Go Hwetša Keletšo e Holago Kudu

BOPHELO bjo bo atlegago bo tloga bo ratega. Keletšo e botse le tshekamelo ya go nyaka go gata mogato ka go dumelelana le yona ke dilo tša bohlokwa bakeng sa go fihlelela bophelo bjo bo bjalo lefaseng le leo le raraganego. Lega go le bjalo, ga se ka dinako tšohle batho ba bego ba ikemišeditše go ela hloko keletšo e holago. Ba bantši ba boletše gore motho o swanetše go phela bophelo bja gagwe ka tsela yeo a e ratago. Ge e le gabotse, pego ya Beibele e bontšha gore Sathane, e lego lenaba la mathomo la pušo ya Modimo, o ile a holofetša batho ba pele boipušo. Genesi 3:5 e bega seo a se boditšego Efa ge a re: “Xe e le Modimo, yêna ó tseba xore mohla Lè se jaxo [sehlare sa go tseba botse le bobe] mahlô a lena a tlo buduloxa la ba byalo ka Modimo, la tseba botse le bobe.”

Na Adama le Efa ka morago ba ile ba kgona go phela ka katlego, ka ntle le ditla-morago tše šoro, ba hlahlwa feela ke dikgopolo tša bona ka noši? Le gatee. Kapejana ba ile ba nyamišwa ke ditla-morago tša go nagana gore ba tseba botse le bobe. Ka mo go swanetšego ba ile ba se sa amogelwa ke Modimo gomme ba thoma bophelo bjo bothata bja go se phethagale, bjoo bo feleletšago ka lehu. (Genesi 3:16-19, 23) Lehu le re kgoma ka moka. Beibele e re: “Byalo ka xe sebe sè tsene lefaseng ka motho o tee [Adama], ’me lehu la tsêna ka sebe, lehu le aparetše batho bohle ka xe ba dirile dibe bohle.”—Ba-Roma 5:12.

Gaešita le ge go e-na le ditla-morago tše šoro tšeo di bakilwego ke phetho ya Adama le Efa, ba bantši ba sa dutše ba sa kgonthišege ka bohlale bja go diriša keletšo e tšwago go Mmopi wa batho. Lega go le bjalo, Beibele e bolela gore e ‘buduletšwe ke Modimo, le gona e a hola,’ e bile e ka re thuša ‘go ba ba bolo ka mo go feletšego gomme ra kgonišwa go dira mediro e botse ka moka.’ (2 Timotheo 3:16, 17) Ka kgonthe re tla ba ba thabilego kudu ge e ba re latela keletšo yeo e lego ka Beibeleng. Bophelo bja lapa ke karolo e kgolo yeo keletšo ye e šomago gona.

Go Botega Lenyalong

Go ya ka Beibele, Modimo o be a rerile gore lenyalo e be tlemo ya sa ruri. (Genesi 2:22-24; Mateo 19:6) Go oketša moo, Mangwalo a bolela  gore “maláô a a se bê le dithšila,” e lego seo se bolelago gore tlemo ye ga se ya swanelwa go šilafatšwa ka dikopano tša botona le botshadi tša ka ntle ga lenyalo. (Ba-Hebere 13:4) Lega go le bjalo, o swanetše go ba o tseba gore manyalo a mantši lehono ga a fihlelele tekanyetšo ye. Batho ba bangwe ba na le mokgwa wa go bapala ka lerato mošomong le batho bao e sego balekane ba bona. Ba bangwe ba botša ba lapa la bona maaka e le gore ba fetše nako le motho yo mongwe yo ba ratanago le yena yo e sego molekane wa bona. Ba bangwe ba bile ba tlogela balekane ba bona gore ba yo dula le batho ba banyenyane ge ba bapetšwa le balekane ba bona, ba bolela gore ka tsela ye ba ikwa e le ba bafsa e bile ba thabile, go etša ge go diregile bjalo tabeng ya Verónica, yeo e hlalositšwego sehlogong se se fetilego.

Lega go le bjalo, go rata go ithabiša go sa šetšwe mafelelo go ka se tšweletše lethabo la sa ruri. Ronald a ka hlatsela seo. A kgodišegile gore o tla kaonefatša bophelo bja gagwe, o ile a lahla mosadi wa gagwe e le gore a yo ba le lapa le lefsa le mosadi yo a bego a ratana le yena ka sephiring ka nywaga e tshela e bile a šetše a e-na le bana ba babedi le yena. Lega go le bjalo, nako e itšego ka morago ga ge a fedišitše lenyalo la gagwe, moratiwa wa gagwe o ile a mo tlogela! Mafelelong Ronald o ile a yo dula le batswadi ba gagwe. O hlalosa boemo bja gagwe e le “bjo bo lešago dihlong.” Woo ke mohlala o tee feela. Mokgwa o bjalo wo o tutuetšwago ke dikganyogo tša boithati o bakile lephoto leo le sa kago la ba gona pele la ditlhalo le go thubega ga malapa, moo go feleletšago ka go tlaišega ga batho ba bantši kudu—batho ba bagolo le bana ka mo go swanago.

Ka lehlakoreng le lengwe, go ela hloko keletšo ya Beibele go feleletša ka lethabo la kgonthe. Go bile bjalo ka Roberto, yo a bolelago gore: “Ke leboga keletšo ya Beibele, ka ge ke sa ka ka swanelwa ke go lahlegelwa ke mosadi wa-ka. Ga re fihlelele lethabo la kgonthe ka go ineela tekong le motho yo mongwe yo e sego molekane wa rena, gaešita le ge motho yo bjalo a ka bonagala e le yo a bogegago. Thuto ya Beibele e nthušitše go lebelela molekane wa-ka e le yo bohlokwa, yo a bego a nthekga ka nywaga e mentši kudu.” Keletšo ya Beibele e rego, “o se hlalê mosadi e O mo tšerexo Lè sa le bafsa” e ile ya kgatha tema ya bohlokwa bophelong bja Roberto. (Maleaki 2:15) Ke maemong afe a mangwe ao go wona re ka holwago ke keletšo ya Modimo?

Go Godiša Bana ba Rena

Nywaga-someng e fetilego go ile gwa tuma kgopolo ye ya gore ge batswadi ba godiša bana ga se ba swanela go bea mellwane e mentši. Go ile gwa bonagala e le mo go leka-lekanego go dumelela bana gore ba itirele diphetho tša bona ka noši mabapi le kamoo ba swanetšego go nagana le go itshwara ka gona. Morero e be e le go phema go thibela kgolo ya bona. Gare ga dilo tše dingwe, mafelong a mangwe go ile gwa thongwa  gaešita le ditshepedišo tša thuto tšeo di sa rulaganywago tšeo go tšona barutwana ba kgonago go ikgethela ge e ba ba nyaka go ya diklaseng goba ba sa nyake le moo ba ka kgonago go ikgethela gore ba nyaka go amogela tekanyo e kaakang ya boithabišo goba ya thuto. Molao wa sekolo se sengwe wa mohuta wo e be e le “go dumelela bana gore ba bontšhe maikwelo a bona a feletšego ka ntle le gore ba ntšhwe diphošo le gore batho ba bagolo ba tsene ditaba gare.” Lehono, baeletši ba bangwe ba boitshwaro bja batho ba sa dutše ba sa dumelelane le mehola ya go diriša mehuta e itšego ya tayo, gaešita le maemong ao batswadi ba bonago go nyakega gore ba nee tayo e lerato.

Mafelelo e bile afe? Go na le batho ba bantši bao ba dumelago gore mekgwa ya go tlogelela dilo ya go godiša bana e nea bana tokologo e feteletšego. Ba nagana gore se se feleleditše ka go oketšega mo gogolo ga bosenyi le go dirišwa ga dihlare-tagi. Nyakišišo ya kua United States e utolotše gore ba nyakilego go ba ba 70 lekgolong ba bao ba arabetšego nyakišišong ba nagana gore bana le bafsa ga ba hwetše tlhahlo ya batswadi e lekanego ka mo go nyakegago. Ge ba leka go hlalosa go thuntšhanwa ga sekolong le bosenyi bjo bongwe bjo šoro bjo bo dirwago ke bafsa bao ba lego mahlalagading, ba bantši ba latofatša “taolo ya batswadi ya go tlogelela dilo.” Gaešita le ge mafelelo e se a setlago pelo kudu, batswadi le bana ba lebeletšana le ditla-morago tše bohloko tša go godišwa ga bana ka tsela e fošagetšego.

Beibele e re’ng tabeng ye? Keletšo ya Mangwalo ke gore taolo ya batswadi e swanetšwe go dirišwa ka lerato e bile e be e tiilego. Beibele e re: “Bošilo xe bo xwêrana le pelo ya mošemanyana, bo rakwa ke kxati ya thsôlô.” (Diema 22:15) Ke therešo gore tayo ka moka ya batswadi e swanetše go ba yeo e swanelago maemo. Bonolo, boitshwaro le go naganela di swanetše go laola tayo le ge e le efe yeo e newago. Ge e newa ka tsela ye e ba seka sa lerato. Go dirišwa ga bolaodi bja batswadi ka tsela e lerato, e sego e šoro kudu, go nea kgonagalo e kgolo ya katlego.

Go na le mafelelo a mabotse a bonagalago ao a ka tlišwago ke go diriša keletšo ye. Arturo, e lego monna wa kua Mexico yo a nago le nywaga e 30 yo a sa tšwago go nyala, o re: “Tate o ile a botša nna le bana bešo ka mo go kwagalago gore yena le mma ba be ba e-na le matla a bolaodi ka lapeng. Ga se ba ka ba dika-dika go re laya. Lega go le bjalo, ka dinako tšohle ba be ba e-na le nako ya go boledišana le rena. Gabjale ke le motho yo mogolo, ke tšeela godimo bophelo bjo bo tsepamego bjo ke bo thabelago, gomme ke tseba gore karolo e kgolo ya bjona ke mafelelo a tlhahlo e botse yeo ke e neilwego.”

 Go Diriša ka Bohlale Keletšo e Holago Kudu

Lentšu la Modimo, Beibele, le na le keletšo e holago kudu yeo batho ba ka e hwetšago. Tlhahlo ya yona ga se ya lekanyetšwa feela thulaganyong ya lapa. E thuša go re hlama ka ditsela tše dintši ka gobane e re ruta kamoo re ka gatago mogato ka gona lefaseng le leo go lona ba bantši ba sa ikemišetšago go amogela gore Mothopo o phagamego wa bohlale o swanetše go laola maphelo a bona e le gore ba holege.

A diriša mopsalme Dafida, Jehofa Modimo e lego Mmopi wa batho, o neile kgonthišetšo ye e rego: “Ke tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.” (Psalme 32:8) Na o ka akanya seo se bolelwago ke go hlokomelwa ke Mmopi e le gore a re šireletše dikotsing? Lega go le bjalo, potšišo e lebišitšwego go yo mongwe le yo mongwe wa rena ke ye: ‘Na ke tla amogela ka boikokobetšo tlhahlo ya Jehofa e šireletšago?’ Lentšu la gagwe le re botša ka lerato gore: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.”—Diema 3:5, 6.

Go tseba Jehofa go nyaka maiteko le boineelo, lega go le bjalo batho ba ka fihlelela seo ka go ithuta Beibele. Tsela ya bophelo yeo a re kgothaletšago yona e “na le kholofedišô ya bophelô byono le ya byo bo tl’o xo tla.” E tloga e le tsela e holago kudu ge re naganišiša ka mehola yeo e e neago.—1 Timotheo 4:8; 6:6.

Ge e ba o kgahlwa ke temogo yeo Beibele e e neago gotee le ditšhegofatšo tšeo di tlišwago ke go phela ka go dumelelana le yona, dira gore go bala le go naganišiša ka Lentšu la Modimo e be dilo tšeo di tlago pele bophelong bja gago. Go dira bjalo go tla go thuša go lebeletšana ka katlego le ditlhohlo tša mehleng yeno le selo le ge e le sefe seo se letšego ka pele. Go oketša moo, o tla hwetša kholofelo ya go phela lefaseng le lefsa la Modimo, moo bohle ba tlago go rutwa ke Jehofa le moo khutšo ya bona e tlago go ata gona.—Jesaya 54:13.

[Caption on page 5]

Keletšo ya Beibele e ka matlafatša tlemo ya lenyalo

[Caption on page 6]

Keletšo ya Beibele ke motheo wa tlhahlo e lokilego, lega go le bjalo e dumelela motho gore a ithabiše

[Caption on page 7]

Bao ba dirišago keletšo ya Beibele ba ka thabela bophelo bjo bo leka-lekanego