Jehofa, ‘Sebo Sa Rena Dinakong Tša Tlalelo’
Jehofa, ‘Sebo Sa Rena Dinakong Tša Tlalelo’
“Thlakodišô ya baloki e tšwa xo Morêna, Yêna sebô sa bôná mohla wa tlalêlô.”—PSALME 37:39.
1, 2. (a) Jesu o ile a rapelela’ng bakeng sa barutiwa ba gagwe? (b) Thato ya Modimo ke efe mabapi le batho ba gagwe?
JEHOFA ke yo matla ohle. O na le matla a go šireletša barapedi ba gagwe bao ba botegago ka tsela le ge e le efe yeo a nyakago. A ka ba a tloša batho ba gagwe ka nama mo lefaseng gomme a ba bea tikologong yeo e bolokegilego le e nago le khutšo. Lega go le bjalo, Jesu o ile a rapela Tatagwe wa legodimong mabapi le barutiwa ba gagwe gore: “Xa ke kxopele xore O ba tlošê lefaseng; ke ba kxopêlêla xo phêmêlwa [go yo mobe, NW].”—Johane 17:15.
2 Jehofa o kgethile gore a se ke a re tloša “lefaseng.” Go e na le moo, thato ya gagwe ke gore re phele gare ga batho ba lefase le e le gore re tsebiše ba bangwe molaetša wa gagwe wa kholofelo le khomotšo. (Ba-Roma 10:13-15) Eupša, bjalo ka ge Jesu a bontšhitše thapelong ya gagwe, ka go phela lefaseng le, re lebeletšana le “yo mobe.” Batho bao ba sa kwego le meoya e kgopo ba baka bohloko bjo bogolo le tlaišego, gomme Bakriste le bona ba ba tlalelong.—1 Petro 5:9.
3. Ke therešo efe yeo gaešita le barapedi ba botegago ba Jehofa ba swanetšego go lebeletšana le yona, eupša re hwetša khomotšo efe ka Lentšung la Modimo?
3 Ka tlase ga diteko tše bjalo, go nolega moko ke mo go tlwaelegilego. (Diema 24:10) Pego ya Beibele e na le dikanegelo tše dintši tša babotegi bao ba ilego ba ba tlalelong. Mopsalme o re: “Mahloko a moloki a atile, ’me Morêna ó mo nthša mo xo ôna ka moka.” (Psalme 34:19) Ee, dilo tše mpe di diragalela gaešita le “moloki.” Ka go swana le mopsalme Dafida, ka dinako tše dingwe re ka ba ra ‘felelwa ke matla, ra robegela ruri.’ (Psalme 38:8) Lega go le bjalo, ke mo go homotšago go tseba gore “Morêna ó kxaufsi le ba ’pelo di rôbexilexo; ó phološa meôya e kxobetsi.”—Psalme 34:18; 94:19.
4, 5. (a) Ka go dumelelana le Diema 18:10, re swanetše go dira’ng e le gore re šireletšwe ke Modimo? (b) Ke megato efe e lebanyago yeo re ka e gatago e le gore re thušwe ke Modimo?
4 Ka go dumelelana le thapelo ya Jesu, Jehofa o tloga a re hlokomela. Ke ‘sebo sa rena nakong ya tlalelo.’ (Psalme 37:39) Puku ya Diema e diriša polelwana e swanago ge e re: “’Ina la Morêna ké sebô se sethata; moloki ó thšabêla xôna a pholoxa.” (Diema 18:10) Lengwalo le le utolla therešo ya motheo mabapi le go tshwenyega ga Jehofa ka tsela e lerato bakeng sa dibopiwa tša gagwe. Modimo o nea tšhireletšo kudu-kudu go baloki bao ba mo tsomago ka phišego, bjalo ka ge eka re be re kitimela sebong se thata goba toreng e tiilego bakeng sa tšhireletšego.
5 Ge re lebeletšane le mathata ao a tlaletšago, re ka tšhabela bjang go Jehofa bakeng sa tšhireletšo? Anke re ahla-ahleng megato e meraro ya bohlokwa yeo re ka e gatago e le gore re thušwe ke Jehofa. Wa pele, re swanetše go retologela go Tatago rena wa legodimong ka thapelo. Wa bobedi, re swanetše go dira dilo ka go dumelelana le moya wa gagwe o mokgethwa. Le gona wa boraro, re swanetše go ikokobeletša thulaganyo ya Jehofa ka go nyaka go gwerana le Bakriste-gotee le rena bao ba ka fokotšago tlalelo ya rena.
Matla a Thapelo
6. Bakriste ba therešo ba lebelela bjang thapelo?
6 Ditsebi tše dingwe tša tša maphelo di kgothaletša thapelo e le kalafo ya kgateletšego. Gaešita le ge e ka ba therešo gore nako ya setu ya go naganišiša ka mokgwa woo o ka rego motho o a rapela e ka imolla kgateletšego, medumo e itšego ya tlhago goba gaešita le go thoba ka mokokotlong le tšona di ka dira se se swanago. Bakriste ba therešo ga ba nyenyefatše thapelo ka go e lebelela e le feela sehlare sa gore motho a ikwe gabotse. Re lebelela thapelo e le poledišano e hlomphegago le Mmopi. Thapelo e akaretša boineelo bja rena go Modimo le go mmota ga rena. Ee, thapelo ke karolo ya borapedi bja rena.
7. Go rapela ka kholofelo go bolela’ng, gomme dithapelo tše bjalo di re thuša bjang go lebeletšana ka katlego le tlalelo?
7 Dithapelo tša rena di swanetše go sepedišana le maikwelo a go holofela, goba go bota Jehofa. Moapostola Johane o ngwadile gore: “Kholofêlô ye e tiilexo, ye re Mo holofetšexo ka yôna, ké xe re tseba xore ó a re kwa xe re kxopêla se se amanaxo le thatô ya xaxwe.” (1 Johane 5:14) Jehofa, e lego Mo-ba-Gona yo a Phagamego, Modimo a nnoši wa therešo le yo matla ohle, ge e le gabotse o lebiša tlhokomelo e kgethegilego dithapelong tše di tšwago pelong tša barapedi ba gagwe. Ke mo go homotšago go fo tseba feela gore Modimo wa rena yo lerato o a re kwa ge re mmotša dipelaelo le mathata a rena.—Ba-Filipi 4:6.
8. Ke ka baka la’ng le ka mohla Bakriste ba se ba swanela go ikwa ba lewa ke dihlong goba ba sa swanelege ge ba batamela Jehofa ka thapelo?
8 Le ka mohla Bakriste ba botegago ga se ba swanela go ikwa ba lewa ke dihlong, ba sa swanelege, goba ba se na kholofelo ge ba batamela Jehofa ka thapelo. Ke therešo gore ge e ba re nyamile goba re imelwa ke mathata, ga se ka mehla re ka sekamelago go batamela Jehofa ka thapelo. Dinakong tše bjalo re swanetše go gopola gore Jehofa “bahlaki ba xaxwe ó a ba šokêlwa” le gore ‘o homotša babotlana.’ (Jesaya 49:13; 2 Ba-Korinthe 7:6) Ke dinakong tša tlaišego le tša tlalelo moo re swanetšego go retologela ka kholofelo go Tatago rena wa legodimong bjalo ka sebo sa rena.
9. Tumelo e kgatha tema efe ge re batamela Modimo ka thapelo?
9 Re swanetše go ba le tumelo ya kgonthe e le gore re holwe ka mo go tletšego ke tokelo ya thapelo. Beibele e re, “e a batamêlaxo Modimo ó swanetše xo dumêla xore Modimo ó xôna, le xore ba ba Mo nyakaxo ó a ba putsa.” (Ba-Hebere 11:6) Tumelo ke selo se se fetago go fo kgolwa gore Modimo o gona. Tumelo ya kgonthe e akaretša go dumela ka tsela e matla bokgoni bja Modimo le kganyogo ya gagwe ya go putsa tsela ya bophelo bja rena bakeng sa go mo kwa. “Mahlô a Morêna a bôna baloki; ’tsêbê tša xaxwe di kwa xe ba lla.” (1 Petro 3:12) Go dula re lemoga go tshwenyega ga Jehofa ka tsela e lerato bakeng sa rena go dira gore dithapelo tša rena di be le morero ka tsela e kgethegilego.
10. Ke’ng seo e swanetšego go ba sa therešo ka dithapelo tša rena ge e ba re tla thekgwa ke Jehofa?
10 Jehofa o theetša dithapelo tša rena ge di rapelwa ka pelo e feletšego. Mopsalme o ngwadile gore: “Ke rapêla ka pelo ka moka; hlê nkwê, Morêna!” (Psalme 119:145) Ka go se swane le dithapelo tšeo di sa fetogego madumeding a mantši, dithapelo tša rena ga se feela tša go ithola kgwara goba tšeo e sego tša pelo ka moka. Ge re rapela Jehofa ka “pelo ka moka,” mantšu a rena a ba le seo a se bolelago gotee le go ba le morero. Ka morago ga dithapelo tše bjalo tše di tšwago pelong, re a imologa ka ge re lahletše ‘morwalo wa rena go Jehofa.’ Go etša ge Beibele e holofetša, ‘o tla re babalela.’—Psalme 55:22; 1 Petro 5:6, 7.
Moya wa Modimo ke Mothuši wa Rena
11. Ke tsela efe e nngwe yeo Jehofa a re arabago ka yona ge ‘re tšwela pele re kgopela’ thušo ya gagwe?
11 Jehofa ga se feela Mokwi wa dithapelo eupša gape ke Moarabi wa dithapelo. (Psalme 65:2) Dafida o ngwadile gore: “Ke Xo bitša kè tlaletšwe, ka xobane O a nkwa.” (Psalme 86:7) Ka go dumelelana le se, Jesu o ile a kgothaletša barutiwa ba gagwe go ‘tšwela pele ba kgopela’ thušo ya Jehofa ka gobane ‘Tate wa magodimong’ o tla ‘nea moya o mokgethwa go bao ba o kgopelago.’ (Luka 11:9-13) Ee, matla a Modimo a šomago a šoma e le mothuši, goba mohomotši go batho ba gagwe.—Johane 14:16.
12. Moya wa Modimo o ka re thuša bjang ge mathata a bonagala e le a nolago moko?
12 Gaešita le ge re lebeletšana le diteko, moya wa Modimo o ka re nea “matla a fetišago a tlwaelegilego.” (2 Ba-Korinthe 4:7, NW) Moapostola Paulo, yoo a ilego a kgotlelela maemo a mantši a gateletšago, o ile a bolela ka kgodišego gore: “Ke kxôna tšohle ka Eo a mphaxo matla.” (Ba-Filipi 4:13) Ka mo go swanago, Bakriste ba bantši lehono ba ile ba kwa matla a bona a moya le a maikwelo a mpshafaditšwe ke go arabja ga ditopo tša bona. Gantši mathata ao a gateletšago ga a bonagale e le ao a nolago moko kudu ka morago ga ge re amogetše thušo ya moya wa Modimo. Ka baka la matla ao re a neilwego ke Modimo, re ka bolela go etša moapostola ka gore: “Re dikilwe thokô tšohle, ’me xa re pitlaxanywe. Re a phoraphora, ’me xa re xakanexe. Re a tlaišwa, ’me xa r’a lahlêxa. Re dixêlwa fase, ’me xa re senyexe.”—2 Ba-Korinthe 4:8, 9.
13, 14. (a) Jehofa o itlhatsetše bjang e le sebo sa rena ka Lentšu la gagwe leo le ngwadilwego? (b) Go diriša melao ya motheo ya Beibele go go thušitše bjang wena ka noši?
13 Le gona moya o mokgethwa o buduletše le go boloka Lentšu la Modimo leo le ngwadilwego e le gore re holege. Jehofa o itlhatsetše bjang go ba sebo sa rena dinakong tša tlalelo ka Lentšu la gagwe? Tsela e nngwe ke ka go re nea bohlale bjo bo šomago le bokgoni bja go nagana. (Diema 3:21-24) Beibele e tlwaetša matla a rena a monagano gomme e kaonefatša matla a rena a go nea mabaka. (Ba-Roma 12:1) Ka go bala le go ithuta Lentšu la Modimo ka mehla, gotee le go le diriša, ‘matla a rena a go nagana a ka tlwaetšwa go tseba botse le bobe.’ (Ba-Hebere 5:14) Mohlomongwe wena ka noši o ka ba o ile wa bona kamoo melao ya motheo ya Beibele e go thušitšego ka gona go dira diphetho tše bohlale ge o lebeletšane le mathata. Beibele e re nea bohlale bjoo bo ka re thušago go hwetša ditharollo tše di šomago mathateng ao a tlaletšago.—Diema 1:4.
14 Lentšu la Modimo le re nea mothopo o mongwe wa matla—kholofelo ya phološo. (Ba-Roma 15:4) Beibele e re botša gore dilo tše mpe di ka se tšwele pele di direga go iša ka mo go sa felego. Mathata le ge e le afe ao a re tlaišago ke a nakwana. (2 Ba-Korinthe 4:16-18) Re na le ‘kholofelo ya bophelo bjo bo sa felego, bjo Modimo yena Morereši a bo holofeditšego batho mola mabaka a bogolo-golo a sešo a ba gona.’ (Tito 1:2) Ge e ba re thaba kholofelong yeo, ka go dula re lemoga bokamoso bjo bo phadimago bjoo Jehofa a bo holofetšago, re ka kgotlelela ge re le mathateng.—Ba-Roma 12:12; 1 Ba-Thesalonika 1:3.
Phuthego—Pontšho ya Lerato la Modimo
15. Bakriste ba ka thušana bjang?
15 Tokišetšo e nngwe e tšwago go Jehofa yeo e ka re thušago dinakong tša tlalelo ke bogwera bjo re bo thabelago ka phuthegong ya Bokriste. Beibele e re: “Moxwêra ké moratwa wa ka mehla; ké ngwan’ešo e a ntswáletšwexo wa mohla wa tlalêlô.” (Diema 17:17) Lentšu la Modimo le kgothaletša bohle ka phuthegong gore ba godišane le gore ba ratane. (Ba-Roma 12:10) Moapostola Paulo o ngwadile gore: “A motho a se kê a inyakela tša xaxwe; a a nyakê sa xo hola ba bangwê.” (1 Ba-Korinthe 10:24) Go ba le boemo bjo bjalo bja kgopolo go ka re thuša go lebiša tlhokomelo go dinyakwa tša ba bangwe go e na le go e lebiša ditekong tša rena. Ge re ineela go thušeng ba bangwe, ga re ba thuše feela eupša gape re ba le lethabo le kgotsofalo tšeo di dirago gore merwalo ya rena e be yeo e kgotlelelegago.—Ditiro 20:35.
16. Ke bjang Mokriste yo mongwe le yo mongwe e ka bago yo a kgothatšago?
16 Banna le basadi bao ba godilego moyeng ba ka kgatha tema e bohlokwa go matlafatšeng ba bangwe. E le gore ba dire bjalo, ba itira bao ba batamelegago le bao ba hwetšagalago. (2 Ba-Korinthe 6:11-13) Phuthego e tloga e šegofaditšwe ge bohle ba dira nako ya go reta bafsa, go aga bao ba sa tšwago go thoma go kopanela gotee le go kgothatša bao ba gateletšegilego. (Ba-Roma 15:7) Le gona lerato la borwarre le tla re thuša go phema mokgwa wa go gononelana. Re swanetše gore re se ke ra akgofela go phetha ka gore mafokodi a motho ka noši ke leswao la go fokola moyeng. Paulo o kgothaletša Bakriste ka mo go nepagetšego ka gore ba “tsošê ba dipelo tše di tapilexo.” (1 Ba-Thesalonika 5:14) Beibele e bontšha gore gaešita le Bakriste ba botegago ba ba tlalelong.—Ditiro 14:15.
17. Ke dibaka dife tšeo re nago le tšona tša go matlafatša tlamo ya borwarre bja Bokriste?
17 Diboka tša Bokriste di re nea sebaka se sebotse sa go homotšana le go kgothatšana. (Ba-Hebere 10:24, 25) Tirišano ye e lerato ga e felele feela dibokeng tša phuthego. Go e na le moo, batho ba Modimo gape ba lebelela dibaka tša go ba le poledišano e agago ge ba iketlile. Ge maemo a tlaletšago a tšwelela, re tla thušana ka ntle le go dika-dika ka gobane ditlemo tše matla tša bogwera di šetše di hlomilwe. Moapostola Paulo o ngwadile gore: “Mo mmeleng xo se kê xwa ba le thšitanô, dithô di babalêlanê . . . Xe sethô se tee sè hlokofala, dithô ka moka di a hlokofala. Xe sethô se tee sè sétšwa, dithô ka moka di thaba le sôna.”—1 Ba-Korinthe 12:25, 26.
18. Ke tshekamelo efe yeo re swanetšego go e phema ge re ikwa re nyamile?
18 Ka dinako tše dingwe, re ka ikwa re nyamile kudu gore re ka thabela bogwera le Bakriste-gotee le rena. Re swanetše go lwantšha maikwelo a bjalo e le gore re se ke ra itima khomotšo le thušo yeo badumedi-gotee le rena ba ka e neago. Beibele e re lemoša gore: “Mo-dula-thokô ó ile le boithatêlô; tše byôbana tšohle ó xanana natšô.” (Diema 18:1) Bana babo rena le dikgaetšedi ke pontšho ya gore Modimo o a re hlokomela. Ge e ba re lemoga tokišetšo yeo e lerato, re tla hwetša kimologo dinakong tša tlalelo.
Kgomarela Boemo bjo bo Nepagetšego bja Kgopolo
19, 20. Mangwalo a re thuša bjang go gana dikgopolo tše di fošagetšego?
19 Ge re ikwa re nolega moko le go nyama, go bonolo go dula re nagana ka dilo tše di fošagetšego. Ka mohlala, batho ba bangwe ge ba lebeletšane le mathata, ba ka thoma go belaela boemo bja bona ka noši bja moya, ba phetha ka gore mathata a bona ke pontšho ya go se amogelwe ke Modimo. Lega go le bjalo, gopola gore Jehofa ga a leke motho le ge e le mang ka “bobe.” (Jakobo 1:13) Beibele e re: “Xe [Modimo] a ôtla bana ba batho, xe a ba hlokofatša, xa a dire di mo kxahla.” (Dillo tša Jeremia 3:33) Ka mo go fapanego, Jehofa o nyama kudu ge bahlanka ba gagwe ba tlaišega.—Jesaya 63:8, 9; Sakaria 2:8, PK.
20 Jehofa ke “Radikxauxêlô, Modimo wa khomotšô yohle.” (2 Ba-Korinthe 1:3) O na le taba le rena gomme o tla re godiša ka nako e swanetšego. (1 Petro 5:6, 7) Go dula re lemoga kamoo Modimo a re ratago ka gona go tla re thuša go kgomarela boemo bjo bo nepagetšego bja kgopolo, gaešita le go thaba. Jakobo o ngwadile gore: “Bana bešo, xe Le wêla melekong ya mehuta-huta, Le re: ké lethabô fêla.” (Jakobo 1:2) Ka baka la’ng? O araba ka gore: “Xobane xe a bonwe xo bôtêxa, ó tlo fiwa mphapahlôxô wa bophelô, wo Modimo a o holofeditšexo ba ba Mo rataxo.”—Jakobo 1:12.
21. Go sa šetšwe mathata ao re lebeletšanago le ona, ke kgonthišetšo efe yeo Modimo a e neago bao ba ipontšhago ba mmota?
21 Bjalo ka ge Jesu a re lemošitše, re tla tlaišega mo lefaseng. (Johane 16:33) Eupša Beibele e holofetša gore ga go na “tlaišô, xoba tlalêlô, xoba xo hlomarwa, xoba thlobolô, xoba kotsi” yeo e tlago go re aroganya le lerato la Jehofa le lerato la Morwa wa gagwe. (Ba-Roma 8:35, 39) Ke mo go homotšago gakaakang go tseba gore tlalelo le ge e le efe yeo re lebeletšanago le yona gona bjale ke ya nakwana! Gona bjale, ge re sa dutše re letile go fela ga tlaišego ya batho, Tatago rena yo lerato e lego Jehofa o a re hlokomela. Ge e ba re kitimela go yena bakeng sa tšhireletšego, o tla itlhatsela e le “sebô sa bahlaki, sebô mohla wa tlalêlô.”—Psalme 9:9.
[Dipotšišo tša Thuto]
Re Ithutile’ng?
• Bakriste ba swanetše go letela’ng ge ba dutše ba phela lefaseng le le kgopo?
• Dithapelo tša rena tše di tšwago pelong di ka itlhatsela bjang go ba tše di matlafatšago ge re lebeletšane le diteko?
• Ke bjang moya wa Modimo e lego mothuši?
• Re ka dira’ng e le gore re thušane?
[Caption on page 18]
Re swanetše go tsoma Jehofa bjalo ka ge eka re be re kitimela toreng e tiilego
[Caption on page 20]
Bao ba godilego moyeng ba diriša sebaka se sengwe le se sengwe go reta le go kgothatša ba bangwe