Phihlelo

Bophelo bjo bo Kgotsofatšago le bjo bo Thabišago bja go Ikgafa ka go Rata

KA GE GO ANEGA MARIAN LE ROSA SZUMIGA

Psalme 54:6 e re: “Ke tlo Xo tlišetša sebexô ka xo ithapa.” Mantšu a e bile ona taba-kgolo bophelong bja Marian Szumiga le mosadi wa gagwe, Rosa, bao ba dulago Fora. Morago bjale ba ile ba dula fase e le gore ba anege tše dingwe tša dintlha tše dikgolo tša bophelo bja bona bjo botelele le bjo bo kgotsofatšago bja go ba tirelong ya Jehofa.

MARIAN: Batswadi ba-ka e be e le bafaladi ba ba tsenago kereke ya Roma Katholika bao ba tšwago Poland. Tate e be e le monna yo a sa rutegago. Le ka mohla ga se a ka a hwetša sebaka sa go ya sekolong. Lega go le bjalo, nakong ya ntwa ya pele ya lefase, o ile a ithuta go bala le go ngwala a dutše a šoma ntweng. Tate e be e le monna yo a boifago Modimo, eupša kereke e be e dula e mo nyamiša.

Go na le tiragalo e nngwe ka mo go kgethegilego yeo a sa e lebalego. Ka letšatši le lengwe nakong ya ntwa, moruti o ile a etela sekgao sa tate sa madira. Ge pomo e be e thuthupa kgaufsi le bona, moruti o ile a tšhaba ka baka la letšhogo, gomme a betha pere ya gagwe ka sefapano e le gore e kitime. Tate o ile a tšhošwa ke gore yo go thwego ke moemedi wa Modimo o be a diriša selo seo go thwego ke sedirišwa se sekgethwa bakeng sa go akgofiša go tšhaba ga gagwe. Go sa šetšwe diphihlelo tše bjalo le dilo tše di tšhošago tšeo tate a di bonego ntweng, tumelo ya gagwe go Modimo ga se ya ka ya fokola. Gantši o be a leboga Modimo bakeng sa go boa ga gagwe ntweng a šireletšegile.

“Poland e Nyenyane”

Ka 1911, tate o ile a nyala mosetsana yo a tšwago motsaneng wa kgaufsi le wa gabo. Leina la gagwe e be e le Anna Cisowski. Go se go ye kae ka morago ga ntwa, ka 1919, tate le mma ba ile ba tloga Poland ba hudugela Fora, moo tate a ilego a hwetša mošomo moepong wa malahla. Ke belegwe ka March 1926 kua Cagnac-les-Mines, yeo e  lego ka borwa-bohlabela bja Fora. Ka morago ga moo, batswadi ba-ka ba ile ba dula le setšhaba sa Mapoliši kua Loos-en-Gohelle, kgaufsi le Lens yeo e lego ka leboa la Fora. Radinkgwa e be e le Mopoliši, raleselaga e be e le Mopoliši gomme moruti wa Roma Katholika le yena e be e le Mopoliši. Ga go makatše ge tikologo ye e be e bitšwa Poland e Nyenyane. Batswadi ba-ka ba be ba tšea karolo medirong ya setšhaba. Tate gantši o be a rulaganya dipontšho tšeo di bego di akaretša terama, mmino le go opela. Le gona o be a e-ba le dipoledišano tša ka mehla le moruti, eupša o be a sa kgotsofatšwe ke ge moruti ka mehla a be a araba ka gore, “Go na le diphiri tše dintši.”

Ka letšatši le lengwe ka 1930, basadi ba babedi ba ile ba kokota mojakong wa gešo. E be e le Barutwana ba Beibele, go etša ge Dihlatse tša Jehofa di be di bitšwa bjalo ka nako yeo. Tate o ile a hwetša Beibele go bona, e lego puku yeo ka nywaga e mentši a bego a dutše a nyaka go e bala. Le gona yena le mma ba ile ba bala ka phišego dikgatišo tšeo di theilwego Beibeleng tšeo basadi ba ba di tlogetšego. Batswadi ba-ka ba be ba kgomilwe kudu ke seo ba ilego ba se bala ka dikgatišong tše. Go sa šetšwe bophelo bja bona bja leema-ema, batswadi ba-ka ba ile ba thoma go ba gona dibokeng tšeo di rulagantšwego ke Barutwana ba Beibele. Dipoledišano tša tate le moruti di ile tša thoma go ba le dingangišano tše dintši go feta pele go ba go fihla ka letšatši le lengwe a tšhošetša ka gore ge e ba batswadi ba-ka ba tšwela pele ba kopanela le Barutwana ba Beibele, gona kgaetšedi’a-ka Stéphanie o be a tla rakwa klaseng ya katikasema. Tate o ile a araba ka gore: “O se ke wa itshwenya. Go tloga gabjale go ya pele morwedi wa-ka le bana ba bangwe ba tla ya le rena dibokeng tša Barutwana ba Beibele.” Tate o ile a tlogela go tsena kereke, gomme mathomong a 1932, batswadi ba-ka ba ile ba kolobetšwa. Ka nako yeo, go be go e-na le bagoeledi ba Mmušo ba ka bago 800 feela kua Fora.

Rosa: Batswadi ba-ka ba be ba e-tšwa Hungary gomme go etša ba lapa la gabo Marian, ba ile ba dula ka leboa la Fora e le gore ba šome meepong ya malahla. Ke belegwe ka 1925. Ka 1937, yo mongwe wa Dihlatse tša Jehofa, e lego Auguste Beugin, goba Papa Auguste go etša ge re be re mmitša bjalo, o ile a thoma go tlišetša batswadi ba-ka Morokami ka se-Hungary. Ba ile ba hwetša dimakasine tše e le tše di kgahlišago, eupša ga go le o tee wa bona yo a ilego a ba yo mongwe wa Dihlatse tša Jehofa.

Gaešita le ge ke be ke sa le yo monyenyane, pelo ya-ka e be e kgomilwe ke seo ke se badilego ka makasineng wa Morokami, gomme ngwetši ya Papa Auguste, e lego Suzanne Beugin, e ile ya ba le kgahlego go nna. Batswadi ba-ka ba ile ba mo dumelela gore a ye le nna dibokeng. Ka morago, ge ke be ke thoma go šoma, go ba gona ga-ka dibokeng ka Disontaga go ile gwa thoma go seleka tate. Gaešita le ge ka kakaretšo e be e le motho yo a lokilego ka tlhago, o ile a belaela ka gore, “Ga o be gona gare ga beke, gomme ka Disontaga o ya dibokeng tša gago!” Lega go le bjalo, ke ile ka tšwela pele ke e-ya. Ka gona, ka letšatši le lengwe tate o ile a re, “Phutha mokotla wa gago gomme o ntšwele motse!” E be e le bošego kudu. Ke be ke e-na le nywaga e 17 feela, gomme ke be ke sa tsebe gore ke ye kae. Ke ile ka feleletša ke ile ga Suzanne, gomme ke lla ke sa kgaotše. Ke ile ka dula le Suzanne mo e  nyakilego go ba lebaka la beke pele tate a ka romela ngwanešo yo mogolo gore a ntliše gae. Ke be ke le motho wa dihlong ka tlhago, eupša kgopolo yeo e bontšhitšwego go 1 Johane 4:18 e ile ya nthuša gore ke eme ke tiile. Lengwalo leo le bolela gore “leratô xe e le la botlalô le raka poifô.” Ke ile ka kolobetšwa ka 1942.

Bohwa bjo Bohlokwa bja Moya

Marian: Ke kolobeditšwe ka 1942, gotee le dikgaetšedi tša-ka e lego Stéphanie le Mélanie le ngwanešo e lego Stéphane. Ka gae, bophelo bja lapa bo be bo theilwe Lentšung la Modimo. Ge re dutše tafoleng, tate o be a tla re balela Beibele ka Sepoliši. Gantši re be re fetša dinako tša rena tša bošego re theeditše batswadi ba rena ge ba anega diphihlelo tša bona tša modirong wa go bolela ka Mmušo. Dinako tše tšeo di kgothatšago moyeng di ile tša re ruta go rata Jehofa le go mmota ka mo go oketšegilego. Boemo bja tate bjo bo fokolago bja tša maphelo bo ile bja mo gapeletša gore a tlogele go šoma, eupša o ile a tšwela pele a re hlokomela moyeng le nameng.

Ka ge tate gabjale a be a e-na le nako yeo ka yona a bego a sa dire selo, o be a swarela bafsa ba phuthegong thuto ya Beibele ka Sepoliši gatee ka beke. Gona moo ke ile ka ithuta go bala Sepoliši. Le gona tate o be a kgothatša bafsa ka ditsela tše dingwe. Ka nako e nngwe ge Ngwanabo rena Gustave Zopfer, yo ka nako yeo a bego a okametše modiro wa Dihlatse tša Jehofa kua Fora, a be a etetše phuthego ya rena, tate o ile a rulaganya sehlopha sa diopedi gotee le terama yeo e theilwego monyanyeng wa Kgoši Belesatsara le mongwalo lebotong yeo go yona go bego go aperwe moaparo wa mehleng ya Beibele. (Daniele 5:1-31) Karolo ya Daniele e be e bapalwa ke Louis Piéchota, yoo ka morago a ilego a ema a tiile malebana le ma-Nazi. * Bjo e be e le boemo bjoo rena bana re godišeditšwego go bjona. Re ile ra bona gore batswadi ba rena ba be ba dula ba swaregile ka dilo tša moya. Lehono, ke lemoga gore batswadi ba rena ba re tlogeletše bohwa bjo bohlokwa gakaakang.

Ge Ntwa ya II ya Lefase e be e tsoga ka 1939, modiro wa boboledi wa Dihlatse tša Jehofa o ile wa thibelwa kua Fora. Tiragalong e nngwe, motsana wa gešo o be o swanetše go phuruphutšwa. Nywako ka moka e be e dikologilwe ke bahlabani ba Jeremane. Tate o be a dirile lebato leo e sego la kgonthe boalong bja lefelo la go tsenya diaparo, gomme re ile ra uta dikgatišo tše di fapa-fapanego tšeo di theilwego Beibeleng ka tlase ga lebato leo. Lega go le bjalo, dikopi tše mmalwa tša pukwana ya Fascism or Freedom di be di le ka laiking yeo re beago dibjana ka go yona. Ka go akgofa tate o ile a di uta ka potleng ya baki yeo e bego e fegilwe tsejaneng ya ka ngwakong. Bahlabani ba babedi le maphodisa a Mafora ba ile ba phuruphutša ngwako wa gešo. Re ile ra ema re tšhogile. Yo mongwe wa bahlabani o ile a thoma go phuruphutša ka diaparong tšeo di bego di fegilwe tsejaneng ya ka ngwakong, gomme kapejana ka morago ga moo o ile a tsena ka khitšhing, moo re bego re le gona, a swere dipukwana ka seatleng. O ile a re lebelela, a bea dipukwana godimo ga tafola, gomme a tšwetša pele lesolo la gagwe ka go phuruphutša lefelong le lengwe. Kapejana ke ile ka tšea dipukwana gomme ka di bea ka laiking yeo bahlabani ba bego ba šetše ba e phuruphutše. Mohlabani ga se a ka a kgopela dipukwana tšela le gatee—go be go le bjalo ka ge eka o be a lebetše ka tšona ka mo go feletšego!

Go Tsena Tirelong ya Nako e Tletšego

Ka 1948, ke ile ka phetha ka go itira yo a hwetšagalago bakeng sa go hlankela Jehofa tirelong ya bobulamadibogo bja nako e tletšego. Matšatšing a sego kae ka morago, ke ile ka amogela lengwalo le le tšwago ofising ya lekala ya Dihlatse tša Jehofa ya kua Fora. Lengwalo le be le ntshwaretše kabelo ya gore ke hlankele ke le mmulamadibogo phuthegong ya Sedan, kgaufsi le Belgium. Batswadi ba-ka ba be ba thabišitšwe ke go mpona ke kgomaretše tirelo ya Jehofa ka tsela yeo. Lega go le bjalo, tate o ile a bontšha gore go bula madibogo go be go ka se be bonolo. E be e tla ba modiro o thata. Lega go le bjalo, o ile a bolela gore ke tla dula ke amogelega ka ngwakong wa gagwe le gore ke be nka ithekga ka yena ge e ba ke be ke e-na le mathata. Gaešita le ge batswadi ba-ka ba be ba se na tšhelete e ntši, ba ile ba nthekela paesekela e mpsha. Ke sa dutše ke e-na le rasiti ya paesekela yeo, gomme ge ke e lebelela, ke sekiša megokgo mahlong a-ka. Tate le mma ba hwile ka 1961, eupša ke sa dutše ke gopola mantšu a tate a bohlale, a nkgothaditše e bile a  nkhomoditše nywageng ka moka ya tirelo ya-ka.

Mothopo o mongwe wa kgothatšo e be e le kgaetšedi wa Mokriste wa nywaga e 75 wa phuthegong ya Sedan yo a bitšwago Elise Motte. Selemo ke be ke ragela paesekela ya-ka go ya metsaneng yeo e lego lekatana go yo dira boboledi, gomme Elise o be a e-tla ka setimela go tlo ntlatša. Lega go le bjalo, ka letšatši le lengwe bo-radientšeneare ba ditimela ba ile ba gana go šoma, gomme Elise o be a ka se kgone go ya gae. Tharollo e nnoši yeo ke bego ke e nagana e be e le go mo nametša lepokisaneng la paesekela ya-ka la go rwala merwalo gore ke mo iše gae—e be e se tsela e kgotsofatšago ya go ragela paesekela. Mesong e latelago, ke ile ka tliša mosamelwana gomme ka feta ke tšea Elise legaeng la gagwe. O ile a tlogela go sepela ka setimela, gomme ka tšhelete ya go namela yeo re e sekeditšego, o ile a kgona go re rekela seno se se fišago nakong ya matena. Ke mang yo a bego a ka nagana gore paesekela ya-ka e be e tla šoma e le senamelwa sa batho bohle?

Boikarabelo bjo bo Oketšegilego

Ka 1950, ke ile ka kgopelwa gore ke hlankele ke le molebeledi wa tikologo karolong ka moka ya ka leboa la Fora. Ka ge ke be ke e-na le nywaga e 23 feela, karabelo ya-ka ya mathomo e bile go tšhoga. Ke be ke nagana gore ofisi ya lekala e dirile phošo! Ke ile ka ba le dipotšišo tše dintši ka monaganong: ‘Na ke swanelegela mošomo wo bobedi moyeng le nameng? Ke be ke tla lebeletšana bjang ka katlego le go dula mafelong a fapanego beke le beke?’ Go oketša moo, ga e sa le go tloga ge ke e-na le nywaga e tshela, ke be ke swerwe ke bolwetši bja leihlo bjo bo bitšwago divergent strabismus. Bolwetši bjo bo dira gore le lengwe la mahlo a-ka le leane. Ke be ke dula ke lewa ke dihlong kudu ka baka la se, ke tshwenyega mabapi le kamoo ba bangwe ba tlago go arabela ka gona. Ke leboga gore ka yona nako yeo ke ile ka amogela thušo e kgolo e tšwago go Stefan Behunick, e lego sealoga sa sekolong sa boromiwa sa Gilead. Ngwanešo Behunick o be a ile a rakwa Poland ka baka la modiro wa gagwe wa boboledi gomme o be a abetšwe gape go yo šoma Fora. Sebete sa gagwe se ile sa tloga se nkgahla. O be a e-na le tlhompho e tseneletšego bakeng sa Jehofa le therešo. Ba bangwe ba be ba nagana gore o ntshwere ka thata, eupša ke ile ka ithuta mo gontši go yena. Sebete sa gagwe se ile sa nthuša gore ke ikholofele.

Modiro wa tikologo o ile wa ntumelela gore ke thabele diphihlelo tše di kgahlišago tirelong ya tšhemo. Ka 1953, ke ile ka kgopelwa gore ke etele Mna. Paoli, yo a bego a dula ka borwa bja Paris gomme a beeleditše Morokami. Re ile ra gahlana, gomme ke ile ka lemoga gore o be a rotše modiro wa bohlabani le gore o hweditše Morokami e le o kgahlišago. O ile a mpotša gore ka morago ga ge a badile sehlogo sa mabapi le Segopotšo sa lehu la Kriste tokollong ya morago-rago, o ile a bina Segopotšo a nnoši gomme a fetša bošego ka moka a bala Dipsalme. Poledišano ya rena e ile ya tšea nako e ntši ya thapameng yeo. Pele ke sepela, re ile ra boledišana ka bokopana mabapi le kolobetšo. Ka morago ke ile ka mo romela taletšo ya gore a be gona kopanong ya rena ya tikologo, yeo e bego e tla swarwa mathomong a 1954. Ngwanabo rena Paoli o ile a tla, gomme o be a le gare ga batho ba 26 bao ba ilego ba kolobetšwa kopanong yeo. Diphihlelo tše di swanago le tšeo e sa dutše e le mothopo wa lethabo go nna.

Rosa: Ka October 1948, ke ile ka thoma go hlankela ke le mmulamadibogo. Ka morago ga go hlankela kua Anor, kgaufsi le Belgium, ke ile ka abelwa go ya Paris, gotee le mmulamadibogo yo  mongwe, e lego Irène Kolanski (yo gabjale e lego wa ga Leroy). Re be re dula ka phapošing e nyenyane kua Saint-Germain-des-Près yeo e lego bogareng bja motse. Ka ge ke godišeditšwe dinaga-magaeng, ke be ke boifa badudi ba Paris kudu. Ke be ke nagana gore ka moka ga bona ba maemong a godimo e bile ba bohlale kudu. Eupša go se go ye kae ge ke dira boboledi go bona ke ile ka lemoga gore ba be ba sa fapane le batho ba bangwe. Gantši re be re rakwa ke baleta-mejako, gomme go thoma dithuto tša Beibele go be go le thata. Lega go le bjalo, batho ba bangwe ba ile ba amogela molaetša wa rena.

Kopanong ya tikologo ya 1951, nna le Irène re ile ra botšišwa mabapi le tirelo ya rena ya bobulamadibogo. Akanya gore ke mang yo a bego a re botšiša? Molebeledi wa tikologo yo e lego mofsa yo a bitšwago Marian Szumiga. Re be re ile ra gahlana peleng, eupša ka morago ga kopano yeo, re ile ra thoma go ngwalelana. Nna le Marian re be re e-na le dilo tše dintši tše di swanago, go akaretša le taba ya gore re kolobeditšwe ka ngwaga o tee gomme ra ba babulamadibogo ka ngwaga o tee. Lega go le bjalo, sa bohlokwa kudu ke gore bobedi bja rena re be re nyaka go dula tirelong ya nako e tletšego. Ka gona ka morago ga go naganišiša ka thapelo, re ile ra nyalana ka July 31, 1956. Ka wona mogato woo, ke ile ka thoma tsela e mpsha ka mo go feletšego ya bophelo. Ke ile ka swanelwa ke go tlwaelana le go ba mosadi yo a nyetšwego gotee le go sepela le Marian modirong wa tikologo, e lego seo se bego se bolela go robala malaong a fapanego beke le beke. Mathomong, go be go le thata kudu go nna, eupša re be re letetšwe ke lethabo le legolo kudu.

Bophelo bjo bo Kgotsofatšago

Marian: Go theoša le nywaga, re bile le tokelo ya go thuša go lokišeletša dikopano tše mmalwa. Ke tloga ke sa lebale ka mo go kgethegilego kopano e nngwe yeo e bego e swerwe ka 1966, kua Bordeaux. Ka nako yeo, mediro ya Dihlatse tša Jehofa e be e thibetšwe kua Portugal. Ka gona lenaneo la kopano le lona le ile la swarwa ka Sepotokisi e le go hola Dihlatse tšeo di ilego tša kgona go ya Fora. Bana babo rena ba Bakriste ba makgolo gotee le  dikgaetšedi ba tšwago Portugal ba ile ba goroga, eupša bothata e be e le gore ba tla robatšwa kae. Ka ge Dihlatse tša Bordeaux di be di se na diphapoši tše di lekanego ka magaeng a tšona, re ile ra hira lefelo la dipontšho tša paesekopo leo le se nago selo gore re le diriše e le lefelo la marobalo. Re ile ra ntšha ditulo ka moka, gomme gareteine ya sethaleng e ile ya dirišetšwa go fetola holo gore e be le mafelo a mabedi a marobalo, le lengwe ya ba la bana babo rena gomme le lengwe ya ba la dikgaetšedi. Le gona re ile ra tsenya dišawara le dipafo tša go hlapela, ra ala furu lebatong la samente, gomme ra e khupetša ka diseila. Batho bohle ba be ba kgotsofaditšwe ke tokišetšo ye.

Ka morago ga mananeo a kopano, re ile ra etela bana babo rena le dikgaetšedi kua lefelong la marobalo. Moya o bego o foka moo e be e le o kgahlišago. Re ile ra kgothatšwa gakaakang ke diphihlelo tšeo ba bilego le tšona go sa šetšwe nywaga yeo ka yona ba ilego ba kgotlelela tlaišo! Ge ba be ba sepela mafelelong a kopano, ka moka re be re sekišitše megokgo.

Tokelo e nngwe e tlile nywageng e mebedi pejana, ka 1964, ge ke be ke kgopelwa gore ke hlankele ke le molebeledi wa selete. Le mo nakong ye ke ile ka ipotšiša ge e ba ke be ke swanelegela modiro wo. Eupša ke ile ka ipotša gore ge bao ba ikarabelago ba nkgopetše gore ke amogele kabelo ye, go molaleng gore ba nagana gore ke na le bokgoni bja go e phetha ka katlego. E be e le phihlelo e botse go hlankela kgaufsi le balebeledi ba bangwe ba basepedi. Ke ile ka ithuta mo gontši go bona. Ba bantši ba bona ke mehlala ya kgonthe ya go se fele pelo le kgotlelelo, e lego dika tšeo di lego bohlokwa mahlong a Jehofa. Ke kwešiša gore ge e ba re ithuta go se fele pelo, Jehofa o tseba moo a tlago go re hwetša gona ge e ba a nyaka go re diriša.

Ka 1982, ofisi ya lekala e ile ya re kgopela gape gore re hlokomele sehlopha se senyenyane sa bagoeledi ba Mapoliši ba 12 kua Boulogne-Billancourt, yeo e lego mollwaneng wa Paris. Seo e be e le se se makatšago. Ke be ke tseba mantšu ao a tswalanago le pušo ya Modimo ka Sepoliši, eupša ke be ke thatafalelwa ke go hlama mafoko. Lega go le bjalo, botho le thušo yeo bana babo rena ba e neilego ka go rata di ile tša nthuša kudu. Lehono, go na le bagoeledi ba ka bago 170 phuthegong yeo, go akaretša le babulamadibogo ba ka bago 60. Ka morago, nna le Rosa re ile ra etela gape dihlopha le diphuthego tša Sepoliši kua Austria, Denmark le Jeremane.

Maemo a Fetogago

Go etela diphuthego tše di fapanego e be e le bophelo bja rena, eupša boemo bja-ka bjo bo fokolago bja tša maphelo bo ile bja nyaka gore re tlogele bodiredi bja rena bja bosepedi ka 2001. Re ile ra hwetša lefelo la bodulo toropong ya Pithiviers, moo kgaetšedi’a-ka Ruth a dulago gona. Ofisi ya lekala ka botho e ile ya re kgetha gore re be babulamadibogo ba kgethegilego gomme ya fokotša diiri tša rena e le go di dumelelanya le maemo a rena.

Rosa: Ngwaga wa mathomo ka morago ga ge re tlogetše modiro wa tikologo e be e le o thata kudu go nna. Phetogo e be e le e kgolo kudu moo ke ilego ka ikwa ke se na mohola. Ke moka ke ile ka ikgopotša gore, ‘O sa dutše o ka diriša gabotse nako ya gago le matla ao a sa dutšego a le gona ka go hlankela o le mmulamadibogo.’ Lehono, ke thabela go šoma le babulamadibogo ba bangwe ba phuthegong ya gabo rena.

Jehofa o be a re Hlokomela ka Mehla

Marian: Ke leboga Jehofa kudu gore Rosa e be e dutše e le molekane wa-ka nywageng e 48 e fetilego. Nywageng ka moka yeo ka yona re bilego modirong wa tikologo, o be a nthekga kudu. Ga go le ka mohla o tee moo ke ilego ka mo kwa a re, ‘Ke kganyoga gore re tlogele modiro wa bosepedi gomme re be le legae la rena ka noši.’

Rosa: Ka dinako tše dingwe motho yo mongwe o be a tla mpotša gore, “Ga o phele bophelo bjo bo tlwaelegilego. O dula le batho ba bangwe ka dinako tšohle.” Eupša ge e le gabotse “bophelo bjo bo tlwaelegilego” ke’ng? Gantši re itsenya ka gare ga dilo tše dintši tšeo di ka fetogago mapheko go phegeleleng ga rena mediro ya moya. Seo re tlogago re se nyaka ke malao a kgotsofatšago, tafola le dilo tše  dingwe tše sego kae tša motheo. Ka ge re le babulamadibogo re be re e-na le dilo tše sego kae tše di bonagalago, lega go le bjalo re be re e-na le dilo tšohle tšeo re bego re di nyaka e le gore re dire thato ya Jehofa. Ka dinako tše dingwe ke be ke botšišwa gore, “O tla dira’ng ge o tšofetše o se na legae la gago ka noši e bile o se na phenšene.” Ke moka ke be ke tla tsopola mantšu a Psalme 34:10 a rego: “Ba ba nyakaxo Morêna ba ka se kê ba bá ba hlôka tše di botse.” Jehofa o be a re hlokomela ka mehla.

Marian: “Seo ruri ke therešo! Ge e le gabotse, Jehofa o re neile dilo tše dintši go feta tšeo re di nyakago. Ka mohlala, ka 1958, ke ile ka kgethwa gore ke yo ba moemedi wa tikologo ya rena kopanong ya ditšhaba-tšhaba kua New York. Lega go le bjalo, re be re se na tšhelete ya go rekela Rosa thekethe. Mantšiboeng a mangwe ngwanabo rena o ile a re nea enfelopo yeo e ngwadilwego “New York.” Mpho yeo e bego e le ka gare e ile ya thuša Rosa gore a sepele le nna!

Nna le Rosa re tloga re sa itsholele nywaga ya rena yeo re e feditšego tirelong ya Jehofa. Ga se ra lahlegelwa ke selo eupša re hweditše dilo ka moka—bophelo bjo bo thabišago le bjo bo kgotsofatšago tirelong ya nako e tletšego. Jehofa ke Modimo yo a makatšago kudu. Re ithutile go mmota ka mo go feletšego, gomme lerato la rena go yena le oketšegile. Bana babo rena ba bangwe ba Bakriste ba hwetše potego ya bona. Lega go le bjalo, ke dumela gore go theoša le nywaga, motho le yena a ka gafa bophelo bja gagwe ganyenyane-ganyenyane. Ke seo nna le Rosa re katanetšego go se dira go fihla gabjale, gomme ke seo re ikemišeditšego go se dira le nakong e tlago.

[Mongwalo wa ka tlase]

[Seswantšho go letlakala 20]

François le Anna Szumiga le bana ba bona e lego Stéphanie, Stéphane, Mélanie le Marian ka bo-1930. Marian o eme setulwaneng

[Seswantšho go letlakala 22]

Ka godimo: Go sepediša dikgatišo tšeo di theilwego Beibeleng khaonthareng ya mmaraka wa kua Armentières, yeo e lego ka leboa la Fora, ka 1950

[Seswantšho go letlakala 22]

Ka go le letshadi: Stefan Behunick a e na le Marian ka 1950

[Seswantšho go letlakala 23]

Marian le Rosa letšatšing la pele ga lenyalo la bona

[Seswantšho go letlakala 23]

Rosa (kgole ka go le letshadi) a e na le mogwera wa gagwe wa mmulamadibogo e lego Irène (wa bone go tšwa go le letshadi), ba tsebatša ka kopano ka 1951

[Seswantšho go letlakala 23]

Senamelwa seo se bego se dirišwa nakong ya diketelo tša tikologo gantši e be e le paesekela