeta le ke Jesu ka boyena ka go tlaišega ka go hloka toka.—Mateo 5:11, 12; Jakobo 5:10; 1 Petro 2:21.

Go Kgotlelela ka Tlase ga Kgobošo

13. Ke’ng seo se ka re thušago go kgomarela teka-tekano ya rena ya moya ge re lebeletšane le kgobošo e kgolo?

¹³ Ge re gobošwa o šoro ka baka la tumelo ya rena, re ka nolega moko, bjalo ka ge go bile bjalo  ka moporofeta Jeremia, gomme ra ikwa gore re ka se kgone go tšwela pele re hlankela Modimo. (Jeremia 20:7-9) Ke’ng seo se ka re thušago go kgomarela teka-tekano ya rena ya moya? Leka go lebelela taba go ya ka pono ya Jehofa. O lebelela bao ba dulago ba botega ka go se kwanantšhe ka tlase ga teko e le bafenyi, e sego bahlaselwa. (Ba-Roma 8:37) Leka go bona ka kgopolong ya gago bao ba ilego ba kgomarela bogoši bja Jehofa go sa šetšwe go nyatšwa ka moka moo Diabolo a bego a ka go tliša go bona—banna le basadi ba bjalo ka Abele, Jobo, Maria mmago Jesu le ba bangwe bao ba botegago ba bogologolo, gotee le bahlanka-gotee le rena ba mehleng yeno. (Ba-Hebere 11:35-37; 12:1) Naganišiša ka tsela ya bona ya potego. Leru leo le legolo la babotegi le re laletša go ba tlatša phenyong yeo e boloketšwego bao ba fenyago lefase ka tumelo ya bona.—1 Johane 5:4.

14. Thapelo e tšwago pelong e ka re matlafatša bjang gore re dule re botega?

¹⁴ Ge e ba ‘dipelaelo ka gare ga rena e e ba tše dintši,’ re ka retologela go Jehofa ka thapelo e tšwago pelong, gomme o tla re homotša le go re matlafatša. (Psalme 50:15; 94:19) O tla re nea bohlale bjo re bo nyakago bakeng sa go lebeletšana ka katlego le teko le go re thuša go lebiša tlhokomelo go kgang e kgolo, bogoši bja Jehofa, yeo e lego sebaki sa lehloyo leo le sa lokafatšwego leo le tlišwago malebana le bahlanka ba gagwe. (Jakobo 1:5) Le gona Jehofa a ka re nea “khutšô ya Modimo, ye e fetaxo thlaoloxanyô yohle.” (Ba-Filipi 4:6, 7) Khutšo ye yeo e newago ke Modimo e dira gore re kgone go dula re fodile le go ema ka go tia ge re lebeletšane le kgateletšo e šoro, re sa ineele pelaelong goba poifong. Ka moya wa gagwe, Jehofa a ka re matlafatša selong le ge e le sefe seo a dumelelago gore se re wele.—1 Ba-Korinthe 10:13.

15. Ke’ng seo se ka re thušago go phema go galefa ge re tlaišega?

¹⁵ Ke’ng seo se ka re thušago gore re se ke ra galefela bao ba re hloilego ntle le lebaka? Gopola gore manaba a rena a magolo ke Sathane le batemona. (Ba-Efeso 6:12) Le ge batho ba bangwe ba re tlaiša ka go tseba le ka boomo, ba bantši ba bao ba ganetšago batho ba Modimo ba dira bjalo ka baka la go se šetše goba ka go hlalefetšwa ke ba bangwe. (Daniele 6:4-16; 1 Timotheo 1:12, 13) Jehofa o kganyoga gore “batho bohle” ba be le sebaka sa gore “ba phološwê ba fihlêlê tsebô ya therešô.” (1 Timotheo 2:4) Ka kgonthe, ba bangwe bao e bego e le batlaiši ba rena gabjale ke bana babo rena ba Bakriste ka baka la ge ba ile ba bona boitshwaro bja rena bjo bo sa solegego. (1 Petro 2:12) Go oketša moo, re ka hwetša thuto go tšwa mohlaleng wa morwa wa Jakobo e lego Josefa. Gaešita le ge Josefa a ile a tlaišega kudu ka baka la bana babo ka motswadi o tee, ga se a ka a boloka maikwelo a go ba hloya. Ka baka la’ng? Ka gobane o ile a kwešiša gore Jehofa o be a akaretšwa tabeng ye, a fetoša ditiragalo e le gore a phethagatše morero wa Gagwe. (Genesi 45:4-8) Ka mo go swanago Jehofa a ka dira gore go tlaišega ka go hloka toka le ge e le gofe moo re ka lebeletšanago le gona e be bakeng sa go tumiša leina la gagwe.—1 Petro 4:16.

16, 17. Ke ka baka la’ng re sa swanela go tshwenyega ka mo go sa swanelago ka maiteko a baganetši a go šitiša modiro wa boboledi?

¹⁶ Ga se ra swanela go tshwenyega ka mo go sa swanelago ge e ba baganetši ba bonagala ba atlega ka lebakanyana go šitišeng tšwelopele ya ditaba tše dibotse. Gabjale Jehofa o šišinya ditšhaba ka bohlatse bjo bo newago lefaseng ka bophara, gomme go tšwa matsaka goba dilo tšeo di kganyogegago. (Hagai 2:7) Kriste Jesu, e lego Modiši yo Botse o itše: “Dinku tša-ka di kwa lentšu la-ka. Xomme Nna ke a di tseba ’me tšôna di a ntatêla. Ké Nna ke di neaxo bophelô byo bo sa felexo. . . . Xa xo e a kaxo di utla ’atleng tša-ka.” (Johane 10:27-29, mongwalo o sekamego ke wa rena.) Barongwa ba bakgethwa le bona ba tšea karolo punong e kgolo ya moya. (Mateo 13:39, 41; Kutollo 14:6, 7) Ka go rialo, ga go na selo seo baganetši  ba se bolelago goba ba se dirago seo se ka šitišago morero wa Modimo.—Jesaya 54:17; Ditiro 5:38, 39.

¹⁷ Gantši maiteko a baganetši a na le ditla-morago tše fapanego le tšeo ba di letetšego. Setšhabeng se sengwe sa Afrika, maaka a mantši a mašoro a be a dutše a phatlalatšwa mabapi le Dihlatse tša Jehofa, go akaretša gore e be e le barapedi ba Diabolo. Ka baka la se, nakong le ge e le efe ge Dihlatse di mo etela, Grace o be a tšhabela ka morago ga ntlo a ikuta go fihlela ge di sepetše. Ka letšatši le lengwe moruti wa kereke ya gagwe o ile a ba bontšha e nngwe ya dikgatišo tša rena gomme a botša bohle bao ba bego ba le gona gore ba se ke ba e bala ka gobane e tla ba dira gore ba tlogele tumelo ya bona. Se se ile sa dira gore Grace a nyake go tseba. Nakong e latelago ge Dihlatse di mo etela, go e na le go ikuta o ile a boledišana le tšona gomme a ikhweletša kopi ya gagwe ka noši ya kgatišo yeo. Go ile gwa thongwa thuto ya Beibele, gomme o ile a kolobetšwa ka 1996. Gabjale Grace o diriša nako ya gagwe bakeng sa go tsoma ba bangwe bao ba ka bago ba neilwe tsebišo e fošagetšego mabapi le Dihlatse tša Jehofa.

Matlafatša Tumelo ya Gago Gona Bjale

18. Ke ka baka la’ng go nyakega gore re matlafatše tumelo ya rena pele diteko tše šoro di tšwelela, gomme ke bjang re ka dirago se?

¹⁸ Ka ge Sathane a ka re hlasela ka lehloyo leo le sa lokafatšwego ka nako le ge e le efe, ke gabohlokwa gore re matlafatše tumelo ya rena gona bjale. Re ka dira bjang se? Pego e tšwago nageng yeo go yona batho ba Jehofa ba bego ba dutše ba tlaišwa e bontšhitše gore: “Selo setee seo se bilego molaleng kudu e bile gore: Bao ba nago le mekgwa e mebotse ya moya le tebogo e tseneletšego ya therešo ya Beibele ga ba na bothata bja go ema ba tiile ge diteko di tšwelela. Eupša bao ka ‘lebaka la xôna’ ba fošago diboka, ba sa bego gona ka mehla tirelong ya tšhemo gomme ba kwanantšha ditabeng tše nyenyane gantši ba a wa ge ba le ka  tlase ga teko e ‘šoro.’” (2 Timotheo 4:2) Ge e ba o bona moo o swanetšego go dira kaonefatšo, dira boiteko bja go dira bjalo ka ntle le go dika-dika.—Psalme 119:60.

19. Ke’ng seo se phethagatšwago ke potego ya bahlanka ba Modimo ge ba lebeletšane le lehloyo leo le sa lokafatšwego?

¹⁹ Potego ya barapedi ba therešo ka tlase ga tlaišo ya lehloyo la Sathane ke bohlatse bjo bo phelago bja go swanela, go swanelega le go loka ga bogoši bja Jehofa. Potego ya bona e thabiša pelo ya Modimo. Gaešita le ge batho ba ka ba goboša, yoo seriti sa gagwe se phagametšego lefase le legodimo ‘ga a lewe ke dihlong tša go bitšwa Modimo wa bona.’ Ka kgonthe, go ka bolelwa ka mo go nepagetšego mabapi le bohle bao ba botegago ka go se kwanantšhe gore: “Bao lefase leno le sa kaxo la swanêlwa ke batho ba ba byalo.”—Ba-Hebere 11:16, 38.

[Mengwalo ya ka tlase]

[Dipotšišo tša Thuto]

[Lepokisi/Seswantšho go letlakala 16]

Ba Ile ba Kwešiša Kgang ya Kgonthe

Yo mongwe wa Dihlatse tša Jehofa kua Ukraine, moo modiro wa go bolela ka Mmušo o bego o thibetšwe ka nywaga ya ka godimo ga e 50 o itše: “Boemo bjoo Dihlatse tša Jehofa di ilego tša ikhwetša di le go bjona ga se bja swanela go lekanywa feela ka tsela yeo batho ba bangwe ba re swarago ka yona. . . . Bontši bja bahlankedi ba be ba fo dira mošomo wa bona. Ge mmušo o be o fetoga, balaodi ba ile ba fetoša bao ba ba botago, eupša ga se ra ka ra fetoga. Re ile ra lemoga gore mothopo wa kgonthe wa mathata a rena o utollotšwe ka Beibeleng.

“Ga se ra ka ra itebelela re le feela bahlaselwa bao ba se nago molato ba banna bao ba gatelelago. Seo se re thušitšego go kgotlelela e be e le kwešišo e kwagalago gabotse ya kgang yeo e rotošitšwego kua tšhemong ya Edene—kgang ya tshwanelo ya Modimo ya go buša. . . . Re ile ra emela ka go tia kgang yeo e sa tswalanego feela le dikgahlego tša motho ka noši tša batho eupša gape e tswalanago le dikgahlego tša Mmuši wa legohle. Re bile le kwešišo e phagamego kudu ka dikgang tša kgonthe tšeo di akaretšwago. Se se ile sa dira gore re be matla gomme sa dira gore re kgone go dula re botega gaešita le ka tlase ga maemo a šoro kudu.”

Na o ka Hlalosa?

• Ke ka baka la’ng barapedi ba therešo ba hloilwe ka mo go sa lokafatšwego?

• Sathane o ile a diriša kgobošo bjang bakeng sa go leka go roba potego ya Jobo le ya Jesu?

• Jehofa o re matlafatša bjang gore re dule re tiile ge re lebeletšane le lehloyo la Sathane?

[Caption on page 13]

Ke mang yo a bakilego kgobošo yeo Jesu a ilego a lebeletšana le yona?

[Caption on page 15]

Jobo, Maria le bahlanka ba Modimo ba mehleng yeno ba bjalo ka Stanley Jones ba ile ba thekga bogoši bja Jehofa

[Caption on page 16]

Victor Popovych, o ile a golegwa ka 1970