Dipotšišo tše Tšwago go Babadi

Ke ka baka la’ng Dihlatse tša Jehofa di tšea palo 144 000 yeo go boletšwego ka yona ka pukung ya Kutollo e le ya kgonthe e sego ya seswantšhetšo?

Moapostola Johane o ngwadile gore: “Ka kwa palô ya ba ba swailwexo è le dikete tše lekxolo le naxo le masome a manê a metšô e menê.” (Kutollo 7:4) Ka Beibeleng, polelwana e rego “ba ba swailwexo” e šupa go sehlopha sa batho bao ba kgethilwego gare ga batho gore ba yo buša le Kriste legodimong ba laola godimo ga Paradeise e tlago ya lefaseng. (2 Ba-Korinthe 1:21, 22; Kutollo 5:9, 10; 20:6) Palo ya bona ya ba 144 000, e kwešišwa e le ya kgonthe ka baka la mabaka a mmalwa. Le lengwe le hwetšwa tabeng ya kgaufsi e dikologilego Kutollo 7:4.

Ka morago ga ge moapostola Johane a be a boditšwe ponong mabapi le sehlopha se sa batho ba 144 000, o ile a bontšhwa sehlopha se sengwe gape. Johane o hlalosa sehlopha se sa bobedi e le “lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka, le merafô ka moka, le maleme ka moka.” (Mongwalo o sekamego ke wa rena.) Lešaba le le legolo le šupa go bao ba tlago go phologa “tlaišexong e kxolo” e tlago, yeo e tlago go fediša lefase la gona bjale le kgopo.—Kutollo 7:9, 14.

Lega go le bjalo, ela hloko phapano yeo Johane a e bontšhago magareng ga ditemana 4 le 9 tša Kutollo kgaolo 7. O bolela gore sehlopha sa pele, sa “ba ba swailwexo,” se na le palo e lekanyeditšwego. Lega go le bjalo, sehlopha sa bobedi, sa “lešaba le lexolo,” ga se na palo e lekanyeditšwego. Re naganne ka seo, ke mo go kwagalago go tšea palo 144 000 e le ya kgonthe. Ge e ba palo 144 000 e be e le ya seswantšhetšo gomme e šupa go sehlopha seo ge e le gabotse se se nago palo e lekanyeditšwego, moko wa phapano magareng ga ditemana tšeo tše pedi o be o ka se kwagale. Ka go rialo, taba e dikologilego e bontšha ka mo go tiilego gore palo 144 000 e swanetše go tšewa e le ya kgonthe.

Diithuti tše di fapa-fapanego tša Beibele tša gona bjale le tša nakong e fetilego, di ile tša fihlelela phetho e swanago—e lego ya gore, palo ye ke ya kgonthe. Ka mohlala, nywaga e lekgolo e fetilego mongwadi wa dipukuntšu wa kua Brithania e lego Dr. Ethelbert W. Bullinger ge a be a bolela ka Kutollo 7:4, 9 o itše: “Ke polelwana e bonolo yeo e lego therešo: gona mo kgaolong ye, palo e lekanyeditšwego e fapanywa le palo e sa lekanyetšwago.” (The Apocalypse or “The Day of the Lord,” letlakala 282) Morago bjale, Robert L. Thomas yo monyenyane, e lego moprofesara wa Testamente e Mpsha kua The Master’s Seminary yeo e lego United States o ngwadile gore: “Taba ya gore palo ye ke ya seswantšhetšo ga e na motheo o tiilego.” O okeditše ka gore: “[Go 7:4] ke palo e lekanyeditšwego ka go fapana le palo e sa lekanyetšwago ya 7:9. Ge e ba e tšewa ka tsela ya seswantšhetšo, ga go na palo yeo e ka tšewago e le ya kgonthe ka pukung ye.”—Revelation: An Exegetical Commentary, Bolumo 1, letlakala 474.

Ba bangwe ba bolela gore ka ge puku ya Kutollo e diriša polelo ya seswantšhetšo kudu, dipalo ka moka tšeo di hwetšwago ka pukung ye, go akaretša le palo 144 000, e swanetše go ba tša seswantšhetšo. (Kutollo 1:1, 4; 2:10) Lega go le bjalo, phetho yeo e tloga e fošagetše. Ke therešo  gore puku ya Kutollo e na le dipalo tše mmalwa tšeo e lego tša seswantšhetšo, eupša gape e akaretša dipalo tša kgonthe. Ka mohlala, Johane o bolela ka “maina a Baapostola ba Kwana ba lesome le metšô e mebedi.” (Kutollo 21:14) Go molaleng gore palo 12 yeo go boletšwego ka yona mo temaneng ye ke ya kgonthe, e sego ya seswantšhetšo. Go oketša moo, moapostola Johane o ngwala mabapi le “nywaxa e sekete” ya pušo ya Kriste. Palo yeo le yona e swanetše go tšewa e le ya kgonthe, ka ge go ahla-ahla Beibele ka kelohloko go bontšha seo. * (Kutollo 20:3, 5-7) Ka baka leo, gore palo yeo e lego ka pukung ya Kutollo e swanetše go tšewa e le ya kgonthe goba e le ya seswantšhetšo go ithekgile ka maemo ao taba e bolelwago go ona le taba e dikologilego.

Phetho ya gore palo 144 000 ke ya kgonthe e bile e šupa go palo e lekanyeditšwego ya batho, e lego sehlopha se senyenyane kudu ge se bapetšwa le “lešaba le lexolo,” e dumelelana gape le ditemana tše dingwe tša Beibele. Ka mohlala, ka moragonyana ponong yeo moapostola Johane a e amogelago, ba 144 000 ba hlaloswa e le bao “ba rekolotšwexo bathong, ya ba di-tháka-ngwaxa.” (Kutollo 14:1, 4, mongwalo o sekamego ke wa rena.) Polelwana e rego, “di-tháka-ngwaxa,” e šupa go batho ba sego kae bao ba kgethilwego. Le gona, ge Jesu a be a le mo lefaseng, o ile a bolela mabapi le bao ba tlago go buša le yena Mmušong wa gagwe wa legodimong gomme a ba bitša “mohlatswana o monyenyane.” (Luka 12:32; 22:29, mongwalo o sekamego ke wa rena.) Ka kgonthe, bao ba tšwago bathong go tla go buša legodimong ke ba sego kae ka palo ge ba bapetšwa le batho bao ba tlago go dula Paradeiseng e tlago ya lefaseng.

Ka baka leo, taba e dikologilego Kutollo 7:4 le dipolelwana tšeo di sepedišanago le yona tšeo di hwetšwago mafelong a mangwe ka Beibeleng, di hlatsela gore palo 144 000 e swanetše go tšewa e le ya kgonthe. E šupa go bao ba tlago go buša le Kriste legodimong ba buša lefaseng la paradeise, leo le tlago go tlatšwa ka palo e kgolo le e sa tsebjego ya batho ba thabilego bao ba rapelago Jehofa Modimo.—Psalme 37:29.

[Mengwalo ya ka tlase]

[Ntlhakgolo go letlakala 31]

Palo ya baja-bohwa ba legodimong e lekanyeditšwe go 144 000

[Caption on page 31]

“Lešaba le lexolo” ga le na palo e lekanyeditšwego

[Caption on page 31]

Stars: Courtesy of Anglo-Australian Observatory, photograph by David Malin