Na Keletšo e Botse e a Nyakega?

LEHONO, batho ba bantši ba dumela gore ba na le bokgoni bja go tseba botse le bobe le gore ba na le tshwanelo ya go dira selo le ge e le sefe seo ba nyakago go se dira. Ba bangwe ba bolela gore selo se sengwe le se sengwe se a amogelega ge feela se dira gore motho a ikwe a thabile. Lenyalo le bophelo bja lapa, e lego dithulaganyo tšeo e lego kgale di lebelelwa e le tša motheo lekokong la batho, di kgongwa kudu ke se.—Genesi 3:5.

Nagana ka Verónica, * yo a dulago Mexico. O bega gore: “Pejana ga ge re ka fetša nywaga e 15 re nyalane, monna wa-ka o ile a mpotša gore o ratana le mosadi yo mongwe. O boletše gore ka ge mosadi yo e le yo monyenyane ge a bapetšwa le nna e bile a mo dira gore a ikwe a thabile kudu, o be a ka se mo tlogele. Ke be ke tšhošitšwe ke kgopolo ya gore mogwera wa-ka wa paala o be a ka se sa ba kgaufsi le nna gore a ntloše bodutu. Ke be ke tlwaetše go nagana gore lehu la bao re ba ratago e be e le lona sebaki se segolo sa bohloko bathong. Eupša go nna, bohlotlolo bo be bo kweša bohloko le go feta ka gobane ga se gore feela ke ile ka lahlegelwa ke motho yo ke bego ke mo rata kudu eupša gape le gore o ile a tšwela pele a dira dilo tša go nkweša bohloko.”

Ke moka go na le boemo bja monna wa nywaga e 22 yo a šetšego a hladile e bile a e-na le morwa eupša e le yo a sa ikemišetšago go amogela boikarabelo bja gagwe bjalo ka tate. O lebeletše gore mmagwe a mo hlokomele a be a hlokomele le morwa wa gagwe. Ge e ba mmagwe a sa dumelelane le dinyakwa tša gagwe ka moka, o a galefa gomme o mo hlasela ka mantšu, go etša ngwana yo a se nago mekgwa. Mmagwe o ikwa a nolega moko ge a lebeletšane le mokgwa o bjalo wa lenyatšo.

Tše ga se ditiragalo tšeo di sa tlwaelegago. Go arogana ka molao le tlhalo di a oketšega gohle. Bana ba bantši ba bona yo mongwe wa batswadi ba bona a tloga gae go yo thoma bophelo bjo  bofsa. Bana ba bangwe ga ba sa hlompha batho ba bangwe le gatee, go akaretša le batswadi ba bona, gomme ba tšea karolo boitshwarong bjoo go bego go sa naganwe ka bjona nakong e fetilego. Go ba le dikopano tša botona le botshadi, go dirišwa gampe ga dihlare-tagi, ditlhaselo tšeo di dirwago ke bafsa le go bolawa ga barutiši goba batswadi ke bana e šetše e le mo go tlwaelegilego dinageng tše dintši. Le gona o ka ba o lemogile gore go godiša bana le lenyalo ga se tšona dibopego feela tšeo di lebeletšanego le mathata lefaseng la lehono.

Ge re dutše re ela hloko ditiragalo tše tšeo di tšwelago pele, re ka ipotšiša gore batho ba diragaletšwe ke eng. Ge e ba batho ba tloga ba tseba botse le bobe, ke ka baka la’ng mathata a mantši gakaakaa a se na tharollo? Na keletšo e botse e a nyakega? Na go na le mothopo wa keletšo e bjalo e holago, wo o ipontšhitšego o ka botwa? Gaešita le ge ba bantši ba bolela gore ba dumela go Modimo le Lentšung la gagwe le le ngwadilwego, ga go bonagale se se tutuetša diphetho tša bona. Eupša ke mehola efe yeo re ka e hwetšago ge re tsoma keletšo e tšwago go Modimo le go e fihlelela? Anke re ahla-ahleng seo sehlogong se se latelago.

[Mongwalo wa ka tlase]