Bagoeledi Ba Mmušo Ba A Bega

“Bahlaselwa Bao ba Lebetšwego” ba a Gopolwa

MATHOMONG a 2001, Haykaz, e lego Hlatse ya Jehofa ya nywaga e 15, o ile a etela pontšho ya “Bahlaselwa Bao ba Lebetšwego” kua Bern, Switzerland, yeo e bego e le mabapi le tlaišo ya Dihlatse tša Jehofa ya kua Nazi. Mafelelong a ketelo ya gagwe, Haykaz o itše: “Ke be ke ile ka kwa ka tshwaro e sehlogo le tlaišo yeo Dihlatse tša Jehofa di ilego tša lebeletšana le yona ka tlase ga pušo ya Nazi, eupša le e be e le lekga la mathomo ke bona mangwalo a kgonthe le dinepe tša nakong yeo. Diswantšho, dipego tša dihlatse tšeo di iponetšego ka mahlo gotee le dipolelo tša bo-radihistori di ile tša dulela ruri ka monaganong le ka pelong ya-ka.”

Nakwana ka morago, ge Haykaz a be a abetšwe go ngwala pego bakeng sa barutwana-gotee le yena sekolong se se phagamego, o ile a kgetha sehlogo se se rego “Dihlatse tša Jehofa—Bahlaselwa Bao ba Lebetšwego ba Bonazi.” Morutiši wa gagwe o ile a dumelelana le sehlogo seo eupša o ile a botša Haykaz gore o be a swanetše go akaretša dipuku tšeo e sego tša bodumedi methopong ya taba ya gagwe. Haykaz o ile a dumela ka lethabo. “Ke ile ka ngwala kakaretšo ya dipuku tše itšego tša mabapi le Dihlatse tša Jehofa nakong ya Bonazi tšeo ke bego ke ile ka di ahla-ahla. Le gona ke ile ka hlalosa maikwelo a-ka ka noši mabapi le pontšho ya ‘Bahlaselwa Bao ba Lebetšwego.’ Pego ye ya matlakala a 43 e be e akaretša diswantšho tšeo di thadilwego le dinepe.”

Ka November 2002, Haykaz o ile a neela pego ya gagwe go bao a tsenago le bona sekolo, barutiši, ba lapa gotee le bagwera. Ka morago ga moo, go be go e na le karolo ya dipotšišo le dikarabo, yeo e ilego ya mo nea sebaka sa go hlalosa ditumelo tša gagwe tšeo di theilwego Beibeleng. Ge mosetsana yo mongwe gare ga batheetši a be a botšiša lebaka leo ka lona a kgethilego sehlogo se, Haykaz o ile a hlalosa gore dipuku tše dintši tša histori ga di bolele ka Dihlatse tša Jehofa le gore o be a nyaka gore batho ba tsebe kamoo Dihlatse di ilego tša lwela tumelo ya tšona ya Bokriste ka sebete. Mafelelo a polelo ya gagwe e bile afe?

Haykaz o itše: “Bao ke tsenago le bona sekolo ba be ba maketše. Ba be ba sa tsebe gore Dihlatse tša Jehofa e le sehlopha di ile tša tlaišwa o šoro. Le gona, ba bantši ba be ba sa tsebe gore Dihlatse tšeo di bego di swerwe kua dikampeng tša tlaišo tša Nazi di be di hlomela leswao le le kgethegilego leo le di hlaolago—khutlo-tharo e phepolo.”

Ka morago ga polelo ya gagwe, Haykaz o ile a ba le dibaka tše di oketšegilego tša go bolela le bao a tsenago le bona ka klaseng le go ahla-ahla boemo bjo bo theilwego Beibeleng bja Dihlatse tabeng ya go tšhelwa madi, ya bjala le ya boitshwaro. Haykaz o itše: “Ga go le o tee wa bao ke tsenago le bona sekolo yoo a ilego a nkwera.” Go feta moo, gabjale pego ya gagwe e bolokilwe bokgobapukung bja sekolo. Seo se tla thuša go kgonthišetša gore boemo bja go ba le sebete bja Dihlatse tša Jehofa bo ka se lebalwe.